1 Corintios 13

Je̱'e̱ tzojku̶ñ ju̶wu̶u̶yu̶ñ

1Pu̶nu̶ ngápxypyu̶ch je̱'e̱ naaxwiiñjya'ay ayuuk ka'anaag y je̱'e̱ ángelestu̶jk ayuuk ajku̶xy, peru̶ pu̶nu̶ ka'p u̶u̶ch je̱'e̱ nmu̶gu'ugtu̶jk ndzoky nju̶wu̶'u̶y, du'un u̶u̶ch naty neby je̱'e̱ pujxk mu̶dyiibu̶ nigoo jaywyaandzu̶u̶by o neby je̱'e̱ platillo mu̶dyiibu̶ nigoo janch ne̱'e̱mbu̶ñ. 2Y pu̶nu̶ najtzkapxu̶u̶yu̶byu̶ch je̱'e̱ Dios y'ayuuk tyu̶y'ajt, y pu̶nu̶ nwinju̶wu̶u̶ybyu̶ch tii miimb ku̶daakp mu̶dyiibu̶ ka'p pu̶n ixyñu̶ nejwu̶'u̶yñu̶, y pu̶nu̶ njajtypyu̶ch je̱'e̱ u̶xpu̶jku̶ñ ku̶xyu̶, y nmu̶dátyu̶ch je̱'e̱ mu̶bu̶jku̶ñ neby u̶u̶ch je̱'e̱ kopt nyajyu'kxu̶chu̶ñ, peru̶ pu̶nu̶ ka'p u̶u̶ch je̱'e̱ nmu̶gu'ugtu̶jk ndzoky nju̶wu̶'u̶y, ka'p u̶u̶ch maa ndzobaady. 3Y pu̶nu̶ nyajwa'kxypyu̶ch ku̶xyu̶ tijaty u̶u̶ch nmu̶dajtypyu̶ñ ma je̱'e̱ ayoobu̶du̶jk ajku̶xyu̶ñ, y pu̶nu̶ nyejkypyu̶ch je̱'e̱ ngu̶'u̶mni'kx ko yajni'ino'ogu̶ch,#13.3 Ko yajni'ino'ogu̶ch: nije̱' jaaybyu̶du̶jk myu̶naangu̶xy: neby u̶u̶ch mu̶baad naygyu'umayiiju̶ñ. peru̶ pu̶nu̶ ka'p u̶u̶ch je̱'e̱ nmu̶gu'ugtu̶jk ndzoky nju̶wu̶'u̶y, ni maa u̶u̶ch je̱'e̱ du'un xykya'atuunu̶ch.

4Ko naty je̱'e̱ nmu̶gu'ugtu̶jk ndzojk nju̶wu̶u̶yu̶m ajku̶xy, nmu̶me̱kxtujku̶mu̶py je̱'e̱ ajku̶xy; n'oyjya'ay'ajtu̶mu̶ch ajku̶xy; ka'p tii nga'ayajmu̶'oy'ijxu̶mu̶ch ajku̶xy, ni nga'anaygyu'umaayu̶mu̶ch ajku̶xy, ni mu̶j ku̶xp nga'anayjyu̶wu̶u̶yu̶mu̶ch ajku̶xy, 5ni nga'aju̶bu̶kja'ay'ajtu̶mu̶ch ajku̶xy, ni nga'awinduk'ajtu̶mu̶ch ajku̶xy, ka'p nwinjootma'ad'ajtu̶mu̶ch ajku̶xy y ni nga'atzipyaj'ijtu̶mu̶ch ajku̶xy; 6ka'p nxondaaku̶mu̶ch ajku̶xy ko naty je̱'e̱ nmu̶gu'ug ka'p tu̶y tu'uda'agy jya'ay'ajtku̶xy, mu̶'it nxondaaku̶mu̶ch ajku̶xy ko naty je̱'e̱ ayuuk tu̶y'ajt tu̶y tu'uda'agy kuydyuungu̶xy. 7Ndzojk nju̶wu̶u̶yu̶mu̶ch je̱'e̱ nmu̶gu'ugtu̶jk, nmu̶najx ngu'ubu̶jku̶mu̶py ku̶xyu̶ ajku̶xy, nmu̶bu̶jku̶mu̶ch ku̶xyu̶ ajku̶xy, n'a'ijx nju̶jp'ijxu̶mu̶ch ku̶xyu̶ ajku̶xy, nmu̶me̱kxtujku̶mu̶ch ku̶xyu̶ ajku̶xy.

