1 Pedro 2
2
1Paady u̶xmajtzku̶xnu̶ je̱'e̱ ju̶bu̶k winma'añ ku̶xyu̶, ku̶xyu̶ je̱'e̱ anu̶u̶'adu̶u̶ winma'añ, je̱'e̱ tzo'oydyu'untúk winma'añ ka'anay'oy'ixu̶u̶ winma'añ, y ku̶xyu̶ je̱'e̱ agapx'adu̶u̶ winma'añ. 2Du'un neby je̱'e̱ ma'axungtu̶jk chi'tzk u̶xta'ayu̶ñ, du'un je̱'e̱ Dios y'ayuuk tyu̶y'ajt wa'atzpu̶ joottu̶góy u̶xtaaygyu̶x wan je̱'e̱ m'u̶xpu̶jku̶ñ du'un myu̶j myayu̶u̶ygyu̶xu̶ch, y mbaatku̶xu̶ch je̱'e̱ aanu̶mu̶ ni'idzooku̶ñ, 3pu̶nu̶ tu̶ du'un jaanch mnejwu̶u̶ygyu̶xy ko je̱'e̱ Windzú̶n Dios oy'ajtu̶ñ tu̶ tuñ.
Cristo du'un je̱' neby je̱'e̱ juugypyu̶ tzaaju̶ñ
4Yajmu̶j'ajtku̶x je̱'e̱ Windzú̶n Jesucristo, je̱'e̱ mu̶dyiibu̶ du'un neby je̱'e̱ juugypyu̶ tzaaju̶ñ, je̱'e̱ mu̶dyiibu̶ je̱'e̱ naaxwiiñjya'ay y'u̶xtijku̶xu̶ñ y ka'p ku'ubu̶jkku̶xy. Jesucristo du'un je̱'e̱ neby je̱'e̱ oybyu̶ tzaa mu̶dyiibu̶ je̱'e̱ pojtzpu̶du̶jk ka'p yajtuungu̶xyu̶ñ, peru̶ Dios je̱'e̱ win'ijxu̶ y mu̶j chobaady ma je̱'e̱ Diosu̶ñ. 5Miich du'un miich nandu'un ajku̶xy neby je̱'e̱ juugypyu̶ tzaaju̶ñ, je̱'e̱ tu̶jk mu̶dyiibu̶ je̱'e̱ Dios kyojpyu̶ñ, je̱'e̱ jya'ay miich ajku̶xy mu̶dyiibu̶ Dios mu̶duunu̶gu̶xpu̶ñ, y mooygyu̶x je̱'e̱ Dios windzu̶gu̶u̶yu̶ñ mu̶dyiibu̶ kyu'umaaybyu̶ñ Jesucristo kyu̶xpu̶ du'un neby je̱'e̱ ju̶yujk windzu̶gu̶'u̶ñ yaj'yóxyu̶ñ. 6Paady je̱'e̱ Dios ñaky du'un nandu'un myu̶na'añ:
“U̶u̶ch jim Sión kajpt nbu̶daakypy tu'ug je̱'e̱ oybyu̶ tzaa
je̱'e̱ mu̶dyiibu̶ oy wu̶'u̶mb ma je̱'e̱ poch chonda'agyu̶ñ,
je̱'e̱ mu̶dyiibu̶ tu̶ yajwin'íxy y mu̶j tzobaatpu̶ñ.
Y pu̶n je̱'e̱ myu̶bu̶jku̶ñ jim pu̶daakp ma je̱'e̱ju̶ñ,
pyaadu̶py je̱'e̱ oy'ajtu̶ñ y ka'p tzo'oydyu'unduum yajwu̶'u̶mu̶u̶ju̶ch.”
