1 Corintios 2

Je̱'e̱ Cristo y'ayuuk tyu̶y'ajt je̱'e̱ mu̶dyiibu̶ yajcruutzpe̱jtu̶ju̶ñ

1Peru̶ mu̶gu'uktu̶jk, ko u̶u̶ch n'ooy ma miich ajku̶xyu̶ñ ko oy nyajmu̶dmu̶dyaakku̶xy je̱'e̱ Dios tyu̶y'ajt yu'uchpyu̶, ka'p u̶u̶ch je̱'e̱ ayuuk nyajtuuñ je̱'e̱ mu̶dyiibu̶ je̱'e̱ u̶xpu̶kyjya'ay yajtuungu̶xypyu̶ñ ni je̱'e̱ tzipjatypyu̶ ayuuk. 2Y ko u̶u̶ch jim n'ijty ma miich ajku̶xyu̶ñ, ka'p u̶u̶ch je̱'e̱ wiingpu̶ ayuuk nnimu̶dyaaky, je̱'e̱ Jesucristo u̶u̶ch je'eyu̶ nnimu̶dyaak, y mu̶kta'agy nnimu̶dyaaky je̱'e̱ Jesucristo je̱'e̱ mu̶dyiibu̶ yajcruutzpe̱jtu̶ju̶ñ. 3Ko nwinguwa'agu̶u̶ygyu̶xy du'un u̶u̶ch nnaybyu̶daaku̶ neby je̱'e̱ ja'ay yuu pu̶ma'aybyu̶ju̶ñ cham u̶u̶ch njanchtzu̶yúy mu̶u̶d je̱'e̱ tzu̶gu̶'u̶ñ, 4y ko nmu̶gápxku̶xy y nyajwingapxu̶u̶ygyu̶xy je̱'e̱ ayuuk tu̶y'ajt, ka'p u̶u̶ch je̱'e̱ ayuuk nyajtuuñ je̱'e̱ mu̶dyiibu̶ je̱'e̱ u̶xpu̶kyjya'ay yajtuungu̶xypyu̶ñ neby mu̶baad nyajkapxykyu'ubu̶jkku̶xyu̶ñ mu̶u̶d je̱'e̱ ayuuk tu̶y'ajt. Nyajku'ubu̶jkku̶x je̱'e̱ ayuuk tu̶y'ajt mu̶u̶d je̱'e̱ Dios y'Espíritu myu̶k'ajtu̶ñ y mu̶u̶d je̱'e̱ Dios myu̶k'ajtu̶ñ. 5Wan je̱'e̱ mu̶bu̶jku̶ñ jim miich mbaatku̶xu̶ch ma je̱'e̱ Dios myu̶k'ajtu̶ñ y ka'p jímu̶ch ma je̱'e̱ ja'ay wyij'ajt kye̱j'ajtu̶ñ ayuuku̶ñ.

Dios je̱'e̱ tyu̶y'ajt xyajnejwu̶u̶yu̶m ajku̶xy mu̶u̶d je̱'e̱ y'Espíritu

6Peru̶ ma je̱'e̱ mu̶dyiibu̶ tu'uda'agy tu̶ mu̶bu̶jknu̶ju̶ñ nyajmu̶dmu̶dyaaku̶mby je̱'e̱ wijypyu̶ kejypyu̶ ayuuk. Peru̶ ka'p jye̱'e̱ju̶ch je̱'e̱ ja'ay wijy kejypyu̶ y'ayuuk, je̱'e̱ mu̶dyiibu̶ ya naaxwiiñ ku̶'u̶m tu̶ yajkojyu̶ñ ni je̱'e̱ mu̶dyiibu̶ je̱'e̱ naaxwiiñ ane̱'e̱mbu̶ñ, je̱'e̱ mu̶dyiibu̶ tzojku̶ adu̶goyu̶'u̶waanu̶byu̶ñ ajku̶xy. 7Je̱' je̱'e̱ ja'ay nyajmu̶dmu̶dyaaku̶mby je̱'e̱ Dios wyiju̶ñ kye̱ju̶ñ yu'uchpyu̶, je̱'e̱ yu'uchpyu̶ je̱'e̱ mu̶dyiibu̶ je̱'e̱ Dios jékyu̶p niwinmayu̶u̶yu̶ñ maabu̶ je̱'e̱ naaxwiiñ najty ka'p yajkojyñu̶ju̶ñ neby je̱'e̱ n'oy'ajtu̶ñ wiinu̶u̶xu̶u̶ nbaattu̶mu̶chu̶ñ ajku̶xy. 8Adaa ayuuk, je̱' adaa je̱'e̱ mu̶dyiibu̶ je̱'e̱ mu̶j'ane̱'e̱mbu̶du̶jk ka'p winju̶wu̶u̶ygyu̶xyu̶ñ je̱'e̱ mu̶dyiibu̶ ya tzu̶naay jugy'ajtku̶xpu̶ñ ma adayaaba naaxwiiñu̶ñ, ko u̶xyu̶py tu̶ okwinju̶wu̶u̶ygyu̶xy ka'p u̶xyu̶py je̱'e̱ Windzú̶n Jesucristo yajcruutzpejty ajku̶xy je̱'e̱ mu̶dyiibu̶ je̱'e̱ oy'ajt niwindzu̶n'ajtpu̶ñ. 9Peru̶ je̱' ko du'un je̱'e̱ Dios ñaky myu̶na'añ:

“Dios tu̶ je̱'e̱ ja'ay yajnibu̶dagu̶'u̶y mo'owa'añ je̱'e̱ mu̶dyiibu̶ tzojku̶p ju̶wu̶u̶yu̶bu̶ñ ajku̶xy,

ku̶xyu̶ tii je̱'e̱ mu̶dyiibu̶ ka'p ni pu̶n ixyñu̶, je̱'e̱ mu̶dyiibu̶ ka'p ni pu̶n mu̶doyñu̶

y je̱'e̱ mu̶dyiibu̶ ka'p ni pu̶n winmayñu̶.”

