1 Corintios 1

Je̱'e̱ yajpókxu̶ñ

1U̶u̶ch Pablo, Dios u̶u̶ch tu̶ xymyu̶j'ya'axy je̱' ko je̱' du'un tzojkp ko u̶u̶ch je̱'e̱ Jesucristo xy'apóstol'ádu̶ch. Kipxy mu̶u̶d je̱'e̱ nmu̶gu'ug Sóstenes, 2yam nijayu̶u̶ygyu̶xy miich je̱'e̱ mu̶bu̶jkpu̶du̶jk je̱'e̱ Dios jya'ay je̱'e̱ mu̶dyiibu̶ jim Corinto kajpt tzu̶naaygyu̶xpu̶ñ, je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xy y tu̶ yajni'ipu̶jku̶gu̶xy Cristo Jesús kyu̶xpu̶ ko yajpaatku̶xu̶ch ma je̱'e̱ jya'ayu̶ñ tyuunu̶xu̶ch je̱'e̱ tyuung, kipxy nigu̶xyu̶ mu̶u̶d je̱'e̱ mu̶dyiibu̶ xii yaa je̱'e̱ nWindzú̶n Jesucristo xyu̶u̶ mu̶yaaxp o'owu̶dajtku̶xpu̶ñ, u̶u̶ch je̱'e̱ nWindzú̶n ajtu̶m ajku̶xy y je̱' Wyindzú̶n ajku̶xy. 3Wan je̱'e̱ Dios u̶u̶ch je̱'e̱ nDeedy ajtu̶m y je̱'e̱ Windzú̶n Jesucristo oy'ajt may'ajt tuñ ma miich ajku̶xyu̶ñ y xyajjootkujk'ajtku̶xu̶ch.

Neby je̱'e̱ kunukxu̶ñ yajpaadyu̶ñ Cristo kyu̶xpu̶

4Je'emy u̶u̶ch je̱'e̱ Dioskujuuyu̶p jaboom jaboom nyeky ma je̱'e̱ Diosu̶ñ mu̶u̶d miich kyu̶xpu̶ ajku̶xy, mu̶u̶d je̱'e̱ oy'ajt may'ajt mu̶dyiibu̶ je̱'e̱ Dios tu̶ tuñ ma miich ajku̶xyu̶ñ mu̶u̶d je̱'e̱ Cristo Jesús kyu̶xpu̶. 5Je̱' ko mu̶u̶d je̱' Cristo kyu̶xpu̶, je̱'e̱ Dios je̱'e̱ mu̶jpu̶ oy'ajtu̶ñ tu̶ xymyooygyu̶xy, neby je̱'e̱ mgapxy m'ayuuk mu̶baad mbaatku̶xy neby je̱'e̱ y'oy'ajtu̶ñ mnimu̶dyaakku̶xu̶chu̶ñ y je̱'e̱ wij'ajt ke̱j'ajtu̶ñ. 6Y du'un je̱'e̱ Cristo y'ayuuk tyu̶y'ajt tu̶ ñi'igu̶xu̶'u̶gy ma miich ajku̶xyu̶ñ ko jaanch tyu̶y'ajtu̶ch. 7Tu̶ je̱'e̱ Dios myu̶k'ajt xyñi'imooygyu̶xy y ka'p cham ni tii m'ok'yajmayjyajtku̶xnu̶, je'eyu̶ mjakja'ay'e̱jxku̶xy mu̶naa je̱'e̱ xu̶u̶ tiempo okpaady mu̶naa je̱'e̱ nWindzú̶n Jesucristo wyimbijtu̶m ajku̶xy ja'adu'ook ya naaxwiiñ. 8Dios xypyube̱jt xypyudu̶gu̶u̶ygyu̶xu̶p neby tu'uda'agy m'ijtku̶xu̶chu̶ñ y ka'p m'u̶xtu̶gu̶'u̶wa'kku̶xu̶ch u̶xtu̶ mabaad je̱'e̱ xu̶u̶ tiempo myu̶baad'ajtnu̶, ka'pu̶ pu̶n xypyoky'ijxku̶xu̶ch ko naty je̱'e̱ nWindzú̶n Jesucristo wyimbijtu̶m ajku̶xy ja'adu'ook ya naaxwiiñ. 9Dios kyuydyuumby je̱'e̱ y'ayuuk je'emy neby naty tu̶ xyajwinwaanu̶u̶ygyu̶xyu̶ñ, y je̱' je̱' je̱'e̱ mu̶dyiibu̶ tu̶ xymyu̶j'yaaxku̶xyu̶ñ ko tu'ugyu̶ mdzu̶naay mjugy'ajtku̶xu̶ch mu̶u̶d je̱'e̱ y'ung Jesucristo, je̱'e̱ nWindzú̶n ajtu̶m ajku̶xy.

