1 Corintios 4

Je̱'e̱ apóstolestu̶jk tyuung ajku̶xy

1Jadu'knáx miich ajku̶xy je̱' u̶u̶ch miich mu̶baad xytyijku̶xy je̱'e̱ adu̶yu̶ba Cristo tyuumbu̶du̶jk ajku̶xy, je̱'e̱ mu̶dyiibu̶ je̱'e̱ Dios yajni'ipu̶jku̶gu̶xu̶ñ ko u̶u̶ch je̱'e̱ yu'uchpyu̶ Dios tyu̶y'ajt nyaj'u̶xpu̶jkku̶xu̶ch neby je̱'e̱ Dios jékyu̶p niwinmayu̶u̶yu̶ñ. 2Pu̶n tii yajni'ipu̶jku̶bu̶ñ ko tii mu̶wu̶'u̶mu̶ch yajni'igu̶xu̶'u̶gu̶py je̱' ko tu̶y tu'uda'agy jya'ay'áty. 3U̶u̶ch ka'p u̶u̶ch tii ngweentu̶ju̶ch pu̶nu̶ xykyu̶'u̶yo'oy xytyekyyo'oyaanu̶bu̶ch je̱'e̱ nboky ngu̶dyeey miich ajku̶xy o pu̶nu̶ xykyu̶'u̶yo'oy xytyekyyo'oyaanu̶bu̶ch je̱'e̱ naaxwiiñjya'ay nboky ngu̶dyeey ma je̱'e̱ ku'utujktaaktu̶ñ. Ni u̶u̶ch je̱'e̱ nboky ngu̶dyeey ka'p ku̶'u̶m ngu̶'u̶yo'oy ndekyyo'oy. 4Oy u̶u̶ch je̱'e̱ nboky ngu̶dyeey ka'p maa nju̶wu̶'u̶y, ka'p u̶u̶ch yam du'un nmu̶na'añ ko u̶u̶ch je̱'e̱ Dios pokytyuk xyajnáxy. Peru̶ je̱'e̱ Windzú̶n u̶u̶ch je̱'e̱ nboky ngu̶dyeey xykyu̶'u̶yo'oy xytyekyyo'oyu̶p. 5Paadyu̶tz, ka'p je̱'e̱ ja'ay pyoky kyu̶dyeey nigoo jayu̶jp mgu̶'u̶yo'oy mdekyyo'oyu̶ ajku̶xy ma naty je̱'e̱ tiempo ka'p paatyñu̶ju̶ñ; ja'ay'e̱jxku̶x wan je̱'e̱ Windzú̶n Jesucristo okmiñu̶ y yajni'igu̶xu̶'u̶gu̶ch je̱'e̱ mu̶dyiibu̶ cham yu'uch ijtpu̶ñ, y nan yajni'igu̶xu̶'u̶gu̶ch neby je̱'e̱ ja'ay joot winma'añ nidu'ug nidu'ug mu̶dajtku̶xyu̶ñ. Mu̶'it je̱'e̱ Dios je̱'e̱ ja'ay nidu'ug nidu'ug ku'umáyu̶ch neby naty wyinmajtzu̶gu̶xyu̶ñ.

6“Mu̶gu'uktu̶jk, cham adaa du'un nyajmu̶dmu̶dyaakku̶xy mu̶u̶d miich kyu̶xpu̶ m'oy'ajtu̶ñ ajku̶xy y mgatz'ijxku̶xu̶ch je̱'e̱ ijxpe̱jt ma je̱'e̱ Apolos y maa u̶u̶chu̶ñ. Nmu̶na'añu̶ch du'un wan du'un mduungu̶xu̶ch je̱'e̱ mu̶dyiibu̶ tu̶ mgatz'ijxku̶xy ma u̶u̶ch ajku̶xyu̶ñ ko ka'p mduungu̶xu̶ch neby je̱'e̱ Dios ñaky ka'p y'ane'emyu̶ñ, y ka'pu̶ pu̶n ñaygyu'umayu̶u̶ju̶ch ko naty je̱'e̱ myu̶gu'ug tu'ug tzoky y tu'ug naty u̶xtijy. 7Pues, ¿pu̶n miich ni'igyu̶ ku'umáy xyaj'ijtp nigu̶ ka'p je̱'e̱ wiingpu̶ ja'ay ajku̶xyñu̶ba? ¿Y tii miich m'okjaktimymyu̶u̶d je̱'e̱ mu̶dyiibu̶ je̱'e̱ Dios ka'p tu̶ xymyo'oyu̶ñ? Y pu̶nu̶ je̱'e̱ Dios ku̶xyu̶ tii tu̶ xymyo'oy, ¿ti ko mnaygyu'umayii neby du'un ku̶'u̶mbu̶ tu̶ mbaadyu̶ñ ku̶xyu̶ tii mmu̶dajtypyu̶ñ?

