1 Corintios 11

1Pa'ijxu̶gyu̶ch je̱'e̱ n'ijxpe̱jtu̶ñ miich ajku̶xy, du'un neby u̶u̶ch je̱'e̱ Cristo y'ijxpe̱jtu̶ñ u̶u̶ch nba'ijxu̶ju̶ñ.

Neby je̱'e̱ to'oxyu̶jktu̶jk mu̶baad jya'ay'ajtku̶xy ma je̱'e̱ mu̶bu̶jkpu̶du̶jk ñaymyujku̶gu̶xyu̶ñ

2Njanchku'umaaygyu̶xypy miich mu̶gu'uktu̶jk, je̱' ko u̶u̶ch miich je'emy xyjya'aymye̱jtzku̶xy y mbanú̶kxku̶xy je̱'e̱ u̶xpu̶jku̶ñ je̱'e̱ mu̶dyiibu̶ tu̶ nyajni'ixu̶u̶ygyu̶xyu̶ñ. 3Peru̶ ndzojkypyu̶ch mwinju̶wu̶u̶ygyu̶xu̶ch ko je̱'e̱ Cristo je̱' je̱'e̱ ya'aydyu̶jk nidu'ug nidu'ug nigu'ubajk'ajtp, y je̱'e̱ ya'aydyu̶jk je̱' je̱'e̱ tyo'oxyu̶jk nigu'ubajk'ajtp, du'un neby je̱'e̱ Dios je̱'e̱ Cristo nigu'ubajk'átyu̶ñ. 4Pu̶nu̶ jii je̱'e̱ ya'aydyu̶jk kyu'ujúp tu'ug pu̶da'agy ko je̱'e̱ Dios naty mu̶bu̶jktzóy o ko je̱'e̱ ayuuk tu̶y'ajt naty kapxwa'kxy je̱'e̱ mu̶dyiibu̶ je̱'e̱ Dios tu̶ myo'oyii, je̱'e̱ Cristo naty je̱'e̱ du'un kya'amu̶j'ijxypy kya'amu̶jpu̶daakypy je̱'e̱ mu̶dyiibu̶ nigu'ubajk'ajtu̶bu̶ñ. 5Y pu̶nu̶ je̱'e̱ to'oxyu̶jk ka'p ñaygyu'ube'eñyii ko je̱'e̱ Dios naty mu̶bu̶jktzóy o ko je̱'e̱ ayuuk tu̶y'ajt naty kapxwa'kxy je̱'e̱ mu̶dyiibu̶ je̱'e̱ Dios tu̶ myo'oyii, je̱'e̱ ñiya'aydyu̶jk naty je̱'e̱ du'un kya'amu̶j'ijxypy kya'amu̶jpu̶daakypy je̱'e̱ mu̶dyiibu̶ nigu'ubajk'ajtu̶bu̶ñ. Du'un je̱'e̱ ni'ipaady neby du'umbu̶ nu̶wu̶'u̶y tu̶ ñaygyu'ume'pxyiiju̶ñ. 6Pu̶nu̶ ka'p je̱'e̱ to'oxyu̶jk ñaygyu'ube'eñyii, ni'igu̶ oy ko tyimyñaygyu'ume̱'pxtu'uta'awu̶u̶ju̶ch. Peru̶ pu̶nu̶ tzo'oydyuungu̶xp je̱'e̱ to'oxyu̶jk du'un ko je̱'e̱ kyu'uwaay u̶xme̱'pxku̶xu̶ch o ko ñaygyu'ume̱'pxu̶gu̶xu̶ch, mu̶'it mu̶baad ñaygyu'ube̱'e̱nu̶gu̶xyu̶. 7Je̱'e̱ ya'aydyu̶jktu̶jk ka'p je̱'e̱ kyu'ujúp mu̶baad pu̶daakku̶xy ko je̱'e̱ Dios naty mu̶bu̶jktzoogu̶xy o ko je̱'e̱ ayuuk tu̶y'ajt naty kapxwa'kxku̶xy je̱'e̱ mu̶dyiibu̶ je̱'e̱ Dios tu̶ myooyu̶gu̶xyu̶ñ, je̱' ko du'un je̱'e̱ ajku̶xy neby je̱'e̱ Diosu̶ñ y jim je̱'e̱ Dios y'oy'ajtu̶ñ kyu̶xu̶'u̶gy ma je̱' ajku̶xyu̶ñ. Peru̶ je̱'e̱ to'oxyu̶jk jim je̱'e̱ y'oy'ajtu̶ñ kyu̶xu̶'u̶gy ma je̱'e̱ ya'aydyu̶jku̶ñ, 8je̱' ko ka'p je̱'e̱ Dios je̱'e̱ ya'aydyu̶jk jiiby yajpu̶dzu̶u̶my ma je̱'e̱ to'oxyu̶jk kyachpyajku̶ñ, je̱'e̱ to'oxyu̶jk jiiby pu̶dzu̶u̶m ma je̱'e̱ ya'aydyu̶jk kyachpyajku̶ñ. 9Y ka'p je̱'e̱ ya'aydyu̶jk to'oxyu̶jk kyu̶xpu̶ yajkoju̶, je̱'e̱ to'oxyu̶jk ya'aydyu̶jk kyu̶xpu̶ yajkoju̶. 10Y paady je̱'e̱ to'oxyu̶jktu̶jk mu̶baad ñaygyu'ube̱'e̱nu̶gu̶xy wan du'un kyu̶xu̶'u̶gu̶ch ko ane'emy y'ijtku̶xy y wan je̱'e̱ ángelestu̶jk du'un jyootkujk'ajtku̶xu̶ch. 11Paady u̶u̶ch je̱'e̱ mu̶dyiibu̶ je̱'e̱ Cristo nmu̶bu̶jku̶mbyu̶ñ ajku̶xy, ka'p je̱'e̱ ya'aydyu̶jk mu̶baad naydyu'um yajpaady ni je̱'e̱ to'oxyu̶jk mu̶baad naydyu'um kya'ayajpaady. 12Oy du'un jya'atu̶y'ajtu̶ch ko je̱'e̱ to'oxyu̶jk jiiby pyu̶dzu̶u̶my ma je̱'e̱ ya'aydyu̶jk kyachpyajku̶ñ, peru̶ nan tu̶y'ajt nandu'un ko je̱'e̱ to'oxyu̶jk je̱'e̱ ya'aydyu̶jk yajma'axung'áty; y jiiby je̱'e̱ ku̶xyu̶ chonda'agy ma je̱'e̱ Diosu̶ñ.