8Je̱'e̱ naychojk nayjyu̶wu̶u̶yu̶ñ nimu̶naaxu̶u̶ je̱'e̱ kya'akú̶x kya'atu̶góyu̶ch. Pyaadu̶py je̱'e̱ xu̶u̶ tiempo mu̶naa, mu̶naa je̱'e̱ ja'ay Dios y'ayuuk tyu̶y'ajt ka'p oknajtzkapxu̶u̶ygyu̶xnu̶chu̶ñ, y ka'p je̱'e̱ wiingpu̶ ayuuk okkápxku̶xnu̶ch, ni je̱'e̱ u̶xpu̶jk'ajtu̶ñ naty kya'a'ok'yajtzojknu̶. 9Je̱' ko ka'p je̱'e̱ u̶xpu̶jk'ajtu̶ñ kya'pxyu̶ch je̱'e̱ mu̶dyiibu̶ nja'amu̶dajtu̶mbyu̶ñ ajku̶xy y nan ka'p je̱'e̱ ayuuknajtzkapxu̶'u̶yiibu̶ kya'pxyu̶ch je̱'e̱ mu̶dyiibu̶ nja'amu̶dajtu̶mbyu̶ñ ajku̶xy, 10y ku'udu̶góyu̶p adayaaba u̶xpu̶jk'ajtu̶ñ mu̶naa ko naty je̱'e̱ u̶xpu̶jk'ajtu̶ñ ka'pxy nmu̶dajtu̶nu̶ ajku̶xy.

11Ko u̶u̶ch najty nbi'k'ana'k'áty, du'un u̶u̶ch najty ngapxy nmu̶dya'agy, ndajy nmay y nja'ay'áty neby je̱'e̱ pi'k'ana'ku̶ñ, peru̶ ko u̶u̶ch tu̶ nmu̶j'ana'ku̶u̶yñu̶, tu̶ u̶u̶ch je̱'e̱ pi'k'ana'k winma'añ n'u̶xmajtznu̶. 12Jada'achám ka'p je̱'e̱ Dios oy yajxón n'ixy'ajtu̶m ajku̶xy, jaam keech jada'achám n'ijxu̶m ajku̶xy, du'un neby je̱'e̱ ijxk woogy keechpyu̶ju̶ñ; peru̶ pyaadu̶py je̱'e̱ xu̶u̶ tiempo mu̶naa je̱'e̱ Jesús wiinu̶ ju̶jpu̶ n'ijxu̶mu̶ch ajku̶xy neby je̱' kyu̶xu̶'u̶gyu̶ñ. U̶u̶ch je̱'e̱ n'u̶xpu̶jk'ajtu̶ñ ka'p je̱'e̱ jada'achám kya'pxyu̶ch, peru̶ pyaadu̶py je̱'e̱ xu̶u̶ tiempo mu̶naa u̶u̶ch je̱'e̱ n'u̶xpu̶jku̶ñ ku̶xyu̶ kya'pxnu̶chu̶ñ, nwinju̶wu̶u̶ydya'awu̶byu̶ch neby je̱'e̱ Dios u̶xpu̶jku̶ñ mu̶u̶du̶chu̶ñ, du'un neby je̱'e̱ Dios nejwu̶ydya'ayu̶ñ neby u̶u̶ch je̱'e̱ u̶xpu̶jku̶ñ u̶u̶ch nmu̶u̶du̶chu̶ñ.

13Tu̶gu̶u̶g je̱' je̱'e̱ mu̶dyiibu̶ nduundu̶u̶wu̶mu̶py ajku̶xy: nmu̶bu̶jku̶yu̶ch je̱'e̱ Dios y'ayuuk tyu̶y'ajt ajtu̶m ajku̶xy, nju̶jp'ijxu̶mu̶ch je̱'e̱ oy'ajtu̶ñ wiinu̶u̶xu̶u̶bu̶ ajku̶xy y naychojk nayjyu̶wu̶u̶yu̶mu̶ch ajku̶xy; peru̶ je̱'e̱ tu̶gu̶u̶gpu̶, je̱'e̱ mu̶dyiibu̶ ni'igyu̶ mu̶j tzobaatpu̶ñ, je̱' je̱'e̱ ko naychojk nayjyu̶wu̶u̶yu̶mu̶ch ajku̶xy.

Currently Selected:

1 Corintios 13: MIXE

Highlight

Copy

Compare