1 Corintios 3

Tuumbu̶du̶jk je̱'e̱ mu̶dyiibu̶ je̱'e̱ Dios tyuung tu'ugyu̶ tuunu̶gyu̶xpu̶ñ

1U̶u̶ch mu̶gu'uktu̶jk ko miich je̱'e̱ Cristo y'ayuuk tyu̶y'ajt oy nyajwingapxu̶u̶ygyu̶xy, ka'p miich je̱'e̱ du'un nyajmu̶dmu̶dyaakku̶xy neby je̱'e̱ ja'ay ajku̶xy je̱'e̱ mu̶dyiibu̶ je̱'e̱ Espíritu jootmooy winma'añmyooyu̶bu̶ñ ajku̶xy, du'un miich je̱'e̱ tu̶ nyajmu̶dmu̶dyaakku̶xy neby oy mu̶dyiibu̶ naaxwiiñjya'ay winma'añ, du'un neby je̱'e̱ ja'ay pi'k'ana'ktu̶jk je̱'e̱ Cristo y'ayuuk tyu̶y'ajt yajwingapxu̶'u̶yu̶ñ. 2Je̱'e̱ u̶xpu̶jku̶ñ ka'pu̶ chípu̶ch miich tu̶ nmooygyu̶xy, du'un neby je̱'e̱ ma'axúng mu̶dyiibu̶ tzi'tzp leeche yajmo'oyu̶ñ y ka'p jyu̶ch kyaagyu̶ch, je̱' ko ka'p miich je̱'e̱ tzipu̶ ayuuk najty mwinju̶wu̶u̶ygyu̶xy, du'un neby je̱'e̱ ma'axúng tu̶'u̶tzpu̶ ju̶ch kaagy ka'p ku'ubu̶jkku̶xyu̶ñ. ¡Y ni chambaadnu̶ je̱'e̱ tzipu̶ ayuuk mga'awinju̶wu̶u̶ygyu̶xyñu̶, 3je̱' ko chambaadnu̶ miich je̱'e̱ naaxwiiñjya'ay winma'añ mmu̶dajtku̶xyñu̶! Ma je̱'e̱ ka'amu̶'oy'ixu̶u̶ y je̱'e̱ naymyu̶jootma'adu̶u̶ ka'p m'u̶xmajtzku̶xyñu̶ju̶ñ, je̱' ko je̱'e̱ naaxwiiñjya'ay winma'añ mbaduun'adu̶u̶tzku̶xy mnayyajtu̶gooyu̶gu̶xy neby je̱'e̱ naaxwiiñjya'ay ku̶xyu̶ y'adu̶u̶tzku̶xyu̶ñ, je̱'e̱ mu̶dyiibu̶ je̱'e̱ Cristo ka'p mu̶bu̶jkku̶xyu̶ñ. 4Ko du'un pu̶n myu̶na'añ: “U̶u̶ch nbanú̶kxu̶py je̱'e̱ Pablo y'ayuuk”, y nije̱' myu̶na'añ: “U̶u̶ch nbanú̶kxu̶py je̱'e̱ Apolos y'ayuuk”, je̱' je̱'e̱ du'un pyaduungu̶xypy neby je̱'e̱ naaxwiiñjya'ay winma'añ'átyu̶ñ ajku̶xy, je̱'e̱ mu̶dyiibu̶ je̱'e̱ Cristo ka'p mu̶bu̶jkku̶xyu̶ñ.

