1 Corintios 15
15
Cristo jyuugypyu̶jky
1Jada'achám, mu̶gu'uktu̶jk, ndzojkypyu̶ch ko je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ mja'aymye̱jtzku̶xu̶ch, je̱'e̱ mu̶dyiibu̶ tu̶ nyajwingapxu̶u̶ygyu̶xyu̶ñ. Adaa je̱' je̱'e̱ ayuuk tu̶y'ajt je̱'e̱ mu̶dyiibu̶ miich mgu'ubu̶jkku̶xu̶ñ y je̱'e̱ mu̶dyiibu̶ tu̶y tu'uda'agy mbanú̶kxku̶xypyu̶ñ. 2Nan paady je̱'e̱ aanu̶mu̶ ni'idzooku̶ñ tu̶ mbaatku̶xy ko je̱'e̱ ayuuk tu̶y'ajt tu̶ mmu̶bu̶jkku̶xy, pu̶nu̶ ka'p naty m'u̶xtu̶gu̶'u̶wa'kku̶xy, y pu̶nu̶ m'u̶xtu̶gu̶'u̶wa'kku̶xp, tu̶ naty je̱'e̱ mxu̶u̶ mtiempo du'un nigoo mni'iyajtu̶gooygyu̶xy ko naty nigoo tzojku̶ tu̶ mmu̶bu̶jkku̶xy.
3Miich ajku̶xy, tu̶ miich je̱'e̱ u̶xpu̶jku̶ñ nmooygyu̶xy je̱'e̱ mu̶dyiibu̶ u̶u̶ch tu̶ nyajmo'oyu̶ñ. Tu̶ nyajni'ixu̶u̶ygyu̶xy ko je̱'e̱ Cristo nboky ngu̶dyeey xykyu'u'o'ogu̶u̶yu̶ ajtu̶m ajku̶xy, du'un neby je̱'e̱ Dios ñaky myu̶na'añu̶ñ je̱'e̱ mu̶dyiibu̶ kuja'ay ijtpu̶ñ; 4ko yajnaaxtu̶gu̶u̶ygyu̶xy y ko kudu̶gu̶u̶g xu̶u̶ ja'adu'ook jyuugypyu̶jky, du'un neby je̱'e̱ Dios ñaky nandu'un myu̶na'añu̶ñ; 5y ko ñayyajni'igu̶xu̶'ku̶ ma je̱'e̱ Pedro, y jak'u̶x'aam ma je̱'e̱ nimajkmé̱tzkpu̶ discípulotu̶jk ajku̶xyu̶ñ. 6Kujeky ñayyajni'igu̶xu̶'ku̶ ma je̱'e̱ mu̶bu̶jkpu̶du̶jk nimu̶gooxk mu̶go'pxnáxy ajku̶xyu̶ñ, may jada'achám jyugy'ajtku̶xyñu̶ je̱'e̱ mu̶dyiibu̶ ijxu̶gu̶xu̶ñ y nije̱' tu̶ y'o'kku̶xnu̶. 7Kujeky ñayyajni'igu̶xu̶'ku̶ ma je̱'e̱ Santiago, y jak'u̶x'aam ma je̱'e̱ apóstolestu̶jk nigu̶xyu̶ ajku̶xyu̶ñ.