8Miich ajku̶xy du'un miich ajku̶xy neby je̱'e̱ kumeeñjya'ay ajku̶xyu̶ñ, y mmu̶dajtku̶xypy miich ku̶xyu̶ tii mdimychojkku̶xypyu̶ñ, y du'un miich mnayjyu̶wu̶u̶yu̶gu̶xy neby je̱'e̱ mu̶j'ane̱'e̱mbu̶ ajku̶xy mu̶dyiibu̶ ka'p tii yajmayjyajtku̶xy ma u̶u̶ch ajku̶xyu̶ñ. ¡Oy it du'un ko jaanch mmu̶j'ane̱'e̱mbu̶'ajtku̶xu̶ch wan u̶u̶ch jiiby nandu'un nyajpaatku̶xu̶ch ma je̱'e̱ m'ane̱'e̱mu̶ñ miich ajku̶xyu̶ñ! 9U̶u̶ch du'un u̶u̶ch adaa du'un nwinju̶wu̶u̶ygyu̶xy, u̶u̶ch je̱'e̱ apóstolestu̶jk ajku̶xy neby u̶u̶ch je̱'e̱ Dios nu̶wu̶'u̶y u̶x'aamdu̶góy tu̶ xypyu̶daakku̶xyu̶ñ, neby u̶u̶ch je̱'e̱ o'ku̶ñ nu̶wu̶'u̶y xywyinmajtzku̶xyu̶ñ. Y du'un u̶u̶ch je̱'e̱ ixy eeby du'un nyajpu̶dzu̶u̶mgu̶xy neby u̶u̶ch je̱'e̱ naaxwiiñjya'ay du'un xy'ijxku̶x xy'é̱pku̶xu̶ch, je̱'e̱ ángelestu̶jk y je̱'e̱ naaxwiiñjya'ay ajku̶xy. 10U̶u̶ch tzuu poj u̶u̶ch je̱'e̱ ja'ay xytyijku̶xy ko u̶u̶ch je̱'e̱ Cristo nmu̶duungu̶xy; cham miich je̱'e̱ ja'ay miich kujoot kuwinma'añ xytyijku̶xpu̶ ko je̱'e̱ Cristo mmu̶bu̶jkku̶xy. U̶u̶ch du'un u̶u̶ch je̱'e̱ ja'ay xytyijku̶xy ko u̶u̶ch ka'p tii mu̶k'ajt nmu̶dajtku̶xy; cham miich je̱'e̱ ja'ay miich xytyijku̶xpu̶ ko je̱'e̱ mu̶k'ajt mmu̶dajtku̶xy. U̶u̶ch xy'u̶xtijku̶xpu̶ch je̱'e̱ ja'ay, y miich xywyindzu̶gu̶u̶ygyu̶xp miich je̱'e̱ ja'ay ajku̶xy. 11U̶xtu̶ chamnu̶baad u̶u̶ch je̱'e̱ yuu xu̶u̶ nmu̶najx nyajnajxku̶xyñu̶, je̱'e̱ tu̶dzu̶'u̶wu̶u̶ y je̱'e̱ ni'idúk u̶xtuk'adyiibyu̶; xytyuungu̶xyu̶ch je̱'e̱ ja'ay ju̶bu̶k axu̶u̶g, ka'p u̶u̶ch je̱'e̱ ngu̶'u̶m nju̶u̶n ngu̶'u̶m ndu̶jk ajku̶xy, 12y nduungu̶xy n'ayoogu̶xyu̶ch mu̶u̶d u̶u̶ch je̱'e̱ ngu̶'u̶m ngu̶'u̶ ngu̶'u̶m ndeky ajku̶xy. Je̱'e̱ mu̶dyiibu̶ u̶u̶ch xy'u̶xwu̶dijtp xypyawu̶dijtpku̶xpu̶ñ, nmu̶gápxku̶xypyu̶ch je̱' mu̶u̶d je̱'e̱ oyjyoot oywyinma'añ; xy'u̶xwu̶dijtp xypyawu̶dijtpku̶xpu̶ch je̱'e̱ ja'ay, y nmu̶me̱kxtujkku̶xypyu̶ch je̱'e̱ ajku̶xy. 13Ko u̶u̶ch ju̶bu̶k axu̶u̶g xyñigapx xyñimu̶dyaakku̶xy, y yuung naaxypy u̶u̶ch je̱'e̱ n'adzoogu̶xy. Du'un u̶u̶ch je̱'e̱ naaxwiiñjya'ay xy'ijxku̶xy neby je̱'e̱ pu'uxku̶ñ, y nandu'un u̶u̶ch je̱'e̱ ja'ay xy'ijxku̶xy neby je̱'e̱ ju̶kxtuk tzu'tztúk mu̶dyiibu̶ nadu̶gu̶u̶ybyu̶ñ.

