1 Pedro 3

Neby je̱'e̱ pu̶kyjya'ay mu̶baady chu̶naaygyu̶xyu̶ñ

1Nandu'un miich to'oxyu̶jktu̶jk kapxymyu̶doogu̶x je̱'e̱ mniya'aydyu̶jk, wan je̱'e̱ mu̶dyiibu̶ je̱'e̱ ayuuk tu̶y'ajt ka'p mu̶bu̶jkku̶xyu̶ñ du'un mu̶bu̶jkku̶xu̶ch, oy naty je̱'e̱ ayuuk tu̶y'ajt mga'adimyyajmu̶dmu̶dyaakku̶xpu̶, ko du'un xy'ijxku̶xu̶ch ko naty oy yajxón m'u̶u̶mu̶doow mgapxymyu̶doogu̶xy, 2y nan ko du'un ijxku̶xu̶ch ko tu'uda'agy mja'ay'ajtku̶xy y myajtuungu̶xy je̱'e̱ windzu̶gu̶u̶yu̶ñ. 3Ka'p je̱'e̱ m'oygyu̶xu̶'ku̶ñ ni'igú̶xp ku'uduuy mbu̶daakku̶xy, neby du'un anaxy mnaygyu't mnaygyaaxu̶gu̶xyu̶ñ, neby je̱'e̱ ooru̶ ku̶'u̶jiitz y ooru̶ taatztú̶y y oyjyatypyu̶ wit tukxy myajtuungu̶xyu̶ñ, 4jiiby jootjooty je̱'e̱ m'oygyu̶xu̶'ku̶ñ mmu̶dajtku̶x ma je̱'e̱ mjoot mwinma'añdyu̶ñ ajku̶xy, je̱'e̱ oygyu̶xu̶'ku̶ñ mu̶dyiibu̶ ka'p wyindu̶goy ma je̱'e̱ joot winma'añ mu̶dyiibu̶ yuung naaxypy y tu'uda'agyu̶ñ. Adaa du'umbu̶ oygyu̶xu̶'ku̶ñ je̱'e̱ Dios kyu'umaaby. 5Adaa du'umbu̶ oygyu̶xu̶'ku̶ñ je̱'e̱ tu'uda'agypyu̶ to'oxyu̶jktu̶jk ijty nandu'un jeky'ajty myu̶dajtku̶xypy. Myu̶bu̶jkku̶xypy je̱'e̱ Dios ijty y nan kyapxymyu̶doogu̶xypy je̱'e̱ ñiya'aydyu̶jk ijty. 6Du'un neby je̱'e̱ Sara ñiya'aydyu̶jk kapxymyu̶dooyu̶ñ y xu̶u̶mooy, “u̶u̶ch nwindzú̶n”. Y miich du'un miich ajku̶xy neby je̱'e̱ Sara du'umbu̶ xytyo'oxy'ung'ajtku̶xyu̶ñ, pu̶nu̶ mduungu̶xypy je̱'e̱ oybyu̶ y ka'p tii je̱'e̱ mniya'aydyu̶jk ko mdzu̶gu̶u̶y mju̶wu̶u̶ygyu̶xu̶chu̶ñ.

7Nandu'un miich ya'aydyu̶jktu̶jk ajku̶xy, mu̶me̱kxtujkku̶x je̱'e̱ mdo'oxyu̶jk. Yajmu̶j'ajtku̶x neby pyadyiiju̶ñ, ka'p pyaadyu̶ch ko je̱'e̱ to'oxyu̶jk ni'igyu̶ y'amaayu̶ch ajku̶xy ni'igu̶ ka'p miich ajku̶xyñu̶ba, je̱' ko je̱'e̱ Dios mu̶u̶d je̱'e̱ myay'ajtu̶ñ je̱'e̱ jugy'ajtu̶ñ nandu'un tu̶ yajwinwanu̶u̶yu̶gu̶xy neby miich tu̶ xyajwinwanu̶u̶ygyu̶xyu̶ñ. Y du'unu̶tz ijxku̶x yajmu̶j'ajtku̶x je̱'e̱ mdo'oxyu̶jk oy yajxón, wan je̱'e̱ mmu̶bu̶jktzoowu̶ñ du'un ñáxu̶ch ajku̶xy ma je̱'e̱ Diosu̶ñ ko je̱'e̱ Dios naty mmu̶bu̶jktzoogu̶xy.