8Jak'u̶x'aam ñayyajni'igu̶xu̶'ku̶ ma u̶u̶ch nandu'unu̶ñ, u̶u̶ch je̱'e̱ mu̶dyiibu̶ du'un neby je̱'e̱ pi'k'ana'k je̱'e̱ mu̶dyiibu̶ miimb ma je̱'e̱ xyu̶u̶ tyiempo naty tu̶ ñajxnu̶ju̶ñ. 9U̶u̶ch je̱' je̱'e̱ mu̶dyiibu̶ ka'p chobaady ma je̱'e̱ nimaybyu̶ apóstolestu̶jk ajku̶xyu̶ñ, y ni xykya'apaadyu̶ch nnaydyiju̶u̶wu̶chu̶ch apóstol, je̱' ko u̶u̶ch je̱'e̱ Dios jya'ay tu̶ n'u̶xwu̶dijt tu̶ nbawu̶dijtu̶ ajku̶xy. 10Nja'ay'átyu̶ch neby u̶u̶ch nja'ay'átyu̶ñ je̱'e̱ Dios u̶u̶ch du'un tu̶ xyajmu̶dzóky je̱' ko y'oyjya'ayu̶ch mu̶u̶d u̶u̶ch; y je̱'e̱ y'oyjya'ay'ajtu̶ñ tu̶ u̶u̶ch je̱'e̱ xypyubety xypyudu̶gu̶'u̶y y ka'p je̱'e̱ tu̶ ñadu̶gu̶'u̶'áty. Ni'igu̶ mu̶j u̶u̶ch ni'igyu̶ tu̶ nduñ ma je̱'e̱ Dios tyuungu̶ñ ni'igu̶ ka'p du'un ni pú̶nu̶ñu̶ba; ka'p je̱'e̱ du'un u̶u̶ch ku̶'u̶m tu̶ nduñ, je̱'e̱ Dios u̶u̶ch tu̶ xypyubety xypyudu̶gu̶'u̶y mu̶u̶d je̱'e̱ y'oyjya'ay'ajtu̶ñ. 11Je̱' ka'p je̱'e̱ chobaady pu̶n miich je̱'e̱ ayuuk tu̶y'ajt tu̶ xyajwingapxu̶u̶ygyu̶xyu̶ñ pu̶nu̶ u̶u̶ch o pu̶nu̶ wiingpu̶ ja'ay, je̱'e̱ mu̶dyiibu̶ tzobaatpu̶ñ je̱' je̱' ko tu̶ ngapxwa'kxu̶m ajku̶xy y adaa je̱' je̱'e̱ mu̶dyiibu̶ miich tu̶ mmu̶bu̶jkku̶xyu̶ñ.
O'ogyjya'ay jyuugypyu̶jkku̶xy
12Peru̶ pu̶nu̶ ngapxwa'kxu̶mby je̱'e̱ ayuuk tu̶y'ajt ko je̱'e̱ Cristo ja'adu'ook jyuugypyu̶jky, ¿ti miich ko du'un nije̱' mmu̶naangu̶xy ko je̱'e̱ o'ogyjya'ay ka'p jyuugypyu̶jkku̶xy? 13Pu̶nu̶ ka'p je̱'e̱ o'ogyjya'ay jyuugypyu̶jkku̶xy, nan ka'p je̱'e̱ Cristo jyuugypyu̶jky; 14y pu̶nu̶ ka'p je̱'e̱ Cristo jyuugypyu̶jky, nan ka'p je̱'e̱ ayuuk tu̶y'ajt maa chobaady je̱'e̱ mu̶dyiibu̶ u̶u̶ch ngapxwa'kxypy ajku̶xyu̶ñ, ni je̱'e̱ mu̶bu̶jku̶ñ maa kya'atzobaady je̱'e̱ mu̶dyiibu̶ miich mmu̶dajtku̶xypyu̶ñ. 15Ko u̶xyu̶py du'un y'okjaanchu̶ch ko je̱'e̱ Cristo ka'p jyuugypyu̶jky, mu̶'it u̶xyu̶py nyajpaatu̶m ajku̶xy je̱'e̱ Dios ñidu̶y'ajt'ajt anu̶u̶bu̶, je̱' ko naty du'un ni'igapxpe̱jtu̶m ajku̶xy ko je̱'e̱ Dios je̱'e̱ Cristo yajjuugypyu̶jky, cham naty du'un ka'p tyu̶y'ajtu̶chpyu̶ ko je̱'e̱ Dios je̱'e̱ Cristo yajjugypyu̶jky y nan ko naty du'un ka'p tyu̶y'ajtu̶ch ko je̱'e̱ o'ogyjya'ay jyuugypyu̶jkku̶xy. 16Pu̶nu̶ ka'p je̱'e̱ o'ogyjya'ay jyuugypyu̶jkku̶xy, nan ka'p je̱'e̱ Cristo jyuugypyu̶jky; 17y pu̶nu̶ ka'p je̱'e̱ Cristo juugypyu̶jky, miich je̱'e̱ mmu̶bu̶jku̶ñ ajku̶xy ka'p je̱'e̱ maa chobaady: je'emyñu̶ miich pokyjyooty ku̶dyeeyjyooty myajpaatku̶xyñu̶. 18Pu̶nu̶ du'un, nan tu̶goydyuum je̱'e̱ mu̶bu̶jkpu̶du̶jk nandu'un yajpaatku̶xy je̱'e̱ mu̶dyiibu̶ tu̶ y'o'kku̶xyu̶ñ mu̶bu̶jkku̶xy je̱'e̱ Cristo najty. 19Pu̶nu̶ yaayu̶ je'eyu̶ nju̶jp'ijxu̶m ajku̶xy ma adayaaba tzu̶naay jugy'ajtu̶ñ je̱'e̱ mu̶dyiibu̶ je̱'e̱ Cristo xymyo'owaanu̶mbu̶ñ ajku̶xy ko naty n'o'ku̶nu̶ ajku̶xy, oymyu̶dtaj oymyu̶dmaayñu̶ du'un nyajpaatu̶m ajku̶xy.
20Peru̶ chi tu̶y'ajt je̱' ko je̱'e̱ Cristo jyuugypyu̶jky. Je̱' je̱'e̱ jayu̶jpu̶ ja'ay mu̶dyiibu̶ tu̶ jyuugypyú̶kyu̶ñ: je̱' jayu̶jp tu̶ jyuugypyu̶jktzooñ. 21Du'un neby je̱'e̱ tu'ugpu̶ ja'ay je̱'e̱ o'ku̶ñ yajtzondaaky ma adayaaba naaxwiiñu̶ñ, nan tu'ug je̱'e̱ ja'ay nandu'un yajtzondaaky neby je̱'e̱ o'ogyjya'ay jyuugypyú̶ku̶chu̶ñ. 22Y du'un neby je̱'e̱ o'ku̶ñ nigu̶xyu̶ yaj'íxy yajpádyu̶ñ Adán kyu̶xpu̶, nandu'un je̱'e̱ jugy'ajtu̶ñ nigu̶xyu̶ yaj'íx yajpaadu̶ch Cristo kyu̶xpu̶. 23Nidu'ug nidu'ug je̱'e̱ o'ogyjya'ay jyuugypyu̶ga'añ du'un neby naty ñibu̶dagu̶'u̶yu̶chu̶ñ: Cristo je̱' jayu̶jp juugypyu̶jk, jak'u̶x'aam je̱'e̱ ja'ay je̱'e̱ mu̶dyiibu̶ je̱'e̱ Dios ja'ay'ajtu̶bu̶ñ ajku̶xy ko naty je̱'e̱ Cristo ya naaxwiiñ wyimbity. 24Y mu̶'it je̱'e̱ naaxwiimbu̶ kyú̶xu̶ch tyu̶góyu̶ch, ko naty je̱'e̱ Cristo mu̶madaakta'ay ku̶xyu̶ mu̶dyiibu̶ ya naaxwiiñ windzu̶n'ajtku̶xpu̶ñ, ane̱'e̱mgu̶xpu̶ñ, y je̱'e̱ mu̶k'ajt mu̶dajtku̶xpu̶ñ, y yajku̶'u̶du̶gu̶u̶yñu̶ je̱'e̱ Dios Teedy ane̱'e̱mu̶ñ naty. 25Je̱' ko ni'igu̶ ane̱'e̱mu̶p je̱'e̱ Cristo, u̶xtu̶ koonu̶ je̱'e̱ myu̶dziptu̶jk yajmu̶madaakku̶xu̶ch, du'un neby naty du'umbu̶ tekypya'tku̶'u̶by tu̶ yajpu̶daakku̶xyu̶ñ. 26Y je̱'e̱ myu̶dzip mu̶dyiibu̶ myu̶madaakkugu̶xu̶'u̶wu̶py je̱' je̱' je̱'e̱ o'ku̶ñ, y ka'p ni pu̶n y'ok'o'knu̶ch. 27Je̱' ko Dios je̱'e̱ Cristo myu̶dzip ku̶xyu̶ tu̶ mu̶madaaku̶yu̶, du'un neby nu̶wu̶'u̶y tyekypya'tku̶'u̶by tu̶ pu̶daakku̶xyu̶ju̶ñ. Peru̶ ko je̱'e̱ Dios ñaky du'un myu̶na'añ ko je̱'e̱ Cristo ku̶xyu̶ tu̶ mu̶madaakta'ay, wa'adz je̱'e̱ du'un yajwinju̶wu̶'u̶y ko ka'p je̱'e̱ Cristo je̱'e̱baad tu̶ mu̶mada'agy je̱'e̱ Dios, je̱' ko je̱'e̱ Dios je̱' je̱'e̱ mu̶dyiibu̶ ku̶xyu̶ tu̶ mu̶madaakta'ayu̶ñ. 28Y ko naty je̱'e̱ Cristo ku̶xyu̶ tu̶ mu̶madaakta'ay, mu̶'it je̱'e̱ Cristo ku̶'u̶m, je̱'e̱ Dios'ung, je̱'e̱ Dios y'ane̱'e̱mu̶ñ ku'ubu̶jkku̶yu̶ch, je̱'e̱ mu̶dyiibu̶ je̱'e̱ Dios ane̱'e̱mu̶ñ ku̶xyu̶ mooyu̶ju̶ñ. Y du'un oymyaa kyu̶xu̶'u̶gu̶ch ko je̱'e̱ Dios je̱'e̱ ane̱'e̱mu̶ñ ku̶xyu̶ mu̶u̶d.
29Je̱'e̱ mu̶dyiibu̶ ja'ay nu̶u̶be̱jtku̶xpu̶ñ o'ogyjya'ay gyu̶xpu̶, ¿ti ko du'un y'adu̶u̶tzku̶xy? Pu̶nu̶ ka'p je̱'e̱ o'ogyjya'ay jyuugypyu̶jkku̶xy, ¿ti ko ñu̶u̶be̱jtku̶xy o'ogyjya'ay gyu̶xpu̶? 30¿Y ti ko ayo'onduum jaboom jaboom nyajpaatu̶m ajku̶xy? 31“Mu̶gu'uktu̶jk, tii u̶u̶ch ko jaboom jaboom o'kju̶jp'aam nnaybyu̶da'agyii. Adaa jaanch adaa du'un ko u̶u̶ch nxonda'agy mu̶u̶d miich kyu̶xpu̶ ajku̶xy ko je̱'e̱ Jesucristo mmu̶bu̶jkku̶xy, je̱'e̱ nwindzú̶n ajtu̶m ajku̶xy. 32U̶u̶ch tu̶ u̶u̶ch je̱'e̱ awa'anja'aydyu̶jk nwindu̶na'ay jim Éfeso, du'un neby je̱'e̱ ja'ay awa'an ju̶yujk mu̶dtziptuñu̶ñ, peru̶ ¿ti u̶u̶ch du'un tu̶ n'ixy tu̶ nbaady ko u̶u̶ch du'un tu̶ njaty tu̶ n'abety? Pu̶nu̶ jaanch du'un tyu̶y'ajtu̶ch ko je̱'e̱ o'ogyjya'ay ka'p jyuugypyu̶jkku̶xy, tzu̶k xoonu̶m ijtu̶m ajku̶xy, du'un neby je̱'e̱ ja'ay nije̱' myu̶naangu̶xyu̶ñ: “¡Tzu̶k ku̶xyu̶ jakkaayu̶m jak'uuku̶m ajku̶xy, je̱' ko jaboom n'o'ogaanu̶nu̶ ajku̶xy!”
