রোমীয় 9
9
থাওরা ফোরা অর ফোরা রুইকক য়ুচা লুঃউরো
1-2খ্রীট ওয়ংরো ঙা প্রচাগা, চিইনুন্হুংমা ঙা কংগং দুঃখাওয়ানা-মেখেংনৈ ওয়িদানাগো রাঃরি অর দিঃ চাঃগাচা ম্হেংরি,ইলিং মুহু। ঙা আতুওয়ক আছাংখ্রাংলি সেংস্যাংস ওয়িঞেংনা পংরো তেজেতৈং সাকসি পিইরি। 3ঙা ঞিংরোগু থাঃরো, প্রফুছুগি যাসুরো ঙা জেঃম্যেও লুঃউ, য়াংসুউরোগু থাঃরো নৈগিরা, ঙা কুঃদৈং খ্রীট্গো ফ্রুফু কিজু কিংগো লাক খেংফু। 4য়াংসুউরোগা ইসরাইল জেঃম্যেও লুঃউ। থাওরা ফোরা য়াংসুউরোগু সাঃ তাওয়েংগো পিইরো হিকরি, কুঃ গুংদগো প্রালিইরি। য়াংসুউরো কিজু আঃরা য়াংলিরি। থুংজৈং পিইলিরি, য়াংসুউগো ক্রিফু অর ওয়িপাসানা থৈফু লেংগু প্রালিইরি অর আম্যা গিধিলি খেংলিরি। 5থাওরা ফোরাগো রুসিইসা আচৈংচা য়াংসুউরো আচৈং হিকলিরি অর লুঃউকিজু মশীহচা য়াংসুউরো আচৈংমা পিদিসেংথি য়ুলিরি। য়াংসুউরা থাওরা ফোরা, যাসু আলুংচা আঃপমা হিকরি; হিকচা আলুং খিম্যেইচা তাসাকপেলুং য়াংসুউচা। আমেন।
6থাওরা ফোরা ঈ চাঃগাচা আম্মা ফ্রব্যা মুহু, আক্রংগা যাসুরো ইস্রাইলরো জেঃমা লাঃরো ম্যুইগেরি, য়াংসুউরো আলুংসো আম্হেংচাংজ ইস্রাইল লুঃউ মুহু। 7অব্রাহাম আচৈংছুরো, য়াংসুউরো অামেংচাংজ য়াংসুউ সাঃ ফ্রফু চাঃগা মুহু। প্রফুছুগি সেংস্যাংস কেইং চাউ চাঃগা আতৈং, “ইসহাক আচৈংগোরা নাক আচৈংছুরো কৈফু।” 8দিঃ চাঃগা আদিপিচা ফ্রইতি, ইস্রায়েল জেঃম্যুওমা, ম্যুইরিলো খ্যাংসুমুছু থাওরা ফোরা সাঃ মুহু। য়িগিলি থাওরা ফোরা ঈ গিধি আতৈং, যাসুরো ম্যুইলিরি, য়াংসুউরোগুরা অব্রাহাম আচৈংছুরো কৈফুচা। 9য়াং গিধিচা ফ্রইতি, “আখিং ফ্রইখা ঙা লাঃফু অর সারামা য়ক্ক্যাসা তয়ক ম্যুইমি।”
