রোমীয় 8
8
সেংস্যাংস ওয়িঞেং পিইচা বাওয়া
1যাসুরো খ্রীট যীশুগো ক্যুংগেরি, থাওরা ফোরাচা য়াংসুউরোগু আপ্রই কিজু ডেং ক্যামি ছুরো মেম্হেপ্যা। 2আসাক ছাকসু সেংস্যাংস ওয়িঞেং নিঃই অলঃ খ্রীট যীশুগা নিংরো ঙাগো আপ্রইনা সিইরাফুগা আক্যুয়ে পিইব্যা। 3লুঃউরোমা আপ্রই লুকক্যান হিকরি কিজু থুংজৈংচা আম্রি মিহিক ফ্রঃ লাঃখাব্যা, অর য়াংচা কিজু থুংজৈংচা যা মলুকনৈলিরিলি, থাওরা ফোরাচা য়াংচাগো লুকরি। থাওরা ফোরা আপ্রইকু পিঃফু কিজু, কুঃদৈং আপ্রই মিহিক সাঃগো, লুঃউ ম্যুও প্যাংরো লুঃউ বাওয়াদুঃ রুওয়েলৈতি। অর য়াংসুউ সাঃ ঈ সিইখ্রাংগা নিংরো, আপ্রইকো তাঃরা চৈরো, আপ্রই আঃগু পিঃরো বলৈতি। 4থাওরা ফোরা দিঃচা লুকলিইরি আক্রংগা, আপ্রই লুকখ্যাংরি মিহিক রাঃঅং অর সেংস্যাংস ওয়েঞেংনা নিংরি আক্রং, ঙারোমা থুংজৈংচা আব্রিচুং ফ্রইঅং। 5যাসুরো আপ্রই লুকরো নিংরি, য়াংসুউরো চিইচা আপ্রই আক্যাংচা যা লুকখ্যাংরি য়াংচা লুকতি। অর যাসুউরো সেংস্যাংস ওয়েঞেংনা নিংরি; য়াংসুউরো চিইদানাচা সেংস্যাংস যা লুকখ্যাংরি, য়াংচা লুকতি। 6আপ্রই লুকফু আক্যাং যা লুকখ্যাংরি, য়াংচা আক্যুওচা ফ্রইতি সিইমাং অর সেংস্যাংস ওয়িঞেং যা লুকখ্যাংরি, য়াংচা আক্যুও ফ্রইতি আখেংসা বাওয়া। 7যাসুমা চিইচা আপ্রই লুকফু আক্যাংলি, য়াংসুউ চিইচা থাওরা ফোরাগো ছেংগ্যাংফাক, আক্রংগা য়াংসুউ থাওরা ফোরা ঈ থুংজৈংগো সুংফু মিক্রি, সুংলি মুসুংনৈ। 8প্রফু ছুগি যাসুরো আপ্রই আক্যাংমা নিংরি, য়াংসুউরো থাওরা ফোরাগো চিই মফ্যনৈ।
9ছুগি থাওরা ফোরা ঈ ওয়িঞেংদরা, নাংরো চিইনুন্হুংমা চুয়িরো হিকরিছুগি, নাংরোগা আপ্রই লুকক্যাং চিইদানামা মিহিক, প্রফুল্হক ছুগি সেংস্যাংস ওয়িঞেংনারা হিকরি। যাসু চিইদানামা খ্রীট্ ওয়িঞেং মিহিকলি, য়াংসুউ খ্রীট লুঃউ মুহু। 10ছুগি খ্রীট চিইদানারা নাংরো চিইনুন্হুংমা হিকরিছুগি, আপ্রই লুকতি আক্রংনা, নাংরোমা সিইমাং হিকগিলি, নাংরো ওয়িঞেংচা হ্রাংরো হিকফু। আক্রংগা থাওরা ফোরাচা নাংরোগু আপ্রই স্যাং মুহুছুরো লাক খেং য়ুব্যা। 11যাসু যীশুগো আসিইগা হ্রাং প্যাংলিরি, য়াং থাওরা ফোরা ঈ ওয়িঞেংরা নাংরো চিইনুন্হুংমা হিকরি ছুগি, য়াংখারা থাওরা ফোরাচা কুঃ ওয়িঞেংনা নাংরোগু, সিইমাংমা হিকগিলি বাওয়া ল্হুমি।
12য়াংচা কিজু ঞিং আকুরো, ঙা কিজুহিকরি লুঃউ, য়িগিলি য়াং কিজুচা আপ্রই আক্যাং অলুকমা মুহু। আপ্রই আক্যাংমা নিংরো ঙারো অরঃ লাঃফু অঃলু মিহিকব্যা। 13নাংরোরা আপ্রই আক্যাংনা নিংগেকি, য়াংখা নাংরো তাসাক পেলুংকিজু সিইরামি। য়িগি সেংস্যাংস ওয়িঞেংনারা কাইংথামা হিকচা আলুং মকং অলুককো ফ্যকবলৈকিরা, তাসাক পেলুং আহ্রাং হিকমি, 14আক্রংগা যাসুরো থাওরা ফোরা ঈ ওয়িইঞেং ছংরো নিংগেতি, য়াংসুউরোরা থাওরা ফোরা ঈ সাঃ। 