13Miich ku̶'u̶m oknigápxku̶x pu̶nu̶ oy du'un ko je̱'e̱ to'oxyu̶jk je̱'e̱ Dios mu̶bu̶jktzówu̶ch ku'uwa'adz. 14Mu̶baad du'un ku̶'u̶m nnejwu̶u̶yu̶m ajku̶xy ko oycho'oydyuunu̶ du'un ko je̱'e̱ ya'aydyu̶jk kyu'uwaay yoñ yaj'yoongu̶xy; 15y ku'umaaybyu̶dzu̶u̶mgu̶xp je̱'e̱ to'oxyu̶jk du'un ko je̱'e̱ kyu'uwaay yoñ yaj'yoongu̶xy; je̱' ko tu̶ je̱'e̱ kyu'uwaay yoñ yajmooygyu̶xy neby du'un kyu'ube̱'e̱nu̶gu̶xu̶chu̶ñ. 16Pu̶nu̶ jii adaa du'umbu̶ u̶xpu̶jku̶ñ pu̶n yajtzibu̶'u̶wa'añ, mu̶baad je̱'e̱ nejwu̶'u̶y ko ni u̶u̶ch ajku̶xy, y ni je̱'e̱ Dios jya'ay je̱'e̱ wiingpu̶ kostumbre ka'anejwu̶u̶ygyu̶xy ko je̱'e̱ to'oxyu̶jk je̱'e̱ Dios mu̶bu̶jktzoogu̶xu̶ch ku'uwa'adz.

