রোমীয় 7
7
ইংথং পংচাগা সাংখ্রাং
1ঞিং আকুরো, নাংরোগা থুংজৈংগু সিকগেতি। নাংরো মিঃসিকগে লঃ, লুঃউ মঃনক রাক তৈঅং হ্রাং হিকরিলি, য়ল্হক রাক তৈঅং, থুংজৈংচা য়াংসুউ আঃপমা ক্যারো নিংরি? 2লাং মন্হঃ রাক তৈঅং হ্রাং নিংরিলি, য়ল্হক রাক তৈঅং মিঃয়াচা লাং-মাঃয়া থুংজৈংমা নিংরারি। য়িগিলি লাং সিই লাঃরি নক, য়াং থুংজৈংগা য়াংসুউ রুওয়েতি। 3য়াংচা কিজু লাং হ্রাং হিকখা, য়াং মিঃয়াচা আখ্রা লুঃউ তয়ক্কু নেজেকি, য়াংসুউগো কামিসুঃ মিঃমা খঃরি। ছুগি য়াংসুউ লাং সিই লাঃগিরা, য়াংসুউ য়াং থুংজৈংগা রুওয়েতি। অর য়াংখারা, য়াংসুউ আখ্রা তয়ক্কু নেজেকি, য়াংখা য়াংসুউ কামিসুক মিঃমা মফ্র। 4য়াংচাঞ্যং তেথেং, ঙা ঞিং আকুরো, খ্রীট্ কেইংথাগা নিংরো মোশি থুংজৈংবামা নাংরোলি সিইগেব্যা। য়াং আকিউনা যাসুগো আঃসিঃইগা আহ্রাং প্যাংলিরি, নাংরো য়াং যীশু খ্রীট লুঃউ ফ্রইকেব্যা। যা স্যালিছুগি থাওরা ফোরা কিজু নাংরো বাওয়াচা আকিউগ্রি রাঃগেব্যা। 5ঙারো যাখা আপ্রই বাওয়ামা হিকলিরি, য়াংখা থুংজৈংচা ঙারোবামা আপ্রই লুকফু কিজু তুঃ তাংলিরি অর য়াং আপ্রই লুকফু চিইচা ঙারো কাইংথামা অলুক লুকলিইরি, য়াংচা কিজু ঙারো বাওয়াচা সিইফু বাওয়াগু রাঃলিইফু । 6য়াংখা ঙারোগু যা থুংজৈং খ্যয়েং থাঃলিরি, য়াংবামা ঙারো ক্যুয়েং ক্যা হিকলিরি। য়াংচা কিজু আগু ঙারো থুংজৈংগা ক্যুয়েপঃ। য়াংচা কিজু ঙারো আগু রুইচা থুংজৈং, য়াং অহং বাওয়া লেংমা ক্যুয়েং মুহু। য়িগিলি সেংস্যাংস ওয়িঞেং পিইচা আসঃ বাওয়া লেংমা ক্যুয়েং ফ্রইব্যা।
থুংজৈংনা আপ্রই
7য়জং ছুগি ঙারো দিঃচা প্রফুলঃ, থুংজৈংচা মকং? তাখালি মুহু; প্রফুছুগি দিঃচা ম্হেংরি, থুংজৈং মিহিকগি, আপ্রই যালি ঙারো য়াংচাগো মিসিকমু। “লঃফা মাপ্যাংগি,” থুংজৈংরা দিঃ চাঃগাগো মঃপ্রগি, ঙারো লঃফা যাচালি য়াংচাগো মিসিকমু। 8ছুগি আপ্রইচা য়াং থুংজৈংগু প্রারো, কুঃদৈং আথিমা লঃফাগো প্রাবলৈতি। আক্রংগা থুংজৈং মিহিকগি, অপ্রইচা আঃসিইঞ্যং ক্যা নিংরিব্যা। 9ঙা বাওয়ামা থুংজৈং মাঃলাখাং, ঙা হ্রাং হিকলিরি, ছুগি য়াং থুংজৈং লাঃরি খ্যাং খ্যাং আপ্রইচালি ম্যা লাঃখারিব্যা। 10অর ঙালে সিই লাঃখারি ব্যা। যা আঃনা আক্যুওগা বাওয়া রাঃফু চাঃগা, য়াংচা আপ্রেইং প্যাংরো ঙামা সিইমাং ফ্রইরি, 11আক্রংগা য়াং আঃনা আলিগো য়ুউরো আপ্রইচা ঙাগো লিংলিরি, অর য়াং আঃনানা আপ্রইচা ঙাগো সেঃ বলৈতি।
