প্রেরিত 7
7
মহা আতৈংবাংগ্রি হ্রিঃগা স্তিফান
1য়াংখা মহা ফুংগ্রিচা স্তিফানগো মিংলিরি, “দিঃ প্রচা চাঃগারো আম্হেংলঃ?”
2আফ্রিমা স্তিফান প্রলিরি, য়ালক ঙা ঞিং আকুঃনা ফাখাংরো, ঙা চাঃগাগো নাথংগে। ঙারোমা আচৈ অব্রাহাম হারণ ম্রুমা নিংফু হ্রিঃগা যাখা মেসোপতেমিয়া প্রিমা হিকলিরি, য়াংখা খিমুয়েংজারা থাওরা ফুরা য়াংসুউগো কুঃদৈং আম্রাং পিরো প্রলিরি, 3‘নাং নাকমা প্রিনা ম্যিও ছুয়িগো বৈরো ঙা যা প্রিগো নাংকু প্রাফুলি য়াং প্রিদুঃঃ লাঃলি।’
4য়াংচাকিজু য়াঙসু কলদীয়দেরো প্রিগো বৈরো হারণ প্রিমা লাঃরো নিংলিরি। যা প্রিমা কুবাংরো আগু নিংগেতিলি, থাওরা ফুরা অব্রাহামগু য়াংসুউ ফাখাং সিঃরিনক য়াং আরাদুঃ রুওয়েলৈ লিরি। 5কুঃ তাওয়েং আতুওয়ক থাওরা ফুরা অব্রাহাগো য়াংদেমা তুখুউলি মিপিলি, ফাওয়া খ্যাফু আঃরাবাং মিপিলি। য়িগিলি থাওরা ফুরা য়াংসুউ বামা গিঃধি খেংলিরিচাগা, য়াংসুউগো অর য়াংসুউ নক আচৈংরোগু তাওয়েংলুঃউ য়াংসুউ য়াং প্রিগো পিফু। প্রফুছুগি য়াংখা অব্রাহাম্মা তয়কলি সাঃ সিঃমি মিহিলি। 6থাওরা ফুরা য়াংসুউগো প্রলিরি, ‘নাং আচৈংরো নেংঙেংখ্রা প্রিমা নিংলিমি। লুঃউরো য়াংসুউরোগু ক্যুয়েং লুঃউরো থালিমি অর আঃন্হ লিঃরাক তৈঅং য়াংসুউরো আঃপমা আঞ্যচিঃ প্যাংলিমি।’ 7থাওরা ফুরাচা আরলি প্রলিরি, ‘যা লুঃউম্যি য়াংসুউরোগু ক্যুয়েং লুকফুলি য়াং লুঃউম্যিগো ঙা ডেং পিফু। নক্কা য়াংসুউরো য়াং প্রিগা থুঃওয়ক লাঃরো, দিঃ আঃরামা লাঃরো ঙাগো ওয়িপাসানা রুওক্কেমি।’ 8য়াংনক থাওরা ফুরা য়াংসুউ চুঃফুচা লাকখানা আতুওয়ক, স্যুও ফিয়া আরিইগো ফ্রেফুচা থুঃউংচৈ পিইলিরি। য়াংনক অব্রাহাম্মা সাঃ ঈসহাক ম্যুংলিরি অর ম্যুংরো স্যঅঃ রাকমা য়াংসুউ স্যুও ফিয়া আরিইগো ফ্রেলিরি। নক্কা ঈসহাক যাকোবগো স্যুও ফিয়া আরিইগো ফ্রেলিরি অর যাকোব থুউ তিঃছি নৈয়ক আচৈং ফাখাংরোগু স্যুও ফিয়া আরিইগো ফ্রেলিরি।
9-10য়াং আচৈং ফাখাংরো ম্যাকচি মুংরো যোষেফগো ক্যুয়েং লুঃউরো মিসর প্রিদুঃ রংগেলিরি। য়িগিলি থাওরা ফুরাচা যোষেফনা আঃতু হিঃলো আলুং দুঃখাওয়ানা ফিঃ ডেংগা কাঃরো থাঃলিরি। দিঃচাগো মুহুকপ্রি থাওরা ফুরাচা যোষেফগো পুয়েংঞা পিইলিরি অর মিসরমা মাং ফরৌণ ম্যাকচিমা তাংঅং প্যাংলিরি। য়াংচা কিজু ফরৌণ য়াংসুউগো মিসরমা ওকখ্যুকসানা কোঃ ইংস্যাং প্যাংলিরি।
