প্রেরিত 6
6
খঃনয়ক লুঃউক্কিসা
1য়াং আখিংমা তিবিরো কংগং আম্যা প্রি লারিব্যা। য়াংখা তিবিরো আতুওয়ংগা যিহুদীরো গ্রীক আঃমুনা চাঃগা প্রগেতি য়াংসুউরো ঈব্রীয় আঃমুনা চাঃগা প্রচা যিহুদীরোগু দিঃ চাঃগা প্ররো আঃপ্র তাংগেচাগা, নিংদৈং আঃচা পিরি আখিংমা য়াংসুউরোমা মুঃছুমারোচা তুখুউলি মাঃরাগে। 2য়জংছুগি য়াং তিঃছি নৈয়ক তিবিচা হিকচা আলুং তিবিরোগু তেঃরেমা খঃরো প্রলিরি, “থাওরা ফুরা তাঃরাগো হঃপ্রাফুগো থাঃরো, ঙারো আঃচাগো য়ুউরো, আলুক ক্রুংফুচা ঙারোমা মাঃসাং। 3-4ঞিং আকুরো, ঙাংরো আতুওয়ংগা লুঃউ মাঃপ্ররাঅং খঃনয়ক লুঃউগো রুঈকক্কে, যাসুরোগু আলুংসুউ ম্যাহ্না পিঃরি অর যাসুরো সেংস্যাংস ওয়িঞেংনা পুয়েংঞা আব্রিচুং লুঃউগো। ঙারো য়াংসুউরো আঃপমা দিঃ লুককি কঃরা আলুককো য়াংসুউরোগু পিইরো ঙারোচা ছুউক তংনৈঅং অর থাওরা ফুরা তাঃরাগো হঃ প্রাফু কিজু চিঃ পিনৈঅং।”
5আফুয়িমা দিঃ চাঃগাগো আলুংসুউ ওয়েংসাগেরি। আক্যুংনা সেংস্যাংস ওয়িঞেং আব্রিচুং স্তিফাংগো য়াংসুউরো রুঈ ককয়ুগেরি। য়াংসুউগো মুহুকপ্রি য়াংসুউরো ফিলিপ, প্রখর, নীকানর, তীমোন, পারমিনা অর আন্তিয়খিয়া ম্রুগা নিকলায়গো য়াংসুউরো রুঈ ককয়ুগেরি। দিঃ নিকলায়চা যিহুদী মহুক ফ্রইলোলি যিহুদী বাসাগো কুগোয়িরি। 6য়াং নক য়াংসুউরো দিঃ লুঃউরোগু তেমেংদরোদুঃ য়ুখাগেতি। য়াংখা তেমেংদরো ছুউক তংগেলিরি অর আলুকমা সুঅংফু কিজু য়াংসুউরো আঃপমা আলাক তাংগেলিরি।
7দিঃ পুয়েং প্যাংরো থাওরা ফুরা তাঃরাচা প্রিরো লাখারি অর যিরুশালেম্মা তিবি গানেংচা কংগং আয়াং প্রি লাখারি। অর পুরোহিতরো আতুওয়ংগা আম্যা লুঃউ খ্রিট বাসাগো ক্যুংরো লাক খেং য়ুগেরি।
লুঃউরো স্তিফানগো তিঃগেরি
8স্তিফানচা থাওরা ফুরা ঈ আখ্যনা আঃ প্রিজুংলু লুঃউরোবামা কংগং আম্যা এংঅফুয়ি আঃলুঃউনা লাকখানা অলুক লুকলিইরি। 9যা রিঃফুংগো ঙারো লুঃউরোগু আকং লুত্তি সিকরি, য়াং রিঃফুং ঈংগা লৈগয়ক লুঃউ স্তিফানগো ঙুরোগেরি। য়াংসুউরো হিকলিরি কুরীনীনা আলেকজান্দ্রিয়া ম্রুগা অর কিলিকিয়ানা তুদিয়া কাবাগা লৈগয়ক যিহুদী। 10য়াংসুউরো স্তিফাননা চাঃগা আঙ্রাংচা ফ্রক্কেলিরি, য়িগিলি স্তিফানচা সেংস্যাংস ওয়িঞেং আতুওয়ংগা নিংরো কংগং পুয়েংঞানা চাঃগা প্রলিরি। য়াংচা কিজু য়াংসুউরো য়াংসুউগো ছেংগ্যাংফাক লুকফু মাঃরাগেলি।
11য়াংখা য়াং যিহুদিরোচা আঃথিমা আঃথি লৈগয়ক লুঃউগো দিঃ চাঃগা প্ররো চুঃ থুউলিগেতিচাগা, “ঙারো স্তিফানগো মোশিনা থাওরা ফুরাগো ছেংগ্যাংফাক লুঃউরো ঞ্যচিঃ প্রচা চাঃগাগো ক্রাগেরি।”
12দিঃ পুয়েং য়াংসুউরো লুঃউরোগু, ওয়াগ্রি গংখ্যুকরোগু অর ডেংমা ছাঃরারোগু চুঃ থুউলিগেতি অর স্তিফানগো মহা আতৈংবাংগ্রি হ্রিইগা য়ুখাগেতি। 13য়াংসুউরো লৈগয়ক আঃলিং সাকসিগো তাং প্রাগেলিরি। য়াং আঃলিং সাকসিরো প্রগেলিরি, “দিঃ লুঃউচা ক্যাংখা মুছু ওয়িপাসানা ক্যংনা মোশি থুঃউংজৈগো য়ুউরো ছেংগ্যাংফাক চাঃগা প্ররি। 14ঙারো য়াংসুউগো দিঃ চাঃগা প্ররো ক্রাগেলিরি, য়াংসুউ নাসরৎ রুওয়াগা যীশু দিঃ ওয়িপাসানা ক্যংগো ফ্রুবলৈফু অর মোশি যা ফ্রঃচা থুউংজৈরো ঙারোগু পিলিচা য়াংচারোগুলি হ্লিবলৈফু ছুওরি।”
15যাসুরো য়াং মহা আতৈংবাংগ্রিমা থৈরো হিকলিরি, য়াংসুউরো আলুংসুউ য়াংখা স্তিফানদুঃ হ্লি ক্রিগেলিরি, য়াংসুউ ম্যাকহ্নাচা তয়ক থাওরা ফুরা তেমেংদ ম্যাকহ্নাঞ্যং ফ্রলিরি।
Currently Selected:
প্রেরিত 6: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