Naymyu̶dzibu̶'u̶wu̶u̶ ma je̱'e̱ mu̶bu̶jkpu̶du̶jku̶ñ

10“Mu̶gu'uktu̶jk, cham nmu̶nukxtaakku̶xy mu̶u̶d je̱'e̱ nWindzú̶n Jesucristo xyu̶u̶ ajtu̶m ajku̶xy ko nay'ayuukwinju̶wu̶u̶yu̶gu̶x y ka'p mnaymyu̶dzibu̶u̶yu̶gu̶xy. Tzu̶naay jugy'ajtku̶x tu'ugyu̶ xi'ig xon, tu'ug'aa tu'ugjoot y tu'ugwinma'añ. 11Nmu̶na'añu̶ch du'un, mu̶gu'uktu̶jk ajku̶xy, je̱' ko tu̶ u̶u̶ch je̱'e̱ Cloé myu̶gu'ugtu̶jk du'un xy'awaanu̶ ajku̶xy ko miich mnaymyu̶jootma'ttu̶gu̶xy amíñ u̶xyu̶py. 12Je̱' u̶u̶ch du'un ndijpy ko miich du'un nije̱' mmu̶naangu̶xy: “Je̱'e̱ Pablo y'ayuuk u̶u̶ch nbanú̶kxu̶py”; nije̱' mmu̶naangu̶xy: “Je̱'e̱ Apolos y'ayuuk u̶u̶ch nbanú̶kxu̶py”. Nije̱' mmu̶naangu̶xy: “Je̱'e̱ Pedro y'ayuuk u̶u̶ch nbanú̶kxu̶py”; y nije̱' mmu̶naangu̶xy: “Je̱'e̱ Cristo y'ayuuk u̶u̶ch nbanú̶kxu̶py.” 13¿Nej maybyu̶ky je̱'e̱ Cristo da'a tu̶ ñayyajwa'kxyiija? ¿Nej je̱'e̱ Pablo da'a yajcruutzpe̱jtu̶ju̶ mu̶u̶d miich kyu̶xpu̶ ajku̶xy? ¿Nej tu̶ miich mnu̶u̶be̱jtku̶xy mu̶u̶d je̱'e̱ Pablo xyu̶u̶? 14¡Dioskujuuyu̶p je̱'e̱ Dios ko ka'p miich ni tu'ug tu̶ nyajnu̶u̶be̱jtku̶xy, je'eyu̶du̶'ajty je̱'e̱ Crispo y je̱'e̱ Gayo! 15Y du'unu̶tz, ka'p du'un mu̶baad pu̶n myu̶na'añ ko tu̶ ñu̶u̶be̱jtku̶xy mu̶u̶d u̶u̶ch je̱'e̱ nxu̶u̶. 16Nan nyajnu̶u̶be̱jtu̶ch je̱'e̱ Estéfanas jyuugy myu̶gu'ug ajku̶xy, peru̶ ka'p u̶u̶ch n'okja'aymye̱jtznu̶ pu̶nu̶ nyajnu̶u̶be̱jtu̶ch je̱'e̱ wiingpu̶, 17je̱' ko ka'p u̶u̶ch je̱'e̱ Cristo ja'ay yajnu̶u̶be̱jtpu̶ xykyejxy, je̱' u̶u̶ch je̱'e̱ xykyejxy ko u̶u̶ch je̱'e̱ aanu̶mu̶ ni'idzooku̶ñ ngapxwa'kxu̶ch, y ka'p u̶u̶ch je̱'e̱ u̶xpu̶kytyu̶jk wyij'ajt kye̱j'ajtu̶ñ nyajtuunu̶, ka'pu̶ je̱'e̱ myu̶k'ajt du'un tyu̶góyu̶ch neby je̱'e̱ Cristo cruutzkú̶xp y'o'kyu̶ñ mu̶u̶d u̶u̶ch kyu̶xpu̶ nboky ajtu̶m ajku̶xy.

