1 Corintios 9

Je̱'e̱ mu̶dyiibu̶ je̱'e̱ apóstol paattu̶p túnu̶chu̶ñ

1Janch tu̶y'ajt ko u̶u̶ch mu̶baad nduñ tii u̶u̶ch ndimychojkypyu̶ñ y je̱'e̱ tuung je̱'e̱ mu̶dyiibu̶ je̱'e̱ apóstol paattu̶p túnu̶chu̶ñ, je̱' ko tu̶ u̶u̶ch je̱'e̱ Jesús n'ixy je̱'e̱ nWindzú̶n ajtu̶m ajku̶xy, y miich du'un myajni'igu̶xu̶'kku̶xypy ko u̶u̶ch je̱'e̱ Windzú̶n Jesús tyuung nduunu̶, ko je̱'e̱ y'ayuuk tyu̶y'ajt tu̶ mmu̶bu̶jku̶ ajku̶xy. 2Wandu̶ je̱'e̱ ja'ay du'un ka'p nije̱' ku'ubu̶jkku̶xy ko u̶u̶ch n'apóstol'aty; peru̶ miich mni'igu̶ku'ubu̶jkku̶xu̶py du'un ko du'un jyaanchu̶ch, je̱' ko u̶u̶ch miich je̱'e̱ Windzú̶n Jesús tu̶ nyajmu̶bu̶jkku̶xy y je̱' je̱'e̱ du'un yajni'igu̶xu̶'kp ko u̶u̶ch jaanch n'apóstol'aty.

3Y agu̶ du'un u̶u̶ch je̱'e̱ n'adzoogu̶xy pu̶njaty u̶u̶ch xyñi'oju̶u̶ybyu̶ñ. 4U̶u̶ch xypyaatpu̶ch ko u̶u̶ch je̱'e̱ ju̶ch kaagy nyajmo'owu̶ch, 5y nan xypyaatpu̶ch ko u̶u̶ch je̱'e̱ ndo'oxyu̶jk nmu̶dwu̶dítu̶ch je̱'e̱ mu̶dyiibu̶ je̱'e̱ ayuuk tu̶y'ajt mu̶bu̶jkpu̶ñ, du'un neby je̱'e̱ wiingpu̶ apóstolestu̶jk tyo'oxyu̶jk mu̶dwu̶dijtku̶xyu̶ñ, y je̱'e̱ Windzú̶n Jesús myu̶gue̱'e̱xktu̶jk ajku̶xy, y je̱'e̱ Pedro. 6¿O nej u̶u̶ch y je̱'e̱ Bernabé da'a je'eyu̶ nime̱tzkpajk ka'p xypyaatku̶xy xyajkaay xyaj'uukku̶xu̶chu̶ch je̱'e̱ ja'ay ajku̶xy majaty u̶u̶ch je̱'e̱ ayuuk tu̶y'ajt ngapxwa'kxku̶xyu̶ñ? 7¿Pu̶n tziptuumbu̶ da'a ku̶'u̶m nayñimu̶juyu̶u̶yu̶py? ¿Pu̶n je̱'e̱ uvakam da'a pu̶daakp y ka'p je̱'e̱ uvaju̶kxy je̱'e̱ mu̶dyiibu̶ naty tu̶ yaj'ítyu̶ñ? ¿Pu̶n da'a borreegu̶ kweentu̶'ajtp y ka'p je̱'e̱ byorreegu̶ lyeechu̶ uuku̶ je̱'e̱ mu̶dyiibu̶ chi'tzmú̶kxypyu̶ñ? 8Y ka'p mmu̶naangu̶xu̶ch ko u̶u̶ch adaa ngu̶'u̶m'ayuuk, je̱' ko nandu'un je̱'e̱ Moisés y'ane̱'e̱mu̶ñ myu̶na'añ. 9Du'un kyuja'ayu̶ch ma je̱'e̱ y'ane̱'e̱mu̶ñ nakyu̶ñ: “Ka'p je̱'e̱ wajyuubu̶ y'ajé̱n mbu̶daaku̶yu̶ ma naty je̱'e̱ trigo mu̶u̶y te̱nmoda'añu̶ñ ko naty tyrigo yajpajk'ada'añ.” Y ka'p adaa ayuuk du'un wyimbu̶dzu̶my ko je̱'e̱ Dios je̱'e̱ waj jootmay'áty, 10u̶u̶ch je̱'e̱ xyjyootmay'ajtp ajtu̶m ajku̶xy. Je̱' ko yajkujaay je̱'e̱ Moisés y'ane̱'e̱mu̶ñ mu̶u̶d u̶u̶ch kyu̶xpu̶ ajtu̶m ajku̶xy, y du'unu̶tz je̱'e̱ ja'ay je̱'e̱ mu̶dyiibu̶ je̱'e̱ naax ju̶dzijtzku̶xpu̶ñ y je̱'e̱ mu̶dyiibu̶ je̱'e̱ trigo mu̶u̶y te̱nmótku̶xpu̶ñ ko naty je̱'e̱ trigo yajpajk'adaangu̶xy jyu̶jp'ijxku̶xypy je̱'e̱ pyu̶da'aky je̱'e̱ mu̶dyiibu̶ paattu̶gu̶xpu̶ñ. 11U̶u̶ch ajku̶xy tu̶ u̶u̶ch je̱'e̱ ayuuk tu̶y'ajt ngapxwa'kxku̶xy ma miich ajku̶xyu̶ñ, y xyjya'apaatku̶xp it xypyube̱jtku̶xu̶chu̶ch miich ajku̶xy. 12Neby miich je̱'e̱ wiingpu̶ m'okpube̱jtku̶xpu̶, y u̶u̶ch it ni'igyu̶ xyjya'apaatku̶xp xypyube̱jtku̶xu̶chu̶ch miich.

