1 Corintios 7

Kapxwiju̶ñ ma je̱'e̱ pu̶kyjya'ay ajku̶xyu̶ñ

1Jada'achám u̶u̶ch je̱'e̱ ayuuk n'adzowimbida'añ je̱'e̱ mu̶dyiibu̶ u̶u̶ch miich naky'aam tu̶ xyajtu̶u̶gu̶xyu̶ñ. Oy it je̱'e̱ du'un ko je̱'e̱ ya'aydyu̶jk kya'apú̶gu̶ch; 2peru̶ je̱' ko mu̶jtu̶gu̶u̶by je̱'e̱ to'oxyu̶jk mu̶dtuundu̶goyu̶u̶, paady ni'igu̶ oy ko je̱'e̱ ya'aydyu̶jk kyu̶'u̶mdo'oxyu̶jk nidu'ug nidu'ug mu̶dtzu̶na'awu̶ch y je̱'e̱ to'oxyu̶jk kyu̶'u̶mniya'aydyu̶jk nidu'ug nidu'ug mu̶dtzu̶na'awu̶ch. 3Y du'unu̶tz ka'p je̱'e̱ ya'aydyu̶jk ni je̱'e̱ to'oxyu̶jk ñaymyu̶ju̶'u̶gu̶u̶wu̶ch ajku̶xy ko naty myaamúk pyokxmugaangu̶xy neby pyadyii ñayyajjootkujk'ajtu̶gu̶xu̶chu̶ñ. 4Ka'p je̱'e̱ to'oxyu̶jk kyu̶'u̶mni'kx naydyu'um je̱'e̱'áty, je̱'e̱ ñiya'aydyu̶jk je̱'e̱ nandu'un je̱'e̱'ajtp, ni je̱'e̱ ya'aydyu̶jk je̱'e̱ kyu̶'u̶mni'kx ka'p naydyu'um je̱'e̱'áty, je̱'e̱ tyo'oxyu̶jk je̱'e̱ nandu'un je̱'e̱'ajtp. 5Ka'p amíñ u̶xyu̶py mnaymyu̶ju̶'ku̶gu̶xy ko mgamaamúk mgapokxmugaangu̶xy, mu̶'it tu̶y ko naty nime̱tzk tu̶ mgapxy'ajtku̶xy ko me̱jtz xu̶u̶ tu̶gu̶u̶g xu̶u̶ mgamaamúk mgapokxmugaangu̶xy, je̱' ko je̱'e̱ Dios naty mmu̶bu̶jktzowaangu̶xy. Y ko naty du'un me̱jtz xu̶u̶ tu̶gu̶u̶g xu̶u̶ tu̶ m'oknay'amay'ajtu̶gu̶xy, mu̶'íttu̶tz mu̶baad ja'adu'ook mmaamujk mbokxmujkku̶xnu̶ba; ka'pu̶ tu'ook u̶xmachu̶ mnay'u̶xmajtzu̶gu̶xu̶ch ko je̱'e̱ mu̶jku'u du'un xymyu̶madaakku̶xu̶ch y xyajtuundu̶gooygyu̶xu̶ch.

6Ku̶xyu̶ adaa neby u̶u̶ch yam nmu̶na'añu̶ñ kapxwiju̶ñ adaa du'un je'eyu̶ y ka'p y'ane̱'e̱mu̶ch. 7U̶u̶ch du'un u̶u̶ch nja'atzóky ko u̶xyu̶py naydyu'um m'ijtku̶xy neby u̶u̶chu̶ñ; peru̶ tu̶gachjyaty je̱'e̱ Dios may'ajt tu̶ xyñi'imooyu̶m ajku̶xy, nije̱' tu̶ xymyooyu̶m ajku̶xy ko nbu̶jku̶mu̶ch ajku̶xy y nije̱' ko naydyu'um n'ijtu̶mu̶ch ajku̶xy.

