1 Corintios 10

Wingapx ju̶jpkapxu̶u̶yu̶ñ ma je̱'e̱ mu̶dyiibu̶ je̱'e̱ tzaadzéch kepychech windzu̶gu̶u̶ygyu̶xpu̶ñ

1Ka'p u̶u̶ch ndzoky mu̶gu'uktu̶jk, mja'aydyu̶gooygyu̶xu̶ch ko je̱'e̱ nmu̶j'áp nmu̶jteedy je̱'e̱ nu̶ma'a jékyu̶p nigu̶xyu̶ kweentu̶'ajtu̶gu̶xy ñu̶u̶woow tyu'uwoowu̶ ajku̶xy, y ko je̱'e̱ Tzaptz Mejy nigu̶xyu̶ yajnajxku̶xy. 2Y du'un oy du'un tyu'ugyu̶ju̶u̶ygyu̶xy mu̶u̶d je̱'e̱ Moisés ko je̱'e̱ nu̶ma'a tyu'uwoowu̶gu̶xy y yajnajxku̶xy je̱'e̱ mejy, neby du'umbu̶ yajnu̶u̶be̱jtu̶gu̶xyu̶ñ. 3Kipxy je̱'e̱ maná nigu̶xyu̶ kaaygyu̶xy, je̱'e̱ mu̶dyiibu̶ je̱'e̱ Dios najty yejkypyu̶ñ, 4y nan y'uukku̶x je̱'e̱ nu̶u̶ nandu'un je̱'e̱ mu̶dyiibu̶ je̱'e̱ Dios najty yejkypyu̶ñ. Je̱' ko je̱'e̱ nu̶u̶ najty y'uukku̶xypy je̱'e̱ mu̶dyiibu̶ najty tzaajooty pu̶dzu̶u̶mbu̶ñ je̱'e̱ mu̶dyiibu̶ je̱'e̱ Dios najty yejkypyu̶ñ, je̱'e̱ mu̶dyiibu̶ najty pawu̶dijtu̶bu̶ñ ajku̶xy majaty najty ñú̶kxku̶xyu̶ñ, y je̱'e̱ tzaa je̱' najty je̱' je̱'e̱ Cristo. 5Y je̱'e̱ jaknimaybyu̶ ka'p je̱'e̱ Dios mu̶mu̶doogu̶xy y ka'p je̱'e̱ Dios du'un kyu'umaayu̶gu̶xy, y paady je̱'e̱ jim adu'ugtuum y'o'kku̶xy.

6Ku̶xyu̶ neby adaa du'un tyuunu̶ jyajtu̶ju̶ñ, paady adaa du'un tyuunu̶ jyajtu̶ neby du'un mu̶baad n'ijxpe̱jt'ajtu̶mu̶ñ ajku̶xy, ka'pu̶ je̱'e̱ ju̶bu̶kpu̶ n'adzojku̶mu̶ch ajku̶xy, neby je̱'e̱ adzojky ajku̶xyu̶ñ. 7Paady ka'p miich je̱'e̱ tzaadzéch kepychech m'o'owu̶dajtku̶xy neby je̱'e̱ nije̱' y'adu̶u̶tzku̶xyu̶ñ, neby je̱'e̱ Dios ñaky myu̶na'añu̶ñ: “Naxwé̱tzku̶x je̱'e̱ ja'ay kaaybyu̶ uukpu̶, y chi pyu̶du̶'kku̶xy y'e̱jtztu̶gu̶u̶y pyujtu̶gu̶u̶ygyu̶xy.” 8Ka'p je̱'e̱ to'oxyu̶jk nmu̶dtuundu̶gooyu̶mu̶ch ajku̶xy, neby je̱'e̱ nije̱' y'adu̶u̶tzku̶xyu̶ñ, y y'o'kku̶xy je̱'e̱ tu'kxu̶u̶bu̶ ipxtu̶gu̶u̶g mil. 9Nan ka'p je̱'e̱ Jesucristo#10.9 Nije̱' jaaybyu̶du̶jk myu̶naangu̶xy: je̱'e̱ Windzú̶n Dios. mu̶baad njoot'ijx nwinma'añ'ijxu̶m ajku̶xy, neby je̱'e̱ nije̱' y'adu̶u̶tzku̶xyu̶ñ, y chi je̱'e̱ tza'añ kyu'udzu'tzu̶ ajku̶xy. 10Y ka'p je̱'e̱ Dios mni'oj mniyaaxu̶u̶ygyu̶xy, neby je̱'e̱ nije̱' ni'oj niyaaxu̶u̶ygyu̶xyu̶ñ, y chi je̱'e̱ ángel je̱'e̱ mu̶dyiibu̶ yaj'o'kpu̶ñ yaj'o'ku̶ ajku̶xy.