15নাংরোগা ক্যুওয়েং মাক্যাফুসি, য়াংচা কিজু মক্রক্কে; নাংরো থাওরা ফোরা ঈ ওয়িইঞেংগো রাঃগেরি, যাসু নাংরোগু সাঃ তাওয়েংগো পিইলিরি। য়াংচা কিজু ঙারো থাওরা ফোরাগো ফাখাং, প্রফু ছুগি আঃব্বা খঃগেতি। 16সেংস্যাংস ওয়িইঞেংলি কুঃদৈং ঙারো চিইদানামা সাকসি পিইচাগা, ঙারোচা থাওরা ফোরা ঈ সাঃ। 17ঙারো আম্হেংরা থাওরা ফোরা ঈ সাঃ ফ্রতিছুগি, থাওরা ফোরাচা য়াংসুউ সাঃরোগু যা পিইফু গিধি খেংলিরি, য়াংচাগো ঙারো আম্হেং রাঃফু, খ্রীট থাওরা ফোরাগা য়াংচা রাঃফু অর ঙারোলি য়াংসুউরোনা আতু রাঃফু। আক্রংগা ঙারোরা খ্রীট্না আতু দুখাওয়া খেংগেকি, য়াংসুউনা আতু গুংধ আঃগুলি আঃফু রাঃফু।
যা গুংধ আঃগো ঙারো রাঃফু।
18ঙা সিকরি, ঙারো নক্কা যা গুংধ আঃ রাঃফু, য়াংচাগো ছাংখ্রাংগি, আগু দুঃখাওয়াচা তুখুউলি মুহু। 19থাওরা ফোরা সাঃরোচা, যাখা য়াং গুংদগো ম্রাংরাফুলি, য়াংচা কিজু কাবামা তিম্রিজ আলুংচাগো থাকপাং ম্হেরো চংনিংগেতি, 20আক্রংগা কাবাগো যা পুয়েং তিম্রিজফু চাঃগা হিকলিরি, য়াং পুয়েং মফ্রলি। প্রফুছুগি, য়াংচা কুঃ চিইদানা মফ্রলি, থাওরা ফোরা ঈ য়াংচাগো মফ্ররাঅং লাক্কা রুওয়েলৈতি। য়িগিলি খ্যাং খ্যাং দিঃ চাঃগাগো গিধি পিইলিরি, 21প্যাক লাঃফুচাগা রুওয়েরো, দিঃ তিম্রিজচা তারাক থাওরা ফোরা ঈ সাঃরোচা রুওয়েম্রকতি রাক্কু খিম্যুয়েংগেলিইমি। 22ঙারো সিকচাগা, কাবা তিম্রিজরি আখিংখা, যা দুঃখাওয়া খেংলিরি, য়াংচা আগুলি অাম্রি হিকরিসি। 23দিঃচা সাসাক মুহু, ছুগি নক্কা ঙারো যা গুংদগো রাঃফু, য়াং আক্যুওচা সেংস্যাংস ওয়িঞেংগো রাঃরো, ঙারো কুঃদৈংলি চিইনুন্হুংচা তুংগেতি। অর য়াংচানা আতু য়াং রাক কিজু চংরো হিকরি, যাখা থাওরা ফোরা ঈ সাঃ ফ্রইরো ঙারো তাং প্রাফুলি। প্রফুছুগি আম্রি মিহিক কেইংথাগা, ঙারো যাখা ক্যুওয়েফুলি। 24আপ্রইকা ক্যুওয়েরো ঙারো দিঃচাগো রাঃফু ম্হেকেরি। ঙারো যাচা কিজু ম্হে নিংগেতিলি, য়াংচা রাঃগিগা ঙারো যাচাগো ম্হে নিংগেতিলি, য়াংচাগো অর মেম্হেরাব্যা। যাচাগো রাঃব্রিব্যালি, য়াংচা কিজু যাসু ম্হেরো চং নিংরিলি? 25ছুগি যাচাগো মাঃরাসিলি, য়াংচা কিজু ঙারো ম্হে হিরিছুগি, য়াংচাগো চংফু কিজু ঙারো সিঃখেংরোলি চংগেতি।
26দিঃচাগো অাঃপি ঙারো যাখা চিইঞেখা সেংস্যাংস ওয়িঞেংচা কিজু প্রুত্তি। ঙারো হ্রিঃ খুগি যা ছুউক তংরাফুলি, য়াংচাগো ঙারো মিঃসিক, য়িগিলি যা ঙারো খুঃনাংনা মপ্রনৈংলি, য়াং পুয়েংঞ্যং সেংস্যাংস ওয়িঞেং কুঃদৈং ঙারো আতুওয়ংগা নিংরো আতংবেং থাঃরি। 27যাসু লুঃউ চিইনুন্হুংগো হ্রারি, য়াংসুউ সেংস্যাংস ওয়িঞেং চিইনুন্হুং চাঃগাগোলি সিকরি, আক্রংগা সেংস্যাংস ওয়িঞেংচা থাওরা ফোরা ঈ চিই ছেংদা আতৈং, থাওরা ফোরা ঈ লুঃউরো আতুওয়ক আতংবেং থাঃরি।
