1 Corintios 6

Tzip ma'ad ma je̱'e̱ kuduungtu̶jk je̱'e̱ mu̶dyiibu̶ je̱'e̱ tu̶y'ajt ka'p mu̶bu̶jkku̶xyu̶ñ

1Ko naty miich nidu'ugtu̶ ajku̶xy je̱'e̱ mmu̶gu'ug tu'ug mxu̶'u̶waangu̶xy je̱'e̱ mu̶dyiibu̶ je̱'e̱ tu̶y'ajt mu̶bu̶jkpu̶ñ, ¿ti ko jiiby ni'igyu̶ mnu̶kxy y'awingujku̶'u̶wu̶ch ma je̱'e̱ kuduungtu̶jk je̱'e̱ mu̶dyiibu̶ je̱'e̱ tu̶y'ajt ka'p mu̶bu̶jkku̶xyu̶ñ, ma jya'apadyii y'awingujku̶'u̶wu̶ch ma je̱'e̱ Dios jya'ayu̶ñ? 2¿Nej ka'p miich mnejwu̶u̶ygyu̶xy ko je̱'e̱ Dios jya'ay je̱'e̱ naaxwiiñjya'ay ku̶xyu̶ tu̶ydyunaangu̶xp? Y pu̶nu̶ miich je̱'e̱ naaxwiiñjya'ay mdu̶ydyunaangu̶xypy, ¿ti ko mga'ajajtku̶xy neby je̱'e̱ we̱e̱nu̶ba winma'añ myaj'awingujku̶u̶ygyu̶xu̶chu̶ñ? 3¿Nej ka'p mnejwu̶u̶ygyu̶xy ko u̶xtu̶ ángeles paad u̶u̶ch ndu̶ydyunaamby ajtu̶m ajku̶xy? ¡Pues ni'igu̶ ka'p chípu̶ch nyaj'awingujku̶u̶yu̶mu̶ch je̱'e̱ we̱e̱nu̶ba winma'añ, je̱'e̱ mu̶dyiibu̶ ya yajpaatp ma adayaabu̶ naaxwiiñu̶ñ! 4Y du'unu̶tz, pu̶nu̶ jii miich tijaty myajtzibu̶u̶ygyu̶xy je̱'e̱ yaaba naaxwiiñ winma'añ, ¿ti je̱'e̱ kuduung ko mmu̶xu̶'u̶gu̶xy je̱'e̱ mu̶dyiibu̶ je̱'e̱ tu̶y'ajt ka'p mu̶bu̶kyu̶ñ? 5Nmu̶na'añ u̶u̶ch du'un wan du'un mjatytimycho'oydyuungu̶xu̶ch: ¿Nej ka'p jim ni tu'ug ma miich ajku̶xyu̶ñ mu̶dyiibu̶ jajtp nay'aju̶wu̶u̶yu̶bu̶ñ neby je̱'e̱ du'umbu̶ winma'añ myaj'awingujku̶'u̶wu̶chu̶ñ agu̶ mu̶bu̶jkpu̶du̶jk ajku̶xy? 6¡Ka'p je̱'e̱ mu̶bu̶jkpu̶du̶jk nigoo oy tii amíñ u̶xyu̶py ni'iyajtzibu̶u̶ygyu̶xy, nan myu̶xu̶'u̶gu̶xypy je̱'e̱ kuduung nandu'un je̱'e̱ mu̶dyiibu̶ je̱'e̱ tu̶y'ajt ka'p mu̶bu̶jkku̶xyu̶ñ!

7Ko miich du'un ku̶xyu̶ tii myajtzibu̶u̶ygyu̶xy agu̶ miich, mdu̶gooygyu̶xp du'un neby du'un m'adu̶u̶tzku̶xyu̶ñ. ¿Ti ko ni'igyu̶ mga'ame̱kxtujkku̶xy ko naty pu̶n xymyu̶duundu̶gooygyu̶xy? ¿Ti ko ni'igyu̶ mga'anayye̱jku̶gu̶xy myajme̱e̱tzku̶xu̶ch? 8¡Peru̶ miich ajku̶xy wiing miich ni'igyu̶ m'adu̶u̶tzku̶xy, ni'igyu̶ miich mnaymyu̶duundu̶gooyu̶gu̶xy y u̶xtu̶ mmu̶mu̶bu̶jkpu̶du̶jk miich mme̱e̱tzku̶xypy!