11Ku̶xyu̶ adaa neby je̱'e̱ nmu̶j'áp nmu̶jteedy ajtu̶m ajku̶xy jyajtku̶xy y'abe̱jtku̶xy, paady je̱'e̱ du'un jyajtku̶xy y'abe̱jtku̶xy neby du'un mu̶baad n'ijxpe̱jt'ajtu̶mu̶ñ ajku̶xy, y yajkujaay adaa du'un ma je̱'e̱ Dios ñakyu̶ñ ka'pu̶ du'un n'adu̶u̶tzu̶mu̶ch ajku̶xy neby je̱'e̱ y'adu̶u̶tzku̶xyu̶ñ, je̱'e̱ mu̶dyiibu̶ jada'achám jaktzu̶naay jakjugy'ajtu̶mbu̶ñ ajku̶xy ma je̱'e̱ xu̶u̶ tiempo tu̶ wyingoonu̶ju̶ñ mu̶naa je̱'e̱ Jesucristo ya naaxwiiñ wyimbijttu̶gatza'añu̶ñ. 12Y du'unu̶tz, pu̶n nayjyu̶wu̶u̶yu̶p ko tu'ug'aa tu'ugjoot mu̶bu̶ky, wan naygyweentu̶'adyii ka'p wyinma'añdyu̶góyu̶ch. 13Miich ajku̶xy, ka'p miich je̱'e̱ tzaachpyu̶ ayo'on tu̶ mmu̶najx myajnajxku̶xy je̱'e̱ mu̶dyiibu̶ ka'p myu̶madaaknu̶chu̶ñ. Peru̶ joot'amu̶j'ajtu̶gu̶x je̱'e̱ Dios, je̱' ka'p je̱'e̱ a'ixu̶'u̶wu̶ch nu̶kxy je̱'e̱ tzaachpyu̶ ayo'on ni'igyu̶ mmu̶najx myajnajxku̶xy, je̱'e̱ mu̶kpu̶ je̱'e̱ mu̶dyiibu̶ ka'p mu̶baad mmu̶madaakku̶xyu̶ñ. Ko naty je̱'e̱ du'umbu̶ tzaachpyu̶ ayo'on mbaatku̶xy m'ijxku̶xy, nan xymyooygyu̶xu̶p je̱'e̱ Dios joot winma'añ nandu'un neby je̱'e̱ tzaachpyu̶ ayo'on mu̶baad mmu̶madaakku̶xyu̶ñ.