10দিঃচাব্যা মুহু চাঃগা, রিবিকামা মুরুওয়া ম্যুইচা সাঃরো, ফাখাংচা তয়কতৈং হিকলিরি। 11-12য়াং য়ক্ক্যাচা হিকলিরি, ঙারো আচৈংমা ইসহাক। য়াং নৈয়ক সাঃ মুম্যুইখাং হ্রিঃগা, য়াংসুউরো আকং মকং তুখুউলি মুলুকলি, থাওরা ফোরা য়াংখা খ্যাং খ্যাং রিবিকাগো প্রলিরি, “আগ্রিইচা-আঞিমা ক্যুওয়েং ফ্রইফু।” দিঃচাগো থাওরা ফোরা প্রালিরিচাগা, কুঃ অাতুওয়করো হিকচাগো প্রিজুংফু ক্রিজু, কুঃদৈং রুইকক য়ুচা। তুখুউলি আলুক কিজু, ফোরাচা য়াংচাগু মুলুক প্রফুছুগি ফোরাচা চিই তুদুওয়ক, কোঃ লুঃউগো খঃরি। 13অর য়াংচা কিজু সেংস্যাংস কেইং চাউমা রুইরো হিকরি, “যাকোবগো ঙা ওয়াসানা হিকলিরি য়িগিলি এষৌগো লাক মেখেংলি।”
14য়জংছুগি ঙু যা প্রফুলি, থাওরা ফোরাচা মুকং লুকতি? তাখালি মুহু। থাওরা ফোরাচা মোশিগো প্রলিরি, 15“ঙা যাসুগো চিইমা তুওয়কতিলি, য়াংসুউগো ওয়ানাসা ফ্রুফু, যাসুগো চিইমা তুওয়কতি, য়াংসুউগো চিই ফ্যফু।” 16য়জংছুগি দিঃচা তয়কলি ক্রুগ্রেংচানা তুওয়কচাগো য়ুউরো মুফ্রঃ, থাওরা ফোরা ঈ ওয়াসানাগো য়ুউরোরা ফ্রচা। 17সেংস্যাংস কেইং চাউমা থাওরা ফোরা ঈ ফরোনগো দিঃ চাঃগাগো প্রলিরি, “ঙা নাক্কু মাং তাংলিরি, যাস্যালিছুগি নাক আক্যাং আতুওয়ংগা নিংরো ঙা গুংধ আঃগু প্রানৈঅং অর কাবালুংমা ঙা নাঃমি ক্যঞাবেচি।” 18য়জংছুগি ম্রাংরিচাগা, থাওরা ফোরাচা কুঃ চিইতুদুওয়ক খ্যাংসুউগোমুছু ওয়াসানা প্যাংরি অর খ্যাংসুফ্র চিই্কু কেগেং প্যাংরি।
থাওরা ফোরা ঈ ওয়াসানা
19জং ফ্রনৈরি, নাংরো আতুওয়ংগা খ্যাংসুফ্র তয়ক মিনৈংরি, “য়জংছুগি থাওরা ফোরা লুঃউমা আপ্রইকো যাফু কৈরিলি? খ্যাংসুমুছু থাওরা ফোরা তুওয়কচা ছেংদাগো ছিইরো থাঃনৈলঃ?” 20য়াং চাঃগা আলৈই, ঙা আফ্রি পিইফুছাগা, নাং লুঃউ; থাওরা ফোরা আপঃমা চাঃগা প্রলৈঅং নাং যাসুলি? খ্যাংসুমুছু তুখু ওয়েং লুক্কি, য়াং লুকচা ওয়েং যালি য়াংসুউগো মিংনৈলঃ, “যাফু ঙাগো দিঃপুয়েং লুকরিলিঃ?” 21তেজেতৈং ক্যুক্কা, ওঁ লুকসামাচা জে জে ওঁ খুওক লুকনৈফু তাওয়েং মিঃহিকলঃ- যাচা ম্যাকন্হা মিহিক লুঃউ কিজু অর যাচা ম্যাকন্হা হিকরি লুঃউ কিজু?
