1 Pedro 4

Yajtuungu̶x je̱'e̱ may'ajt mu̶dyiibu̶ je̱'e̱ Dios tu̶ xyñi'imooygyu̶xyu̶ñ

1Paady, du'un neby je̱'e̱ Cristo tzaachpyu̶ mu̶najxy ku'ubu̶jky ma je̱'e̱ ñi'kx kyoptu̶ñ, nandu'un miich je̱'e̱ tzaachpyu̶ mmu̶najx mgu'ubu̶jkku̶xu̶ch. Y pu̶nu̶ mduungu̶xypy du'un tu̶ naty je̱'e̱ poky du'un mmu̶madaakku̶xy, 2neby du'un mjaktzu̶naaygyu̶xu̶chu̶ñ ya naaxwiiñ neby je̱'e̱ Dios tzokyu̶ñ y ka'p dyu'unu̶ch neby je̱'e̱ naaxwiiñjya'ay ju̶bu̶k adzojku̶ñ mu̶dajtku̶xyu̶ñ. 3Jeky miich du'un tu̶ m'adu̶u̶tzku̶xy neby je̱'e̱ ja'ay y'adu̶u̶tzku̶xy mu̶dyiibu̶ je̱'e̱ ayuuk tu̶y'ajt ka'p nejwu̶u̶ygyu̶xyu̶ñ. Mdzu̶naay mjugy'ajtku̶xy najty mu̶u̶d je̱'e̱ du'umbu̶ winma'añ mu̶dyiibu̶ ka'p mu̶baad m'u̶xmajtzku̶xyu̶ñ, je̱'e̱ ju̶bu̶k adzojku̶ñ, je̱'e̱ u'ugu̶u̶ ju̶kxu̶u̶, je̱'e̱ anaxypyu̶ mu̶gay mu̶'u'ugu̶u̶, m'uukku̶x mjú̶kxku̶xnu̶ anaxy y mwindzu̶gu̶u̶y m'o'owu̶dajtku̶xy je̱'e̱ tzaadzéch kepychech mu̶dyiibu̶ je̱'e̱ Dios chaachju̶wu̶u̶ybyu̶ñ. 4Jada'achám, je̱' ko ka'p miich je̱'e̱ du'umbu̶ ja'ay m'okpuyo'oy m'okpunaxu̶u̶ygyu̶xnu̶ ma je̱'e̱ anaxypyu̶ jyu̶bu̶ktzu̶naay jyu̶bu̶kjugy'ajtu̶ñ ajku̶xyu̶ñ, paady je̱'e̱ mu̶k yajju̶wu̶u̶ygyu̶xy y xyñigapx xyñimu̶dyaakku̶xy ju̶bu̶kjaty axu̶u̶játy. 5Peru̶ ka'p miich je̱'e̱ mu̶jpu̶daakku̶xy, je̱' ko kyu̶'u̶ye̱jkku̶xu̶py tyu̶y'ajt je̱' Dios winduuy je̱'e̱ mu̶dyiibu̶ paattu̶p tu̶ydyúnu̶ch je̱'e̱ ja'ay je̱'e̱ o'ogypyu̶ y je̱'e̱ juugypyu̶ ajku̶xy. 6Paady je̱'e̱ ayuuk tu̶y'ajt tu̶ yajkapxwa'kxy ma je̱'e̱ o'ogyjya'ay ajku̶xyu̶ñ, wan je̱'e̱ y'aanu̶mu̶ du'un jyugy'ajtku̶xu̶ch du'un neby je̱'e̱ Dios jyugy'atyu̶ñ, oy u̶xyu̶py je̱'e̱ ñi'kx kyopt yaa naaxwiiñ tu̶ jya'ayajtu̶ydyuungu̶xpu̶ o jya'a'o'k jya'ake̱e̱kku̶xpu̶ neby oy mu̶dyiibu̶ ja'ayu̶ñ.

7Tu̶ je̱'e̱ xu̶u̶ tiempo wyingoonu̶ mu̶naa je̱'e̱ naaxwiimbu̶ ku̶xyu̶ tyu̶goyaanu̶ju̶ñ. Paady wijy kejy ja'ay'ajtku̶x y yajkoptu̶gu̶u̶ygyu̶x je̱'e̱ Dios mu̶bu̶jktzowu̶u̶ tu̶y tu'uda'agy. 8Nnaychojk nnayjyu̶wu̶u̶yu̶gu̶x amíñ u̶xyu̶py mu̶k, je̱' ko je̱'e̱ mu̶dyiibu̶ mu̶k naychojk nayjyu̶wu̶u̶yu̶gu̶xpu̶ñ naywyinmé̱kxu̶gu̶xp je̱'e̱ ajku̶xy, oy naty mu̶j ku̶je̱e̱ tu̶ jya'anaymyu̶duundu̶gooyu̶gu̶xpu̶. 9Nayjyu̶u̶nmooy naydyu̶jkmooyu̶gu̶x oy amíñ u̶xyu̶py ko naty pu̶n myiinda'aga'añ jya'tta'aga'añ ma je̱'e̱ mju̶u̶n mdu̶jk ajku̶xyu̶ñ, y ka'p y'adzip y'ama'adu̶ch. 10Yajtuungu̶x oy yajxón je̱'e̱ mayñaxpu̶ kunukxu̶ñ mu̶dyiibu̶ je̱'e̱ Dios tu̶ xymyooygyu̶xyu̶ñ, y pube̱jt pudu̶gu̶u̶ygyu̶x je̱'e̱ mmu̶gu'ug miich nidu'ug nidu'ug mu̶u̶d je̱'e̱ may'ajt mu̶dyiibu̶ je̱'e̱ Dios nidu'ug nidu'ug tu̶ xyñi'imooygyu̶xyu̶ñ, du'un neby je̱'e̱ oybyu̶ tuumbu̶du̶jk ajku̶xyu̶ñ. 11Ko naty je̱'e̱ Dios y'ayuuk tyu̶y'ajt pu̶n kapxwa'kxy, du'un wan kapxwa'kxy neby je̱'e̱ Dios y'ayuuk tyu̶y'ajt myu̶na'añu̶ñ. Ko naty pu̶n tii tuung tuñ mu̶dyiibu̶ tu̶ yajmo'oyu̶ñ, du'un wan tuñ mu̶u̶d je̱'e̱ mu̶k'ajt mu̶dyiibu̶ je̱'e̱ Dios mooyu̶bu̶ñ. Ku̶xyu̶ tijaty mduungu̶xypyu̶ñ, tuungu̶x oy yajxón wan je̱'e̱ Dios du'un ku'umáy y'ídu̶ch Jesucristo kyu̶xpu̶, je̱'e̱ mu̶dyiibu̶ je̱'e̱ ku'umaayu̶ñ y je̱'e̱ mu̶k'ajt wiinu̶u̶xu̶u̶ mu̶dajtpu̶ñ. Jaanch adaa du'un.

