1 Corintios 14

Ko je̱'e̱ wiingpu̶ ayuuk yajkápxy

1Mu̶joottu̶gooygyu̶x neby mnaychojk mnayjyu̶wu̶u̶yu̶gu̶xu̶chu̶ñ, y nandu'un adzojkku̶x je̱'e̱ may'ajt je̱'e̱ mu̶dyiibu̶ je̱'e̱ Dios ñi'iyejkypyu̶ñ Espíritu Santo kyu̶xpu̶, je̱' ni'igyu̶ adzojkku̶x je̱'e̱ Dios y'ayuuk tyu̶y'ajt najtzkapxu̶'u̶wu̶u̶. 2Je̱'e̱ ja'ay mu̶dyiibu̶ je̱'e̱ wiingpu̶ ayuuk kapxpu̶ñ, je̱'e̱ Dios naty je̱'e̱ myu̶gapxypy y ka'p jya'ayu̶ch. Je̱' ko ka'p je̱'e̱ y'ayuuk ni pu̶n wyinju̶wu̶u̶yu̶xu̶. Je̱'e̱ mu̶dyiibu̶ kyapxypyu̶ñ je̱'e̱ ayuuk je̱' mu̶dyiibu̶ je̱'e̱ Espíritu Santo mooyu̶bu̶ñ, peru̶ ka'p je̱'e̱ ni pu̶n nejwu̶'u̶y tii du'un tyijpy ñigapxypyu̶ñ ayu'uch amechu̶. 3Peru̶ je̱'e̱ mu̶dyiibu̶ je̱'e̱ Dios y'ayuuk tyu̶y'ajt najtzkapxu̶u̶ybyu̶ñ, pyubejtypy je̱'e̱ myu̶gu'ug du'un neby je̱'e̱ myu̶bu̶jku̶ñ du'un jyakyé̱kku̶xu̶chu̶ñ, y neby du'un yajku'ubu̶jkku̶xu̶chu̶ñ y jootmu̶kmooygyu̶xu̶chu̶ñ. 4Je̱'e̱ mu̶dyiibu̶ je̱'e̱ wiingpu̶ ayuuk kapxpu̶ñ, ku̶'u̶m je̱'e̱ myu̶bu̶jku̶ñ jyak'yeegy; peru̶ je̱'e̱ mu̶dyiibu̶ je̱'e̱ Dios y'ayuuk tyu̶y'ajt najtzkapxu̶u̶ybyu̶ñ, jyak'yaj'yé̱ku̶py je̱'e̱ mu̶bu̶jkpu̶du̶jk myu̶bu̶jku̶ñ ajku̶xy.

5U̶u̶ch nja'atzojkypyu̶ch ko u̶xyu̶py miich je̱'e̱ wiingpu̶ ayuuk nigu̶xyu̶ mgápxku̶xy; peru̶ ni'igu̶ oy ko je̱'e̱ Dios y'ayuuk tyu̶y'ajt mnajtzkapxu̶u̶yu̶ch ajku̶xy, adaa ni'igyu̶ oy ni'igu̶ ka'p ko je̱'e̱ wiingpu̶ ayuuk mgápxku̶xu̶ch, nan oy it adaa nandu'un mu̶'it ko naty jii, pu̶n kapxtu̶wu̶bu̶ñ neby du'un wyimbu̶dzu̶myu̶ñ, neby je̱'e̱ mu̶bu̶jkpu̶du̶jk myu̶bu̶jku̶ñ du'un jyakyé̱kku̶xu̶chu̶ñ. 6Paady mu̶gu'uktu̶jk, ka'p du'un ni tii pube̱jtu̶ñ mbaatku̶xu̶ch ko nu̶kxy n'okku'ijxku̶xy y n'okmu̶gápxku̶xu̶ch mu̶u̶d je̱'e̱ wiingpu̶ ayuuk ma jya'apadyii nyajmu̶dmu̶dyaakku̶xu̶ch neby je̱'e̱ Dios y'ayuuk tyu̶y'ajt tu̶ xyajnejwu̶u̶yu̶mu̶ñ ajku̶xy, o je̱'e̱ tu̶y'ajtpu̶ u̶xpu̶jk'ajtu̶ñ, o ma jya'apadyii nnajtzkapxu̶u̶yu̶chu̶ch je̱'e̱ Dios y'ayuuk tyu̶y'ajt ma miich ajku̶xyu̶ñ, o je̱'e̱ u̶xpu̶jku̶ñ nije̱'.

