রোমীয় 5
5
আপ্রই স্যাং মুহুছুরো লাক খেংচা আক্যুও
1আক্যুংগা নিংরোরা ঙারোগু আপ্রই স্যাং মুহুছুরো লাক খেংলিরি অর য়াংচা কিজুরা আস্যাং যীশু খ্রীট্গা নিংরো থাওরা ফোরানা ঙারোমা আখেংসা ফ্রইরি। 2ঙারো থাওরা ফোরা ঈ মিত্তা কিজু ঙারো হ্রাং নিংগেচা, য়াংদেমা ঙারো খ্রীট্গা নিংরো আক্যুংনা ঙারো রক্কেচা। থাওরা ফোরা ঈ রংখ্রিদগো রাঃফু কিজু ঙারো প্যগেচা। 3দিঃচা সাসাক মুহু, দুখাওয়া সুখাওয়ামালি ঙারো আপ্যনা নিংগেতি, আক্রংগা ঙারো সিকরি দুখাওয়া সুখাওয়া আক্যুওচা সিঃখেং পারমি। 4সিঃখেং আক্যুওচা সেংস্যাংজ আক্যাং অর সেংস্যাংস আক্যাংমা আক্যুও ফ্রইতি ম্হেচা। 5দিঃ ম্হেচা ঙারোগু সিরিঃ আহ্রাকমা মাখ্যা, আক্রংগা থাওরা ফোরা ঈ পিইচা সেংস্যাংস ওয়িঞেংনারা ঙারো চিইনুন্হুংগা য়াংসুউ আখ্য মিত্তানা আব্রিচুং প্যাংলিরি।
6যাখা ঙারোমা তুখুউলি আঃ মিহিকলি, য়াং অাখিংমা খ্রীট্চা থাওরা ফোরাগো রুসিইসা লুঃউরো কিজু প্রফুছুগি ঙারো কিজু আসাক পিইলিরি। তুখু আকং অলুক কিজু তয়কলি আসাক মিপিছুগিলি রাঃরি। 7যাসু আখ্রা লুঃউরোগু কিঃছিরি, য়াং পুয়েং লুঃউ আতুওয়ক, তয়কতিরি আসাক পিইগিলি পিনৈংরি। 8য়িগিলি থাওরা ফোরা ঙারোগু খ্যতি য়াংচাগো তাং প্রানৈরিগা, ঙারো আপ্রই স্যাং হিকলিরিখা খ্রীট্চা ঙারো কিজু আসাক পিইলিরি। 9য়জংছুগি খ্রীট্ স্যুই খ্যারো যাখা ঙারোগু আপ্রই স্যাং মুহুকছুলো লাক খেংরি, য়াংখা ঙারো খ্রীট্গা নিংরো থাওরা ফোরা ঈ ডেংগা আম্হেং রুওয়েমি। 10ঙারো যাখা থাওরা ফোরা ঈ রেংসুউ হিকলিরি য়াংখা য়াংসুউ সাঃদ খ্রীট্ আসিইগা নিংরোরা য়াংসুউনা ঙারো পং ক্যাচা। দিঃ পুয়েং পং ক্যারি কিজুরা খ্রীট্গো ক্যুংরি কিজু ঙারো আম্হেং আপ্রইকা ক্যুওয়েম্রক ফু। 11দিঃচারা সাসাক মুহু, যাসু কিজু ঙারো থাওরা ফোরানা পং ক্যারি, য়াং আস্যাং যীশু খ্রীট্গা নিংরো থাওরা ফোরাগো য়ুউরো ঙারো প্যগেতি।
আদম অর খ্রীট্
12লুঃউ তয়ক্কারা নিংরোরা দিঃ কাবাদুঃ আপ্রই লাঃচা অর য়াং আপ্রই ক্যারো লুঃউ সিইলাঃচা। হিকচা আলুংসো আপ্রই লুকরি কিজু, দিঃ পুয়েং আলুংসোবামা সিইমাং ছঃলিরি। 13মোশি থুংজৈং পিইফু হ্রিঃগাকাবাং দিঃ কাবামা আপ্রই হিকলিরি, য়িগিলি থুংজৈং মিহিকগিগা আপ্রইকো আপ্রইছুরো মকৈনৈং। 14য়িগিলি আদম আখিংখাকাবাং চাঃরো মোশি আখিং রকঅং হিকচা আলুংসো আঃপমা সিইমাংচা হিকলিরি। প্রফুছুগি থাওরা ফোরা ঈ আঃনাগো যাসুরো লাক মাখেংব্রি আদমঞ্যং আপ্রই মলুকলি, য়াংসুউরো আপমালি সিইমাংচা হিকলিরি।
