প্রেরিত 8
8
1শৌলচা য়াংদেমা স্তিফানগো সেঃ বৈফু ব্রাক্কা আঃ পিইলিরি।
আঞ্যচিঃ ফ্রঈতি আক্রং খ্রীট্গো ক্যুংসারো থুঃউদুঃঃদুঃ ক্রাংগেলিরি।
য়াং রাকনিং যিরুশালেনমা খ্রীট্ ক্যং লুঃউরো আঃপমা কংগং আম্যা আঞ্যচিঃ প্যাংফু চাঃলিরি। য়জংছুগি তেমেংদরো মুহুকপ্রি আখ্রা ক্যুংসারোচা যিহুদীয়ানা শমরিয়া প্রিনি আলুং আঃরামা ক্রাংগেলিরি। 2লৈগয়ক থাওরা ফুরাগো রুসিইসা স্তিফানগো য়ুউ লাঃরো ম্রুংগেলিরি অর য়াংসুউ কিজু কংগং ওয়েংনি চাঃগা প্রগেলিরি। 3য়জংছুগি শৌলচা থুউ ক্যং লুঃউরোগু প্যঅক বলৈফু কিজু ঈংদৈং ঈংদৈং লাঃরো য়াং ক্যং লুঃউ মিকমা য়ক্ক্যারোগু ঙাং য়ুউ লাঃরো থংমা থিলিরি।
শমরিয়মা ফিলিপ তাঃরা হঃচা
4যা সুরো ক্রাংগেলিরি, য়াংসুউরো লিঃফাক লাকচি লাঃরো খ্রীট্ আকং সাদাংগো হঃ প্রাগেলিরি। 5য়াং আখিংমা ফিলিপচা শমরিয়া প্রিনিমা ম্রু তুম্রুমা লাঃরো মশীহ আক্রংলিলাগো হঃ প্রালিইরি। 6লুঃউরো য়াংসুউ চাঃগাগো ক্রারো অর য়াংসুউ যা এংঅফুয়ি অলুক লুকরিলি য়াংচাগো ম্রাংরো লুঃউরোচা চিঃ খ্যারো চাঃগা নাথংগেলিরি। 7লৈংগায়ক লুঃউগা মকং নেঃচা অঃরো থুঃওয়ক লাখারি অর আম্যা তেখ্রেংসিঃ সানাসিঃনা আঃকি সানাসিঃ কংগেলিরি। 8য়জংকিজু য়াং ম্রুমা লুঃউরোচা কংগং প্যগেলিরি।
9য়াং ম্রুমা শিমোন নাঃমিনা লুঃউ তয়ক আয়াংকাবাং য়াংদেমা ম্যাকচি ফ্যাক(যাদুঃ) প্রালিইরি। য়াংচাগো ম্রাংরো শমরিয় লুঃউরোচা এংঅগেলিরি। 10য়াংসুউ কুঃগুকু তয়ক আগ্রিকিঃ লুঃউ প্ররো আক খেংলিরি। অর ছাংরিসা কামাস্যাং আলুংসুুউ য়াংসুউ চাঃগাগো নাঃথংগেতি। লুঃউরো প্রগেলিরি, “থাওরা ফুরা ঈঃ যা আঃগো কংমুদঃ আঃগ্রি প্ররি, দিঃ লুঃউচা য়াং কংমুং আঃগ্রিচাদি।” 11লুঃউরো য়াংসুউ চাঃগা আতৈং নিংগেতি আক্রংগা আয়াংকাবাং য়াংসুউ য়াংসুউমা ম্যাকখ্য প্রারো লুঃউরোগু এংঅফুয়ি প্যাংরো থালিরি। 12ছুগি ফিলিপ যাখা থাওরা ফুরাঈঃ পেংলাংদনা যীশু খ্রীট আক্রংলিলাগো আকং সাদাং হঃলিইরি য়াংখা লুঃউরো য়াংসুউ চাঃগাগো ক্যুংগেলিইরি অর মিঃমানা য়ক্ক্যারো রিইখ্যুও মাঙ্গালা য়ুউগেলিইরি। 13য়াং শিমোনলি ক্যুংরো রিখ্যু মাঙ্গালা য়ুলিরি অর য়াং ফিলিপ নক্কা নক্কা আলুং আঃরাদুঃ লাঃলিইরি অর লাকখানা আলুকনা আগ্রি আগ্রি এংঅফুয়ি আলুক ম্রাংরো এংঅগেলিরি। 