1 Pedro 5

Wingapx ju̶jpkapxu̶u̶yu̶ñ ma je̱'e̱ mu̶bu̶jkpu̶du̶jk ajku̶xyu̶ñ

1Nwingapx nju̶jpkapxu̶'u̶we̱e̱mbyu̶ch jada'achám je̱'e̱ mu̶dyiibu̶ je̱'e̱ mu̶bu̶jkpu̶du̶jk nigu'ubajk'ajtku̶xp ma miich mnayo'oymyujku̶gu̶xyu̶ñ, u̶u̶ch nan nigu'ubajk'ajtypyu̶ch je̱'e̱ mu̶bu̶jkpu̶du̶jk nandu'un neby je̱' ajku̶xyu̶ñ, y n'ijxu̶ch neby je̱'e̱ Cristo tzaachpyu̶ ijxy paatyu̶ñ, y mbade̱e̱mbyu̶ch je̱'e̱ oy'ajt nandu'un neby je̱' ajku̶xyu̶ñ ko naty ya naaxwiiñ ja'adu'ook ñayyajni'igu̶xu̶'u̶gyii. 2Kweentu̶'ajtku̶x je̱'e̱ Dios jya'ay, mu̶dyiibu̶ je̱' tu̶ xyajni'ipu̶jkku̶xyu̶ñ ko mgweentu̶'ajtku̶xu̶ch, tuungu̶x oy yajxón du'un neby je̱'e̱ Dios tzokyu̶ñ, y ka'p y'adzip y'ama'adu̶ch ni kya'ameeñgyú̶xpu̶ch. Tuungu̶x je̱'e̱ mduung oy yajxón, 3ka'p m'ojku̶x myaaxku̶xu̶ch je̱'e̱ mu̶dyiibu̶ mgu̶'u̶'aam'ajtku̶xypyu̶ñ, neby je̱'e̱ ane̱'e̱mu̶ñ miichtyu̶'ajty je'eyu̶ tu'kpajk mmu̶dajtku̶xypyu̶ñ, yuung naaxypy mu̶gapx ane̱'e̱mgu̶x wan je̱'e̱ ijxpe̱jt jim du'un pu̶jkku̶xu̶ch ma miich ajku̶xyu̶ñ. 4Y du'un, ko naty je̱'e̱ Majkueentu̶'ajtpu̶ ya naaxwiiñ ja'adu'ook wyimbity, miich mbaatku̶xu̶py je̱'e̱ ku'umaaybyu̶ oy'ajtu̶ñ, je̱'e̱ oy'ajt mu̶dyiibu̶ ka'p nimu̶naaxu̶u̶ kyú̶xu̶ch tyu̶góyu̶chu̶ñ.

5Nandu'un miich cham nwingapx nju̶jpkapxu̶u̶ygyu̶xy, miich tzugajy'ana'ktu̶jk ajku̶xy, u̶u̶mu̶doogu̶x kapxymyu̶doogu̶x neby je̱'e̱ mu̶bu̶jkpu̶du̶jk nigu'ubajk'ajtpu̶du̶jk xy'ane̱'e̱mgu̶xyu̶ñ. Nigu̶xyu̶ mu̶baad amíñ u̶xyu̶py mnay'u̶mu̶doow mnaygyapxymyu̶doowu̶gu̶xy mu̶u̶d je̱'e̱ yuungpu̶ joot winma'añ, je̱' ko:

“Ka'p je̱'e̱ Dios ku'umaay, pu̶n amu̶j jootmu̶j nayjyu̶wu̶u̶yu̶gu̶xpu̶ñ,

peru̶ pyubejtypy mu̶u̶d je̱'e̱ pya'a''ayoowu̶ñ

pu̶n yuung naaxypy ja'ay'ajtku̶xpu̶ñ.”

6Yuung naaxypy naybyu̶daaku̶gu̶x ma je̱'e̱ Dios mu̶k'ajtmu̶u̶dpu̶ y'ane̱'e̱mu̶ñ, wan du'un xykyu'umaaygyu̶xu̶ch ko naty je̱'e̱ xu̶u̶ tiempo myu̶baad'ajtnu̶. 7Yajku̶'u̶du̶gu̶u̶ygyu̶x je̱'e̱ Dios ku̶xyu̶ je̱'e̱ mjootmáy ajku̶xy, je̱' ko je̱' xyajmayjyajtku̶xp neby xypyube̱jt xypyudu̶gu̶u̶ygyu̶xu̶chu̶ñ y xykyweentu̶'ajtku̶xu̶chu̶ñ.