9-10¿Nej ka'p miich mnejwu̶u̶ygyu̶xy ko je̱'e̱ ju̶bu̶kja'aydyu̶jk jiiby ka'p tyu̶gu̶u̶ygyu̶xu̶ch ma je̱'e̱ Dios y'ane'emyu̶ñ? Ka'p myajwin'u̶u̶ngu̶xy, ma je̱'e̱ Dios y'ane'emyu̶ñ ka'p je̱'e̱ jiiby tyu̶gu̶u̶ygyu̶xu̶ch je̱'e̱ mu̶dyiibu̶ je̱'e̱ to'oxyu̶jktu̶jk tu'ug tu'ug mu̶dtuundu̶gooygyu̶xpu̶ñ, ni je̱'e̱ mu̶dyiibu̶ je̱'e̱ tzaadzéch kepychech o'owu̶dajtku̶xpu̶ñ, ni je̱'e̱ mu̶dyiibu̶ je̱'e̱ wiing to'oxyu̶jktu̶jk mu̶dtuundu̶gooygyu̶xpu̶ñ, ni je̱'e̱ mu̶dyiibu̶ je̱'e̱ myu̶ya'aydyu̶jk mu̶dtuundu̶gooygyu̶xpu̶ñ, ni je̱'e̱ me̱e̱tzpu̶du̶jk ajku̶xy, ni je̱'e̱ mu̶dyiibu̶ ku̶xyu̶ tii adzojkku̶xpu̶ñ, ni je̱'e̱ amu'ugyu̶ ja'ay ajku̶xy, ni je̱'e̱ mu̶dyiibu̶ janch agapx ajku̶xyu̶ñ, ni je̱'e̱ mu̶dyiibu̶ win'u̶u̶ñ'eemby me̱e̱tzku̶xpu̶ñ. 11Y du'un miich ijty jékyu̶p nije̱' mdzu̶naay mjugy'ajtku̶xy; peru̶ jada'achám ka'p du'un m'oktzu̶naay m'okjugy'ajtku̶xnu̶ y oy wa'adz cham myajpaatku̶xnu̶ ma je̱'e̱ Diosu̶ñ, tu̶ je̱'e̱ Dios xyajpokyñi'iwaatzku̶xy mu̶u̶d je̱'e̱ Windzú̶n Jesucristo kyu̶xpu̶ xyu̶u̶ y mu̶u̶d je̱'e̱ nDios y'Espíritu ajtu̶m ajku̶xy.

Je̱'e̱ ni'kx wya'adz'ajtu̶ñ

12Du'un je̱'e̱ ja'ay myu̶naangu̶xy: “U̶u̶ch mu̶baad u̶u̶ch tii nduñ tii u̶u̶ch ndimychojkypyu̶ñ.” Tu̶y'ajt je̱'e̱ du'un, peru̶ ka'p ku̶xyu̶ y'óyu̶ch je̱'e̱ mu̶dyiibu̶ u̶u̶ch nja'atune̱e̱mbyu̶ñ. Jaanch mu̶baad u̶u̶ch nduñ tii u̶u̶ch ndimychojkypyu̶ñ, peru̶ ka'p u̶u̶ch mu̶baad nayyegyii nnú̶kxyu̶ch je̱'e̱ du'umbu̶ nije̱' xymyu̶mada'agy. 13Nandu'un je̱'e̱ ja'ay myu̶naangu̶xy: “Je̱'e̱ ju̶kxy pu̶ky aajooty moxjooty je̱'e̱ tu̶ yajnibu̶dagu̶'u̶y, y je̱'e̱ aa mox tu̶ je̱'e̱ yajnibu̶dagu̶'u̶y ko je̱'e̱ ju̶kxy pu̶ky ku'ubú̶gu̶ch.” Tu̶y'ajt je̱'e̱ du'un, peru̶ yajku'udu̶goye̱e̱mby je̱'e̱ Dios ju̶kxy pu̶ky y je̱'e̱ aa mox mu̶naa. Peru̶ ka'p du'un tyu̶y'ajtu̶ch ko je̱'e̱ Dios je̱'e̱ to'oxyu̶jk ñi'kx tu̶ nibu̶daagu̶u̶yu̶ ko je̱'e̱ ya'aydyu̶jk mu̶dtuundu̶góyu̶ch; je̱'e̱ ni'kx tu̶ je̱'e̱ yajnibu̶dagu̶'u̶y ko je̱'e̱ Windzú̶n Jesucristo mu̶dúnu̶ch, y je̱'e̱ Windzú̶n Jesucristo tu̶ je̱'e̱ ni'kx nibu̶dagu̶'u̶y ko myu̶dunu̶u̶ju̶ch. 14Y du'un neby je̱'e̱ Dios je̱'e̱ Windzú̶n Jesucristo yajjugypyu̶jkyu̶ñ, nandu'un u̶u̶ch xyajjugypyu̶gaanu̶m ajku̶xy mu̶u̶d je̱'e̱ myu̶k'ajtu̶ñ.