11য়াং নক মিসর প্রিলুংনা কনান প্রিমা আঃচা খংবাংলিরি। য়জংছুগি যাখা কংগং আম্যা দুঃখাওয়া ফ্রত্তি য়াংখা ঙারোমা আচৈংরো আঃচাঃ আঃসক মাঃরাগেলি। 12ছুগি মিসরমা আঃচাঃ হিকরি ক্রারো যাকোব ঙারোমা আচৈংরোগু পাথামা তখক য়াংদুঃ রুওয়েলৈতি। 13তুঃদিয়াখা যোষেফ ঞিংরোগু আঃসি পিইলিরি, য়াংসুউ যাসুলি। য়াং আখিংমা ফরৌণ যোষেফমা ঈংসারো আক্রংলিলাগো সিঃলিরি। 14য়াংনক যোষেফ য়াংসুউ ফাখাং যাকোবনা ঈংসারো হিকচা আলুংসুউগু খঃফু রুওয়েলৈ লিরি। য়াংসুউরো আলুংসুউ পংরো খঃনৈছি ঙায়ক হিকলিরি। 15যাকোব মিসরদুঃ লাঃলিইরি, অর য়াংদেমা য়াংসুউনা ঙারো আচৈংরো সিকগেলিরি। 16য়াংসুউরো আলংগো শিখিম্মা য়ুউরো ম্রুক্কেলিরি। য়াং সাংখ্যুয়েংগু অব্রাহাম শিখিম ম্রুমা হমোর সাঃরোগা তাঃমা তেংগানা ওয়িলিরি।
17“অব্রাহাম বামা থাওরা ফুরা যা গাঃধি খেংলিরি, য়াংচা প্রিজুংফু আখিং যাখা লাঃলিইরি, য়াংখা ক্রিলৈতিখা ঙারো লুঃউচা কংগং আম্যা ফ্রঃ লাঃখাব্যা। 18য়াংনক মিসরমা আরতয়ক মাং ফ্রলিরি। য়াংসুউ যোষেফ আক্রংলিলাগো তুখুউলি মিসিক হিকলিলি। 19য়াং মাংচা ঙারো লুঃউরোগু লিংরি অর ঙারো আচৈরো আঃপমা কংগং আঃঞ্যচি প্যাংলিরি। প্রফুছুগি, য়াংসুউরোমা সাঃ সিঃমি ম্যুংগি, য়াং আঃস্যিরোচা সিঃঅং য়াংচাকিজু য়াং আঃসিরোগু প্রাংগা থাঃরাফু আম্হেং হিকলিরি।”
20“য়াং আখিংমা মোশি ম্যুংলিরি। য়াংসুউ আঃমা আহ্লা হিকলিরি। য়াংসুউ সুংলা তৈঅং কুঃ ফাখাং ঈংমা হিকলিরি। 21নক্কা যাখা য়াংসুউগো প্রাংগা বৈথাঃলিরি য়াংখা ফরৌণ সিঃমিচা য়াংসুউগো য়ুউ লাঃরো কুঃ সাঃঅং ম্যুংজেলিরি। 22মোশিচা মিসরীয়রোমা হিচা আলুং চাঃবি তেঃরো চাঃদেসা ফ্রলিরি, অর য়াংসুউচা চাঃগানা আঃলুঃউমা আঃনা খঈংনা হিকলিরি।”
23“মোশি আসাক যাখা লিঃছি ফ্রলিরি য়াংখা য়াংসুউ ঈস্রায়েলী ঞিংরোনা আতুয়ি খেংফু লুকলিইরি। 24তয়ক মিসরীয়গো তয়ক ঈস্রায়েলীয়গো মকং প্যাংচাগো ম্রাংরো য়াং ঈস্রালীয়েগো আঃকু পিইলিরি। অর য়াং মিসরীয়গো সেঃরো মেং ফ্রিলিরি। 25মোশি চিঃমা তুওয়কলিরি, কুঃ লুঃউম্যিরো সিঃগেমিচাগা থাওরা ফুরাচা য়াংসুউগা নিংরো য়াংসুউরোগু খ্যুয়েফু। ছুগি য়াংসুউরো য়াংচাগো নাঃমিলিগেলি। 26মুঃলাং নক মোশিচা নৈয়ক ঈস্রায়েলীগো কুঃরো খ্যাং খ্যাং বুঃক্কেচাগো ম্রাংলিরি। য়াংখা মোশিচা য়াংসুউরোগু পং পিফু কিজু প্রলিরি, ‘অ, নাংরোগা ঞিংকো ঞিংকো; ছুগি তয়কনা তয়ক যাফু দিঃ মকং আক্যাংগো লুঃক্কেতিলি?’”