7Mu̶u̶d miich ajku̶xy je̱'e̱ mu̶dyiibu̶ je̱'e̱ Jesucristo mu̶bu̶jkku̶xpu̶ñ, je̱'e̱ mu̶dyiibu̶ du'un neby je̱'e̱ oybyu̶ tzaaju̶ñ y mu̶j je̱'e̱ chobaady. Peru̶ mu̶u̶d je̱'e̱ mu̶dyiibu̶ ka'p mu̶bu̶jkku̶xyu̶ñ jii je̱'e̱ du'un yajkuydyúñ neby je̱'e̱ Dios ñaky myu̶na'añu̶ñ:
“Je̱'e̱ oybyu̶ tzaa mu̶dyiibu̶ je̱'e̱ pojtzpu̶du̶jk ka'p yajtuuñ ajku̶xyu̶ñ,
je̱' oy tu̶ wyu̶'u̶mnu̶ ma je̱'e̱ poch chonda'agyu̶ñ.”
8Y nandu'un yajkuydyúñ ma je̱'e̱ Dios ñaky du'un myu̶na'añu̶ñ:
“Tu'ug tzaa ma kyu'une̱jp kyu'ugojxku̶xu̶chu̶ñ.”
Ku'une̱jp ku'ugojxku̶xu̶p, je̱' ko je̱'e̱ ayuuk tu̶y'ajt naty ka'amu̶bu̶jkku̶xy. Du'un je̱'e̱ Dios tu̶ yajnigu'udugu̶u̶yu̶gu̶xy y jyajtku̶x y'abe̱jtku̶xu̶ch du'un.
9Peru̶ miich, je̱'e̱ ja'ay miich ajku̶xy je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xyu̶ñ, je̱'e̱ mu̶j'ane̱'e̱mbu̶ Jesucristo myu̶duumbu̶ ajku̶xy, je̱'e̱ wa'adzpu̶ Dios jya'ay ajku̶xy, je̱'e̱ kajpt mu̶dyiibu̶ je̱'e̱ Dios tu̶ win'ixy y tu̶ ijxtú̶y. Paady je̱'e̱ tu̶ xywyin'ijxku̶xy neby je̱'e̱ Dios oybyu̶ myu̶j'ajt y'oy'ajtu̶ñ mgapxwa'kxku̶xu̶chu̶ñ, je̱'e̱ mu̶dyiibu̶ tu̶ tuñu̶ñ, je̱'e̱ mu̶dyiibu̶ pokyjyooty ku̶dyeeyjyooty xyaaxpu̶dzu̶u̶mgu̶x y xyajnejwu̶u̶ygyu̶xy je̱'e̱ oybyu̶ tu̶y'ajt, du'un neby du'umbu̶ agootztuuby xyaaxpu̶dzu̶u̶mgu̶xy y xypyu̶daakku̶xy ma oy jyajy tyu̶kxyu̶ñ. 10Miich ajku̶xy, ka'p je̱'e̱ Dios ijty jeky'ajty xyjya'ay'ajtku̶xy, peru̶ jada'achám xyjya'ay'ajtku̶xnu̶py je̱'. Jeky'ajty ka'p je̱'e̱ Dios ijty xypya'a''ayoogu̶xy, peru̶ jada'achám xypya'a''ayoogu̶xnu̶py je̱'.
Tzu̶naay jugy'ajtku̶x neby cham je̱'e̱ Dios mmu̶duungu̶xy
11“Mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ygyu̶xypyu̶ñ, cham nmu̶nukxtaakku̶xy neby je̱'e̱ jaybyokxytyu̶jk tzojku̶ ñajxku̶xy ma adayaaba naaxwiiñu̶ñ, ko ka'p mnayye̱jku̶gu̶xy ma je̱'e̱ naaxwiiñjya'ay adzojku̶ñ, je̱'e̱ mu̶dyiibu̶ ka'p ñay'ixaanu̶gu̶xy mu̶u̶d je̱'e̱ aanu̶mu̶. 12Oy yajxón ja'ay'ajtku̶x ma je̱'e̱ ja'ay mu̶dyiibu̶ je̱'e̱ Dios tyu̶y'ajt ka'p nejwu̶u̶ygyu̶xyu̶ñ. Y du'un je̱'e̱ ajku̶xy, oy je̱'e̱ cham ju̶bu̶k axu̶u̶g xy'okja'anigápx xy'okja'animu̶dyaakku̶xy y xytyijku̶xy ju̶bu̶kja'ay, peru̶ ko ijxku̶xu̶ch ko oy yajxón mja'ay'ajtku̶xy y mduungu̶xy je̱'e̱ oybyu̶, mu̶'it je̱'e̱ Dios ja'aymye̱jtz o'owu̶dajtku̶xu̶ch ko je̱'e̱ xu̶u̶ myínu̶ch mu̶naa je̱'e̱ Dios ja'ay ku̶xyu̶ tu̶ydyúnu̶chu̶ñ.