যাসু লাঃফু চাঃগা হিকলিরি, প্রফুছুগি আদমচা তাব্রাকসে য়াং যীশু খ্রীট্ঞ্যং পুং হিকলিরি। 15য়িগিলি আদম্মা যা পুয়েং আপ্রই, থাওরা ফোরাবামা আফুঃমাক্যা মিত্তা আল্হুচা য়াংচাঞ্যং মুহু। যাখা লুঃউ তয়ক আপ্রই কিজু, আম্যা লুঃউ সিইলিইরি য়াংখা থাওরা ফোরা ঈ মিত্তানা অর তয়ক লুঃউ মিত্তাগা নিংরো যা আল্হু লাঃলিইরি, য়াংচা আম্যা লুঃউ আতুওয়ক মন্হক তয়ং আম্যা প্রফুমারা! য়াং অর তয়ক লুঃউচা ফ্রইতি যীশু খ্রীট। 16থাওরা ফোরা আল্হুচা আদম্মা আপ্রই আক্যুঞ্যং মুহু, আক্রংগা তুখু আপ্রই ডেং কিজু হিকচা আলুংসোগু ডেংস্যাংছুরো কৈলিরি, প্রফুছুগি আপ্রই স্যাং মুহু ছুরো থাওরা ফোরাবামা ক্যালৈঅং মিত্তা চিইদানাচা, লাঃরিগা আম্যা আপ্রইকা। 17লুঃউ তয়ক আপ্রইনা সিইরি কিজুরা, য়াং তয়ক লুঃউগা নিংরো সিইমাংচা লুঃউরোবামা রকলিরি। য়িগিলি যাসুরো কংগং আম্যা থাওরা ফোরা ঈ মিত্তানা আপ্রই স্যাং মুহু ছুরো য়াংসুউবামা লাক খেংফুঞ্যং আঃলি রাঃরি, য়াংসুউরো থুঃউ লুঃউ তয়ক কিজু প্রফুছুগি যীশু খ্রীট্ গা নিংরো লঃগামা আব্রিচুং প্যাংরো আম্হেং হ্রাং নিংমি।
18য়জং ছুগি তুখু আপ্রইকা নিংরো, যা পুয়েং হিকচা আলুংসো লুঃউরোগু ডেং স্যাং ছুরো কৈগেতি, য়াং পুয়েং তুখু আকং অলুককা নিংরো হিকচা আলুংসো লুঃউরোগু আপ্রই স্যাং মুহু ছুরো লাক খেংফুচালি লেং প্যাংরো হিকরি অর য়াং আক্যুও ফ্রইতি তিম্রিজ বাওয়া। 19ক্রি লুঃউ তয়ক চাঃগা মকৈংগা নিংরো আম্যা লুঃউরোগু আপ্রই স্যাং ছুরো কৈলিরি, য়াং পুয়েং লুঃউ তয়ক চাঃগা কৈরিগা নিংরো আম্যা লুঃউরোগু আপ্রই মিহিক ছুরো লাক খেংফু।
20থুংজৈং পিইলিরিচাগা, মকং অলুকচা ম্যাঞ্যং, য়িগিলি যাদেমা মকং প্রিলিরি য়াংদেমা থাওরা ফোরা ঈ মিত্তা অরলি আম্যা প্রিলাঃখারি। 21য়াং মিত্তাচা দিঃ পুয়েং কিজু প্রি লাঃখারি, ঙারো সিকরি আঃসিইগা নিংরো যা পুয়েং আপ্রইচা নিংখুরিলি, য়াং পুয়েং লুঃউরোগু আপ্রই স্যাং মুহু ছুরো লাক খেংরিগা নিংরো, আগু য়াংসুউ মিত্তাচা নিংখুনৈরি। অর য়াং আক্যুওচা ফ্রইতি ঙারোমা আস্যাং যীশু খ্রীট্গা নিংরো তিম্রিজ বাওয়াগো রাঃফুচা।
Currently Selected:
রোমীয় 5: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