8Naygyweentu̶'ajtu̶gu̶x y wijy kejy ijtku̶x, je̱' ko je̱'e̱ mmu̶dzip ajku̶xy je̱'e̱ mu̶jku'u xy'u̶xwu̶dijt xypyawu̶dijtku̶xy neby xyajwinma'añdyu̶goyaangu̶xyu̶ñ, du'un neby je̱'e̱ kaa u̶xwu̶dity pawu̶dityu̶ñ pu̶n chu'udze̱e̱mbyu̶ñ. 9Windu̶naaygyu̶x, ka'p m'u̶xtu̶gu̶'u̶wa'kku̶xy ma je̱'e̱ mmu̶bu̶jku̶ñ ajku̶xyu̶ñ, y tu'ug'aa tu'ugjoot je̱'e̱ mmu̶bu̶jku̶ñ mu̶dajtku̶x, ka'p mja'aydyu̶gooygyu̶xy ko nandu'un je̱'e̱ mmu̶gu'ugtu̶jk, mu̶dyiibu̶ je̱'e̱ ayuuk tu̶y'ajt mu̶bu̶jkku̶xpu̶ñ je̱'e̱ tzaachpyu̶ nandu'un xii yaa ijxku̶xy paatku̶xy majaty chu̶naaygyu̶xyu̶ñ. 10Peru̶ ko naty je̱'e̱ tzaachpyu̶ miich tzojku̶ tu̶ m'okmu̶najx m'okku'ubu̶jkku̶xy, mu̶'it je̱'e̱ Dios xyaj'oybyu̶dzu̶u̶m xyajwa'adzpu̶dzu̶u̶mgu̶xnu̶ch, mmu̶bu̶jkku̶xnu̶ch tu'ug'aa tu'ugjoot y ka'p m'u̶xtu̶gu̶'u̶wa'kku̶xu̶ch ma je̱'e̱ mmu̶bu̶jku̶ñ ajku̶xyu̶ñ, y m'ijtku̶xu̶ch mu̶k y jootkujk mu̶dyiibu̶ mmu̶bu̶jkku̶xypyu̶ñ. Je̱' je̱'e̱ Dios je̱'e̱ mu̶dyiibu̶ tu̶ xywyin'ijxu̶mu̶ñ ajku̶xy ko mu̶j xychojk xyjyu̶wu̶u̶yu̶m ajku̶xy y ko je̱'e̱ y'oy'ajt wiinu̶u̶xu̶u̶bu̶ mbaattu̶mu̶ch ajku̶xy ko tu'ugyu̶ nyajpaatu̶m ajku̶xy mu̶u̶d je̱'e̱ Jesucristo. 11Je̱' je̱'e̱ myu̶k'ajt wiinu̶u̶xu̶u̶ ijtu̶wu̶p. Jaanch adaa du'un.

Yajpókxu̶ñ mu̶dyiibu̶ ku̶jxp maayñu̶byu̶ñ

12Nyajnigue̱jxku̶xypy adaa naky mu̶u̶d je̱'e̱ Silvano, je̱'e̱ mu̶gu'ug mu̶dyiibu̶ je̱'e̱ ayuuk tu̶y'ajt tu'uda'agy mu̶bu̶jkpu̶ñ, ma we̱e̱nu̶ nnijayu̶u̶ygyu̶xyu̶ñ nwingapx nju̶jpkapxu̶u̶ygyu̶xy y nmooygyu̶xy je̱'e̱ tu̶y'ajt ko je̱'e̱ kunukxu̶ñ mu̶dyiibu̶ tu̶ mbaatku̶xyu̶ñ, je̱' je̱'e̱ du'un yajni'igu̶xu̶'kp ko je̱'e̱ Dios jaanch xychojkku̶xy xyjyu̶wu̶u̶ygyu̶xy. Tzojkku̶x ju̶wu̶u̶ygyu̶x je̱'e̱ Dios y ka'p m'u̶xmajtzku̶xy.

13Cham je̱'e̱ mu̶bu̶jkpu̶du̶jk mu̶dyiibu̶ ya Babilonia tzu̶naaygyu̶xpu̶ñ, je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xyu̶ñ du'un neby miich tu̶ xywyin'ijxku̶xyu̶ñ, yajpókxu̶ñ xyajnigue̱jxku̶xy y je̱'e̱ Marcos nandu'un mu̶dyiibu̶ u̶u̶ch du'un nju̶wu̶u̶by neby ungu̶ñ. 14Nayyajpókxu̶gu̶x xi'ig xon amíñ u̶xyu̶py; cham mnaymyajtz mnaymyu̶ne̱e̱nu̶gu̶xy ko amuumdu'ugjoot mnaychojk mnaybya'a''ayoowu̶gu̶xy.

Jootkujk miich nigu̶xyu̶ ijtku̶x, mu̶dyiibu̶ yajpaatku̶xpu̶ñ ma je̱'e̱ Crístoju̶ñ.

Currently Selected:

1 Pedro 5: MIXE

Highlight

Copy

Compare