Y du'un u̶u̶ch jada'achambaad njajtku̶xy n'ayoogu̶xy.

14Ka'p du'un paady nnijayu̶u̶ygyu̶xy neby nyajtzo'oydyunaangu̶xyu̶ñ, paady nnijayu̶u̶ygyu̶xy neby du'un ngapxwijaangu̶xyu̶ñ, je̱' ko du'un miich nju̶wu̶u̶ygyu̶xy neby je̱'e̱ ku̶'u̶m'úngu̶ñ, je̱' ko ndzojkku̶xy nju̶wu̶u̶ygyu̶xy. 15Oy u̶xyu̶py miich je̱'e̱ mwindzú̶n majk mil mja'amu̶dajtku̶xpu̶ je̱'e̱ mu̶dyiibu̶ je̱'e̱ Cristo tyu̶y'ajt xyajmu̶dmu̶dyaakku̶xpu̶ñ, peru̶ ka'p je̱'e̱ mdeedy myáyu̶ch ajku̶xy. Je̱'e̱ teedy je̱'e̱ mu̶dyiibu̶ miich mdeedy'ajtypy ajku̶xy ko je̱'e̱ Cristo Jesús tu̶ mmu̶bu̶jkku̶xy, u̶u̶ch je̱' je̱' ko u̶u̶ch miich je̱'e̱ oybyu̶ ayuuk tu̶y'ajt jayu̶jp'ajt nyajmu̶dmu̶dyaakku̶x je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 16Y du'unu̶tz nmu̶nukxtaakku̶xy ko mba'ijxku̶xu̶ch neby u̶u̶ch nja'ay'átyu̶ñ.

17Paady je̱'e̱ Timoteo yam nyajnigue̱jxku̶xy, je̱'e̱ mu̶dyiibu̶ u̶u̶ch oy ndzojkypy nju̶wu̶u̶ybyu̶ñ y xy'u̶mu̶doob xykyapxymyu̶doobu̶ñ y je̱'e̱ mu̶dyiibu̶ u̶u̶ch du'un nju̶wu̶u̶by neby je̱'e̱ ku̶'u̶m'úngu̶ñ Jesucristo kyu̶xpu̶. Je̱' xyajja'aymye̱jtzku̶xu̶p neby u̶u̶ch ndzu̶na'ay njugy'atyu̶ñ neby je̱'e̱ mu̶dyiibu̶ je̱'e̱ Cristo Jesús mu̶bu̶jkpu̶ñ, du'un neby u̶u̶ch nyaj'u̶xpú̶ky majaty je̱'e̱ kajpt ku̶xyu̶ majaty u̶u̶ch naxyu̶ñ ma je̱'e̱ mu̶dyiibu̶ je̱'e̱ Cristo mu̶bu̶jkku̶xpu̶ñ. 18Nije̱' miich mu̶j ku̶xp mnayjyu̶wu̶u̶yu̶gu̶xnu̶; mmu̶naangu̶xy ko u̶u̶ch ka'p n'oknu̶kxaanu̶ ku'ijx mu̶gapxpu̶ ma miich ajku̶xyu̶ñ, 19peru̶ pu̶nu̶ je̱'e̱ Windzú̶n Dios du'un mu̶naamb, nú̶kxu̶p tzojku̶ ngu'ijxku̶xy. Mu̶'it u̶u̶ch n'íxu̶ch pu̶nu̶ myu̶dajtku̶xypy je̱'e̱ Dios myu̶k'ajt je̱'e̱ mu̶dyiibu̶ naygyu'umaayu̶gu̶xpu̶ñ o pu̶nu̶ nigoo du'un kyápxku̶xy myu̶dyaakku̶xy. 20Je̱'e̱ Dios y'ane̱'e̱mu̶ñ ka'p je̱'e̱ mu̶'it ñi'igu̶xu̶'u̶gy ko nigoo nigapx nimu̶dyaaku̶mu̶ch ajku̶xy, mu̶'it je̱'e̱ Dios myu̶k'ajt ñi'igu̶xu̶'u̶gy ko je̱'e̱ ijxpe̱jt mu̶jwinma'añbyu̶ nduunu̶mu̶ch ajku̶xy. 21¿Ti miich mdzojkku̶xypy: ko u̶u̶ch ni'ixu̶'u̶ nnú̶kxu̶ch nu̶kxy nyajkumu̶doogu̶xy, o ko u̶u̶ch nnú̶kxu̶ch nu̶kxy ngu'ijxku̶xy mu̶u̶d je̱'e̱ tzojku̶ñ ju̶wu̶u̶yu̶ñ y yuung'ajt naaxypy'ajtu̶ñ?

Currently Selected:

1 Corintios 4: MIXE

Highlight

Copy

Compare