Peru̶ miich mu̶naa tu̶ nmu̶ne̱'e̱mgu̶xy oy u̶u̶ch je̱'e̱ ane̱'e̱mu̶ñ nja'amu̶dajtku̶xy, y tu̶ u̶u̶ch miich nmu̶me̱kxtujkku̶xy ka'pu̶ je̱'e̱ Cristo y'ayuuk tyu̶y'ajt kapxwa'kxu̶u̶ wya'kxu̶bu̶ch wan du'un tyu'uyo'oy'adu̶'u̶dzu̶ch. 13Miich mnejwu̶u̶ygyu̶xypy ko je̱'e̱ mu̶dyiibu̶ jiiby tuungu̶xpu̶ñ ma je̱'e̱ mu̶jtzajptu̶jku̶ñ, je̱' je̱'e̱ ñijugy'ajtku̶xypy je̱'e̱ mu̶dyiibu̶ jiiby yaj'yojxpu̶ñ. Je̱' u̶u̶ch du'un ndijpy, je̱'e̱ mu̶dyiibu̶ jiiby tuungu̶xpu̶ñ ma je̱'e̱ poch ma je̱'e̱ windzu̶gu̶'u̶ñ yaj'yóxyu̶ñ, paattu̶gu̶xp je̱' tzu'tzku̶xu̶ch je̱'e̱ ju̶yujk tzu'uch je̱'e̱ mu̶dyiibu̶ je̱'e̱ ja'ay je̱'e̱ Dios jiiby yajwindzu̶gu̶u̶ygyu̶xypyu̶ñ. 14Nandu'un je̱'e̱ Windzú̶n Jesucristo ane̱'e̱mu̶ñ tu̶ yeky ko je̱'e̱ mu̶dyiibu̶ je̱'e̱ ayuuk tu̶y'ajt kapxwa'kxku̶xpu̶ñ je̱' je̱'e̱ ñijugy'ajtku̶xu̶py. 15Peru̶ u̶u̶ch ka'p miich nimu̶naa tu̶ n'ane̱'e̱mgu̶xy y tu̶ nmu̶ne̱'e̱mgu̶xy ko u̶u̶ch miich xypyube̱jtku̶xu̶ch, y ka'p miich yam paady nijaayu̶u̶ygyu̶xy xymyooygyu̶xu̶chu̶ch miich tiga'atii. ¡Ni'igu̶ oy ko u̶u̶ch n'o'ogu̶ch ni'igu̶ ka'p xypyu̶jku̶chu̶ch je̱'e̱ ja'ay nije̱' je̱'e̱ jootkujk'ajtu̶ñ mu̶dyiibu̶ u̶u̶ch nmu̶u̶du̶ñ!