Ka'amu̶jpu̶daaku̶ñ ma je̱'e̱ Windzú̶n Jesús y'adzuuju̶ñ

17Ko njaknijayu̶y'adu̶'u̶dzaangu̶xy, ka'p miich mu̶baad n'okku'umaaygyu̶xnu̶, je̱' ko ma mnaymyujku̶gu̶xy ju̶bu̶k axu̶u̶g mnaydyuunu̶gu̶xy ma jya'apadyii mja'ay'ajtku̶xu̶ch oy yajxón. 18Du'un u̶u̶ch je̱'e̱ ja'ay tu̶ xyñu̶maaygyu̶xy ko mnayyo'oymyujku̶gu̶xy ko naty mdzajptu̶gooty'adaangu̶xy, mnaymyu̶dzibu̶u̶yu̶gu̶xp agu̶ miich mnayyajwa'kxu̶gu̶xy me̱jtz pu̶ky tu̶gu̶u̶g pu̶ky, y nmu̶bu̶jkypyu̶ch nije̱' ko du'un tyu̶y'ajtu̶ch. 19Peru̶ kuaanu̶ je̱'e̱ du'un ñi'igu̶ jádu̶ch mnaymyu̶dzibu̶u̶yu̶gu̶xu̶ch mnayyajwa'kxu̶gu̶xu̶ch me̱jtz pu̶ky tu̶gu̶u̶g pu̶ky, wan du'un ñi'igu̶xu̶'u̶gu̶ch je̱'e̱ mu̶dyiijáty je̱'e̱ ayuuk tu̶y'ajt jaanch kuydyuungu̶xpu̶ñ. 20Y je̱' du'un myajtzíp myajma'adu̶u̶ygyu̶xypy je̱'e̱ m'adzuu mu̶dyiibu̶ mdzuugaay mdzuu'uukku̶xypyu̶ñ ma mnaymyujku̶gu̶xyu̶ñ y ka'p du'un jaanch je̱' mja'aymye̱jtzku̶xypy je̱'e̱ Windzú̶n Jesús y'adzuu. 21Y ko je̱'e̱ hooru̶ paady mu̶naa mgaaydyu̶gu̶u̶y m'uuktu̶gu̶u̶ygyu̶xu̶chu̶ñ, chi miich mjayu̶jp'ajtu̶gu̶u̶ygyu̶xkojy; mnixajju̶ydyu̶gu̶u̶ygyu̶xy je̱'e̱ mgu̶'u̶m'adzuu mgaaydyu̶gu̶u̶ygyu̶xy je̱'e̱ m'adzuu abu̶kyjyaty y ka'p je̱'e̱ mmu̶gu'ug mgweentu̶tuungu̶xy pu̶nu̶ kaaygyu̶xp uukku̶xp je̱' o pu̶nu̶ ka'p, y nije̱' ayuu wyu̶'u̶mgu̶xy y nije̱' u̶xtu̶ koonu̶ myúku̶gu̶xy. 22¿Nej ka'p miich je̱'e̱ mju̶u̶n mdu̶jk ajku̶xy ma mgaaygyu̶x m'uukku̶xu̶chu̶ñ? ¿Ti je̱'e̱ Dios jya'ay ko mga'amu̶j'ijx mga'amu̶jpu̶daaku̶ ajku̶xy y myajtzo'oydyuungu̶xy je̱'e̱ ayoobu̶du̶jk je̱'e̱ mu̶dyiibu̶ ka'p tii mu̶dajtku̶xyu̶ñ ko mwingay mwin'uugu̶u̶ygyu̶xy? ¿Nej mu̶baad n'oknu̶maaygyu̶xy? ¿Ko ngu'umaaygyu̶xypy? ¡Ka'p, ka'p mu̶baad ngu'umaaygyu̶xy neby m'adu̶u̶tzku̶xyu̶ñ!