12য়জং ছুগি দিঃ চাঃগা ম্হেংরিলঃ, থুংজৈংচা সেংস্যাংজ অর য়াংসুউ আঃনালি সেংস্যাংজ, রাঃথৈতি অর কিজুস্যাং। 13প্রফু ছুগি যাসুউ কিজুস্যাং, য়াংসুউ আলাকমা ঙা সিইরালিরি? তাখালি মুহু, প্রফু ছুগি যাসু কিজুস্যাং, য়াংসুউনারা আপ্রই ঙাগো সেঃ বলৈচা। যাস্যালি ছুগি আপ্রইচা আম্হেং আপ্রই য়াংচাগু সিকঞ্যং। আপ্রইচা মন্হক তয়ং রেংসুগ্রিলি, য়াংদে আঃনামা সিকরারিব্যা।
লুঃউম্যুমা ন্হইচে আক্যাং হিকরি
14ঙারো সিকরি থুংজৈংচা ওয়িঞেং, য়িগিলি ঙা আপ্রই লুকক্যাং হিকরিকিজু, আপ্রইমা ক্যুয়েং ফ্রইরি। 15ঙা যা লুকতিলি, ঙা কুঃদৈং য়াংচাগো মিসিক, আক্রংগা ঙা যা লুকখ্যাংরিলি, ঙা য়াংচা মুলুক, প্রলৈঞ্যং ছুগি, যাচাগো মুংরিলি য়াংচাগো লুকতি। 16যাচা মুলুকসাং, য়াংচাগো ঙা যাখা লুকতিলি, য়াংখা ঙা দিঃচাগো আঃমা খেংনৈরিচাগা, থুংজৈংচা আকং। 17য়জংছুগি ম্রাংরিগা, ঙা কুঃদৈং দিঃচারোগু মুলুক, য়িগিলি ঙা আঃথিমা আপ্রই হিকচা, য়াংসুউরা ঙাগো দিঃচারোগু লুকচিইরি। 18ঙা সিকরি, ঙা আঃথিমা প্রফু ছুগি ঙা আপ্রই লুকচামা আকংছুরো তুখুউলি মিহিক। যা ম্হেংরি, সাংরিলি, য়াংচা লুকফু চিইদানা হিকরি, য়িগিলি আঃ মিহিক। 19যা আকং অলুকরোগু ঙা লুকখ্যাংরিলি, য়াংচাগো ঙা মুলুক, প্রফুছুগি য়াংচাগো পিঃরো যাচা মুলুকখ্যাংলি, য়াং মকং অলুকরোগুরা ঙা লুকনিংরি। 20যা মুলুকখ্যাং, য়াংচাগো ঙা যাখা লুকতিলি, য়াংখা প্রফুছুগি ঙা কুঃদৈং মুলুক, য়াংচা লুকতিচা ফ্রইতি, ঙামা যা আপ্রই কাইংথামা হিকরি, য়াং অাপ্রইরা ঙাগো য়াংচা লুকচিইরি।
21য়জং ছুগি ঙাচা কুঃদৈং আঃথিমা তুখু আক্যাংচা অলুক লুকতি ম্রাংরি। য়াং আক্যাংচা ফ্রইতি, যা আকং য়াংচাগো ঙা লুকখ্যাংখা, য়াংখা মকংচা খ্যাংখাফ্রঃ ঙামা মেংনে ছঃতি। 22ঙা চিইদানামা থাওরা ফোরা ঈ থুংজৈং কিজু আপ্য ফ্রইতি; 23য়িগিলি ঙা ম্রাংরিচাগা, আখ্রা তুখু আক্যাং ঙা কাইংথামা অলুক লুকতি। যা কংরিলি, য়াংচাগো ঙা চিইচা কংরিল্হু মেত্তি, য়িগিলি আখ্রা আক্যাংচা ফ্রইতি ঙা চিঃককু য়ুউরো সেঃ থাঃরি অর ঙাগো আকং অলুককা পিঃ থাঃরি। ঙা আঃথিমা যা আপ্রই অলুক হিকরি, য়াংসুউ আক্যাংচা ফ্রইতি দিঃচা। 24মন্হক তয়ং ওয়েংনিফু কংরিলি! ঙা আঃথিমা যা আপ্রই আক্যাংচা ঙাগো সিইমাংদুঃ য়ুউ লাঃরি, য়াংচাগা ঙাগো যাসু কিঃয়ি ছিঃফুলি? 25ঙারোমা আস্যাং যীশু খ্রীট্গা নিংরো, ঙা থাওরা ফোরাগো খিম্যুয়েংচাগা, য়াংসুউ ঙাগো কিঃয়ি ছিঃরি। য়জং ছুগি ম্রাংরিচাগা, চিইকা ঙা থাওরা ফোরা ঈ থুংজৈংমা ক্যুয়েং, য়িগিলি আপ্রই লুকখ্যাংরি আক্যাংগা নিংরো, ঙাচা আপ্রইমা ক্যুয়েং।
Currently Selected:
রোমীয় 7: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