7Pu̶nu̶ ka'p je̱'e̱ xuuxk je̱'e̱ mu̶dyiibu̶ je̱'e̱ ja'ay yajxuuxypy yajkooby tu̶gachjyaty myu̶na'añ, du'un neby je̱'e̱ tzajpkepyxuuxk o je̱'e̱ arpu̶, ka'p u̶xyu̶py je̱'e̱ yajmu̶dogugu̶'u̶y mu̶dyiibu̶ tzajpkepyxuuxk o mu̶dyiibu̶ arpu̶. 8Y pu̶nu̶ ka'p je̱'e̱ trompeta oy xyu'uxy ma je̱'e̱ tzip tyuna'añyii jyada'añyii, ka'p ni pu̶n ñayñi'ixu̶'u̶wu̶u̶ju̶ch chiptúnu̶ch. 9Nandu'un jyaty ma miich ajku̶xyu̶ñ: pu̶nu̶ ka'p je̱'e̱ ayuuk mgápxku̶xy je̱'e̱ mu̶dyiibu̶ yajwinju̶wu̶'u̶wu̶bu̶ñ, ¿neby je̱'e̱ du'un yajnejwu̶'u̶wu̶ch je̱'e̱ mu̶dyiibu̶ du'un mja'akápxypy mja'amu̶dyaakku̶xypyu̶ñ? ¡Mbojkápxp mbojmu̶dyaakp naty du'un nigoo ajku̶xy! 10Jaanch je̱' ko je̱'e̱ ayuuk ya naaxwiiñ may yajpaady tu̶gachjyaty, y nan jaanch je̱'e̱ ku̶xyu̶ yajwinju̶wu̶'u̶y pu̶njaty je̱'e̱ du'umbu̶ ayuuk kápxku̶xpu̶ñ. 11Peru̶ pu̶nu̶ ka'p u̶u̶ch je̱'e̱ du'umbu̶ ayuuk nwinju̶wu̶'u̶y neby du'un wyimbu̶dzu̶myu̶ñ, jaybyokxyjya'ayu̶ch naty ma je̱'e̱ mu̶dyiibu̶ u̶u̶ch naty xymyu̶gapxpu̶ñ, y je̱' jaybyokxyjya'ay je̱'e̱ naty ma u̶u̶chu̶ñ. 12Paady, neby je̱'e̱ may'ajt m'adzojkku̶xyu̶ñ je̱'e̱ mu̶dyiibu̶ je̱'e̱ Dios ñi'iyejkypyu̶ñ Espíritu Santo kyu̶xpu̶, mu̶joottu̶gooygyu̶x neby mu̶j may mmu̶dajtku̶xu̶chu̶ñ je̱'e̱ mu̶dyiibu̶ je̱'e̱ mu̶bu̶jkpu̶du̶jk myu̶bu̶jku̶ñ jak'yaj'yé̱kku̶xu̶bu̶ñ ajku̶xy.