28ঙারো সিকরি যাসুউরো থাওরা ফোরাগো রুসিইলি, প্রফুছুগি থাওরা ফোরা ঈ কুঃচিই তুদুওয়ক যাসুরোগু খঃলিইরি, য়াংসুউরো মাঙ্গালা কিজু আলুংসুগো য়ুউরো তঃখকদৈংমা অলুক লুকতি। 29থাওরা ফোরা ঈ যাসুরোগু আয়াংকাবাং রুইকক য়ুলিরি, য়াংসুউরোগু থাওরা ফোরাচা কুঃ সাঃঞ্যং ফ্রঃফু কিজু আয়াংকাবাং ম্হেঃরো হিকলিরি, যাস্যালিছুগি য়াং সাঃচা লুঃউ আথাকমা আগ্রি ফ্রঅং। 30য়াংসুউরোগু থাওরা ফোরা আয়াংকাবাং ম্হেঃরো হিকলিরি, য়াংসুউরোগু থাওরা ফোরাচা খঃলি খঃলিইরি; যাসুরোগু খঃলিইরি, য়াংসুউরোগু থাওরা ফোরা আপ্রই মিহিকছুরো লাক খেংলিরি; যাসুরোগু আপ্রই মিহিকছুরো লাক খেংলিরি, য়াংসুউরোগু থাওরা ফোরাচা কুঃ রংখ্রিদঃ গুংধগুলি ল্হুউলিরি।
থাওরা ফোরা ঈ ওয়াসানা
31য়াং পুয়েং ছুগি, আলুংচাগো য়ুউরো ঙারো যা প্রফুলিঃ? থাওরা ফোরা ঈ ঙারো ব্রাংক্কারা হিকগি, য়াংখা ঙারোগু ফ্যাকফু যাসু হিকরিলি? 32থাওরা ফোরাচা কুঃ সাঃগুতয়ং মুরুওয়েলি, প্রফুছুগি ঙারো আলুংসো কিজু, য়াংসুউগো সিইমাং আলাকমা তাংলৈতি। য়জংছুগি থাওরা ফোরাচা কোঃ সাঃনা অর আলুংচাগুলি ঙারোগু মুল্হুব্যা লঃ? 33থাওরা ফোরা যাসুরোগু রুইকক য়ুলিরি, যাসু য়াংসুউরোগু ছেংগ্যাংফাক লুকফুলি? থাওরা ফোরাগা কুঃদৈং য়াংসুউরোগু আপ্রই মিহিকছুরো লাক খেংয়ুব্যা। 34যাসু য়াংসুউরোগু আপ্রইস্যাংছুরো ম্হেফুলি? যাসু সিই লাঃখারি অর যাসুউগো আসিইগা আহ্রাং প্যাংলিইরি, য়াং যীশু খ্রীট আগু থাওরা ফোরা ঞ্যাফাক ব্রাক্কা হিকরি অর ঙারো আতুওয়ক আতংবেং থাঃরি। 35প্রফুছুগি, যাসুউ হিকরিলি, ঙারোগু খ্রীট্ ওয়াসানাগা আওয়িই থালৈঞ্যং? মেখেংনৈ-মতুওয়েনৈ? চিই দুখাওয়া? ঞ্যচিঃ? ম্যুওয়েতি? আওয়েচা-মিহিক? ফিঃই? সিইফুচা? 36সেংস্যাংস কেইংচাউমা রুইরো হিকরি,
নাক কিজু খ্যাংখাফ্র, ঙারোগা তয়ককো মুহুক তয়ককো সেঃএ বৈতি।
হ্লিইচা সাংফঃ ছুইঞ্যং লুঃউরোচা ঙারোগু ম্হেকেতি।
37য়িগিলি যাসুউ নাংরোগু ওয়াসানা হিকরিলি, য়াংসুউ আতুওয়ংগা নিংরো, য়াংচারো ফ্রইকিলি, ঙারো য়াংচারো আলুংচাগো অংম্রাংনৈরি। 38ঙা দিঃ চাঃগাগো আহ্লাপা সিকরি আঃনিচ্চা মুহুকি বাওয়া, সাগ্রাফুংগা তেমেংদ মুহুকি আপ্যাক তেমেংদ, আগু মুহুককি হ্রিইদুঃ তুখুমাসা, মুহুকি আখ্রা তুখু আঃ, 39য়াংচা মুহুকি গংখাং আথাকমা মুহুকি কাঃবা অক্কা তুখুমাসা, প্রফুছুগি, কাবাঃমা তিম্রিজ হিকচা আলুং আতুওয়ংগা তুখুউলি থাওরা ফোরা ঈ ওয়াসাগা ঙারোগু আখ্রা মাপ্যাংনৈমু। থাওরা ফোরা ঈ দিঃ ওয়াসানাচা ঙারো আস্যাং খ্রীট যীশুমা হিকরি।
Currently Selected:
রোমীয় 8: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