14যিরুশালেংমা তেমেংদরো যাখা ক্রাগেলিরি, শমরিয় লুঃউরো থাওরা ফুরাঈঃ ডেংমাগো ক্যুংগেতি য়াংখা য়াংসুউরো পিতরনা যোহনগো য়াং লুঃউরোদুঃ রুওয়েলৈতি। 15পিতরনা যোহন লাঃরো য়াংসুউরো কিজু ছুউক তংগেরিচাগা য়াংসুউরো সেংস্যাংস ওয়েঞেং রাঃঅং, 16আক্রংগা য়াংখালি য়াংসুউরো আঃপমা সেংস্যাংস ওয়িঞেং মেলেসি। য়াংসুউরো সাসাক যীশু নাঃমিনা রিখ্যু মাঙ্গালা পিগেতি। 17য়াংখা পিতরনা যোহন য়াংসুউরো আঃপমা আঃলাক তাংলিরি অর য়াংসুউরো সেংস্যাংস ওয়িঞেং রাঃগেরি। 18যাখা শিমোন ম্রাংলিরি, তেমেংদরো আঃলাক তাংরি আতুওয়ংগা নিংরো সেংস্যাংস ওয়িঞেংগো পিইলিরি য়াংখা য়াংসুউ থুউসুউরোবামা তেংগা য়ুউ লাঃরো প্রলিরি, 19“ঙাগোলি দিঃ গুংধ আঃগো পিঃ, ঙা খ্যাংসু আঃপমা আঃলাক তাংগি য়াংসুউ সেংস্যাংস ওয়িঞেং রাঃঅং।” 20য়াংখা পিতর য়াংসুউগো প্রলিরি, “নাং তেংগা নাংনা আতু প্যকরো লাঃলি, আক্রংগা নাং চিঃমা তুওয়কতি থাওরা ফুরাঈ গুংধ আঃগো তেংগানা ওয়িফু রাঃরি। 21ঙারো দিঃ আলুকমা নাং আঃফু রাঃফু তাওয়েং মিহি। আক্রংগা থাওরা ফুরাঈ ম্যাকচিমাগা নাং চিঃ ঞুয়েংচা মকং। 22দিঃ মকংগা নাং নাক চিঃকু প্রেং অর আস্যাং বামা ছুউক তং; য়জংছুগি নাং চিঃমা দিঃ মকং চিঃ ঞুয়েংগো য়াংসুউ খুওয়ং রুওয়ে নৈংরি। 23ঙা ক্রিরো ম্রাংচাগা, নাং চিইচা লঃফা প্রিরো অর নাং আপ্রই আতুওয়ংমা হিরি।” 24য়াংখা শিমোন প্রলিরি, “কুবাংরো আস্যাংবামা ঙা কিজু ছুঃউক তংগেবা, যাফুলি ছুগি কুবাংরো যা প্রগেলি য়াংচা ঙামা মাক্যারাঅং।”
25য়াং নক পিতরনা যোহন আস্যাং আক্রংলিলিগো সাকসি পিগেরি অর য়াংসুউ তাঃরাগো হঃরো যিরুশালেংদুঃ প্রেং লাঃখাগেতি। লাঃরি লেংমা শমরিয়রো আম্যা রুওয়ামা আকং সাদাংগো হঃগেলিরি।
ফিলিপনা ঈথিয়পিয়া প্রিমা মাং য়ুংসি
26তারাক আস্যাং তেমেংদ তয়ক ফিলিপকু প্রলিরি, “থা, ম্রকফাক্কা যা লেংচা যিরুশালেংগা নিংরো গাজা প্রিদুঃ লাঃহারি, য়াং লেংদুঃ লাঃলি।” লেংচা হিকলিরি সিঃলি প্রাং আতুওয়ংমা। 27য়াংখা ফিলিপ য়াংচুদুঃ লাঃলিইরি। লেংমা ঈথিয়পিয়া প্রিমা তয়ক প্রলঃঞ্যং মাং য়ুংসিনা আতুয়ি রাঃলিরি। য়াং মাং য়ুংসিচা হিকলিরি তেংগা চংসা। ঈথিয়পিয়া কান্দাকী মাংমাঃআ রুঈ মুঈংগো ক্রিসা প্যাংসা দিঃ লুঃউ আঃপমা তাওয়েং হিকলিরি। থাওরা ফুরাঈ ওয়িপাসানা প্যাংফু কিজু য়াংসুউ যিরুশালেংদুঃ লাঃলিইরি। 28ঈংদুঃ প্রেংরি লেংমা য়াংসুউ ম্রাং গারিমা থৈংরো রিসি যিশায় কেইং চাউকু ফেলিরি। 29য়াংখা সেংস্যাংস ওয়িঞেংচা ফিলিপকু প্রলিরি, “থুউ ম্রাং গারিবাদুঃ লাঃলি অর য়াংসুউনা আঃতু আঃতু লাঃলি।”