13Paady, pu̶n je̱'e̱ wiingpu̶ ayuuk kapxpu̶ñ, mu̶bu̶jktzoogu̶x je̱'e̱ Dios wan je̱'e̱ mu̶k'ajtu̶ñ xymyooygyu̶xu̶ch neby nandu'un mgapxtu̶u̶gu̶xu̶chu̶ñ. 14Pu̶nu̶ u̶u̶ch je̱'e̱ Dios nmu̶bu̶jktzooby mu̶u̶d je̱'e̱ wiingpu̶ ayuuk, tu̶y'ajt ko u̶u̶ch je̱'e̱ Dios nmu̶bu̶jktzóy mu̶u̶d u̶u̶ch je̱'e̱ njoot nju̶wu̶'u̶ñ, peru̶ ka'p u̶u̶ch je̱'e̱ nwinju̶wu̶'u̶y tii u̶u̶ch du'un ngapxypyu̶ñ. 15¿Y tii u̶u̶ch mu̶baad nduñ? Pues nmu̶bu̶jktzówu̶byu̶ch je̱'e̱ Dios mu̶u̶d u̶u̶ch je̱'e̱ njoot nju̶wu̶'u̶ñ, peru̶ nan mu̶u̶d u̶u̶ch je̱'e̱ njoot nwinma'añ nandu'un. Nwin'u̶w nwinya'axu̶byu̶ch je̱'e̱ Dios mu̶u̶d u̶u̶ch je̱'e̱ njoot nju̶wu̶'u̶ñ, peru̶ nan mu̶u̶d u̶u̶ch je̱'e̱ njoot nwinma'añ nandu'un. 16Pu̶nu̶ mgu'umaaby m'o'owu̶dajtypy je̱'e̱ Dios miich je'eyu̶du̶'ajty mu̶u̶d je̱'e̱ mjoot mju̶wu̶'u̶ñ, y je̱'e̱ mu̶dyiibu̶ amdo'ijtpu̶ñ ka'p je̱'e̱ ayuuk winju̶wu̶'u̶wu̶ch, ka'p je̱'e̱ Dioskujuuyu̶p mu̶baad yeky mu̶u̶d miich, je̱' ko ka'p je̱'e̱ winju̶wu̶'u̶wu̶ch neby naty mja'amu̶na'añu̶ñ. 17Oy je̱'e̱ Dioskujuuyu̶p naty oy yajxón tu̶ mja'ayéky, peru̶ ka'p je̱'e̱ tii pube̱jtu̶ñ paadu̶ch je̱'e̱ mu̶dyiibu̶ je̱'e̱ ayuuk naty ka'awinju̶wu̶u̶ybyu̶ñ je̱'e̱ mu̶dyiibu̶ je̱'e̱ myu̶bu̶jku̶ñ jak'yaj'yé̱kku̶xu̶bu̶ñ. 18Nyejkypyu̶ch je̱'e̱ Dioskujuuyu̶p ma je̱'e̱ Diosu̶ñ je̱' ko u̶u̶ch je̱'e̱ wiingpu̶ ayuuk ni'igyu̶ may ngapxypy ni'igu̶ ka'p miich nigu̶xyu̶ ajku̶xyñu̶ba. 19Peru̶ ma je̱'e̱ mu̶bu̶jkpu̶du̶jk ajku̶xyu̶ñ ni'igu̶ oy ko u̶u̶ch je̱'e̱ ayuuk mu̶gooxk ngápxu̶ch je̱'e̱ mu̶dyiibu̶ yajwinju̶wu̶u̶ybyu̶ñ, neby u̶u̶ch je̱'e̱ wiingpu̶ ja'ay nyaj'u̶xpu̶jkku̶xu̶chu̶ñ, ni'igu̶ ka'p ko u̶u̶ch je̱'e̱ wiingpu̶ ayuuk majk mil ngápxu̶ch, je̱'e̱ mu̶dyiibu̶ ka'p pu̶n winju̶wu̶'u̶yu̶ñ.

