1 Corintios 12

Je̱'e̱ may'ajt je̱'e̱ mu̶dyiibu̶ je̱'e̱ Espíritu Santo yejkypyu̶ñ

1“Mu̶gu'uktu̶jk, ndzojkypyu̶ch ko miich we̱e̱nu̶ mnejwu̶u̶ygyu̶xu̶ch je̱'e̱ may'ajt je̱'e̱ mu̶dyiibu̶ je̱'e̱ Dios y'Espíritu yejkypyu̶ñ.

2Miich mnejwu̶u̶ygyu̶xypy ko najty je̱'e̱ ayuuk tu̶y'ajt ka'p mmu̶bu̶jkku̶xyñu̶, du'un najty myajpaatku̶xy neby wiindzpu̶ju̶ñ mwindzu̶gu̶u̶ygyu̶xy je̱'e̱ uumbu̶ tzaadzéch kepychech najty ajku̶xy. 3Paady ndzojkypyu̶ch jada'achám mnejwu̶u̶ygyu̶xu̶ch ko ka'p du'un mu̶baad pu̶n myu̶na'añ: “¡Ju̶bu̶kja'ay yu̶'u̶ Jesús!” pu̶nu̶ je̱'e̱ Dios y'Espíritu myu̶k'ajt naty yajkápxu̶p. Y nan ka'p du'un mu̶baad pu̶n myu̶na'añ: “¡Jesús je̱' je̱'e̱ Windzú̶n!” pu̶nu̶ ka'p je̱'e̱ Dios y'Espíritu myu̶k'ajt naty yajkápxu̶p.

4Je̱'e̱ tu'ugpu̶ ja'ay mu̶baad je̱'e̱ may'ajt ka'anaagnáx mu̶daty, je̱'e̱ mu̶dyiibu̶ je̱'e̱ Dios y'Espíritu yejkypyu̶ñ, peru̶ tu'ug je̱'e̱ Dios y'Espíritu je'eyu̶ je̱'e̱ mu̶dyiibu̶ je̱'e̱ yejkypyu̶ñ. 5Mayñax je̱'e̱ tuung jii neby je̱'e̱ Dios mu̶baad yajmu̶dúñu̶ñ, peru̶ tu'kpajk je̱'e̱ Windzú̶n Jesús je'eyu̶ je̱'e̱ mu̶dyiibu̶ du'un ku̶xyu̶ xyajni'ipu̶jku̶mbu̶ñ ajku̶xy. 6Y mayñax je̱'e̱ Dios mu̶k'ajt xymyooyu̶m ajku̶xy neby mu̶baad nduunu̶mu̶ñ ajku̶xy, peru̶ tu'kpajk je̱'e̱ Dios je'eyu̶ je̱'e̱ mu̶dyiibu̶ ku̶'u̶m ku̶xyu̶ tuumbu̶ñ. 7Dios yajni'igu̶xu̶'kypy je̱' ma je̱'e̱ mu̶bu̶jkpu̶du̶jk nidu'ug nidu'ugu̶ñ ko je̱'e̱ Dios y'Espíritu naty mu̶dajtu̶yu̶ ajku̶xy, neby je̱'e̱ y'oy'ajtu̶ñ du'un nigu̶xyu̶ paatku̶xu̶chu̶ñ. 8Espíritu Santo kyu̶xpu̶, Dios tu̶ je̱'e̱ ja'ay nije̱' mo'oy neby kyápxku̶x myu̶dyaakku̶xu̶ch mu̶u̶d je̱'e̱ wiju̶ñ ke̱ju̶ñ; y nije̱' tu̶ mooygyu̶xy neby je̱'e̱ tzipjatypyu̶ u̶xpu̶jku̶ñ kápxku̶x mu̶dyaakku̶xu̶chu̶ñ, peru̶ tu'kpajk je̱'e̱ Dios y'Espíritu je'eyu̶ je̱'e̱ mu̶dyiibu̶ adaa du'un ku̶xyu̶ ye̱jkpu̶ñ. 9Nije̱' je̱'e̱ Dios y'Espíritu mu̶bu̶jku̶ñ myooyu̶gu̶xy, peru̶ tu'kpajk je̱'e̱ Dios y'Espíritu je'eyu̶ je̱'e̱ mu̶dyiibu̶ adaa du'un ku̶xyu̶ ye̱jkpu̶ñ, y nije̱' je̱'e̱ may'ajt myooyu̶gu̶xy neby je̱'e̱ pa'amja'aydyu̶jk yajtzookku̶xu̶chu̶ñ. 10Nije̱' je̱'e̱ mu̶k'ajtu̶ñ tu̶ yajmooygyu̶xy neby je̱'e̱ mu̶jwinma'añ tuungu̶xu̶chu̶ñ, y nije̱' neby je̱'e̱ Dios y'ayuuk tyu̶y'ajt najtzkapxu̶u̶yu̶chu̶ñ ajku̶xy. Nije̱' je̱'e̱ Dios wij'ajtu̶ñ tu̶ myooyu̶gu̶xy neby je̱'e̱ tu'uda'akypyu̶ Espíritu u̶xkajpku̶xu̶chu̶ñ y neby je̱'e̱ ka'pu̶ tu'uda'akypyu̶ espíritu u̶xkajpku̶xu̶chu̶ñ, y nije̱' je̱'e̱ wij'ajtu̶ñ tu̶ myooyu̶gu̶xy neby je̱'e̱ wiingpu̶ ayuuk kápxku̶xu̶chu̶ñ; y nan nije̱' je̱'e̱ wij'ajtu̶ñ tu̶ myooyu̶gu̶xy neby je̱'e̱ wiingpu̶ ayuuk kapxtu̶u̶gu̶xu̶chu̶ñ tii je̱'e̱ wiingpu̶ ayuuk naty du'un tyijpyu̶ñ. 11Peru̶ ku̶xyu̶ adaa je̱'e̱ tu'ugpu̶ Dios y'Espíritu adaa du'un ku̶xyu̶ ku̶'u̶m tuumb, mo'oy je̱'e̱ ja'ay nidu'ug nidu'ug neby je̱'e̱ tzokyu̶ñ.

