1 Corintios 5

Ja'ay tu'ug yajtzaachtyúñ je̱'e̱ mu̶dyiibu̶ je̱'e̱ to'oxyu̶jk najty tu̶ mu̶dtuundu̶góyu̶ñ

1Tu̶ du'un yajnejwu̶'u̶y ko nidu'ugtu̶ miich je̱'e̱ mgu̶'u̶mgudaj mmu̶dtzu̶naaygyu̶xy. Adaa du'umbu̶ to'oxyu̶jk mu̶dtuundu̶goyu̶u̶ mu̶j adaa kyubókyu̶ch, ni je̱' du'un kya'a'adu̶u̶tzku̶xy je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p nejwu̶u̶ygyu̶xyu̶ñ. 2¡Y ni'igyu̶ miich mu̶j ku̶xp mnayjyu̶wu̶u̶yu̶gu̶xy! ¡Ni'igyu̶ u̶xyu̶py miich mdajku̶xy mmaaygyu̶xy! Je̱'e̱ ja'ay mu̶dyiibu̶ du'un tuundu̶gooybyu̶ñ yajpu̶dzu̶u̶mgu̶x je̱' ma miich ajku̶xyu̶ñ. 3Peru̶ mu̶u̶d u̶u̶ch, oy u̶u̶ch je̱'e̱ nwiinju̶jp jim nga'ayajku̶xu̶'u̶gy ma jim miich ajku̶xyu̶ñ, peru̶ jim u̶u̶ch je̱'e̱ njoot nwinma'añ ma jim miich ajku̶xyu̶ñ; y neby u̶u̶ch je̱'e̱ jimbu̶ nyajpaady ma miich ajku̶xyu̶ñ mu̶u̶d je̱'e̱ Jesucristo kyu̶xpu̶ xyu̶u̶, u̶u̶ch je̱'e̱ nWindzú̶n ajtu̶m ajku̶xy, tu̶ u̶u̶ch je̱'e̱ tzaachpyu̶ nyajnibu̶dagu̶'u̶y je̱'e̱ mu̶dyiibu̶ du'un tuundu̶gooybyu̶ñ. 4Ko naty jim miich mnayyo'oymyujku̶gu̶xy, u̶u̶ch yajpaadu̶bu̶ch je̱'e̱ njoot nwinma'añ jim mu̶u̶d miich ajku̶xy y nan mmu̶dajtku̶xu̶py je̱'e̱ Windzú̶n Jesús myu̶k'ajt. 5Mu̶'it je̱'e̱ du'umbu̶ ja'ay je̱'e̱ mu̶jku'u myajku̶'u̶du̶gu̶u̶ygyu̶xu̶ch, wan je̱'e̱ ñi'kx wyindu̶góyu̶ch y ñi'idzo'ogu̶ch je̱'e̱ y'aanu̶ma ko naty je̱'e̱ Windzú̶n Jesús ya naaxwiiñ jadu'ook wyimbity.

6Ka'p mu̶j ku̶xp mnayjyu̶wu̶u̶yu̶gu̶xy mu̶u̶d je̱'e̱ mu̶dyiibu̶ mduungu̶xypyu̶ñ. Miich mnejwu̶u̶ygyu̶xypy neby je̱'e̱ ja'ay myu̶na'añu̶ñ: “Ko je̱'e̱ levaduru̶ we̱e̱nu̶ yajpu̶da'agy ma je̱'e̱ hariina ju̶chu̶ñ, yajxuundaaby yajtu̶gu̶u̶ydyaaby je̱'e̱ ju̶ch ku̶xyu̶.” 7Y du'unu̶tz najtz'ixu̶u̶ygyu̶xnu̶ je̱'e̱ jeky levaduru̶ je̱'e̱ ka'pu̶ y'óyu̶ch je̱'e̱ mu̶dyiibu̶ xyajwinma'añdyu̶gooygyu̶xpu̶ñ, neby oy wa'adz m'ijtku̶xnu̶chu̶ñ ka'p je̱'e̱ poky maa, neby je̱'e̱ tzajkaagy mu̶u̶d je̱'e̱ jemy ju̶ch mu̶u̶d yaj'oydyúñu̶ñ y jaylevaduru̶ mu̶u̶d je̱'e̱ mu̶dyiibu̶ Pascua xu̶u̶jooty yajkaaybyu̶ñ, du'un neby miich je'emy ajku̶xyu̶ñ. Je̱' ko je̱'e̱ Cristo, je̱'e̱ borreegu̶'úng nPascua xu̶u̶'ajtu̶mby ajku̶xy, je̱'e̱ mu̶dyiibu̶ o'k neby je̱'e̱ windzu̶gu̶'u̶ñdyu̶ñ mu̶u̶d u̶u̶ch kyu̶xpu̶ ajtu̶m ajku̶xy. 8Tzu̶k je̱'e̱ nPascua xu̶u̶ tuunu̶m ajku̶xy mu̶u̶d je̱'e̱ tu'uda'agy'ajtu̶ñ y tu̶y'ajtu̶ñ, je̱'e̱ mu̶dyiibu̶ du'un neby je̱'e̱ tzajkaagy je̱'e̱ ka'pu̶ lyevaduru̶ mu̶u̶du̶ch, y ka'p nxu̶u̶duunu̶mu̶ch ajku̶xy mu̶u̶d je̱'e̱ ju̶bu̶kpu̶ joot winma'añ y je̱'e̱ mu̶dyiibu̶ yajtu̶gooybyu̶ñ, je̱'e̱ mu̶dyiibu̶ du'un neby je̱'e̱ jeky levaduru̶ je̱'e̱ ka'pu̶ y'óyu̶ch.