Cristo, Dios myu̶k'ajt y wyij'ajt kye̱j'ajtu̶ñ je̱'e̱ myu̶dajtu̶py

18Ko je̱'e̱ ayuuk tu̶y'ajt jya'ayajnimu̶dya'agy neby je̱'e̱ Cristo y'o'kyu̶ñ jim cruutzkú̶xp, looku̶ o'ku̶ñ je̱'e̱ ja'ay tijku̶xy je̱'e̱ mu̶dyiibu̶ ju̶bu̶ktuum nú̶kxku̶xpu̶ñ; peru̶ adayaaba ayuuk tu̶y'ajt Dios myu̶k'ajt adaa mu̶u̶d u̶u̶ch ajtu̶m ajku̶xy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ nbadaanu̶mbyu̶ñ ajku̶xy. 19Du'un neby je̱'e̱ Dios ñaky myu̶na'añu̶ñ:

“Nyajku'udu̶gooyu̶byu̶ch je̱'e̱ wijyjya'ay wyij'ajt kye̱j'ajtu̶ñ ajku̶xy

y n'u̶xtiju̶byu̶ch je̱'e̱ kuwinma'añbyu̶ ja'ay jyoot wyinma'añ ajku̶xy.”

20¿Ma je̱'e̱ wijyjya'ay tyuungu̶xy y je̱'e̱ yaj'u̶xpu̶jkpu̶, y je̱'e̱ mu̶dyiibu̶ je̱'e̱ y'u̶xpu̶jku̶ñ yajtzibu̶u̶ygyu̶xpu̶ñ, je̱'e̱ u̶xpu̶jku̶ñ mu̶dyiibu̶ ya tuumb ma adayaaba naaxwiiñu̶ñ? ¡Dios tzuuwinma'añ looku̶winma'añ je̱'e̱ tu̶ yaj'awimbíty je̱'e̱ mu̶dyiibu̶ ya naaxwiiñ wij'ajt ke̱j'ajtpu̶ñ! 21Dios, ma je̱'e̱ wyij'ajt kye̱j'ajtu̶ñ ñibu̶daagu̶u̶y je̱'e̱ du'un ko je̱'e̱ ja'ay je̱'e̱ mu̶dyiibu̶ je̱'e̱ naaxwiiñ winma'añ paduungu̶xpu̶ñ, je̱'e̱ y'ayuuk tyu̶y'ajt ka'p wyinju̶wu̶u̶yu̶xu̶ch ajku̶xy mu̶u̶d je̱'e̱ wij'ajt ke̱j'ajtu̶ñ je̱'e̱ mu̶dyiibu̶ ya yajpaatp ma adayaaba naaxwiiñu̶ñ. Ni'igyu̶ je̱'e̱ du'un nibu̶daagu̶u̶y ko je̱'e̱ ni'idzooku̶ñ paatku̶xu̶ch ko je̱'e̱ y'ayuuk tyu̶y'ajt myu̶bu̶jkku̶xu̶ch ajku̶xy, oy naty adayaaba ayuuk tu̶y'ajt du'un ja'amu̶doogu̶xpu̶ neby je̱'e̱ tzuuwinma'añ looku̶winma'añdyu̶ñ.