16U̶u̶ch ka'p u̶u̶ch je̱'e̱ nayyajku'umayii ko u̶u̶ch je̱'e̱ ayuuk tu̶y'ajt ngapxwa'kxy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱' ko ni'igu̶ kapxwa'kxu̶byu̶ch je̱'. ¡Y ayo'onbaadu̶bu̶ch pu̶nu̶ ka'p u̶u̶ch je̱'e̱ ngapxwa'kxy! 17Paady, pu̶nu̶ ngapxwa'kxypyu̶ch je̱' mu̶u̶d u̶u̶ch je̱'e̱ ngu̶'u̶mndzojku̶ñ, mu̶'it u̶u̶ch u̶xyu̶py nyajmu̶júy, peru̶ ka'p je̱'e̱ dyu'unu̶ch, ni'igu̶ túnu̶byu̶ch je̱'e̱ du'umbu̶ tuung je̱' ko je̱'e̱ Dios u̶u̶ch je̱'e̱ tu̶ xyajni'ipú̶ky. 18Y du'unu̶tz, je̱'e̱ jootkujk'ajtu̶ñ u̶u̶ch nmu̶ju'uñ'ajtypy ko u̶u̶ch je̱'e̱ ayuuk tu̶y'ajt ngapxwa'kxy jaymyu̶juy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ; ka'p u̶u̶ch miich mu̶naa tu̶ n'ane̱'e̱mgu̶xy y tu̶ nmu̶ne̱'e̱mgu̶xy ko u̶u̶ch miich xypyube̱jtku̶xu̶ch nijugy'ádu̶chu̶ch je̱'e̱ nduung neby je̱'e̱ ayuuk tu̶y'ajt kapxwa'kxpu̶ju̶ñ.

19Oy u̶u̶ch pu̶n xykya'atuumbu̶'áty, peru̶ tu̶ u̶u̶ch du'un naybyu̶da'agyii ma miich nigu̶xyu̶ ajku̶xyu̶ñ neby je̱'e̱ tuumbu̶ju̶ñ, wan u̶u̶ch je̱'e̱ ja'ay du'un ni'igyu̶ may nyajmu̶bú̶gu̶ch je̱'e̱ Cristo. 20Ko u̶u̶ch jim nyajpaady ma je̱'e̱ judío ja'ay ajku̶xyu̶ñ du'un u̶u̶ch naybyu̶da'agyii neby tu'ug judioja'ayu̶ñ, neby u̶u̶ch je̱'e̱ Cristo du'un nyajmu̶bu̶jkku̶xu̶chu̶ñ; du'un u̶u̶ch je̱'e̱ du'un ndijy neby u̶u̶ch je̱'e̱ Cristo du'un nyajmu̶bu̶jkku̶xu̶chu̶ñ je̱'e̱ mu̶dyiibu̶ je̱'e̱ Moisés y'ane̱'e̱mu̶ñ ane̱'e̱mu̶gu̶xpu̶ñ, u̶u̶ch du'un ku̶'u̶m naybyu̶daaku̶p neby u̶u̶ch je̱'e̱ du'umbu̶ ane̱'e̱mu̶ñ nu̶wu̶'u̶y xy'ane'emyu̶ñ, oy u̶u̶ch je̱'e̱ Moisés y'ane̱'e̱mu̶ñ xykya'a''ane'emy. 21Y nandu'un neby u̶u̶ch je̱'e̱ Cristo mu̶baad nyajmu̶bú̶kyu̶ñ je̱'e̱ mu̶dyiibu̶ je̱'e̱ Moisés y'ane̱'e̱mu̶ñ ka'p y'ane̱'e̱mu̶gu̶xyu̶ñ, du'un u̶u̶ch nandu'un naybyu̶da'agyii neby je̱'e̱ nidu'ugtu̶ ajku̶xyu̶ñ, oy u̶u̶ch je̱'e̱ Dios y'ane̱'e̱mu̶ñ je'emy xyjya'a''ane'emy, peru̶ je̱'e̱ Cristo u̶u̶ch y'ane̱'e̱mu̶ñ xy'ane̱'e̱mb. 22Ko u̶u̶ch jim nyajpaady ma je̱'e̱ mu̶dyiibu̶ je̱'e̱ myu̶bu̶jku̶ñ we̱e̱nu̶ju̶ñ ajku̶xy, nandu'un u̶u̶ch naybyu̶da'agyii neby u̶u̶ch je̱'e̱ nmu̶bu̶jku̶ñ we̱e̱nu̶bu̶ju̶ñ neby je̱'e̱ nidu'ugtu̶ ajku̶xyu̶ñ, neby u̶u̶ch je̱'e̱ Cristo mu̶baad nandu'un nyajmu̶bu̶jkku̶xyu̶ñ. Du'un u̶u̶ch naybyu̶da'agyii neby je̱'e̱ ja'ay nigu̶xyu̶ ajku̶xyu̶ñ, neby u̶u̶ch je̱'e̱ Cristo mu̶baad nije̱' nyajmu̶bu̶jkku̶xyu̶ñ. 23Ndúñu̶ch adaa du'un ku̶xyu̶ mu̶u̶d je̱'e̱ Cristo y'ayuuk tyu̶y'ajt kyu̶xpu̶ je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, neby u̶u̶ch je̱'e̱ oy'ajtu̶ñ nandu'un nbaadu̶chu̶ñ kipxy mu̶u̶d je̱'e̱ mu̶dyiibu̶ adaa ayuuk tu̶y'ajt mu̶bu̶jkku̶xpu̶ñ.