Je̱'e̱ Windzú̶n Jesús y'adzuu

(Mt 26.26-29; Mc 14.22-25; Lc 22.14-20)

23Je̱' ko je̱'e̱ Windzú̶n Jesús u̶u̶ch adayaaba u̶xpu̶jku̶ñ ku̶'u̶m tu̶ xymyo'oy, je̱'e̱ mu̶dyiibu̶ miich tu̶ nyaj'u̶xpu̶jkku̶xyu̶ñ: Ko je̱'e̱ mu̶'it koodz ko je̱'e̱ Windzú̶n Jesús yajku̶'u̶yejky, chi je̱'e̱ tzajkaagy konu̶'ky, 24y ko je̱'e̱ Dioskujuuyu̶p yejky ma je̱'e̱ Diosu̶ñ, chi adugu̶u̶y y myu̶naañ: “Adaa tzajkaagy u̶u̶ch adaa nni'kx mu̶dyiibu̶ u̶u̶ch nyejkypy ma je̱'e̱ o'ku̶ñ ke̱e̱ku̶ñ mu̶u̶d miich kyu̶xpu̶ m'oy'ajtu̶ñ ajku̶xy. Adaa ijxpe̱jt miich mu̶'ijtku̶xu̶py mu̶u̶d u̶u̶ch kyu̶xpu̶. Mduungu̶xu̶py adaa y du'un mja'aymye̱jtzku̶xu̶ch ko u̶u̶ch je̱'e̱ njugy'ajtu̶ñ tu̶ nyeky mu̶u̶d miich kyu̶xpu̶ ajku̶xy.” 25Nandu'un tuuñ ko y'adzuu'ajtku̶xy, chi je̱'e̱ u'ugy konu̶'ky y myu̶naañ: “Adaa u'ugy je̱' adaa je̱'e̱ jembyu̶ Dios y'ane'emyu̶ñ, u̶u̶ch adaa nne'pty je̱'e̱ mu̶dyiibu̶ nidu̶y'ajt'ajtpu̶ñ. Naag'ook naag'ook adaa u'ugy naty m'uukku̶xyu̶ñ, tuungu̶x neby du'un mja'aymye̱jtzku̶xu̶ch ko u̶u̶ch je̱'e̱ njugy'ajtu̶ñ tu̶ nyeky mu̶u̶d miich kyu̶xpu̶ ajku̶xy.” 26Y u̶xtu̶ koonu̶ je̱'e̱ Windzú̶n Jesús ya naaxwiiñ myínu̶ch, ja'aymye̱jtzku̶x ko je̱'e̱ jyugy'ajtu̶ñ yejky mu̶u̶d miich kyu̶xpu̶ ajku̶xy naag'ook naag'ook adaa tzajkaagy y adaa u'ugy naty m'uukku̶xyu̶ñ.