13Windzú̶n Jesucristo kyu̶xpu̶, kapxymyu̶doogu̶x ku̶xyu̶ je̱'e̱ naaxwiiñ tuungmu̶u̶dpu̶du̶jk, kapxymyu̶doogu̶x je̱'e̱ mu̶j'ane̱'e̱mbu̶, je̱' ko je̱'e̱ mu̶jtuung mu̶u̶du̶ch. 14Nan kapxymyu̶doogu̶x je̱'e̱ ane̱'e̱mbu̶du̶jk mu̶dyiibu̶ je̱'e̱ mu̶j'ane̱'e̱mbu̶ kyejxypy neby je̱'e̱ ju̶bu̶kja'ay tzaachtyuungu̶xu̶chu̶ñ y ku'umaaygyu̶xu̶ch je̱'e̱ mu̶dyiibu̶ je̱'e̱ oybyu̶ tuungu̶xpu̶ñ. 15Je̱' ko du'un je̱'e̱ Dios tzoky ko je̱'e̱ oybyu̶ miich mduungu̶xu̶ch, neby je̱'e̱ ja'ay du'un mu̶dyiibu̶ je̱'e̱ Dios tyu̶y'ajt ka'p winju̶wu̶u̶ygyu̶xy, y je̱'e̱ tzuja'ay myaj'amoongu̶xu̶chu̶ñ ka'pu̶ nej xyñigapx xyñimu̶dyaakku̶xu̶ch ko ju̶bu̶k axu̶u̶g mja'ay'ajtku̶xy.
16Oy yajxón ja'ay'ajtku̶x du'un neby je̱'e̱ ja'ay mu̶dyiibu̶ je̱'e̱ oy'ajt tu̶ paatku̶xyu̶ñ, ka'p je̱'e̱ winma'añ m'u̶xtaaygyu̶xy ko je̱'e̱ oy'ajt tu̶ mbaatku̶xnu̶ y ko je̱'e̱ ju̶bu̶kpu̶ mu̶baad mduungu̶xnu̶. Oy yajxón ja'ay'ajtku̶x neby je̱'e̱ Dios myu̶duumbu̶du̶jk ajku̶xyu̶ñ. 17Windzu̶gu̶u̶ygyu̶x je̱'e̱ ja'ay ku̶xyu̶ neby pyadyiiju̶ñ. Tzojkku̶x ju̶wu̶u̶ygyu̶x je̱'e̱ mu̶bu̶jkpu̶du̶jk, windzu̶gu̶u̶y o'owu̶dajtku̶x je̱'e̱ Dios, y nan windzu̶gu̶u̶ygyu̶x je̱'e̱ mu̶j'ane̱'e̱mbu̶.