27“য়জংছুগি যা লুঃউচা মকং আক্যাং লুকলিইরি, য়াংসুউচা মোশিগো তুঃ বৈরো প্রলিরি, ‘ঙারো আঃপমা যাসু নাংকু উখ্যুসুনা তাঃরা চৈসা লুকলিইরি? 28ঙাগা যা পুয়েং থুউ মিসরীয়গো সেঃ বৈলিলি, য়াং পুয়েং ঙাগোলি সেঃ বৈফু ক্রিরিলঃ?’ 29দিঃ চাঃগাগো ক্রারো মোশিচা থওয়ক ব্রিরো মিদিয়ন প্রিমা লাঃরো নিংলিরি। য়াংদে মোশিমা সাঃ নৈয়ক ম্যুংলিরি।
30“য়াং নক ন্হঃ লিঃছি ক্যলিরি। সিনাঈ তঃ নেংমা যা সিঃলিপ্রাং হিকলিরি য়াংদেমা মিং তকরো ওকখুরুংমা তয়ক থাওরা ফুরা তেমেংদ মোশিগো আম্রাং পিইলিরি। 31দিঃ চাগো ম্রাংরো মোশিচা এংঅলিরি। আহ্লাপা ক্রিফু কিজু নেংদুঃ লাঃরি নক য়াংসুউচা আস্যাং দিঃ চাঃগাগো ক্রালিরি, 32‘ঙা নাং আচৈংমা থাওরা ফুরা অব্রাহাম, ঈসহাকনা যাকোবমা থাওরা ফুরা।’ য়াংখা মোশি ক্রকরো তুংলিরি, ম্যাকচি তাং ক্রিফু তয়ং রিই মিহি ফ্ররি।” 33“য়াংখা আস্যাং য়াংসুউগো প্রলিরি, ‘নাকমা আখ্রিমা ফেনেংগো খ্যুবঃলঃ। আক্রংগা নাং যা আঃরামা রেঃ হিরিরি, য়াংচাঃচা সেংস্যাংরি। 34মিসর প্রিমা ঙা লুঃউরো আঃপমা যা ঞ্যচি ফ্রত্তি, ঙা য়াংচাগো ম্রাংরি। ঙা য়াংসুউরো তুংরো প্রচা চাঃগাগো ক্রারি অর য়াংসুউরোগু খ্যুওয়েম্রকফু কিজু ঙা সাক লাঃচা। আগু ঙা নাংকু মিসর প্রিদুঃ প্রেংরো রুওয়েফু।’
35“দিঃ সুচা য়াং তয়কতৈং মোশিব্যা, যাসুগো ঈস্রায়েলীরো দিঃ চাঃগা প্ররো লাক মাখেংগেলি, ‘যাসু নাংকু ওকখ্যুকসুনা তাঃরা চৈসু লুকরিলি?’ যা তেমেংদ থুঃউঃ ওকখ্রুংমা মোশিগো আম্রাং পিইলিরি, য়াং গংখাং তেমেংদগা নিংরো থাওরা ফুরাচা কুঃদৈং দিঃ মোশিগো ঈস্রায়েলীরোগু ওকখ্রুকসুনা খ্যুওয়েম্রকসু প্যাংরো মিসরদুঃঃ রুওয়েলৈলিরি। 36দিঃ মোশিচা ঈস্রায়েলীরোগু মিসর প্রিগা থুউখারি অর মিসর প্রিমা, লোহিত ম্রমা, অর আন্হ লিঃছি পেলুং সিঃলি প্রাংমা আম্যা তুবুং এংঅফুয়ি আলুকনা লাকখানা আলুং লুকলিইরি। 37দিঃ লুঃউচা য়াং মোশি যাসু ঈস্রায়েলীরোগু প্রলিরি, ‘নাংরো থাওরা ফুরা নাংরো ঈস্রায়েলীরো আতুওয়ংগা নাংরো কিজু ঙাঞ্যং তেথেং তয়ক রিসি থুউলিইমি।’” 38দিঃ মোশিচা সিঃলি প্রাংমা ঈস্রায়েলীরো য়াং আফুয়ি আতুওয়ংমা ঙারো আচৈনা আতু হিকলিরি। যা নেঃফুং তেমেংদ সিনাঈ তংমা চাঃগা প্রলিরিলি, য়াং মোশিচা থুউ নেঃফুং তেমেংদনা আতু য়াংদেমা হিকলিরি। ঙারোগু পিফু কিজু আহ্রাং চাঃগা দিঃ মোশিচা য়াংদেমা রাঃলিরি।