22য়াংচাঞ্যং তেথেং থাওরা ফোরাচা য়াংসুউ দঃসানা তেংখুংদগো প্রাফৃু ক্রিলিরি। য়িগিলি যা লুঃউ আঃপমা য়াংসুউ দঃসাগো প্রাফু, কংগং সিঃখেং পারমিনা য়াংসুউরোগু সিঃখেংলিরি। য়াং লুঃউরোগো ফ্যকবলৈফু থঃ তেংরি। 23য়িগিলি ফোরাচা কোঃ রংখ্রেদ গুংদগুলি প্রাফু ক্রিলিরি। যাসুরো ফোরা মিত্তা ওয়াসানা লুঃউ, য়াংসুউরোগু থাওরা ফোরাচা কোঃ রংখ্রেদ গুংদগো রাঃফু কিজু আয়াংকাবাং য়াংরো হিকলিরি। 24ঙারোচা য়াং মিত্তা ওয়াসানা লুঃউ ফ্রত্তি। থাওরা ফোরাচা যিহুদিরোগা ঙারোগু সাসাক মখঃলি, যিহুদিমুহু লুঃউরোগালি খঃলিইরি। 25হোশেয় রিসিই কেইং চাউমা প্রলিরি, “যাসুরো ঙা লুঃউ মুহু, য়াংসুউরোগু ঙা, ঙা লুঃউছুরো খঃফু। অর যাসুগো ঙা ওয়াসানা মিহিকলি, য়াংসুউগো ঙা ঙামা আখ্যছুরো খঃফু। 26যা আঃরামা য়াংসুউরোগু প্রগেলিরি, ‘নাংরো ঙা লুঃউ মুহু,’ য়াংদেমা য়াংসুউরোগু আহ্রাং থাওরা ফোরা সাঃছুরো খঃফু।” 27যিশায় রিসিইচা ইস্রায়েল জেঃ লুঃউম্যে আক্রংলিলাগো প্রলিরি, “ইস্রায়েরো ম্রঃ কাইংনাঃমা সিঃলি প্রাংঞ্যং লুঃউ হিকগিলি, য়াং লুঃউগা তুফুরা ক্যুওয়েফুব্যা। 28আস্যাংচা কংগং আয়াং দিঃ কাবাগো, য়াংসুউ রাঃথৈচা ডেংগো আব্রিচুং প্যাংরো পিইফু।” 29যিশায়চা অরলি প্রলিরি, “আলুংসু থাক গুংদগ্রি আস্যাংচা লৈংজেসা লুঃউম্যি ঙারো কিজু মাঃবাহালিগি, ঙারোচা সদোমনা ঘমোরা ম্রুঞ্যং ফ্রলিফু।”
ইস্রায়েল লুঃউঃম্যিনা আকং সাদাং
30য়জংছুগি ঙারো চাঃগা প্রফুচাগা, যিহুদিমুহু লুঃউরোচা থাওরা ফোরা ঈ লাক খেংঞ্যং, য়জংজেলি মেক্রেংগেলি, য়িগিলি য়াংসুউরো চিই আক্যুংগা নিংরো, য়াংসুউরো থাওরা ফোরা বামা আসুং ওয়ংরি। 31য়িগিলি ইস্রায়েরোচা থুঃউজৈংগো সুংরি আতুওয়ংগা নিংরো থাওরা ফোরা বামা আসুং ক্যাঅং ক্রেংগেলিরি, য়িগিলি য়াংসুউরো আসুং মাক্যাগেলি। 32যাফু আসুং মাক্যাংগেলিরি? আক্রংগা য়াংসুউরো আক্যুংগো মুক্যুংব্রি, অলুককো ক্যুংগেলিরি। যা ক্যকলুংমা লুঃউরো খুরোক তৈতিলি, য়াংসুউরো য়াংদেমা খুরোক তৈইকেলিরি। 33য়াং আক্রংলিলাগো সেংস্যাংস কেইং চাউমা রুইরো হিকচাগা,
ক্রি, ঙা সিয়োনমা প্রফুচাঞ্যং ক্যক তগ্যক থলৈতি, য়াংদেমা লুঃউরো খুরোক তঃঞ্যং অর য়াংচা খুরোক তঃচা ছুরো আক্রং ফ্রইপেচি। য়িগিলি যাসু য়াংসুউ আঃপমা ক্যুংরিলি, য়াংসুউ মুছুমু।
Currently Selected:
রোমীয় 9: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