20“Mu̶gu'uktu̶jk, ka'p je̱'e̱ winma'añ du'un mmu̶dajtku̶xy neby je̱'e̱ pi'k'ana'ktu̶jk ajku̶xyu̶ñ. Du'un naybyu̶daaku̶gu̶x neby je̱'e̱ pi'k'ana'ktu̶jk je̱'e̱ mu̶dyiibu̶ je̱'e̱ ju̶bu̶kpu̶ ka'p nejwu̶u̶ygyu̶xyu̶ñ, peru̶ ja'ay'ajtku̶x du'un neby je̱'e̱ mu̶j'ana'ktu̶jk jya'ay'ajtku̶xyu̶ñ, je̱'e̱ mu̶dyiibu̶ je̱'e̱ jyoot wyinma'añ tu̶ kya'pxku̶xnu̶ju̶ñ. 21Ma je̱'e̱ Dios y'ane̱'e̱mu̶ñ nakyu̶ñ du'un jiiby kyuja'ayu̶ch: “Nmu̶gapxe̱e̱mbyu̶ch je̱'e̱ Israel ja'ay mu̶u̶d je̱'e̱ wiingpu̶ ayuuk, y nmu̶gapxe̱e̱mbyu̶ch mu̶u̶d je̱'e̱ wiingpu̶ ja'ay mu̶dyiibu̶ wiing naax wiing kajpt tzóngu̶xpu̶ñ wan u̶u̶ch je̱'e̱ n'ayuuk ndu̶y'ajt xyajnajxu̶ch ajku̶xy ma je̱' ajku̶xyu̶ñ, peru̶ ni du'un u̶u̶ch je̱'e̱ n'ayuuk ndu̶y'ajt xykya'akweentu̶tuunu̶ch ajku̶xy, du'un je̱'e̱ Windzú̶n Dios myu̶na'añ.” 22Y du'unu̶tz ko je̱'e̱ wiingpu̶ ayuuk ngápxu̶mu̶ch ajku̶xy, je̱' ijxpe̱jt'ajtp ma je̱'e̱ mu̶dyiibu̶ je̱'e̱ ayuuk tu̶y'ajt ka'p mu̶bu̶jkku̶xyu̶ñ, y ka'p jyímu̶ch ma je̱'e̱ mu̶bu̶jkpu̶du̶jk ajku̶xyu̶ñ. Peru̶ je̱'e̱ Dios y'ayuuk tyu̶y'ajt naty nnajtzkapxu̶u̶yu̶ ajtu̶m ajku̶xy, je̱' ijxpe̱jt'ajtp ma je̱'e̱ mu̶bu̶jkpu̶du̶jku̶ñ, y ka'p jyímu̶ch ma je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ. 23Y ko je̱'e̱ mu̶bu̶jkpu̶du̶jk naty nigu̶xyu̶ ñayyo'oymyujku̶gu̶xy, y pu̶nu̶ nigu̶xyu̶ je̱'e̱ wiingpu̶ ayuuk naty kápxku̶xy, y ko je̱'e̱ ja'ay tu'ug tyu̶gu̶'u̶wu̶ch amdo'ijtpu̶ nigoo ma je̱' ajku̶xyu̶ñ o je̱'e̱ mu̶dyiibu̶ je̱'e̱ ayuuk tu̶y'ajt ka'p mu̶bu̶kyu̶ñ, chi du'un myu̶na'anu̶ch ko miich tu̶ mlooku̶ju̶u̶ygyu̶xnu̶. 24Peru̶ ko naty je̱'e̱ Dios y'ayuuk tyu̶y'ajt nigu̶xyu̶ najtzkapxu̶u̶yu̶ ajku̶xy, y tyu̶gu̶'u̶wu̶ch je̱'e̱ ja'ay tu'ug ma je̱' ajku̶xyu̶ñ je̱'e̱ mu̶dyiibu̶ je̱'e̱ ayuuk tu̶y'ajt ka'p mu̶bu̶kyu̶ñ, o je̱'e̱ amdo'ijtpu̶ nigoo, kyu'ubú̶gu̶py je̱'e̱ pyoky kyu̶dyeey, y je̱' ku̶'u̶m nayjyu̶wu̶'u̶wu̶u̶ju̶p ko du'un ka'p y'óyu̶ch neby chu̶na'ay jyugy'atyu̶ñ ko du'un mu̶dówu̶ch neby je̱'e̱ mu̶bu̶jkpu̶du̶jk je̱'e̱ Dios y'ayuuk tyu̶y'ajt naty nigu̶xyu̶ najtzkapxu̶u̶ygyu̶xyu̶ñ. 25Y du'un du'un wa'adzu̶ ñi'igu̶xu̶'u̶gu̶ch neby je̱'e̱ joot winma'añ mu̶u̶du̶chu̶ñ, y o'owu̶dátu̶ch je̱'e̱ Dios kojxtu̶na'a, y myu̶na'anu̶ch ko je̱'e̱ Dios jaanch yajpaady ma miich ajku̶xyu̶ñ.