33Ka'p myajwin'u̶u̶ngu̶xy. Je̱' ko du'un je̱'e̱ ayuuk myu̶na'añ: “Je̱'e̱ mu̶gu'uktu̶jk je̱'e̱ mu̶dyiibu̶ je̱'e̱ ju̶bu̶kjoot ju̶bu̶kwinma'añ mu̶dajtku̶xpu̶ñ, yajwinma'añdyu̶gooygyu̶xypy je̱'e̱ myu̶gu'ugtu̶jk je̱'e̱ mu̶dyiibu̶ je̱'e̱ oyjyoot oywyinma'añ naty mu̶dajtku̶xpu̶ñ.” 34Wimbijtku̶x ma je̱'e̱ wijy kejpyu̶ mjoot mwinma'añ ja'adu'ook ajku̶xyu̶ñ, y ka'p m'okpokytyuungu̶xnu̶, nije̱' miich ajku̶xy ka'p miich mnejwu̶u̶ygyu̶xy pu̶n Diosu̶ñ, nmu̶na'añu̶ch du'un, wan du'un we̱e̱nu̶ m'okjatytimycho'oydyuungu̶xu̶ch.
Neby je̱'e̱ o'ogyjya'ay da'a jyuugypyu̶jkku̶xu̶ch
35Wandu̶ je̱'e̱ ja'ay nije̱' yajtu̶u̶wu̶ch: “¿Neby je̱'e̱ o'ogyjya'ay da'a jyuugypyu̶jkku̶xu̶ch? ¿Ti ni'kx ti kopt je̱'e̱ da'a myu̶dadaangu̶xypy?” 36Tzuuja'ay adaa du'umbu̶ ayuuk yajtu̶u̶gu̶xp. Ko tii yajni'iby, je̱'e̱ tu̶u̶md ni'igu̶ o'ogu̶p je̱'e̱ jayu̶jp neby je̱'e̱ ujtz mu̶baad myuxyu̶ñ. 37Je̱'e̱ mu̶dyiibu̶ yajniipu̶ñ ka'p je̱'e̱ jye̱'e̱ju̶ch je̱'e̱ ujtz mu̶dyiibu̶ naty tu̶ myuxyu̶ñ, je̱' mujxp je̱'e̱ tu̶u̶md je̱'e̱ mu̶dyiibu̶ naty tu̶ yajni'ibyu̶ñ, wan trigo tu̶u̶mdu̶ch o wiing tu̶u̶md. 38Y ko je̱'e̱ tu̶u̶md myuxy, mu̶'it je̱'e̱ Dios je̱'e̱ ni'kx kopt mo'oy neby naty je̱' tzokyu̶ñ, y tu'ug tu'ug je̱'e̱ tu̶u̶md ñi'kx kyopt nibu̶dagu̶u̶yu̶ neby pyadyiiju̶ñ tu̶gachjyaty tu̶gachjyaty. 39Ka'p je̱'e̱ ni'kx kopt tyu'knaxjátyu̶ch, wiing je̱'e̱ ja'ay ñi'kx kyopt, wiing je̱'e̱ no'on ju̶yujk, wiing je̱'e̱ joon muuxy y nan wiing je̱'e̱ nu̶u̶ju̶yujk ñi'kx kyopt ajku̶xy. 40Y nandu'un, jii je̱'e̱ ni'kx kopt je̱'e̱ mu̶dyiibu̶ tzajpjooty yajpaatpu̶ñ y je̱'e̱ mu̶dyiibu̶ ya naaxwiiñ yajpaatpu̶ñ; peru̶ wiing je̱'e̱ tzajpjootypyu̶ ni'kx kopt oy'ajt yajxon'ajtu̶ñ mu̶u̶du̶ch y nan wiing je̱'e̱ naaxwiiñbyu̶ ni'kx kopt oy'ajt yajxon'ajtu̶ñ mu̶u̶du̶ch. 41Je̱'e̱ xu̶u̶ tu̶gach y'adu̶kx y'ajaju̶ñ je̱' mu̶u̶d je̱'e̱ po'o y'adu̶kx y'ajaju̶ñ; y nan tu̶gach je̱'e̱ mu̶dza'a y'adu̶kx y'ajaju̶ñ; y nandu'un je̱'e̱ maymyu̶dza'a ni je̱' je̱'e̱ y'adu̶kx y'ajaju̶ñ kya'anaybyaattu̶gu̶xy; agu̶ tu̶gachjyaty je̱'e̱ y'adu̶kx y'ajajku̶xy.