15¿Nej ka'p miich mnejwu̶u̶ygyu̶xy ko je̱'e̱ mni'kx ajku̶xy je̱' je̱'e̱ Cristo nandu'un ñi'kx'ajtypy? ¿Y nej nyé̱gu̶byu̶ch je̱'e̱ mu̶dyiibu̶ je̱'e̱ Cristo ñi'kx'ajtypyu̶ñ y nmo'owu̶chu̶ch je̱'e̱ to'oxyu̶jk je̱'e̱ mu̶dyiibu̶ je̱'e̱ ya'aydyu̶jk tu'ug tu'ug mu̶dtuundu̶gooybyu̶ñ? ¡Ka'p, ka'p nimu̶naa! 16¿Nej ka'p miich mnejwu̶u̶ygyu̶xy ko je̱'e̱ ya'aydyu̶jk je̱'e̱ to'oxyu̶jk tu'ug pudu̶gu̶'u̶y je̱'e̱ mu̶dyiibu̶ je̱'e̱ ya'aydyu̶jk tu'ug tu'ug mu̶dtuundu̶gooybyu̶ñ, je̱'e̱ nime̱tzkpu̶ ajku̶xy tu'ug je̱'e̱ ñi'kx du'un ajku̶xyu̶ñ? Je̱' ko du'un je̱'e̱ Dios ñaky myu̶na'añ: “Du'un je̱'e̱ nime̱tzkpu̶ y'idaangu̶xnu̶ neby je̱'e̱ tu'ugpu̶ ni'kxu̶ñ.” 17Peru̶ ko je̱'e̱ Windzú̶n Jesucristo pu̶n ku'ubú̶ky, tu'ugyu̶ je̱'e̱ ja'ay du'un wyimbijtnu̶ mu̶u̶d je̱'e̱ Windzú̶n Jesucristo.

18Ku'uge̱e̱kku̶x je̱'e̱ to'oxyu̶jk mu̶dtuundu̶goyu̶u̶. Ku̶xyu̶ oy mu̶dyiibu̶ poky je̱'e̱ mu̶dyiibu̶ je̱'e̱ ja'ay tyuumby, ka'p je̱'e̱ ñi'kx du'un mu̶duundu̶góy; peru̶ je̱'e̱ mu̶dyiibu̶ je̱'e̱ to'oxyu̶jk mu̶dtuundu̶gooybyu̶ñ, je̱'e̱ kyu̶'u̶mni'kx je̱'e̱ du'un myu̶duundu̶gooby. 19¿Nej ka'p miich mnejwu̶u̶ygyu̶xy ko je̱'e̱ Espíritu Santo je̱' chajptu̶jk'ajtypy je̱'e̱ mni'kx ajku̶xy je̱'e̱ mu̶dyiibu̶ je̱'e̱ Dios miich tu̶ xymyooygyu̶xyu̶ñ, y ko je̱'e̱ Espíritu Santo jiiby tzu̶naaby ma miich ajku̶xyu̶ñ? Paady miich ka'p je̱'e̱ mni'kx ku̶'u̶m mje̱'e̱'ajtu̶gu̶xyu̶, 20je̱' ko tzoowu̶ je̱'e̱ Dios xykyujuuygyu̶xy ko je̱'e̱ y'Ung xykyu'u'o'ogu̶u̶y ajku̶xy. Paady je̱'e̱ Dios mu̶baad mwindzu̶gu̶u̶ygyu̶xy mu̶u̶d je̱'e̱ mni'kx y je̱'e̱ m'aanu̶mu̶ ajku̶xy.

Currently Selected:

1 Corintios 6: MIXE

Highlight

Copy

Compare