8Nnu̶maaybyu̶ch je̱'e̱ jaybyu̶kypyu̶ ajku̶xy y je̱'e̱ ku'o'ogytyo'oxyu̶jktu̶jk ko oy ni'igyu̶ ko naydyu'um wyu̶'u̶mgu̶xu̶ch jaybyu̶ky du'un neby u̶u̶chu̶ñ, 9peru̶ pu̶nu̶ ka'p naydyu'um myu̶da'agaangu̶xy, wan timypyu̶jkku̶xy, oy ko tyimypyu̶jkku̶xu̶ch ka'pu̶ je̱'e̱ to'oxyu̶jk nigoo tu'ug tu'ug pawu̶dijtku̶xu̶ch.

10Peru̶ je̱'e̱ mu̶dyiibu̶ tu̶ pyu̶jkku̶xnu̶ju̶ñ, cham u̶u̶ch adaa ane̱'e̱mu̶ñ nmooygyu̶xy, adaa ka'p adaa u̶u̶ch n'ane̱'e̱mu̶ñ, je̱'e̱ Windzú̶n Jesús adaa y'ane̱'e̱mu̶ñ ko ka'p je̱'e̱ to'oxyu̶jk ñi'iya'aydyu̶jk u̶xmádzu̶ch. 11Pu̶nu̶ je̱'e̱ to'oxyu̶jk je̱'e̱ ñiya'aydyu̶jk u̶xmajtzp, naydyu'um je̱'e̱ mu̶baad y'ijtnu̶ y ka'p pyu̶jktu̶gajtznu̶ch, o pu̶nu̶ ka'p myu̶nukxta'agu̶py je̱'e̱ ñiya'aydyu̶jk. Nandu'un je̱'e̱ ya'aydyu̶jk, nan ka'p je̱'e̱ tyo'oxyu̶jk mu̶baad u̶xmach.