Ijxpe̱jt neby je̱'e̱ Cristo tzaachpyu̶ mu̶najxy ku'ubu̶jkyu̶ñ
18Tuumbu̶du̶jk, kapxymyu̶doogu̶x y windzu̶gu̶u̶ygyu̶x je̱'e̱ mwindzu̶ndu̶jk, ka'p jye̱'e̱du̶'ajtyu̶ch je̱'e̱ mu̶dyiibu̶ oyjya'ayu̶ñ ajku̶xy y je̱'e̱ mu̶dyiibu̶ je̱'e̱ ayuuk winju̶wu̶u̶ygyu̶xpu̶ñ, nandu'un je̱'e̱ mu̶dyiibu̶ ju̶bu̶k ja'ay'ajtku̶xpu̶ñ. 19Je̱' ko kyu'umaaby je̱'e̱ Dios du'un ko je̱'e̱ tzaachpyu̶ nmu̶najx ngu'ubu̶jku̶mu̶ch pokytyuk, oy naty xykya'awinmajtzu̶m ajku̶xy. 20Pu̶nu̶ myajtzaachtyuungu̶xp miich ko naty tu̶ m'oktuundu̶gooygyu̶xy ¿ti ku'umaayu̶ñ du'un m'okpaatku̶xu̶py, oy je̱'e̱ tzaachpyu̶ du'un m'okja'amu̶madaakku̶xy mu̶u̶d je̱'e̱ me̱kxtujku̶ñ? Peru̶ pu̶nu̶ mdzaachjyajtku̶xp ko je̱'e̱ oybyu̶ naty mduungu̶xy, y mmu̶madaakku̶xy je̱'e̱ tzaachpyu̶ mu̶u̶d je̱'e̱ me̱kxtujku̶ñ. Mu̶'it je̱'e̱ Dios xykyu'umaaygyu̶xu̶ch. 21Paady je̱'e̱ Dios tu̶ xywyin'ijxku̶xy, je̱' ko tu̶ je̱'e̱ Cristo tzaachpyu̶ mu̶naxy ku'ubú̶ky mu̶u̶d miich kyu̶xpu̶ ajku̶xy, tu̶ je̱'e̱ ijxpe̱jt xymyooygyu̶xy neby je̱'e̱ ijxpe̱jt du'un mba'ijxku̶xu̶chu̶ñ. 22Cristo ka'p je̱'e̱ ni tii poky tuuñ y nan ni pu̶n ni mu̶naa ka'awin'u̶u̶ñ. 23Ko yaj'ojy, ka'p ju̶bu̶k axu̶u̶g y'adzoowimbijty, ko yajtzaachtyuuñ, ka'p y'adzooy ko yaj'awimbijtu̶gatza'añ, ni'igyu̶ je̱'e̱ Dios ñayyajku̶'u̶wanu̶u̶yu̶, je̱'e̱ Dios mu̶dyiibu̶ je̱'e̱ ja'ay tu'uda'agy tu̶ydyuumbu̶ñ. 24Cristo je̱'e̱ nboky ngu̶dyeey ku̶'u̶m xyajnú̶kxu̶ ajtu̶m ajku̶xy ma je̱'e̱ ñi'kx kyoptu̶ñ ko cruutzkú̶xp y'o'ky, wan je̱'e̱ poky ku̶dyeey du'un n'u̶xmajtzu̶mu̶ch ajku̶xy y ndzu̶naay njugy'ajtu̶mu̶ch ajku̶xy mu̶u̶d je̱'e̱ tu'uda'agypyu̶ tzu̶naayu̶ñ. Cristo pyaat y'ijx je̱'e̱ tzaachpyu̶ neby miich je̱'e̱ mjoot mwinma'añ du'un wyinje̱e̱mgu̶xu̶chu̶ñ. 25Miich du'un miich ijty jékyu̶p myajpaatku̶xy neby je̱'e̱ borreegu̶ mu̶dyiibu̶ tu̶ yo'oydyu̶gooygyu̶xyu̶ñ, ju̶gue̱m najty myajpaatku̶xy ma je̱'e̱ Diosu̶ñ, peru̶ tu̶ jada'achám mwimbijtku̶xnu̶ ma je̱'e̱ Crístoju̶ñ, je̱'e̱ mu̶dyiibu̶ xykyweentu̶'ajtku̶xpu̶ñ.
Currently Selected:
1 Pedro 2: MIXE
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