39-40য়জংছুগি ঙারো আচৈরোচা মোশিগো লাক খেংফু মালুগে। য়াংচাগো পিরো য়াংসুউরোচা মোশিগো লাক মাঃখেংরো মিসর প্রিদুঃ চিই হ্লিরো হারোনগো প্রলিরি, ‘ঙারোগু লেং প্রারো য়ুউ লাঃফু কিজু নেঃবু নেঃমা পিঃ। আক্রংগা যা মোশি মিসর প্রিগা ঙারোগু থুউখারি, য়াংসুউ যা ফ্ররিলি, ঙারো মিসি।’ 41য়াং আখিংমা য়াংসুউরো নাওয়াস্যিঞ্যং তগং আঃরোক থুক্কেলিরি। য়াংসুউরো য়াং আঃরোকমা সুদুঃওয়ারোগু পুজগেতি অর কুঃরো আঃলাকনা যা লুক্কেতি য়াংচাগো য়ুউরো য়াংসুউরো তুখু আপ্য পুয়ি লুক্কেলিইরি। 42য়জংছুগি থাওরা ফুরাচা মাঃসায়ালিব্যা অর য়াংসুউরোগু আখাসি গংখাংমা লাঃআ, নিংগো য়ুউরো পুজবেচি ছুরো থাঃলৈতিব্যা। দিঃ চাঃগা তেজেতৈং রিসি চাউমা রুঈরো হিরি:
অঃ ঈস্রায়েলী লুঃউরো,
সিঃলি প্রাংমা নাংরো ন্হ লিঃছি পেলুং, ঙাগো রুয়িমেহেরো
তুখুউলি সুদুঃওয়া ছুউক আখ্রা তুখু ছুউক পুজ প্যাংগেলি লঃ?
43মিহি, প্রফুছুগি নাংরো পুজ প্যাংফু কিজু নাংরো যা পুং লুক্কেরিলি,
য়াং মুলক নেঃ পুংনা অর নাংরোমা রিফণ নেঃ য়াংসুউরোগু
নাংরো রুসিই থাঃগেলিরি।
য়াংচা কিজু ঙা বাবিল প্রি থুঃ ব্রাক্কা
আখ্যং ক্যাসাঅং প্যাংরো নাংরোগু রুওয়েলৈফু।
44“সাকসি তাম্বুচা সিঃলি প্রাং আঃরামা ঙারো আচৈংনা আতু হিকলিরি। থাওরা ফুরাচা যা পুয়েং মোশিগো আঃনা পিইলিরি অর মোশি যা আসুওয়েং প্রালিইরি, য়াং পুয়েঞ্যং দিঃ তাম্বুচা লুকলিইরি। 45ঙারো আচৈংচা য়াং তাম্বুগো রাঃরো য়াংসুউরো গংখ্যুক যিহোশূয়ে আতুওয়ংমা য়াংচাগো কুঃরোনা আতু ঙারো দিঃ প্রিদুঃ য়ুলাগেতি। থাওরা ফুরাচা য়াং আখিংমা য়াংসুউরো হ্রিঃগা আখ্রা লুঃউ ম্যুগো লঃ রুওয়েলৈতি অর য়াংসুউরো দিঃ প্রিগো চুঃগেলিরি। দায়ুদ মাং তিহি তৈংঅং য়াং তাম্বুচা দিঃ প্রিমা হিকলিরি। 46দায়ুদচা থাওরা ফুরা আখ্যঃ রাঃরো যাকোবমা থাওরা ফুরা নিংফু ঈং লুকফু কিজু খুঃঅং তংলিরি; 47প্রফুছুগি শলোমনরা য়াংসুউ কিজু ঈং লুক পিইলিইরি।
48“ছুগি আগ্রিই আকিঃ থাওরা ফুরাচা লুঃউ লুকচা ঈংমাগা মিনিং। রিসিই প্রলিরি, 49আস্যাং প্ররি, ‘নেঃফুংচা ঙা পেংলাং, কাবাচা ঙা ফাওয়া খ্যাফু আঃরা, ঙা কিজু যা পুয়েং নাং ঈং লুকফুলি? ঙা নাঃফুচা ঈং যামা ফ্রফুলি? 50য়াং ওয়েংরো ঙা কুঃদৈং আলাকলা মুলুকলি লঃ?’