12Neby yam njaknu̶ma'awaangu̶xyu̶ñ, u̶u̶ch ngu̶'u̶m'ayuuk adaa y ka'p jye̱'e̱ju̶ch je̱'e̱ Windzú̶n Jesucristo; pu̶nu̶ jii je̱'e̱ ya'aydyu̶jk je̱'e̱ mu̶dyiibu̶ je̱'e̱ tu̶y'ajt mu̶bu̶jkpu̶ñ pyú̶kyu̶ch mu̶u̶d je̱'e̱ to'oxyu̶jk, je̱'e̱ mu̶dyiibu̶ je̱'e̱ tu̶y'ajt ka'p mu̶bu̶kyu̶ñ, y pu̶nu̶ je̱' du'un mu̶naamb ko je̱'e̱ ñiya'aydyu̶jk mu̶dtzu̶naay'adu̶'u̶dza'añ, ka'p je̱'e̱ ya'aydyu̶jk je̱'e̱ tyo'oxyu̶jk mu̶baad u̶xmach. 13Y pu̶nu̶ je̱'e̱ to'oxyu̶jk je̱'e̱ mu̶dyiibu̶ je̱'e̱ tu̶y'ajt mu̶bu̶jkpu̶ñ pu̶ky mu̶u̶d je̱'e̱ ya'aydyu̶jk je̱'e̱ mu̶dyiibu̶ je̱'e̱ tu̶y'ajt ka'p mu̶bu̶kyu̶ñ, y pu̶nu̶ je̱' du'un mu̶naamb ko je̱'e̱ tyo'oxyu̶jk mu̶dtzu̶naay'adu̶'u̶dza'añ, ka'p je̱'e̱ to'oxyu̶jk ñiya'aydyu̶jk mu̶baad u̶xmach. 14Je̱'e̱ ya'aydyu̶jk mu̶dyiibu̶ je̱'e̱ tu̶y'ajt ka'p mu̶bu̶kyu̶ñ, kunukxy je̱'e̱ Dios yaj'awimbijtu̶nu̶ je̱' ko je̱'e̱ to'oxyu̶jk pudu̶gu̶'u̶y je̱'e̱ mu̶dyiibu̶ je̱'e̱ tu̶y'ajt mu̶bu̶jkpu̶ñ. Y je̱'e̱ to'oxyu̶jk mu̶dyiibu̶ je̱'e̱ tu̶y'ajt ka'p mu̶bu̶kyu̶ñ, kunukxy je̱'e̱ Dios yaj'awimbijtu̶nu̶ je̱' ko je̱'e̱ ya'aydyu̶jk pudu̶gu̶'u̶y je̱'e̱ mu̶dyiibu̶ je̱'e̱ tu̶y'ajt mu̶bu̶jkpu̶ñ. Ko u̶xyu̶py kya'a'okdu'unu̶ch, du'un u̶xyu̶py je̱'e̱ m'ung m'ana'k ajku̶xy neby je̱'e̱ mu̶dyiibu̶ je̱'e̱ tu̶y'ajt ka'p mu̶bu̶jkku̶xyu̶ñ; peru̶ ni'igu̶ paattu̶p je̱'e̱, yajpaatku̶xu̶ch ma je̱'e̱ Dios jya'ayu̶ñ je̱' ko je̱'e̱ tyaj tyeedy je̱'e̱ tu̶y'ajt naty nidu'ugtu̶ mu̶bu̶jkku̶xy. 15Peru̶ pu̶nu̶ je̱'e̱ ya'aydyu̶jk o je̱'e̱ to'oxyu̶jk mu̶dyiibu̶ je̱'e̱ tu̶y'ajt ka'p mu̶bu̶jkku̶xy, mu̶ktaakku̶xp mu̶dnay'u̶xmadzaanu̶gu̶xy je̱'e̱ ñiya'aydyu̶jk o je̱'e̱ tyo'oxyu̶jk, wan nay'u̶xmajtzu̶gu̶xy. Du'un neby naty y'adu̶u̶tzku̶xyu̶ñ awa'adztuum naty je̱'e̱ ya'aydyu̶jk o je̱'e̱ to'oxyu̶jk du'un wyu̶'u̶mgu̶xnu̶ je̱'e̱ mu̶dyiibu̶ je̱'e̱ tu̶y'ajt mu̶bu̶jkku̶xpu̶ñ, je̱' ko je̱'e̱ Dios tu̶ xymyu̶j'yaaxku̶xy ko jootkujk mdzu̶naay mjugy'ajtku̶xu̶ch y ka'p je̱'e̱ tzip ma'ad maa. 16Je̱' ko ka'p miich mnejwu̶'u̶y to'oxyu̶jk pu̶nu̶ mu̶mada'age̱e̱mby je̱'e̱ mniya'aydyu̶jk myajmu̶bú̶gu̶ch je̱'e̱ ayuuk tu̶y'ajt. Y nan ka'p miich mnejwu̶'u̶y ya'aydyu̶jk pu̶nu̶ mu̶mada'age̱e̱mby je̱'e̱ mdo'oxyu̶jk myajmu̶bú̶gu̶ch je̱'e̱ ayuuk tu̶y'ajt.