14Paadyu̶tz, miich mu̶gu'uktu̶jk ajku̶xy je̱'e̱ mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, ku'uge̱e̱kku̶x je̱'e̱ tzaadzéch kepychech o'owu̶datu̶u̶. 15Cham adaa nyajmu̶dkápx nyajmu̶dmu̶dyaakku̶xy, je̱' ko nnejwu̶u̶ybyu̶ch ko miich adaa mwinju̶wu̶u̶ygyu̶xy, y mu̶baad miich ku̶'u̶m mgu̶'u̶yo'oy mdekyyo'oygyu̶xy, pu̶nu̶ ka'p du'un y'okjaanchu̶ch neby yam nnu̶maaygyu̶xyu̶ñ. 16Ko je̱'e̱ viino kunukxypyu̶ n'uuku̶m ajku̶xy je̱'e̱ mu̶dyiibu̶ je̱'e̱ Dioskujuuyu̶p mu̶u̶d nye̱jku̶mu̶ñ ajku̶xy, tu'ugyu̶ naty du'un nyajpaatu̶nu̶ ajku̶xy mu̶u̶d je̱'e̱ Cristo ko je̱'e̱ ñe'pty teemy yojky mu̶u̶d u̶u̶ch kyu̶xpu̶ ajtu̶m ajku̶xy; ko je̱'e̱ tzajkaagy ngaayu̶m ajku̶xy je̱'e̱ mu̶dyiibu̶ n'adugu̶u̶yu̶mbyu̶ñ ajku̶xy, tu'ugyu̶ naty du'un nyajpaatu̶nu̶ ajku̶xy mu̶u̶d je̱'e̱ Cristo, ko je̱'e̱ ñi'kx kyopt yejky yaj'o'ku̶ mu̶u̶d u̶u̶ch kyu̶xpu̶ ajtu̶m ajku̶xy. 17Oy nja'animáyu̶ch ajtu̶m ajku̶xy, peru̶ nigu̶xyu̶ je̱'e̱ tu'ugpu̶ tzajkaagy ngaayu̶m ajku̶xy, y paady ntu'ugyu̶ yajpaattu̶nu̶ ajku̶xy.

18Ok'yajkoptu̶u̶ygyu̶x je̱'e̱ Israel ja'ay ajku̶xy: je̱'e̱ mu̶dyiibu̶ je̱'e̱ windzu̶gu̶'u̶ñ tzu'tzku̶xpu̶ñ je̱'e̱ mu̶dyiibu̶ naty tu̶ yojxku̶xyu̶ñ, tu'ugyu̶ ju̶u̶ygyu̶xp naty je̱'e̱ du'un nixim niyam y mu̶u̶d je̱'e̱ Dios. 19Ka'p u̶u̶ch yam du'un nmu̶na'añ ko je̱'e̱ tzaadzéch kepychech mu̶k'ajt mu̶u̶du̶ch, y nan ka'p u̶u̶ch yam du'un nmu̶na'añ ko je̱'e̱ tzu'uch ni'igyu̶ y'óyu̶ch je̱'e̱ mu̶dyiibu̶ je̱'e̱ tzaadzéch kepychech yajwindzu̶gu̶u̶ygyu̶xypyu̶ñ ni'igu̶ ka'p oy mu̶dyiibu̶ tzu'uchu̶ñu̶ba. 20Je̱' u̶u̶ch du'un ndijpy ko je̱'e̱ ja'ay je̱'e̱ mu̶dyiibu̶ je̱'e̱ Dios ka'p mu̶bu̶jkku̶xy tii windzu̶gu̶'u̶ñ yojxku̶xy, je̱'e̱ ka'a'óybyu̶ je̱'e̱ yajwinwaanu̶u̶ygyu̶xypy y ka'p Diósu̶ch, y u̶u̶ch ka'p u̶u̶ch ndzoky ko miich tu'ugyu̶ myajpaatku̶xu̶ch mu̶u̶d je̱'e̱ ka'a'óybyu̶ ajku̶xy. 21Ka'p je̱'e̱ Windzú̶n Jesús vyiino mu̶baad m'uuku̶ ajku̶xy cham naty je̱'e̱ ka'a'óybyu̶ vyiino nandu'un m'uuku̶byu̶ ajku̶xy je̱'e̱ mu̶dyiibu̶ wyindzu̶gu̶'u̶ñ'ajtku̶xypyu̶ñ; nan ka'p je̱'e̱ tzajkaagy mu̶baad mgaaygyu̶xy ma je̱'e̱ Windzú̶n Jesús myeesu̶ju̶ñ cham naty je̱'e̱ ka'a'óybyu̶ chajkaagy nandu'un mgaayu̶byu̶ ajku̶xy ma je̱'e̱ ka'a'óybyu̶ myeesu̶ ajku̶xyu̶ñ je̱'e̱ mu̶dyiibu̶ wyindzu̶gu̶'u̶ñ'ajtku̶xypyu̶ñ.