51“অ, তুগুজা জেঃ লুঃউম্যিরো! কুবাংরো চিঃ চিইদানাচা যিহুদী মুহু লুঃউরো ঞ্যংব্যা। অর কুবাংরো আম্হেং কুবাংরোমা আচৈং ঞ্যংব্যা। কুবাংরো খ্যাংখামুছু সেস্যাংস ওয়িঞেংগো ছিঃ থাগেতি। 52প্রফুজারা রিসি তয়ক হিরিলঃ, যাসুগো কুবাংরোমা আচৈংরো আঞ্যচিঃ মাপ্যাংগেলি? প্রফুছুগি, যাসুরো য়াং কংমুংস্যাং লুঃউরোগু অর খ্রীট্ লেঃফু চাঃগাগো হ্রিইগা প্রসা য়াংসুউরোগুলি য়াংসুউরো সেঃ বলৈকেতি। 53থাওরা ফুরা নেঃসাগা নিংরোরা কুবাংরোগু ক্যাংফু থুংজৈ পিলিইচা, য়িগিলি কুবাংরো য়াংচাগো মসুংগেলি।”
স্তিফান সিইচা
54দিঃ চাঃগারোগু ক্রারো থুউ গংখ্যুকরোচা মেংগ্রি তাক্কেলিরি অর স্তিফানগো ছেংগ্যাংফাক লুঃউরো সাওয়া কুরুরিক্কেলিরি। 55য়জংছুগি স্তিফানচা সেংস্যাংস ওয়িঞেংনা ব্রিজুংরো থাওরা ফুরাফুংদুঃ ক্রিরিখা থাওরা ফুরা ঈঃ গুংদগো ম্রাংলিরি। য়াংসুউচা যীশুগো থাওরা ফুরা ঈঃ ঞাফাকক ব্রাক্কা রেঃ হিচাগো ম্রাংরো প্রলিরি, 56“ক্রিগে, ঙা ম্রাংরি থাওরা ফুরাফুংচা ল্হঃরো হিরি অর থাওরা ফুরা ঈঃ ঞাফাক ব্রাক্কা মনুঃ সাওয়া সাঃচা রেঃরো হিকরি।”
57দিঃচাগো ক্রারো য়াংসুউরোচা নাঃমা লাকঞ্যং ছুওগেলিরি অর কংগং আঃনা অঃরো তিলিং দৈংমা স্তিফানমা চুক্কেলিরি। 58নক্কা য়াংসুউরো স্তিফানগো ক্যক লুঃউং বৈফু কিজু ঙাংরো ম্রু প্রাংগা য়ুউ লাখাগেতি, অর সাকসিরোচা য়াংসুউরোমা আথাক্কা আওয়েকু খ্যুয়েরো শৌল নাঃমি খরো তয়ক আঃপ্যি খারাংমা থাগেলিরি।
59যাখা সাকসিরো স্তিফানগো ক্যক লুঃউং বৈকেতিলি, য়াংখা স্তিফানচা ছুঃউক তংরো প্রলিরি, “আস্যাং যীশু, ঙা ওয়িঞেং লাক খেংবা।” 60নক্কা য়াংসুউুচা পঃছতুক থকরো অঃরো প্রলিরি, “আস্যাং, দিঃ লুঃউরোমা দিঃ আপ্রইকু মকৈংগিবা।” দিঃ চাঃগা প্ররো য়াংসুউ সিঃ লাখারি।
Currently Selected:
প্রেরিত 7: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