10Adaaju̶tz je̱' je̱'e̱ mu̶dyiibu̶ je̱'e̱ Dios tu̶ xyajnejwu̶u̶yu̶mu̶ñ ajku̶xy mu̶u̶d je̱'e̱ y'Espíritu, je̱'e̱ Espíritu je̱'e̱ mu̶dyiibu̶ ku̶xyu̶ tii ku̶'u̶yo'oby tekyyo'oybyu̶ñ u̶xtu̶ je̱'e̱baad kyu̶'u̶yo'oby tyekyyo'oby neby je̱'e̱ Dios wyinmayu̶ñ.

11¿Pu̶n ja'ay da'a mu̶baad oknejwu̶'u̶y neby je̱'e̱ wiingpu̶ ja'ay jootjooty winma'añjyooty tyajy myayu̶ñ? Je̱'e̱ ja'ay je̱'e̱ kyu̶'u̶mwinma'añ ku̶'u̶m nejwu̶u̶by neby je̱'e̱ jyu̶wu̶'u̶ñ jiiby jootjooty winma'añjyooty tyajy myayu̶ñ. Y nandu'un jyaty mu̶u̶d je̱'e̱ Dios, je̱'e̱ Dios y'Espíritu nejwu̶u̶ydyaaby neby je̱'e̱ Dios jiiby jootjooty winma'añjyooty tyajy myayu̶ñ. 12Y u̶u̶ch ajtu̶m ajku̶xy ka'p je̱'e̱ Dios je̱'e̱ naaxwiiñjya'ay jyu̶wu̶'u̶ñ tu̶ xymyooyu̶m ajku̶xy, je̱'e̱ Espíritu je̱'e̱ Dios tu̶ xymyooyu̶m ajku̶xy je̱'e̱ mu̶dyiibu̶ jiiby tzomb ma je̱'e̱ Diosu̶ñ, neby nwinju̶wu̶u̶yu̶mu̶chu̶ñ ajku̶xy je̱'e̱ mu̶dyiibu̶ je̱'e̱ Dios tu̶ xymyooyu̶mu̶ñ ajku̶xy myay'ajtu̶ñ gyu̶xpu̶. 13Adaa ayuuk tu̶y'ajt u̶u̶ch nmu̶dyaakku̶xypy je̱'e̱ mu̶dyiibu̶ u̶u̶ch je̱'e̱ Dios y'Espíritu tu̶ xyaj'u̶xpu̶jkku̶xyu̶ñ, y ka'p jye̱'e̱ju̶ch je̱'e̱ ayuuk je̱'e̱ mu̶dyiibu̶ ku̶'u̶mjoot ku̶'u̶mwinma'añ tu̶ njajtu̶mu̶ñ ajku̶xy. Y du'un u̶u̶ch adaa ayuuk tu̶y'ajt ngapxtu̶u̶gu̶xy, je̱'e̱ mu̶dyiibu̶ je̱'e̱ Dios tyuumbyu̶ñ ma je̱'e̱ ja'ay je̱'e̱ mu̶dyiibu̶ je̱'e̱ Espíritu Santo jootjooty winma'añjyooty mu̶dajtku̶xpu̶ñ.

14Pu̶n je̱'e̱ Espíritu Santo ka'p mu̶dajtu̶, ka'p je̱'e̱ ku'ubú̶ky je̱'e̱ mu̶dyiibu̶ je̱'e̱ Dios y'Espíritu ja'amooyu̶bu̶ñ, du'un je̱'e̱ myu̶na'añ ko je̱'e̱ du'umbu̶ tu̶y'ajt chuwinma'añ lyooku̶winma'añdyu̶ch. Y nan ka'p je̱'e̱ du'umbu̶ tu̶y'ajt mu̶baad winju̶wu̶'u̶y, je̱' ko ka'p je̱'e̱ du'umbu̶ tu̶y'ajt yajwinju̶wu̶'u̶y pu̶nu̶ ka'p je̱'e̱ Espíritu Santo naty nmu̶dajtu̶m. 15Peru̶ pu̶n je̱'e̱ Dios y'Espíritu mu̶dajtpu̶ñ ñejwu̶ydyaaby je̱'e̱ ku̶xyu̶ oy tii, neby je̱'e̱ ja'ay joot winma'añ mu̶datyu̶ñ, y ni pu̶n je̱'e̱ mu̶baad kya'awin'u̶u̶ñyii. 16Je̱' ko du'un je̱'e̱ Dios ñaky myu̶na'añ: “¿Pu̶n da'a oknejwu̶u̶by neby je̱'e̱ windzú̶n Dios wyinmayu̶ñ? ¿Pu̶n da'a mu̶baad y'ok'yaj'u̶xpu̶gyii?” Peru̶ u̶u̶ch ajtu̶m ajku̶xy nmu̶dajtu̶mby je̱'e̱ Cristo wyinma'añ.

Currently Selected:

1 Corintios 2: MIXE

Highlight

Copy

Compare