5¿Pu̶n Pablo? y ¿Pu̶n Apolos? Dios mu̶duumbu̶du̶jk u̶u̶ch je'eyu̶ ajku̶xy, je̱'e̱ mu̶dyiibu̶ je̱'e̱ Windzú̶n Jesucristo xyajmu̶bu̶jkku̶xu̶ñ. Je̱'e̱ tuung u̶u̶ch nidu'ug nidu'ug tu̶ nduungu̶xy, je̱'e̱ mu̶dyiibu̶ u̶u̶ch je̱'e̱ Windzú̶n Dios xyajni'ipu̶jkku̶xu̶ñ: 6u̶u̶ch du'un u̶u̶ch neby je̱'e̱ tu̶u̶md u̶u̶chpyu̶ tu̶ nni'ibyu̶ñ y je̱'e̱ Apolos tu̶ nu̶u̶yóky, peru̶ je̱'e̱ Dios je̱' je̱'e̱ mu̶dyiibu̶ je̱'e̱ tu̶u̶md tu̶ yajmúxy yaj'yeegyu̶ñ. 7Y du'unu̶tz ni je̱'e̱ mu̶dyiibu̶ je̱'e̱ tu̶u̶md niipu̶ñ y ni je̱'e̱ mu̶dyiibu̶ nu̶u̶yojkpu̶ñ ka'p je̱'e̱ ni tii mu̶k'ajty mu̶dajtku̶xy, Dios je̱' je̱'e̱ mu̶dyiibu̶ je̱'e̱ mu̶k'ajt ku̶xyu̶ mu̶dajtpu̶ñ, je̱' ko je̱' je̱'e̱ tu̶u̶md yajmujxp yaj'ye̱kp. 8Je̱'e̱ mu̶dyiibu̶ je̱'e̱ tu̶u̶md niipku̶xpu̶ñ, y je̱'e̱ mu̶dyiibu̶ nu̶u̶yojkku̶xpu̶ñ tu'knáx je̱'e̱ ajku̶xy, Dios je̱'e̱ oy'ajt mo'owu̶u̶ju̶p ajku̶xy neby naty je̱'e̱ tyuung nidu'ug nidu'ug tu̶ tuungu̶xyu̶ñ. 9Je̱'e̱ tuumbu̶du̶jk ajtu̶m ajku̶xy je̱'e̱ mu̶dyiibu̶ je̱'e̱ Dios tyuung tu'ugyu̶ tuunu̶gyu̶xpu̶ñ, y miich du'un miich ajku̶xy neby je̱'e̱ kam je̱'e̱ mu̶dyiibu̶ je̱'e̱ Dios yajtuumbyu̶ñ, je̱'e̱ mu̶jtu̶jk je̱'e̱ mu̶dyiibu̶ je̱'e̱ Dios kyojpyu̶ñ. 10U̶u̶ch du'un u̶u̶ch je̱'e̱ Dios tu̶ xypyu̶da'agy neby je̱'e̱ pojtzpu̶ windzú̶n, je̱'e̱ mu̶dyiibu̶ je̱'e̱ tu̶jk pojtzu̶'kpu̶ñ y wiingpu̶ je̱'e̱ jakpojtz'abe̱jtp ma u̶u̶ch tu̶ nbojtzu̶'u̶gyu̶ñ. Peru̶ nidu'ug nidu'ug mu̶baad jatyim'yajkoptu̶u̶ygyu̶xy neby je̱'e̱ tu̶jk mu̶baad jak'yaj'abe̱jtku̶xyu̶ñ, 11ni pu̶n je̱'e̱ wiingpu̶ tu̶jk mu̶baad ka'apojtzu̶'u̶gy ma je̱'e̱ mu̶dyiibu̶ pojtzu̶'u̶gy ijtnu̶bu̶ñ, je̱' ko je̱'e̱ Jesucristo du'un tu'kpajk ijtp neby je̱'e̱ tu̶jk pojtzu̶'u̶gyu̶ñ. 12Ma je̱'e̱ tu̶jk pojtzu̶'u̶gypyu̶ju̶ñ mu̶baad je̱'e̱ pu̶n jakpojtz'abéty mu̶u̶d je̱'e̱ ooru̶, mu̶u̶d je̱'e̱ platu̶ y mu̶u̶d je̱'e̱ oyjyatypyu̶ tzaa, o mu̶baad nandu'un mu̶u̶d je̱'e̱ pu'uy, mu̶u̶d je̱'e̱ mu̶u̶y y mu̶u̶d je̱'e̱ waaxkképy; 13peru̶ ko naty je̱'e̱ xu̶u̶ tiempo paady mu̶naa je̱'e̱ ja'ay yajtu̶ydyunaangu̶xyu̶ñ, mu̶'it wa'adzu̶ ñi'igu̶xu̶'kta'awa'añ neby naty nidu'ug nidu'ug tu̶ tyuungu̶xyu̶ñ, je̱' ko du'un je̱'e̱ xu̶u̶ tiempo myina'añ mu̶u̶d je̱'e̱ ju̶u̶n y je̱'e̱ ju̶u̶n je̱'e̱ tuung yajni'igu̶xu̶'u̶gaamb tii tu̶jk naty tu̶ yajkojyu̶ñ y tyooydya'awu̶ch ku̶xyu̶ mu̶dyiibu̶ ka'p chobaadyu̶ñ. 14Pu̶n je̱'e̱ mu̶jtu̶jk naty tu̶ kojyu̶ñ je̱'e̱ mu̶dyiibu̶ je̱'e̱ ju̶u̶n ka'p myu̶mada'agyii, yajmo'owu̶p myu̶ju'uñ je̱'; 15peru̶ ko nu̶kxy tyoy je̱'e̱ mu̶dyiibu̶ naty tu̶ kojyu̶ñ, mu̶du̶gooydya'awu̶u̶ju̶p je̱'e̱ du'un ku̶xyu̶, oy u̶xyu̶py je̱'e̱ ku̶'u̶m je̱'e̱du̶'ajty jya'a''awa'adzpu̶dzu̶u̶mbu̶ du'un neby je̱'e̱ ja'ay ju̶u̶njooty kye'egyu̶ñ.