30য়জং ছুগি ফিলিপচা ব্রি লাঃরো য়াং ম্রাং গারিবাদুঃ লাঃলিইরি অর ক্রালিরি য়াং লুঃউচা রিসি যিশায় কেইং চাউকু ফেঃতি। ফিলিপ য়াংসুউগো মিংলিরি, “কুঃবাং যা ফেঃতিলি, য়াংচাগো নাঃলি লঃ।”
31য়াং মাং য়ুংসিচা প্রলিরি, “তয়কলি খুওয়িরো মঃপ্রগি যা পুয়েং নাঃলিফুলি?” য়াংসুউচা ফিলিপকু ম্রাং গারিমা তাকরো য়াংসুউবামা থৈংফু কিজু আঃফি থাঃলিরি।
32য়াং য়ুংসিচা সেংস্যাস কেইং চাউমা যা চাঃগো ফেঃলিরিলি, য়াংচা ফ্রতি:
খুওয়েফু কিজু সাংফ ছুয়িকু যা পুয়েং য়ুউ লাঃরিলি,
য়াং পুয়েং য়াংসুউগো য়ুউ লাঃলিইরি।
আঃরি প্যাংসা হ্রিঃগা যা পুয়েং সাংফ ছুয়িচা তিদিং চুঃয়ি নিংরিলি,
য়াং পুয়েং য়াংসুউলি খুঃনাংগো পুঃয়ি থাঃলিরি।
33য়াংসুউ সিঃরি প্যাকরি,
য়াংসুউ আঃপমা থঃতেংরি তাঃরাগো মঃচকেলি।
য়াংসুউ আচৈং চাঃগাগো প্রফু মাঃরা,
আক্রংগা য়াংসুউ আঃসাক্কু দিঃ কাবাগা য়ুউ লাঃখাব্যা।
34য়াং য়ুংসিচা ফিলিপকু প্রলিরি, “প্রমে, রিসি যাসু আক্রলিলাগো য়ুউরো প্রলিরিলি? কুঃ আক্রংলিলাগো, মুহুকি আখ্রা লুঃউ আক্যংলিলাগো লঃ?” 35য়াংখা ফিলিপ সেংস্যাংস কেইং চাউমা থুউ ফেঃচা চাঃরুওয়ক্কা নিংরো য়াংসুউবামা যীশু আক্রলিলাগো য়ুউরো হঃ প্রালিইরি।
36-37লেংমা লাঃরো লাঃরো য়াংসুউরো প্রফুঞ্যং আঃরা তাঃরাদুঃ রক্কেরি, য়াংদেমা রিই হিকলিরি। য়াংখা থুউ য়ুংসিচা প্রলিরি, “দিঃ ক্রি, দিঃমা রিই হিকরি, ঙা রিইখ্যু মাঙ্গালা য়ুউফু কিজু পাঃছা হিকরি লঃ?” 38য়াংসুউচা ম্রাং গারিকু তেংজিলিরি। য়াং নক ফিলিপনা য়াং য়ুংসিচা রিঃমা সাক্কেলিরি অর ফিলিপ য়াংসুউগো রিঃখ্যু মাঙ্গালা পিঃলিরি। 39যাখা য়াংসুউরো রিইগা তাকলেকেতি য়াংখা আস্যাং ওয়িঞেংচা ফিলিপকু য়ুউরো লাঃলিইরি। য়াংখা থুউসুচা প্যরো ঈংদুঃ লাঃলিইরি। 40য়জং ছুগি ফিলিপকু অসদোদ ম্রুমা আম্রাং রাঃলিরি। য়াংসুউচা ওয়াদৈং ওয়াদৈংমা আকং সাদাংগো প্ররো আতুংছুংমা কৈসরিয়াদুঃ লাঃলিইরি।
Currently Selected:
প্রেরিত 8: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