Tuungu̶x ku̶xyu̶ mu̶u̶d je̱'e̱ tu'uda'agy'ajtu̶ñ y oy yajxón

26Du'un neby tu̶ nnu̶maaygyu̶xyu̶ñ, mu̶gu'uktu̶jk, ko naty miich mnayyo'oymyujku̶gu̶xy, nije̱' je̱'e̱ salmos mu̶baad m'u̶u̶gu̶xy, nije̱' mu̶baad yaj'u̶xpu̶jkku̶xy o kapxnajxku̶xu̶ch neby je̱'e̱ Dios naty tu̶ yajnejwu̶u̶yu̶gu̶xyu̶ñ, kápxku̶xu̶ch je̱'e̱ wiingpu̶ ayuuk, kapxtu̶u̶gu̶xu̶ch neby je̱'e̱ wiingpu̶ ayuuk wyimbu̶dzu̶myu̶ñ. Peru̶ du'un ku̶xyu̶ tuungu̶x neby je̱'e̱ mmu̶bu̶jku̶ñ jyak'yé̱kku̶xu̶chu̶ñ. 27Y ko naty je̱'e̱ wiingpu̶ ayuuk pu̶n kapxy, me̱tzk je̱'e̱ ja'ay mu̶baad kapxy, o tu̶gu̶u̶g jidu̶baad, y nan nidu'ugjáty nidu'ugjáty; chi jadu'knáx kuaanu̶ je̱'e̱ yajkapxtu̶wu̶ch neby je̱'e̱ wiingpu̶ ayuuk naty wyimbu̶dzu̶myu̶ñ. 28Y pu̶nu̶ ka'p pu̶n ma je̱'e̱ mu̶bu̶jkpu̶du̶jku̶ñ je̱'e̱ mu̶dyiibu̶ je̱'e̱ wiingpu̶ ayuuk kapxtu̶u̶gu̶xu̶bu̶ñ, ni'igu̶ oy ko je̱'e̱ wiingpu̶ ayuuk ka'adimykápxku̶xu̶ch, y wan aajooty jootjooty kápxku̶xy y mu̶gápxku̶xu̶ch je̱'e̱ Dios. 29Nandu'un, pu̶n je̱'e̱ Dios y'ayuuk tyu̶y'ajt najtzkapxu̶u̶yu̶bu̶ñ, wan najtzkapxu̶u̶yu̶ ajku̶xy nime̱tzk nidu̶gu̶u̶g je'eyu̶, y wan je̱'e̱ nimaybyu̶ mu̶bu̶jkpu̶du̶jk je'eyu̶ ijxku̶xy tuungu̶xy pu̶nu̶ tu̶y'ajt je̱'e̱ du'un o pu̶nu̶ ka'p. 30Peru̶ pu̶nu̶ Dios je̱'e̱ wiingpu̶ ja'ay tii yajnejwu̶u̶by je̱'e̱ mu̶dyiibu̶ naty jiiby u̶ñaaybyu̶ñ, mu̶'ityu̶ je̱'e̱ ja'ay y'amónu̶ch je̱'e̱ mu̶dyiibu̶ je̱'e̱ Dios y'ayuuk tyu̶y'ajt naty jayu̶jp tu̶ najtzkapxu̶u̶ydyu̶gu̶u̶yu̶ju̶ñ. 31Wan je̱'e̱ Dios y'ayuuk tyu̶y'ajt du'un nidu'ugjáty nidu'ugjáty najtzkapxu̶u̶yu̶ch ajku̶xy neby naty pyaattu̶gu̶xyu̶ñ, y wan du'un nigu̶xyu̶ jajtku̶xu̶ch y ñayjyootmu̶kmooyu̶gu̶xu̶ch. 32Nnajtzkapxu̶u̶yu̶ch je̱'e̱ Dios y'ayuuk tyu̶y'ajt ajtu̶m ajku̶xy, je̱' chogyii nnay'ane̱'e̱mu̶mu̶ch ku̶'u̶m ajku̶xy y nja'ay'e̱jxu̶mu̶ch u̶xtu̶ koonu̶ je̱'e̱ hooru̶ paadu̶ch mu̶naa je̱'e̱ Dios y'ayuuk tyu̶y'ajt nnajtzkapxu̶ydyu̶gu̶u̶yu̶ch ajtu̶m ajku̶xy, 33je̱' ko je̱' je̱'e̱ Dios chojkypy ko nidu'ugjáty nidu'ugjáty ngápxu̶mu̶ch ajku̶xy y ka'p ko nigoo nigu̶xyu̶ nyaax njojku̶mu̶ch ajku̶xy.