17Oy jya'anejpyu̶ch, tzu̶naay jugy'ajtku̶x nidu'ug nidu'ug neby je̱'e̱ Dios may'ajt tu̶ xyñi'imooygyu̶xyu̶ñ, y du'un neby najty je'emy mdzu̶naay mjugy'ajtku̶xy ko je̱'e̱ Dios xymyu̶j'yaaxku̶xy. Adaa ane̱'e̱mu̶ñ u̶u̶ch je̱'e̱ mu̶bu̶jkpu̶du̶jk nyajnu̶maaygyu̶xypy kajpt kajpt. 18Pu̶nu̶ Dios je̱'e̱ ja'ay nije̱' win'ijxp je̱'e̱ mu̶dyiibu̶ tu̶ yajtu̶y'ajtu̶'u̶yu̶ñ, ka'p je̱'e̱ tyu̶y'ajtu̶'u̶yiibyu̶ mu̶baad yajtu̶góy, wan du'un wu̶'u̶mu̶'u̶y; y pu̶nu̶ wyin'ijxypy je̱'e̱ ja'ay nije̱' je̱'e̱ mu̶dyiibu̶ ka'p yajtu̶y'ajtu̶'u̶yñu̶ju̶ñ, ka'p je̱'e̱ pyadyii jyatytyimyyajtu̶y'ajtu̶'u̶wu̶ch. 19Je̱' ko ka'p je̱' tzobaatp pu̶nu̶ tu̶y'ajtu̶'u̶y o pu̶nu̶ ka'p ndu̶y'ajtu̶'u̶yu̶ch ajtu̶m ajku̶xy, je̱' tzobaatp ko je̱'e̱ Dios y'ane̱'e̱mu̶ñ nguydyuunu̶ch ajtu̶m ajku̶xy. 20Du'un nidu'ug nidu'ug wu̶'u̶mgu̶x neby miich najty je'emy ajku̶xyu̶ñ ko je̱'e̱ Dios xywyin'ijxku̶xy. 21Pu̶nu̶ tuumbu̶ ni'idoogy miich najty ko je̱'e̱ Dios xywyin'ijxy, ka'p mdajy mmay; peru̶ pu̶nu̶ m'a'ixu̶u̶by m'awa'adzpu̶dzu̶u̶mnu̶ch, ku'ubu̶jkkoj mu̶k'eemby neby m'awa'adzpu̶dzu̶u̶mnu̶chu̶ñ ka'p mu̶j ku̶je̱e̱ mdajy mmay. 22Je̱'e̱ mu̶dyiibu̶ najty ni'idoogy ijtp ko je̱'e̱ Windzú̶n Jesucristo wyin'ijxu̶ neby je̱'e̱ y'ayuuk tyu̶y'ajt myu̶bu̶jkku̶xu̶chu̶ñ, awa'adztuum je̱'e̱ du'umbu̶ ja'ay chamu̶ñ mu̶duunu̶ je̱'e̱ Windzú̶n Jesucristo; y je̱'e̱ mu̶dyiibu̶ ja'ay najty awa'adztuum ko je̱'e̱ Windzú̶n Jesucristo wyin'ijxu̶, Cristo je̱'e̱ jada'achám myu̶duunu̶py, du'un neby je̱'e̱ Cristo du'umbu̶ ni'idoogy myu̶dadyiiju̶ñ. 23Tzoowu̶ je̱'e̱ Dios xykyujuuygyu̶xy ko je̱'e̱ y'ung xykyu'o'ogu̶u̶y ajku̶xy, ka'p mnayye̱jku̶gu̶xy nu̶kxy je̱'e̱ wiingpu̶ ja'ay xywyin'u̶u̶ngu̶xy xymyu̶dajtku̶xu̶ch du'un neby je̱'e̱ tuumbu̶ ni'idoogypyu̶ju̶ñ. 24Y du'unu̶tz mu̶gu'uktu̶jk, du'un nidu'ug nidu'ug ijtku̶x ma je̱'e̱ Diosu̶ñ neby najty je'emy myajpaatku̶xyu̶ñ ko je̱'e̱ Dios xywyin'ijxku̶xy.

25Ka'p u̶u̶ch ni tii ane̱'e̱mu̶ñ nmu̶u̶du̶ch je̱'e̱ mu̶dyiibu̶ u̶u̶ch je̱'e̱ Windzú̶n Jesús tu̶ xymyo'oyu̶ñ ko je̱'e̱ ja'ay ka'p mu̶baad pyu̶jkku̶xy; peru̶ u̶u̶ch mu̶naamb, je̱'e̱ mu̶dyiibu̶ je̱'e̱ Windzú̶n Dios tu̶y tu'uda'agy tu̶ ijxtú̶y ko u̶u̶ch tu̶ xypya'a''ayóy. 26Ko oy ni'igyu̶ ko je̱'e̱ ja'ay ka'p pyú̶gu̶ch, wan du'un naydyu'um wu̶'u̶my neby je'emyu̶ñ. Je̱' ko amaay je̱'e̱ xu̶u̶ tiempo cham ma yam yajtzu̶na'ay yajjugy'átyu̶ñ. 27Pu̶nu̶ mdo'oxyu̶jk mu̶u̶d, ka'p m'u̶xmach; y pu̶nu̶ ka'p mdo'oxyu̶jk mu̶u̶du̶ch, ka'p m'u̶xta'ay. 28Pu̶nu̶ mbu̶jkp, ka'p mbokytyúñ; y pu̶nu̶ pu̶jkp je̱'e̱ ku̶xyii tu'ug, nan ka'p pyokytyúnu̶ch. Peru̶ je̱'e̱ mu̶dyiibu̶ pu̶jkku̶xpu̶ñ pyadaangu̶xypy je̱'e̱ jootmáy ma je̱'e̱ chu̶naayu̶ñ jyugy'ajtu̶ñ ajku̶xyu̶ñ, je̱'e̱ mu̶dyiibu̶ u̶u̶ch du'un nga'ayajmu̶dzojkku̶xypyu̶ñ.