Cristo y'ayuuk tyu̶y'ajt yajku'u'ayo'onbadu̶'u̶y

12“Mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ygyu̶xypyu̶ñ, ka'p myajju̶wu̶u̶ygyu̶xy ko je̱'e̱ mu̶kpu̶ tzaachpyu̶ m'ijxku̶xy mbaatku̶xy, ka'p mmu̶naangu̶xy ko du'un kya'apaadyii. 13Ni'igyu̶ miich xondaakku̶x, ko je̱'e̱ tzaachpyu̶ du'un m'ijxku̶xy mbaatku̶xy neby je̱'e̱ Crístoju̶ñ, wan du'un nandu'un mjootkugu̶u̶ygyu̶xu̶ch ko naty je̱'e̱ Cristo yaa naaxwiiñ ja'adu'ook ñayyajni'igu̶xu̶'u̶gyii mu̶u̶d je̱'e̱ y'oy'ajt myu̶k'ajt. 14Jootkugu̶u̶ygyu̶x miich, pu̶nu̶ jii pu̶n xy'ojku̶xy xyaaxku̶xy Cristo kyu̶xpu̶, je̱' ko je̱'e̱ oybyu̶ Espíritu Santo je'emy ijtu̶u̶b ma miich ajku̶xyu̶ñ.#4.14 Nije̱' wiingpu̶ jaaybyu̶du̶jk myu̶naangu̶xy: je̱'e̱ ja'ay ñi'oj ñiyaaxu̶u̶ygyu̶xypy je̱'e̱ Espíritu Santo, y chi miich mgu'umaaby mja'aymye̱jtzku̶xypy miich je̱'e̱ ajku̶xy. 15Pu̶nu̶ jii miich je̱'e̱ tzaachpyu̶ ayo'on nidu'ugtu̶ m'ijxku̶xy mbaatku̶xy, oy naty tu̶ mga'aja'ayyaj'o'kku̶xy, oy naty tu̶ mga'ame̱e̱tzku̶xy o mga'aju̶bu̶kja'ayu̶ch ajku̶xy, y oy naty tii tu̶ mga'ayajtu̶gu̶u̶ygyu̶xy mu̶dyiibu̶ ka'p xypyaatku̶xyu̶ñ. 16Peru̶ pu̶nu̶ m'ijxku̶xypy mbaatku̶xypy je̱'e̱ tzaachpyu̶ ayo'on ko je̱'e̱ Jesucristo mmu̶bu̶jkku̶xy, ka'p mmu̶dzo'oydyuungu̶xu̶ch y ni'igyu̶ je̱'e̱ Dios mja'aymye̱jtz m'o'owu̶dajtku̶xu̶ch ko naty du'un mjajt m'abe̱jtku̶xy.

17Tu̶ je̱'e̱ xu̶u̶ tiempo paatnu̶ mu̶naa je̱'e̱ Dios tyu̶ydyuunu̶ñ chonda'aga'añ ma je̱'e̱ Dios jya'ayu̶ñ. Y pu̶nu̶ tzondaakp je̱'e̱ Dios tyu̶ydyuunu̶ñ ma u̶u̶ch ajtu̶m ajku̶xy mu̶dyiibu̶ mu̶bu̶jku̶mbu̶ñ ajku̶xy, ¿neby je̱'e̱ jye̱' da'a y'okmiingu̶xy mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ? 18Y pu̶nu̶ adzaach je̱'e̱ wa'adzja'ay ñi'idzooku̶ñ paady, ¿neby je̱'e̱ ju̶bu̶kja'ay axu̶u̶gja'ay y je̱'e̱ pokyjya'ay da'a y'okjajtku̶xu̶ch? 19Y du'unu̶tz pu̶n je̱'e̱ tzaachpyu̶ ijxku̶xp paatku̶xpu̶ñ neby je̱'e̱ Dios yajmu̶dzojku̶gu̶xyu̶ñ, wan je̱'e̱ oybyu̶ tuun'adu̶u̶tzku̶xy y yajku̶'u̶du̶gu̶u̶ygyu̶xy je̱'e̱ Dios y'aanu̶mu̶, je̱'e̱ Dios mu̶dyiibu̶ tu̶ yajkoju̶gu̶xyu̶ñ y je̱' ka'p je̱'e̱ nimu̶naa y'u̶xmajtzu̶gu̶xu̶ch.

Currently Selected:

1 Pedro 4: MIXE

Highlight

Copy

Compare