24Miich mnejwu̶u̶ygyu̶xypy ko ma je̱'e̱ ja'ay pyoyu̶'kkípxyu̶ñ nigu̶xyu̶ je̱'e̱ pyoyu̶'kku̶xy, peru̶ tu'ug je̱'e̱ je'eyu̶ je̱'e̱ mu̶dyiibu̶ mu̶ju̶da'agaambu̶ñ pada'añ je̱'e̱ kyubuyu̶'u̶gy. Y nandu'unu̶tz miich, mu̶duungu̶x je̱'e̱ Dios wan je̱'e̱ m'oy'ajtu̶ñ mbaatku̶xu̶ch. 25Je̱'e̱ mu̶dyiibu̶ nayñi'ixu̶u̶yu̶gu̶xpu̶ñ nu̶kxy myu̶''u̶yu̶'u̶waangu̶xy, naygyweentu̶'ajtu̶gu̶xp je̱'e̱ mu̶k mu̶u̶d ku̶xyu̶ je̱'e̱ mu̶dyiibu̶ ka'p oy kya'awu̶gu̶xyu̶ñ. Y du'un tuungu̶xy ko naty myu̶jju̶da'agaangu̶xy padaangu̶xy je̱'e̱ kyu'u̶yu̶'u̶y je̱'e̱ mu̶dyiibu̶ tzojku̶ adu̶goyu̶u̶ybyu̶ñ; peru̶ u̶u̶ch ajtu̶m ajku̶xy nay'amu̶jaduunu̶mb ajku̶xy neby je̱'e̱ oy'ajtu̶ñ nbaattu̶mu̶chu̶ñ ajku̶xy je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ. 26U̶u̶ch ka'p u̶u̶ch awiindz nbuyu̶'u̶gy y nan ka'p u̶u̶ch du'un ngoxy neby u̶u̶ch je̱'e̱ du'umbu̶ nigoo njanchtexyu̶ñ y ka'p naty ñi'ipaattu̶ba. 27Ni'igyu̶ u̶u̶ch je̱'e̱ nni'kx ndzaachtyúñ neby u̶u̶ch xymyu̶mu̶dówu̶chu̶ñ neby u̶u̶ch naty ndzokyu̶ñ ndúnu̶chu̶ch, ka'pu̶ u̶u̶ch du'un ndu̶góyu̶ch, nga'apaadu̶chu̶ch je̱'e̱ n'oy'ajtu̶ñ cham u̶u̶ch naty je̱'e̱ wiingpu̶ ja'ay je̱'e̱ ayuuk tu̶y'ajt tu̶ n'okyaj'u̶xpu̶jkpu̶.

Currently Selected:

1 Corintios 9: MIXE

Highlight

Copy

Compare