Nigu̶xyu̶ tu'ug ni'kx nyajpaatu̶m ajku̶xy

12Je̱'e̱ ja'ay ñi'kx, oy je̱'e̱ waay pajk may ja'amu̶u̶du̶ch je̱'e̱ mu̶dyiibu̶ yu'kxpu̶ñ, tu'ug je̱'e̱ ni'kx kopt je'eyu̶. Nandu'un je̱'e̱ Cristo nandu'un. 13Y nandu'un u̶u̶ch nigu̶xyu̶ ajtu̶m ajku̶xy oypyú̶nu̶ch judío ja'ay o ka'pu̶ jyudíoja'ayu̶ch, ni'idookypyu̶ja'ay o awa'adztuumbu̶ ja'ay ajku̶xy, tu̶ nnu̶u̶be̱jtu̶m ajku̶xy neby tu'ugyu̶ nyajpaatu̶mu̶chu̶ñ ajku̶xy mu̶u̶d je̱'e̱ tu'ugpu̶ Espíritu Santo kyu̶xpu̶; y nigu̶xyu̶ je̱'e̱ tu'ugpu̶ Espíritu tu̶ xyaj'adu̶gu̶u̶y xyajjoottu̶gu̶u̶yu̶m ajku̶xy.

14Je̱'e̱ tu'ugpu̶ ni'kx kopt mayñax waay pajk je̱'e̱ mu̶u̶du̶ch je̱'e̱ mu̶dyiibu̶ yu'kxpu̶ñ y ka'p tyu'kpajku̶ch. 15Ko je̱'e̱ teky du'un y'okmu̶na'anu̶ch: “Je̱' ko ka'p u̶u̶ch ngu̶'u̶ju̶ch, ka'p u̶u̶ch nyajpaady ma je̱'e̱ ni'kx koptu̶ñ”, ka'p je̱'e̱ ni'kx kopt paady puwa'adzu̶ch y kya'a'okyajpaadnu̶ch tu'ugyu̶. 16Y ko je̱'e̱ tadzak du'un y'okmu̶na'anu̶ch: “Je̱' ko ka'p u̶u̶ch nwiinu̶ch, ka'p u̶u̶ch nyajpaady ma je̱'e̱ ni'kx koptu̶ñ”, ka'p je̱'e̱ ni'kx kopt paady puwa'adzu̶ch, y kya'a'okyajpaadnu̶ch tu'ugyu̶. 17Ko u̶xyu̶py je̱'e̱ ni'kx kopt ku̶xyu̶ y'okwiinu̶ch, ka'p u̶xyu̶py nmu̶doowu̶m. Y ko u̶xyu̶py je̱'e̱ ni'kx kopt ku̶xyu̶ y'oktadzáku̶ch, ka'p u̶xyu̶py tii nxúku̶mu̶. 18Peru̶ Dios ñibu̶daagu̶u̶y je̱'e̱ ku̶'u̶ teky y je̱'e̱ wiin awak nidu'ugjáty nidu'ugjáty ma je̱'e̱ ni'kx kopt neby pyadyiiju̶ñ y neby najty tzokyu̶ñ. 19Ko u̶xyu̶py n'ok'agu̶pajku̶ch ajtu̶m ajku̶xy, ka'p u̶xyu̶py je̱'e̱ ni'kx kopt. 20Je̱'e̱ju̶tz tu̶y'ajt, oy je̱'e̱ waay pajk jya'amáyu̶ch, peru̶ je̱'e̱ ni'kx kopt tu'ug je̱'e̱ je'eyu̶.