16¿Nej ka'p miich mnejwu̶u̶ygyu̶xy ko miich je̱'e̱ Dios xychajptu̶jk'ajtku̶xy, y ko je̱'e̱ Dios y'Espíritu jiiby chu̶na'ay ma je̱'e̱ mjoot mwinma'añ miich ajku̶xyu̶ñ? 17Pu̶nu̶ jii je̱'e̱ Dios chajptu̶jk pu̶n yajwindu̶gooyu̶, yajku'udu̶goyu̶u̶ju̶p Dios je̱', je̱' ko oy wa'adz je̱'e̱ Dios chajptu̶jk, y je̱'e̱ tzajptu̶jk miich je̱'e̱ ajku̶xy.

18Ka'p ku̶'u̶m mnaywin'u̶u̶nu̶gu̶xy pu̶nu̶ jii miich nidu'ugtu̶ u̶xpu̶ky mnaydyiju̶gu̶xy du'un neby je̱'e̱ naaxwiiñjya'ay u̶xpu̶jku̶ñ, wan du'un naybyu̶da'agyii neby je̱'e̱ ja'ay je̱'e̱ mu̶dyiibu̶ ka'p tii jatyu̶ñ, neby je̱'e̱ jaanchpyu̶ u̶xpu̶jku̶ñ mu̶baad mbaatku̶xyu̶ñ. 19Je̱'e̱ naaxwiiñjya'ay u̶xpu̶jku̶ñ du'un je̱' mu̶u̶d je̱'e̱ Dios y'u̶xpu̶jku̶ñ, neby je̱'e̱ tzuuwinma'añ looku̶winma'añdyu̶ñ. Du'un je̱'e̱ Dios ñaky myu̶na'añ: “Dios yajku'ujo'py je̱'e̱ u̶xpu̶kyjya'ay ajku̶xy je̱'e̱ mu̶dyiibu̶ u̶xpu̶ky naydyiju̶gu̶xpu̶ñ mu̶u̶d je̱'e̱ kyu̶'u̶mju̶bu̶kwinma'añ ju̶bu̶ktuum ñayyajka'awu̶gu̶xy.” 20Y nandu'un je̱'e̱ Dios ñaky myu̶na'añ: “Ñejwu̶u̶by je̱'e̱ Windzú̶n Dios ko je̱'e̱ u̶xpu̶kyjya'ay y'u̶xpu̶jku̶ñ ka'p chobaady.” 21Paady ka'p pu̶n mu̶baad mu̶j ku̶xp ñayjyu̶wu̶'u̶yii ko je̱'e̱ ja'ay y'ayuuk nije̱' panu̶kxu̶ ajku̶xy, je̱' ko agu̶ miich mje̱' je̱'e̱ ku̶xyu̶ ajku̶xy je̱'e̱ mu̶dyiibu̶ mmu̶dajtku̶xypyu̶ñ: 22je̱'e̱ Pablo, je̱'e̱ Apolos, je̱'e̱ Pedro, je̱'e̱ naaxwiiñ, je̱'e̱ jugy'ajtu̶ñ, je̱'e̱ o'ku̶ñ, je̱'e̱ xu̶u̶ tiempo mu̶dyiibu̶ jii'ajtpu̶ñ y je̱'e̱ xu̶u̶ tiempo mu̶dyiibu̶ miimb ku̶daakpu̶ñ, ku̶xyu̶ agu̶ miich mje̱' je̱'e̱ ajku̶xy, 23y miich ajku̶xy je̱'e̱ Cristo miich xyjya'ay'ajtku̶xp, y je̱'e̱ Cristo je̱'e̱ Dios je̱'e̱ je̱'e̱'ajtu̶p.

Currently Selected:

1 Corintios 3: MIXE

Highlight

Copy

Compare