22Je̱'e̱ judío ja'ay ijxpe̱jt mu̶jwinma'añbyu̶ je̱'e̱ y'u̶xtaaygyu̶xypy, y je̱'e̱ griego ja'ay je̱'e̱ wij'ajt ke̱j'ajtu̶ñ je̱'e̱ y'u̶xtaaygyu̶xypy, 23peru̶ u̶u̶ch ajku̶xy je̱' u̶u̶ch ngapxwa'kxku̶xypy je̱'e̱ Cristo#1.23 Cristo. je̱'e̱ mu̶dyiibu̶ tu̶ yajcruutzpedyiiju̶ñ. Y adaa je̱' je̱'e̱ mu̶dyiibu̶ je̱'e̱ judío ja'ay ka'p ku'ubu̶jkku̶xyu̶ñ y je̱'e̱ mu̶dyiibu̶ je̱'e̱ ka'pu̶ jyudíoja'ayu̶ch tyijku̶xypyu̶ñ ko chuwinma'añ lyooku̶winma'añdyu̶ch. 24Peru̶ mu̶u̶d je̱'e̱ mu̶dyiibu̶ je̱'e̱ Dios tu̶ wyin'ijxu̶gu̶xyu̶ñ, wan judío ja'ay o ka'pu̶ jyudíoja'ayu̶ch ajku̶xy, adayaaba Cristo je̱' je̱'e̱ mu̶dyiibu̶ je̱'e̱ Dios myu̶k'ajt y wyij'ajt kye̱j'ajtu̶ñ mu̶dajtu̶byu̶ñ. 25Peru̶ je̱'e̱ mu̶dyiibu̶ je̱'e̱ ja'ay tyijpyu̶ñ ko chuwinma'añ looku̶winma'añdyu̶ch je̱'e̱ mu̶dyiibu̶ jim yajpaatp ma je̱'e̱ Diosu̶ñ, ni'igyu̶ wij'ajt winma'añ je̱', ni'igu̶ ka'p je̱'e̱ wij'ajt ke̱j'ajtu̶ñ je̱'e̱ mu̶dyiibu̶ je̱'e̱ naaxwiiñjya'ay ku̶xyu̶ jya'amu̶dajtypyu̶ñ; y je̱'e̱ mu̶dyiibu̶ je̱'e̱ ja'ay tyijpyu̶ñ ko je̱'e̱ mu̶k'ajt ka'p mu̶u̶du̶ch je̱'e̱ mu̶dyiibu̶ jim yajpaatp ma je̱'e̱ Diosu̶ñ, ni'igyu̶ mu̶k'ajt je̱'e̱ mu̶u̶du̶ch ni'igu̶ ka'p je̱'e̱ mu̶k'ajt je̱'e̱ mu̶dyiibu̶ je̱'e̱ naaxwiiñjya'ay ku̶xyu̶ jya'amu̶dajtypyu̶ñ. 26“Mu̶gu'uktu̶jk, mu̶baad mnejwu̶u̶ygyu̶xy ko je̱'e̱ Dios tu̶ xywyin'ijxku̶xy oy miich mja'aniwe̱e̱nu̶ju̶ch ajku̶xy je̱'e̱ mu̶dyiibu̶ je̱'e̱ wij'ajt winma'añ we̱e̱nu̶ mu̶u̶du̶ñ du'un neby je̱'e̱ naaxwiiñjya'ay winma'añdyu̶ñ, y niwe̱e̱nu̶ miich ajku̶xy je̱'e̱ mu̶dyiibu̶ je̱'e̱ ane̱'e̱mu̶ñ mu̶dajtku̶xpu̶ñ o je̱'e̱ mu̶dyiibu̶ je̱'e̱ myu̶j'áp myu̶jteedy tii niwindzu̶n'ajtku̶xpu̶ñ. 27Dios, neby je̱'e̱ ja'ay mu̶baad yajtzo'oydyúñu̶ñ je̱'e̱ mu̶dyiibu̶ wijy kejy naydyiju̶gu̶xpu̶ñ, tu̶ je̱'e̱ ja'ay win'ixy je̱'e̱ mu̶dyiibu̶ ya naaxwiiñ tzuu poj tyijku̶xypyu̶ñ; y neby je̱'e̱ ja'ay mu̶baad yajtzo'oydyúñu̶ñ je̱'e̱ mu̶dyiibu̶ tii niwindzu̶n'ajtku̶xpu̶ñ, tu̶ je̱'e̱ ja'ay win'ixy je̱'e̱ mu̶dyiibu̶ ya naaxwiiñ tyijku̶xypyu̶ñ ko je̱'e̱ mu̶k'ajt ka'p mu̶dajtku̶xy. 28Dios tu̶ je̱'e̱ ja'ay win'ixy je̱'e̱ mu̶dyiibu̶ yaj'u̶xtijku̶xpu̶ñ y je̱'e̱ mu̶dyiibu̶ ka'p yajmu̶j'ijx yajmu̶jpu̶daakku̶xyu̶ñ ya naaxwiiñ, je̱' u̶u̶ch du'un ndijpy je̱'e̱ mu̶dyiibu̶ ka'p chobaatku̶xyu̶ñ, neby je̱'e̱ ja'ay mu̶baad yajku'udu̶góyu̶ñ je̱'e̱ mu̶dyiibu̶ mu̶j ku̶xp naydyiju̶gu̶xpu̶ñ. 29Y ka'pu̶ ni pu̶n ñaygyu'umayu̶u̶ju̶ch Dios winduuy. 30Peru̶ je̱'e̱ Dios miich ku̶'u̶m tu̶ xyajtu'ugyu̶ju̶u̶ygyu̶xy mu̶u̶d je̱'e̱ Cristo Jesús, y je̱' du'un nandu'un tu̶ nibu̶dagu̶'u̶y ko je̱'e̱ wij'ajt ke̱j'ajt jim nbaattu̶mu̶ch ajku̶xy ma je̱'e̱ Crístoju̶ñ y ko Cristo kyu̶xpu̶ nbokyñi'iwaatzu̶mu̶ch ajku̶xy, tu̶ xywyin'ijxu̶m ajku̶xy ko nyajpaatu̶mu̶ch ajku̶xy ma je̱'e̱ Diosu̶ñ y pokywyinmekxyu̶ñ. 31Y du'unu̶tz, neby je̱'e̱ Dios ñaky myu̶na'añu̶ñ: “Pu̶nu̶ jii pu̶n ñaygyu'umaya'añyii, wan naygyu'umayii ti je̱'e̱ Windzú̶n Dios tu̶ tuñu̶ñ.”

Currently Selected:

1 Corintios 1: MIXE

Highlight

Copy

Compare