22¿O neby je̱'e̱ Windzú̶n Jesucristo da'a du'un nyajjootma'ade̱e̱mby ajtu̶m ajku̶xy? ¿Nej ni'igyu̶ da'a tijy nmu̶k'ajt mu̶u̶du̶ch ajtu̶m ajku̶xy ni'igu̶ ka'p je̱'e̱ju̶ñu̶ba?

Oy tii mu̶baad nduunu̶m y je̱'e̱ tzojku̶ñ mu̶dyiibu̶ je̱'e̱ mu̶bu̶jkpu̶du̶jk mu̶baad tuñu̶ñ

23Du'un je̱'e̱ ja'ay myu̶naangu̶xy: “U̶u̶ch mu̶baad u̶u̶ch tii nduñ tii u̶u̶ch ndimychojkypyu̶ñ.” Tu̶y'ajt je̱'e̱ du'un, peru̶ ka'p je̱'e̱ ku̶xyu̶ y'óyu̶ch je̱'e̱ mu̶dyiibu̶ u̶u̶ch nja'atune̱e̱mbyu̶ñ. Jaanch mu̶baad u̶u̶ch nduñ tii u̶u̶ch ndimychojkypyu̶ñ, peru̶ ka'p je̱'e̱ ku̶xyu̶ pyubety neby je̱'e̱ mu̶bu̶jku̶ñ jak'yajwimbé̱du̶chu̶ñ. 24Ka'p je̱'e̱ ngu̶'u̶m'oy'ajtu̶ñ mu̶baad ku̶'u̶m nmu̶joottu̶gooyu̶m ajku̶xy, je̱'e̱ nmu̶gu'ugtu̶jk je̱'e̱ y'oy'ajtu̶ñ tzu̶k mu̶joottu̶gooyu̶yu̶ ajtu̶m ajku̶xy.

25Tzu'tzku̶x oy tii tzu'uch ku̶xyu̶ mu̶dyiibu̶ mercado tóku̶bu̶ñ, ka'p mmu̶du̶u̶ myajtu̶u̶gu̶xu̶ch ma tu̶ chooñu̶ñ, ka'pu̶ nigoo mdzu̶gu̶ychoogu̶xu̶ch. 26Je̱' ko ku̶xyu̶ je̱'e̱ naaxwiimbu̶ y ku̶xyu̶ je̱'e̱ mu̶dyiibu̶ ya yajpaatpu̶ñ, je̱'e̱ Windzú̶n Dios jye̱' je̱'.