21Je̱'e̱ wiin ka'p je̱'e̱ ku̶'u̶ mu̶baad nu̶ma'ay: “Ka'p miich nyajmayjáty”; ni je̱'e̱ ku'ubajk je̱'e̱ teky mu̶baad ka'anu̶ma'ay: “Ka'p miich nyajmayjyajtku̶xy.” 22Ku̶xyu̶ je̱'e̱ mu̶dyiibu̶ du'un ku̶'u̶xu̶'kp ma je̱'e̱ ni'kx kopt neby ka'pu̶ tyuñu̶ñ, je̱' ni'igyu̶ mu̶k tuumb. 23Y je̱'e̱ ni'kx kopt mu̶dyiibu̶ we̱e̱nu̶ yajtzojkpu̶ñ, je̱' ni'igyu̶ oy nigweentu̶ nyojxu̶mby nbu̶jku̶mby. Y je̱'e̱ ni'kx kopt mu̶dyiibu̶ ka'p jyaty kyu̶xu̶'u̶gyu̶ñ, je̱' ni'igyu̶ nyu'tzu̶mby n'amé̱ttu̶mby neby oy yajxón kyu̶xu̶'u̶gu̶chu̶ñ, 24y ka'p jyaty paadyii nyu'tz n'amé̱ttu̶mu̶ch je̱'e̱ ni'kx kopt je̱'e̱ mu̶dyiibu̶ je̱'e̱ wit tukxy ka'p jatyyajmayjyátyu̶ñ. Dios ñibu̶daagu̶u̶y je̱'e̱ ni'kx kopt oy yajxón neby je̱'e̱ mu̶dyiibu̶ we̱nnu̶ yajtzojkpu̶ñ ni'igyu̶ oy yajxón nigweentu̶ nyu'tz n'amé̱ttu̶mu̶chu̶ñ, 25ka'pu̶ abu̶kyjyaty y'ijtku̶xu̶ch je̱'e̱ mu̶dyiibu̶ yu'kxp ma je̱'e̱ ni'kx koptu̶ñ, wan du'un nigu̶xyu̶ naybyube̱jtu̶gu̶xu̶ch amíñ u̶xyu̶py ma je̱'e̱ ni'kx koptu̶ñ. 26Ko je̱'e̱ ni'kx kopt we̱e̱nu̶ chu̶chu̶'u̶y, ku̶xyu̶ je̱'e̱ ni'kx kopt nandu'un pyu̶jkta'ay y pu̶nu̶ yajku'umaaby je̱'e̱ ni'kx kopt tu'uk'ít je'eyu̶, ku̶xyu̶ je̱'e̱ ni'kx kopt nandu'un xyonda'agy.

27Miich ajku̶xy, je̱'e̱ Cristo miich xyñi'kx'ajtku̶xp, y du'un miich nidu'ug nidu'ug myajpaatku̶xy ma je̱'e̱ Cristo ñi'kx neby je̱'e̱ ku̶'u̶ tekyu̶ñ. 28Dios yajni'ipu̶jk je̱'e̱ mu̶bu̶jkpu̶du̶jk nidu'ug nidu'ug tii tyuungu̶xu̶byu̶ñ. Timyjyayu̶jp yajni'ipu̶jky ko y'apóstol'ajtku̶xu̶ch; mu̶me̱tzk ko y'ayuuknajtzkapxu̶u̶ygyu̶xu̶ch, mu̶du̶gu̶u̶g ko yaj'u̶xpu̶jkku̶xu̶ch, y mu̶'it je̱'e̱ mu̶dyiibu̶ je̱'e̱ mu̶jwinma'añ tuungu̶xu̶bu̶ñ, y naagu̶ñ je̱'e̱ mu̶dyiibu̶ je̱'e̱ pa'amja'ay yajtzookku̶xu̶bu̶ñ, o je̱'e̱ mu̶dyiibu̶ pube̱jtku̶xu̶bu̶ñ, o je̱'e̱ mu̶dyiibu̶ ane̱'e̱mgu̶xu̶bu̶ñ, o je̱'e̱ mu̶dyiibu̶ je̱'e̱ wiingpu̶ ayuuk kápxku̶xu̶bu̶ñ. 29Ka'p je̱'e̱ nigu̶xyu̶ y'apóstol'ajtku̶xy, nan ka'p nigu̶xyu̶ y'ayuuknajtzkapxu̶u̶ybyu̶du̶jku̶ch ajku̶xy, nan ka'p je̱'e̱ mu̶jwinma'añ nigu̶xyu̶ tuungu̶xy, 30nan ka'p je̱'e̱ mu̶k'ajt nigu̶xyu̶ mu̶dajtku̶xy neby je̱'e̱ pa'amja'ay yajtzookku̶xu̶chu̶ñ. Nan ka'p nigu̶xyu̶ jajtku̶xy neby je̱'e̱ wiingpu̶ ayuuk kápxku̶xu̶chu̶ñ, nan ka'p nigu̶xyu̶ jajtku̶xy neby je̱'e̱ wiingpu̶ ayuuk kapxtu̶u̶gu̶xu̶chu̶ñ tii je̱'e̱ wiingpu̶ ayuuk naty du'un tyijpyu̶ñ. 31Miich mu̶joottu̶gooygyu̶x je̱'e̱ oybyu̶ may'ajt je̱'e̱ mu̶dyiibu̶ je̱'e̱ Dios ñi'iyejkypyu̶ñ.

Y u̶u̶ch miich je̱'e̱ jak'oybyu̶ nu̶u̶ tu'u nyajni'ixu̶'u̶wu̶py ajku̶xy.

Currently Selected:

1 Corintios 12: MIXE

Highlight

Copy

Compare