42Nandu'un tyuñyii jyadyii mu̶u̶d je̱'e̱ o'ogyjya'ay mu̶dyiibu̶ juugypyu̶jkku̶xpu̶ñ. Je̱'e̱ naaxni'kx mu̶dyiibu̶ naaxtu̶gu̶u̶ybyu̶ñ windu̶gooby je̱', peru̶ je̱'e̱ mu̶dyiibu̶ ja'adu'ook juugypyu̶jkpu̶ñ ka'p je̱'e̱ nimu̶naa wyindu̶goy. 43Je̱'e̱ naaxni'kx mu̶dyiibu̶ naaxtu̶gu̶u̶ybyu̶ñ, ka'p je̱'e̱ tii oy'ajtu̶ñ mu̶u̶du̶ch, peru̶ je̱'e̱ mu̶dyiibu̶ ja'adu'ook juugypyu̶jkpu̶ñ je̱'e̱ju̶tz je̱'e̱ oy'ajtu̶ñ mu̶u̶d. Je̱'e̱ naaxni'kx mu̶dyiibu̶ naaxtu̶gu̶u̶ybyu̶ñ, yuu pu̶ma'ay je̱', peru̶ je̱'e̱ mu̶dyiibu̶ ja'adu'ook juugypyu̶jkpu̶ñ, oy mu̶k je̱'e̱ju̶ñ. 44Je̱'e̱ naaxni'kx mu̶dyiibu̶ naaxtu̶gu̶u̶ybyu̶ñ, je̱' je̱' je̱'e̱ mu̶dyiibu̶ yaj'ijxp y yajni'idoomb yajni'ijaaxpu̶ñ. Peru̶ je̱'e̱ mu̶dyiibu̶ ja'adu'ook juugypyu̶jkpu̶ñ, je̱'e̱ ni'kx je̱' je̱'e̱ mu̶dyiibu̶ ka'p yaj'íxy y ka'p yajni'idóñ yajni'ijaaxyu̶ñ. Pu̶nu̶ jii je̱'e̱ naaxni'kx je̱'e̱ mu̶dyiibu̶ yaj'ijxp y yajni'idoomb yajni'ijaaxpu̶ñ, nan jii je̱'e̱ ni'kx nandu'un je̱'e̱ mu̶dyiibu̶ ka'p yaj'íxy y ka'p yajni'idóñ yajni'ijaaxyu̶ñ.