27Pu̶nu̶ jii je̱'e̱ ja'ay mu̶gaaybyu̶ xywyoogu̶xy je̱'e̱ mu̶dyiibu̶ je̱'e̱ ayuuk tu̶y'ajt ka'p mu̶bu̶kyu̶ñ, y pu̶nu̶ mmu̶naangu̶xp du'un mnu̶kxaangu̶xy, tzu'tzku̶x ku̶xyu̶ tii naty xymyooygyu̶xpu̶ñ, ka'p mmu̶du̶u̶ myajtu̶u̶gu̶xu̶ch ma tu̶ chooñu̶ñ ka'pu̶ nigoo mdzu̶gu̶ychoogu̶xu̶ch. 28Ko tu̶y pu̶n xyñu̶maaygyu̶xu̶ch: “Adaa tzu'uch je̱'e̱ tzaadzéch kepychech adaa tu̶ yajwindzu̶gu̶u̶ygyu̶xy.” Mu̶'íttu̶tz tu̶y ka'p mdzu'tzku̶xu̶ch, ka'pu̶ je̱'e̱ mmu̶gu'ug nigoo tzu̶gu̶ychoogu̶xu̶ch je̱'e̱ mu̶dyiibu̶ naty du'un tu̶ xy'awaanu̶ju̶ñ ajku̶xy#10.28 Nije̱' jaaybyu̶du̶jk myu̶naangu̶xy: je̱' ko ku̶xyu̶ je̱'e̱ naaxwiimbu̶ y ku̶xyu̶ je̱'e̱ mu̶dyiibu̶ ya yajpaatpu̶ñ, je̱'e̱ windzú̶n Dios jye̱' je̱'. 29Je̱'e̱ wiingpu̶ ja'ayu̶ch du'un nnimu̶dyaakypy je̱'e̱ mu̶dyiibu̶ tzu̶gu̶ychoogu̶xpu̶ñ neby naty tu̶ xyñu̶maaygyu̶xyu̶ñ, y ka'p myiichu̶ch ajku̶xy.

Peru̶ yajtú̶wu̶py je̱'e̱ ja'ay nije̱' ajku̶xy: “¿Ti ko yajku̶'u̶yo'oy yajtekyyo'oy je̱'e̱ mu̶dyiibu̶ u̶u̶ch nduumbyu̶ñ neby je̱'e̱ wiingpu̶ ja'ay naty tu̶ tzu̶gu̶ychoogu̶xyu̶ñ? 30Y pu̶nu̶ nyejkypyu̶ch je̱'e̱ Dioskujuuyu̶p mu̶u̶d je̱' gyu̶xpu̶ je̱'e̱ mu̶dyiibu̶ u̶u̶ch naty ndzu'chpyu̶ñ, ¿ti u̶u̶ch je̱'e̱ ja'ay ko xyajni'oj xyajniyaxu̶'u̶wu̶ch je̱'e̱ mu̶dyiibu̶ u̶u̶ch naty tu̶ ndzu'uchu̶ñ?” 31Y du'unu̶tz pu̶nu̶ mgaaygyu̶xp m'uukku̶xp y pu̶nu̶ mduungu̶xypy oy tii, tuungu̶x ku̶xyu̶ neby je̱'e̱ Dios y'oy'ajtu̶ñ du'un ñi'igu̶'u̶xu̶'u̶gu̶chu̶ñ. 32Ka'p mduungu̶xy je̱'e̱ mu̶dyiibu̶ je̱'e̱ ja'ay yajwinma'añdyu̶gooyu̶gu̶xu̶bu̶ñ, ni je̱'e̱ mu̶dyiibu̶ je̱'e̱ judío ja'ay yajwinma'añdyu̶gooyu̶gu̶xu̶bu̶ñ, ni je̱'e̱ ka'pu̶ jyudíoja'ayu̶ch ajku̶xy, ni je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ay ajku̶xyu̶ñ. 33U̶u̶ch, je̱'e̱ mu̶dyiibu̶ u̶u̶ch ku̶xyu̶ nduumbyu̶ñ, njatytimytyuumbyu̶ch je̱' neby je̱'e̱ ja'ay nigu̶xyu̶ ku'umaaygyu̶xu̶chu̶ñ, ka'p u̶u̶ch je̱'e̱ ngu̶'u̶m'oy'ajtu̶ñ nmu̶joottu̶góy, je̱'e̱ nmu̶gu'ugtu̶jk u̶u̶ch je̱'e̱ y'oy'ajtu̶ñ nmu̶joottu̶gooyu̶py, neby je̱'e̱ aanu̶mu̶ ni'idzooku̶ñ paatku̶xu̶chu̶ñ.

Currently Selected:

1 Corintios 10: MIXE

Highlight

Copy

Compare