9Ma je̱'e̱ naky je̱'e̱ mu̶dyiibu̶ tu̶u̶yu̶p nyajnigue̱jxku̶xu̶ñ, nyajnijayu̶u̶ygyu̶x jiiby ko je̱'e̱ du'umbu̶ ja'ay ka'p mbuyo'oy mbunaxu̶u̶ygyu̶xu̶ch je̱'e̱ mu̶dyiibu̶ je̱'e̱ to'oxyu̶jktu̶jk mu̶dtuundu̶gooygyu̶xpu̶ñ. 10Y ka'p yam du'un nnu̶maaygyu̶xy ko je̱'e̱ ja'ay tu'kku̶'u̶yu̶ ku̶xyu̶ mbuwa'ktuutku̶xu̶ch, je̱'e̱ mu̶dyiibu̶ ya naaxwiiñ je̱'e̱ to'oxyu̶jktu̶jk mu̶dtuundu̶gooygyu̶xpu̶ñ, o je̱'e̱ mu̶dyiibu̶ ku̶xyu̶ tii adzojkku̶xpu̶ñ, o je̱'e̱ mu̶dyiibu̶ me̱e̱tzku̶xpu̶ñ, o je̱'e̱ mu̶dyiibu̶ je̱'e̱ tzaadzéch kepychech o'owu̶dajtku̶xpu̶ñ, y mni'igu̶ paatku̶xu̶py je̱'e̱ du'umbu̶ ja'ay oy ma'eemby mja'anú̶kxku̶xu̶ch ko tu̶y mdimy'o'kku̶xu̶ch mu̶'it ka'p m'okpaatku̶xnu̶ch. 11Neby u̶u̶ch tu̶ nmu̶na'añu̶ñ, je̱' u̶u̶ch du'un ndijpy ko je̱'e̱ ja'ay ka'p ni tu'ug mbuyo'oy mbunaxu̶u̶ygyu̶xu̶ch je̱'e̱ mu̶dyiibu̶ naydyiju̶gu̶xpu̶ñ Dios mu̶duumbu̶, cham je̱'e̱ to'oxyu̶jktu̶jk mu̶dtuundu̶gooygyu̶xy, cham ku̶xyu̶ tii adzojkku̶xy, o cham je̱'e̱ tzaadzéch kepychech o'owu̶dajtku̶xy, o cham y'agapx'ajtku̶xy, o cham y'uukku̶xy jyú̶kxku̶xy, o mye̱e̱tzku̶xy. Je̱'e̱ du'umbu̶ ja'ay ka'p je̱'e̱ mu̶baad mu̶dkaaymyujk mu̶d'uukmujkku̶xy. 12-13Ka'p je̱'e̱ u̶u̶ch xypyaatp je̱'e̱ mu̶dyiibu̶ je̱'e̱ ja'ay tu̶ydyúnu̶bu̶ñ je̱'e̱ mu̶dyiibu̶ je̱'e̱ tu̶y'ajt ka'p mu̶bu̶jkku̶xyu̶ñ; je̱'e̱ Dios je̱'e̱ paattu̶p je̱'e̱ mu̶dyiibu̶ tu̶ydyúnu̶bu̶ñ ajku̶xy. Peru̶ miich ajku̶xy je̱' miich xypyaatku̶xp mdu̶ydyuungu̶xu̶ch je̱'e̱ mu̶dyiibu̶ je̱'e̱ tu̶y'ajt mu̶bu̶jkku̶xpu̶ñ. Paadyu̶tz, yajpu̶dzu̶u̶mgu̶x je̱'e̱ pokyjya'ay ma miich ajku̶xyu̶ñ.

Currently Selected:

1 Corintios 5: MIXE

Highlight

Copy

Compare