45Du'un je̱'e̱ Dios ñaky myu̶na'añ: “Je̱'e̱ jayu̶jpu̶ ja'ay, Adán, du'un najty je̱'e̱ jyugy'ajt mu̶u̶du̶ch neby u̶u̶ch ajtu̶m ajku̶xyu̶ñ”; peru̶ je̱'e̱ u̶x'aambu̶ Adán, je̱'e̱ Cristo, ka'p je̱'e̱ yaj'íxy y ka'p yajni'idóñ yajni'ijaaxy je̱'e̱ mu̶dyiibu̶ je̱'e̱ juugy'ajt ye̱jkpu̶ñ. 46Y du'unu̶tz, jayu̶jp je̱'e̱ ni'kx kopt tu̶ nyajmooyu̶m ajku̶xy je̱'e̱ mu̶dyiibu̶ yaj'ijx y yajni'idoomb yajni'ijaaxpu̶ñ, y u̶x'aam je̱'e̱ ni'kx kopt nyajmooyu̶mu̶ch ajku̶xy je̱'e̱ mu̶dyiibu̶ ka'p yaj'ijxy y ka'p yajni'idóñ yajni'ijaaxy ko naty ja'adu'ook njuugypyu̶jku̶m ajku̶xy. 47Je̱'e̱ jayu̶jpu̶ ja'ay je̱'e̱ mu̶dyiibu̶ je̱'e̱ Dios yajkoju̶ñ, je̱'e̱ naax je̱'e̱ mu̶u̶d yajkojy y yajpaady ya naaxwiiñ; y je̱'e̱ mu̶me̱tzkpu̶ ja'ay je̱'e̱ mu̶dyiibu̶ je̱'e̱ Dios kye̱jxu̶ñ jiiby tzajpjooty je̱'e̱ chooñ.#15.47 Nije̱' wiingpu̶ versión myu̶na'añ: je̱'e̱ nWindzú̶n Jesucristo ajtu̶m ajku̶xy. 48Je̱'e̱ ni'kx kopt je̱'e̱ mu̶dyiibu̶ ya naaxwiiñ yajpaatpu̶ñ, du'un je̱' neby je̱'e̱ Adán je̱'e̱ mu̶dyiibu̶ je̱'e̱ Dios yajkoju̶ju̶ñ mu̶u̶d je̱'e̱ naax, y je̱'e̱ ni'kx kopt mu̶dyiibu̶ jiiby tzajpjooty tzu̶na'awaambu̶ñ, du'un je̱'e̱ y'awimbídu̶ch neby je̱'e̱ Windzú̶n Jesucristo ñi'kxu̶ñ je̱'e̱ mu̶dyiibu̶ jiiby tzajpjooty tzu̶naaybyu̶ñ.
49Du'un neby tu'knáx ngu̶xu̶'ku̶mu̶ñ ajku̶xy mu̶u̶d je̱'e̱ ja'ay je̱'e̱ mu̶dyiibu̶ koju̶ñ mu̶u̶d je̱'e̱ naax, nandu'un tu'knáx ngu̶xu̶'ku̶mu̶ch ajku̶xy mu̶u̶d je̱'e̱ Jesucristo je̱'e̱ mu̶dyiibu̶ jiiby tzajpjooty tzu̶naaybyu̶ñ.
50Du'un nnu̶ma'awaangu̶xy, mu̶gu'uktu̶jk, ko je̱'e̱ ni'kx kopt mu̶dyiibu̶ je̱'e̱ xiixy y je̱'e̱ ne'pty mu̶dajtpu̶ñ ka'p je̱'e̱ jiiby tyu̶gu̶'u̶wu̶ch ma je̱'e̱ Dios y'ane'emyu̶ñ, y je̱'e̱ ni'kx kopt mu̶dyiibu̶ windu̶gooybyu̶ñ, ka'p je̱'e̱ jiiby tyu̶gu̶'u̶wu̶ch ma je̱'e̱ ni'kx kopt y'ityu̶ñ je̱'e̱ mu̶dyiibu̶ ka'p wyindu̶goyu̶ñ. 51Peru̶ ndzojkypyu̶ch ko miich je̱'e̱ yu'uchpyu̶ tu̶y'ajt mnejwu̶u̶ygyu̶xu̶ch. Ka'p nigu̶xyu̶ n'o'ktaayu̶mu̶ch ajku̶xy, peru̶ nigu̶xyu̶ je̱'e̱ Dios nni'kx xyajtu̶gajtzu̶ch