Neby je̱'e̱ Windzú̶n Jesús y'adzuu mu̶baad yajkáy yaj'u'ugyu̶ñ

27Y du'unu̶tz wanpú̶nu̶ch pu̶n je̱'e̱ Windzú̶n Jesús chajkaagy kaayu̶ygyu̶xpu̶ñ y pu̶n je̱'e̱ Windzú̶n Jesús y'u'ugy uuku̶ygyu̶xpu̶ñ neby ka'p pyadyiiju̶ñ, je̱'e̱ Windzú̶n Jesús naty je̱'e̱ ñi'kx y je̱'e̱ ñe'pty du'un myu̶duundu̶gooyu̶py ajku̶xy. 28Paadyu̶tz jayu̶jp nidu'ug nidu'ug oktaj okmaaygyu̶x neby mdzu̶naaygyu̶xy mjugy'ajtku̶xyu̶ñ ma je̱'e̱ tzajkaagy naty ka'anu̶ mgaaygyu̶xyu̶ñ y ma je̱'e̱ u'ugy naty ka'anu̶ m'uukku̶xyñu̶ju̶ñ. 29Je̱' ko pu̶n je̱'e̱ tzajkaagy kaaybyu̶ñ y pu̶n je̱'e̱ u'ugy uukpu̶ñ y pu̶nu̶ ka'p jayu̶jp okkweentu̶túñ ko je̱'e̱ Windzú̶n Jesús ñi'kx y ñe'pty je̱', kyu̶'u̶mdzaachpyu̶ naty je̱'e̱ du'un ñigayu̶u̶by ñi'ugu̶u̶by. 30Y paady miich nimay mbu̶jku̶gu̶xy y mbu̶ma'ayu̶ch ajku̶xy, y nan nije̱' tu̶ y'o'kku̶xnu̶. 31Ko u̶xyu̶py ku̶'u̶m n'oktaj n'okmaayu̶m ajku̶xy oy yajxón neby ndzu̶naay njugy'ajtu̶mu̶ñ ajku̶xy, ka'p u̶xyu̶py je̱'e̱ Windzú̶n Jesús xychaachtyuunu̶m ajku̶xy, 32y oy u̶xyu̶py je̱'e̱ Windzú̶n Jesús xyjya'atzaachtuunu̶mbu̶ ajku̶xy, je̱' gyu̶xpu̶ naty je̱'e̱ du'un xychaachtyuunu̶m ajku̶xy neby njajtu̶mu̶chu̶ñ ajku̶xy nmu̶duunu̶mu̶ch je̱'e̱ Dios ajku̶xy y ka'pu̶ kipxy tu̶goydyuum nnú̶kxu̶mu̶ch ajku̶xy mu̶u̶d je̱'e̱ naaxwiiñjya'ay mu̶dyiibu̶ je̱'e̱ Dios ka'p mu̶bu̶jkku̶xyu̶ñ.

33Y du'unu̶tz mu̶gu'uktu̶jk ajku̶xy, ko naty mnaymyujku̶gu̶xy ko je̱'e̱ Windzú̶n Jesús chajkaagy naty mgayaanu̶ ajku̶xy y ko je̱'e̱ Windzú̶n Jesús y'u'ugy naty m'u'ugaanu̶ ajku̶xy, nayjya'ay'e̱jxu̶gu̶x amíñ u̶xyu̶py y ka'p wiindu'ug u̶xtu'ug mgaaydyu̶gu̶u̶y m'uuktu̶gu̶u̶ygyu̶xy. 34Y pu̶nu̶ jii pu̶n yu'o'ogyii, wan kay u'ugy ma je̱'e̱ kyu̶'u̶mju̶u̶n kyu̶'u̶m du̶jku̶ñ, ka'pu̶ je̱'e̱ Dios chaachtyunu̶u̶ju̶ch ko naty du'un oy yajxón ka'ayajkoptu̶gu̶u̶ygyu̶xy neby je̱'e̱ Windzú̶n Jesús chajkaagy kaayu̶chu̶ñ ajku̶xy y neby je̱'e̱ y'u'ugy uuku̶yu̶chu̶ñ ajku̶xy ma ñaymyujku̶gu̶xyu̶ñ. Y je̱'e̱ wiingpu̶ ayuuk jim u̶u̶ch je̱'e̱ nyaj'oyu̶'u̶wu̶ch ma miich ajku̶xyu̶ñ ko u̶u̶ch naty jim nnu̶kxy nu̶kxy ngu'ijxku̶xy nmu̶gápxku̶xy.

Currently Selected:

1 Corintios 11: MIXE

Highlight

Copy

Compare