Tzu̶k du'un tuunu̶m ajku̶xy neby je̱'e̱ Dios jya'ay nigu̶xyu̶ tuungu̶xyu̶ñ. 34Je̱'e̱ to'oxyu̶jk ka'p je̱'e̱ mu̶baad kyápxku̶xy ma naty yajpaatku̶xy tu̶ ñayyo'oymyujku̶gu̶xyu̶ñ, amoñu̶ je̱'e̱ mu̶baad y'ijtku̶xy, je̱' ko ka'p je̱'e̱ Dios du'un y'ane'emy ko kyápxku̶xu̶ch. Ane'emy je̱'e̱ ñiya'aydyu̶jk yaj'ijtu̶gu̶xu̶ch du'un neby je̱'e̱ Dios y'ane̱'e̱mu̶ñ y'ane'emyu̶ñ. 35Pu̶nu̶ ñejwu̶'u̶waangu̶xypy tii, wan je̱'e̱ ñiya'aydyu̶jk yajtu̶u̶gu̶xy ma je̱'e̱ tyu̶jku̶ñ; je̱' ko ka'p du'un y'óyu̶ch ko je̱'e̱ to'oxyu̶jk kyápxu̶ch ma naty tu̶ ñayyo'oymyujku̶gu̶xyu̶ñ.

36Ja'aymye̱jtzku̶x ko ka'p je̱'e̱ myiichu̶ch ajku̶xy je̱'e̱ mu̶dyiibu̶ je̱'e̱ Dios y'ayuuk tyu̶y'ajt jayu̶jp tu̶ nejwu̶u̶ygyu̶xyu̶ñ, ni ka'p je̱'e̱ miichtyu̶'ajty je'eyu̶ tu̶ mmu̶bu̶jkku̶xy. 37Pu̶nu̶ jii pu̶n ñayjyu̶wu̶'u̶yii Dios y'ayuuknajtzkapxu̶u̶ybyu̶, o pu̶nu̶ nayjyu̶wu̶u̶yu̶p ko je̱'e̱ Espíritu tu̶ wyinma'añmyo'oyii, kyu'ubú̶gu̶py je̱' ko adaa du'un neby yam nnijayu̶u̶ygyu̶xyu̶ñ je̱'e̱ Windzú̶n Dios adaa y'ane̱'e̱mu̶ñ. 38Y pu̶nu̶ ka'p je̱'e̱ Windzú̶n Dios y'ane̱'e̱mu̶ñ ku'ubu̶gaanu̶, nan ka'p je̱'e̱ Dios kyu'ubu̶gu̶u̶ju̶ch.

39Y du'unu̶tz, mu̶gu'uktu̶jk ajku̶xy, adzojkku̶x neby je̱'e̱ Dios y'ayuuk tyu̶y'ajt mnajtzkapxu̶u̶yu̶chu̶ñ ajku̶xy, y ka'p je̱'e̱ ja'ay m'agapxtujkku̶xy je̱'e̱ mu̶dyiibu̶ je̱'e̱ wiingpu̶ ayuuk kápxku̶xpu̶ñ; 40peru̶ tuungu̶x ku̶xyu̶ mu̶u̶d je̱'e̱ tu'uda'agy'ajtu̶ñ y oy yajxón.

Currently Selected:

1 Corintios 14: MIXE

Highlight

Copy

Compare