ajtu̶m ajku̶xy 52tu'ktzojku̶, tu'kwiinme̱'e̱k ko naty je̱'e̱ Dios tyrompeta xyuuxkugu̶xu̶u̶yñu̶. Je̱' ko ya'axu̶p je̱'e̱ trompeta, y je̱'e̱ o'ogyjya'ay juugypyu̶jkku̶xu̶p je̱' mu̶u̶d je̱'e̱ ni'kx mu̶dyiibu̶ ka'p y'ok'o'kku̶xnu̶chu̶ñ. Y u̶u̶ch ajtu̶m ajku̶xy xyajtu̶gajtzu̶p je̱'e̱ Dios nni'kx ajtu̶m ajku̶xy. 53Tu̶gajtzu̶mu̶p je̱'e̱ nni'kx ajku̶xy je̱'e̱ mu̶dyiibu̶ ya naaxwiiñ nmu̶dajtu̶mbyu̶ñ ajku̶xy je̱'e̱ mu̶dyiibu̶ windu̶gooybyu̶ñ mu̶u̶d je̱'e̱ mu̶dyiibu̶ ka'p wyindu̶goyu̶ñ, y nan tu̶gátzu̶p je̱'e̱ nni'kx ajtu̶m ajku̶xy je̱'e̱ mu̶dyiibu̶ o'kp tu̶gooybyu̶ñ mu̶u̶d je̱'e̱ mu̶dyiibu̶ ka'p y'o'ogy tyu̶goyu̶ñ. 54Y ko naty je̱'e̱ nni'kx tu̶ tyu̶gajtzu̶m ajku̶xy je̱'e̱ mu̶dyiibu̶ ya naaxwiiñ nmu̶dajtu̶mbyu̶ñ ajku̶xy je̱'e̱ mu̶dyiibu̶ windu̶gooybyu̶ñ mu̶u̶d je̱'e̱ mu̶dyiibu̶ ka'p wyindu̶goyu̶ñ, y ko naty je̱'e̱ nni'kx tu̶ tyu̶gajtzu̶m ajku̶xy je̱'e̱ mu̶dyiibu̶ o'kp tu̶gooybyu̶ñ mu̶u̶d je̱'e̱ mu̶dyiibu̶ ka'p y'o'ogy tyu̶goyu̶ñ, je̱'e̱ Dios naty ñaky du'un adu̶u̶b neby myu̶na'añu̶ñ: “Tu̶ je̱'e̱ o'ku̶ñ yajmu̶mada'agy. 55O'ku̶ñ, ¿ma miich je̱'e̱ mmu̶daaku̶ñ? ¿Ma miich je̱'e̱ mmu̶k'ajt, miich o'ku̶ñ je̱'e̱ mu̶dyiibu̶ mu̶u̶d mdzaachtyúnu̶chu̶ñ?” 56Ko nbokytyuunu̶m ajku̶xy paady je̱'e̱ o'ku̶ñ nbaattu̶m ajku̶xy je̱'e̱ mu̶dyiibu̶ du'un neby ka'typytyu̶ju̶ñ, y je̱'e̱ jeky'ane̱'e̱mu̶ñ je̱' je̱'e̱ poky mu̶k'ajtu̶ñ mooby. 57¡Peru̶ Dioskujuuyu̶p je̱'e̱ Dios, je̱'e̱ mu̶dyiibu̶ je̱'e̱ mu̶daaku̶ñ xymyooyu̶mbu̶ñ ajku̶xy mu̶u̶d je̱'e̱ Jesucristo kyu̶xpu̶ pyube̱jtu̶ñ, u̶u̶ch nWindzú̶n ajtu̶m ajku̶xy!
58Du'unu̶tz mu̶gu'uktu̶jk, mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, yajtu'uyo'oy'adu̶u̶tzku̶x je̱'e̱ Dios tyuung y ka'p m'u̶xtu̶gu̶'u̶wa'kku̶xy, tuungu̶x ni'igyu̶ jaboom jaboom. Je̱' ko mnejwu̶u̶ygyu̶xypy miich ko ka'p je̱'e̱ tuung ñi'itu̶góy je̱'e̱ mu̶dyiibu̶ miich mduungu̶xypyu̶ñ mu̶u̶d je̱'e̱ Windzú̶n Dios.
Currently Selected:
1 Corintios 15: MIXE
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