29“Mu̶gu'uktu̶jk, je̱'e̱ mu̶dyiibu̶ u̶u̶ch du'un nja'amu̶dya'age̱e̱mbyu̶ñ adaa je̱': Tu̶ je̱'e̱ xu̶u̶ tiempo wyingoonu̶ mu̶naa je̱'e̱ Jesucristo ya naaxwiiñ myinaanu̶ju̶ñ. Paady je̱'e̱ pu̶kyjya'ay wan oy yajxón tzu̶naaygyu̶xy jugy'ajtku̶xy cham je̱'e̱ Dios oy yajxón mu̶duungu̶xy du'un neby ka'pu̶ pyú̶kyu̶chu̶ñ ajku̶xy. 30Je̱'e̱ mu̶dyiibu̶ ju̶u̶ygyu̶xp yaaxku̶xpu̶ñ du'un je̱'e̱ wan tzu̶naay jugy'ajtku̶xy neby du'umbu̶ xyondaakku̶xyu̶ñ, y je̱'e̱ mu̶dyiibu̶ xondaakku̶xpu̶ñ du'un je̱'e̱ wan tzu̶naay jugy'ajtku̶xy neby du'umbu̶ jyu̶u̶ygyu̶xy yaaxku̶xyu̶ñ; je̱'e̱ mu̶dyiibu̶ ajuuby adókku̶xpu̶ñ du'un je̱'e̱ wan tzu̶naay jugy'ajtku̶xy neby je̱'e̱ ka'pu̶ tii mu̶dajtku̶xyu̶ñ. 31Y je̱'e̱ mu̶dyiibu̶ ya naaxwiiñ ku̶xyu̶ tii mu̶xoon mu̶'ijtku̶xpu̶ñ, du'un je̱'e̱ wan tzu̶naay jugy'ajtku̶xy neby je̱'e̱ ka'pu̶ ya naaxwiiñ ku̶xyu̶ tii mu̶xoon mu̶'ijtku̶xyu̶ñ, je̱' ko tzojku̶ adayaaba naaxwiiñ kyu̶xaan tyu̶goyaanu̶ je̱'e̱ mu̶dyiibu̶ cham n'ijxypy ajtu̶m ajku̶xyu̶ñ.