Pu̶n je̱'e̱ tzaachpyu̶ ijxku̶xp paatku̶xpu̶ñ ko je̱'e̱ oybyu̶ tuungu̶xy

8Y du'unu̶tz tzu̶naaygyu̶x jugy'ajtku̶x jootkujk, tu'ugyu̶ je̱'e̱ mjoot mwinma'añ mu̶dajtku̶x y naychojk nayjyu̶wu̶u̶yu̶gu̶x neby tu'kke̱'e̱xpu̶ju̶ñ. Naybya'a''ayoowu̶gu̶x amíñ u̶xyu̶py, y yuung naaxypy ja'ay'ajtku̶x. 9Ka'p ju̶bu̶k myaj'awimbijtu̶gajtzku̶xu̶ch ko naty pu̶n ju̶bu̶k xytyuungu̶xy ni mga'a'ojtu̶gajtzku̶xu̶ch pu̶n, ko naty pu̶n xy'ojku̶xy. Ni'igyu̶ miich je̱'e̱ Dios kunukxu̶ñ amdoowu̶ ajku̶xy wan je̱'e̱ Dios kyunúkxu̶gu̶xu̶ch, je̱' ko je̱'e̱ Dios miich tu̶ xywyin'ijxku̶xy neby je̱'e̱ kyunukxu̶ñ mbaatku̶xu̶chu̶ñ. 10Je̱' ko:

“Pu̶n je̱'e̱ chu̶naay jyugy'ajtu̶ñ tzojkpu̶ñ y

yajnaxa'añ je̱'e̱ xyu̶u̶ jyumu̶jt jootkujk,

wan nnay'awijtzu̶'u̶gyii ka'p jyu̶bu̶kkápxu̶ch,

y ka'p y'anu̶u̶'ádu̶ch.

11Wan je̱'e̱ ju̶bu̶kpu̶ ku'ugue'egy y túnu̶ch je̱'e̱ oybyu̶,

ka'p chipja'ay'ádu̶ch,

wan je̱'e̱ oy'ajt yajkoptu̶gu̶'u̶y y ka'p u̶xmádzu̶ch.

12Je̱' ko kyweentu̶'ajtypy je̱'e̱ Windzú̶n Dios jya'ay

mu̶dyiibu̶ tu'uda'agy tzu̶naaygyu̶xpu̶ñ

y myu̶doowu̶py je̱'e̱ myu̶bu̶jktzoowu̶ñ ko myu̶bu̶jktzoowu̶gu̶xy,

peru̶ myu̶dzip'ajtypy je̱'e̱ mu̶dyiibu̶ je̱'e̱ ju̶bu̶kpu̶ tuungu̶xpu̶ñ.”

13¿Pu̶n miich da'a ju̶bu̶k axu̶u̶g xy'oktuungu̶xu̶p ko je̱'e̱ oybyu̶ naty miich mduungu̶xy? 14Peru̶ pu̶nu̶ jii pu̶n tii xyajku'u'ayowu̶u̶ygyu̶xy, oy naty tu̶y tu'uda'agy mja'aja'ay'ajtku̶xy, ¡jootkugu̶u̶ygyu̶x miich! Ka'p ni pu̶n mdzu̶gu̶u̶y mju̶wu̶u̶ygyu̶xy. 15Ni'igyu̶ miich je̱'e̱ Windzú̶n Jesucristo mu̶jpu̶daakku̶x, je̱'e̱ mu̶dyiibu̶ je̱'e̱ mjoot mwinma'añ xyñiwindzu̶n'ajtu̶byu̶ñ ajku̶xy. Ijtu̶u̶gu̶x ni'ixu̶'u̶ neby m'adzoogu̶xu̶chu̶ñ ko naty pu̶n xyajtu̶u̶gu̶xy tii je̱'e̱ Jesucristo ko mju̶jp'ijxku̶xy ko je̱'e̱ m'aanu̶mu̶ xyajni'idzo'ogaanu̶gu̶xy, 16peru̶ yuung naaxypy m'adzoogu̶xu̶ch y mu̶u̶d je̱'e̱ windzu̶gu̶u̶yu̶ñ. Oy yajxón ja'ay'ajtku̶x neby je̱'e̱ mjoot mwinma'añ du'un jootkujk mmu̶dajtku̶xu̶chu̶ñ, wan je̱'e̱ mu̶dyiibu̶ ju̶bu̶k axu̶u̶g xyñigapxp xyñimu̶dyaakku̶xpu̶ñ ko oy yajxón mja'ay'ajtku̶xy neby je̱'e̱ mu̶dyiibu̶ je̱'e̱ Cristo mu̶bu̶jkku̶xpu̶ñ, kyu̶'u̶m'awák du'un mu̶dzo'oydyuungu̶xu̶ch neby naty tu̶ xyñigápxku̶xy xyñimu̶dyaakku̶xyu̶ñ.

17Ni'igu̶ oy ko je̱'e̱ tzaachpyu̶ n'ijx mbaattu̶mu̶ch ajku̶xy ko je̱'e̱ oybyu̶ naty nduunu̶m ajku̶xy, pu̶nu̶ je̱'e̱ Dios naty du'un xyajmu̶dzojku̶mb ajku̶xy, y ka'p ko je̱'e̱ ju̶bu̶kpu̶ ngu'ayoowu̶mu̶ch ajku̶xy. 18Je̱' ko y'ijx pyaat je̱'e̱ Cristo tzaachpyu̶ nandu'un ku̶'u̶m mu̶u̶d u̶u̶ch kyu̶xpu̶ nboky ngu̶dyeey ajtu̶m ajku̶xy, y tu'u'ooku̶ je'eyu̶ mu̶najxy ku'ubu̶jky. Ka'p najty poky ku̶dyeey je̱'e̱ mu̶u̶du̶ch, peru̶ kyu'u'ayowu̶u̶y je̱'e̱ pokyjya'aydyu̶jk, neby du'un xyajnu̶kxaangu̶xyu̶ñ ma je̱'e̱ Diosu̶ñ. Cristo oy je̱'e̱ ñaaxni'kx jya'a'o'ky, peru̶ ka'p je̱'e̱ y'aanu̶mu̶ y'o'ky, jugy'ajt'adu̶u̶tz je̱', 19y chi je̱'e̱ y'aanu̶mu̶ ñu̶kxy ma je̱'e̱ aanu̶mu̶ jiiby tzumy mach y'ijtku̶xyu̶ñ y kapxwa'kxy je̱'e̱ ayuuk tu̶y'ajt jiiby. 20Adayaaba ja'ay mu̶dyiibu̶ je̱'e̱ y'aanu̶mu̶ najty jiiby tzumy mach ijtku̶xpu̶ñ, je̱' najty je̱'e̱ ajku̶xy je̱'e̱ mu̶dyiibu̶ je̱'e̱ Dios najty ka'p jékyu̶p tu̶ kapxymyu̶doogu̶xyu̶ñ, mu̶naaba je̱'e̱ Noé chu̶naay jyugy'ajtyu̶ñ, mu̶naaba je̱'e̱ Dios jya'aja'ay'éxyu̶ñ mu̶u̶d je̱'e̱ me̱kxtujku̶ñ ko je̱'e̱ barco najty kyojy, ma je̱'e̱ tuktujkpu̶ ja'ay ñi'idzookku̶xyu̶ñ ma je̱'e̱ nu̶u̶gómu̶ñ. 21Je̱'e̱ nu̶u̶góm nu̶u̶, je̱'e̱ nu̶u̶ je̱'e̱ myu̶baatypy je̱'e̱ mu̶dyiibu̶ mu̶u̶d nnu̶u̶be̱jtu̶mu̶ñ ajku̶xy, je̱'e̱ mu̶dyiibu̶ jada'achám xyajpokyñi'iwaatzu̶mbu̶ñ ajku̶xy. Je̱'e̱ nu̶u̶be̱jtu̶ñ ka'p je̱'e̱ nni'kx ngopt xyajwaatzu̶ ajtu̶m ajku̶xy, je̱' je̱'e̱ je'eyu̶ tyuumby ko n'amdoowu̶mu̶ch ma je̱'e̱ Diosu̶ñ ko je̱'e̱ njoot nwinma'añ xyajwaatzu̶yu̶ch ajtu̶m ajku̶xy; y xyajpokyñi'iwaatzu̶m ajku̶xy ko je̱'e̱ Jesucristo jyugypyu̶jky ko najty tu̶ y'o'ogy, 22je̱'e̱ mu̶dyiibu̶ tzajpjooty nu̶kxu̶ñ y yajpaady ma je̱'e̱ Dios y'a'oy'eembyu̶ñ ane̱'e̱mbu̶, ane'emy je̱'e̱ ángelestu̶jk y ku̶xyu̶ mu̶dyiibu̶ je̱'e̱ ku'utujku̶ñ y mu̶k'ajt jiiby tzajpjooty mu̶dajtku̶xpu̶ñ.

Currently Selected:

1 Pedro 3: MIXE

Highlight

Copy

Compare