32U̶u̶ch, je̱' miich nja'ayajmu̶dzojkku̶xypy ka'pu̶ mdajku̶xu̶ch mmaaygyu̶xu̶ch ma je̱'e̱ tzu̶naay juugy'ajtu̶ñ. Je̱'e̱ ya'aydyu̶jk naydyu'um'ajtpu̶ je̱' je̱'e̱ je'eyu̶ myu̶daj myu̶maaby neby je̱'e̱ Windzú̶n Dios mu̶dúnu̶chu̶ñ y neby je̱'e̱ Windzú̶n Dios ku'umáyu̶ñ; 33peru̶ je̱'e̱ mu̶dyiibu̶ ya'aydyu̶jk pu̶kyu̶ñ je̱' je̱'e̱ je'eyu̶ myu̶daj myu̶maaby je̱'e̱ mu̶dyiibu̶ ya naaxwiiñ yajpaatpu̶ñ y neby je̱'e̱ tyo'oxyu̶jk ku'umáyu̶ñ, 34y du'un du'un mayñax jya'atajy jya'amáy. Nandu'un je̱'e̱ to'oxyu̶jk je̱'e̱ mu̶dyiibu̶ ka'p pyú̶kyu̶chu̶ñ y je̱'e̱ mu̶dyiibu̶ ka'p nimu̶naa pyú̶kyñu̶ju̶ñ, je̱' je̱'e̱ je'eyu̶ myu̶daj myu̶maaby neby je̱'e̱ Windzú̶n Dios mu̶dúnu̶chu̶ñ, neby je̱'e̱ Windzú̶n Dios je̱'e̱ ñi'kx kyopt y je̱'e̱ jyoot wyinma'añ ku̶xyu̶ oy wa'adz yajku̶'u̶du̶gu̶'u̶wu̶chu̶ñ;#7.34 Y du'un du'un mayñax jya'atajy jya'amáy neby je̱'e̱ Windzú̶n Dios je̱'e̱ ñi'kx kyopt y je̱'e̱ jyoot wyinma'añ ku̶xyu̶ oy wa'adz yajku̶'u̶du̶gu̶'u̶wu̶chu̶ñ: nije̱' jaaybyu̶du̶jk myu̶naangu̶xy: Y tu̶gachjyaty je̱'e̱ to'oxyu̶jk chu̶naayu̶ñ yajnajxku̶xy je̱'e̱ mu̶dyiibu̶ pu̶kyu̶ñ, y je̱'e̱ mu̶dyiibu̶ ka'p nimu̶naa pyú̶kyñu̶ju̶ñ. Je̱'e̱ mu̶dyiibu̶ ka'p nimu̶naa pyú̶kyñu̶ju̶ñ, je̱' je̱'e̱ je'eyu̶ myu̶daj myu̶maaby neby je̱'e̱ Windzú̶n Dios mu̶dúnu̶chu̶ñ, neby je̱'e̱ Windzú̶n Dios je̱'e̱ ñi'kx kyopt y je̱'e̱ jyoot wyinma'añ ku̶xyu̶ oy wa'adz yajku̶'u̶du̶gu̶'u̶wu̶chu̶ñ. peru̶ je̱'e̱ pu̶kypyu̶ to'oxyu̶jk je̱' je̱'e̱ je'eyu̶ myu̶daj myu̶maaby je̱'e̱ mu̶dyiibu̶ ya naaxwiiñ yajpaatpu̶ñ y neby je̱'e̱ ñiya'aydyu̶jk ku'umáyu̶ñ.

35Nni'inigápxyu̶ch adaa du'un y ka'p miich yam du'un ndimy'ane̱'e̱mgu̶xy, je̱'e̱ m'oy'ajtu̶ñ du'un nja'ayajmu̶dzojkku̶xypy, y neby mu̶baad oy tu'uda'agy mdzu̶naay mjugy'ajtku̶xyu̶ñ, mu̶duungu̶xu̶ch je̱'e̱ Windzú̶n Dios adu'kju̶jp.

36Pu̶nu̶ jii pu̶n wyinmay ko mu̶baad pyu̶jknu̶ mu̶u̶d je̱'e̱ to'oxyu̶jk mu̶dyiibu̶ tu̶ win'ixyu̶ñ, je̱' ko je̱'e̱ xyu̶u̶ jyumu̶jt tu̶ kya'pxnu̶, y pu̶nu̶ mu̶naamb ko du'un y'óyu̶ch, wan du'un tuñ neby naty ku'umáyu̶ñ; pu̶k, je̱' ko ka'p je̱'e̱ pyókyu̶ch ko mbú̶gu̶ch. 37Y pu̶nu̶ jii je̱'e̱ wiingpu̶ ja'ay y pu̶nu̶ ka'p pu̶n yajmu̶dzibu̶'u̶yii pyú̶gu̶ch, mu̶baad je̱'e̱ tuñ tii naty tyimychojkypyu̶ñ, pu̶nu̶ nidu'uñdyu̶ du'un aajooty jootjooty kya'amu̶na'añ ko pyú̶gu̶ch, y oy naty je̱'e̱ du'un ko ka'p pyu̶ga'añ. 38Y du'unu̶tz, pu̶nu̶ pu̶jkp mu̶u̶d je̱'e̱ to'oxyu̶jk mu̶dyiibu̶ naty tu̶ win'ixyu̶ñ, oy naty je̱'e̱ du'un ko pyú̶gu̶ch; peru̶ pu̶nu̶ ka'p pyu̶ky, ni'igu̶ oy naty je̱'e̱ du'un ni'igyu̶ ko kya'apú̶gu̶ch.#7.38 Nije̱' wiingpu̶ jaaybyu̶du̶jk myu̶naangu̶xy ma je̱'e̱ vs. 36-38 Pu̶nu̶ jii pu̶n myu̶na'añ ko ni'igu̶ oy ko je̱'e̱ tyo'oxy'úng pyú̶gu̶ch, je̱' ko je̱'e̱ xyu̶u̶ tyiempo tu̶ wyimbe̱jtnu̶, y pu̶nu̶ mu̶naamb ko du'un y'óyu̶ch, wan du'un tuñ neby naty ku'umáyu̶ñ. Mu̶baad je̱'e̱ tyo'oxy'úng yajpú̶ky, je̱' ko ka'p je̱'e̱ du'un kyubókyu̶ch ko yajpú̶gu̶ch. 37 Y pu̶nu̶ je̱'e̱ wiingpu̶ ja'ay, y pu̶nu̶ ka'p pu̶n yajmu̶dzibu̶'u̶yii yajpú̶gu̶ch je̱'e̱ tyo'oxy'úng, mu̶baad je̱'e̱ tuñ tii naty tyimychojkypyu̶ñ. Pu̶nu̶ nidu'uñdyu̶ du'un aajooty jootjooty kya'amu̶na'añ yajpú̶gu̶ch je̱'e̱ tyo'oxy'úng, y oy naty je̱'e̱ du'un ko ka'p yajpú̶gu̶ch. 38 Y du'unu̶tz, pu̶n je̱'e̱ tyo'oxy'úng ye̱jkpu̶ñ pyú̶gu̶ch, oy naty je̱'e̱ du'un ko yajpú̶gu̶ch. Y je̱'e̱ mu̶dyiibu̶ je̱'e̱ tyo'oxy'úng ka'aye̱jkpu̶ñ, ni'igu̶ oy naty je̱'e̱ du'un ni'igyu̶ ko ka'ayé̱gu̶ch.

39Je̱'e̱ pu̶kypyu̶ to'oxyu̶jk myu̶dtzu̶na'awu̶py je̱'e̱ ñiya'aydyu̶jk u̶xtu̶ mabaad je̱'e̱ ñiya'aydyu̶jk jyugy'atyu̶ñ; peru̶ pu̶nu̶ o'kp je̱'e̱ ñiya'aydyu̶jk, awa'adzpu̶dzu̶u̶mnu̶py je̱', y mu̶baad pyu̶jktu̶gajtznu̶ pu̶n naty tyimychojkypyu̶ñ, peru̶ je̱'e̱ju̶tz tu̶y pyú̶gu̶py je̱'e̱ mu̶dyiibu̶ je̱'e̱ ayuuk tu̶y'ajt naty mu̶bu̶jkpu̶ñ. 40Peru̶ u̶u̶ch mu̶naamb ko jootkujk je̱'e̱ ni'igyu̶ chu̶na'a jyugy'ádu̶ch ko kya'a'okpu̶jktu̶gajtznu̶ch. U̶u̶ch du'un okni'imu̶naamb, y nan nnejwu̶u̶ybyu̶ch ko nmu̶dajtypyu̶ch je̱'e̱ Dios y'Espíritu nandu'un.

Currently Selected:

1 Corintios 7: MIXE

Highlight

Copy

Compare