প্রেরিত 28
28
মাল্টা রিই তংমা
1ঙারো ফিঃ মাক্যাপ্রি আহ্লাপা কেইং তাকরো সিগেলিরি, রিই তং নামিচা মাল্টা। 2য়াং রিই তংমা লুঃউরোচা ঙারোগু কংগং লগাওয়ে হিকলিরি। য়াংখা মুঃও ক্যারিনা খেংগেতিহ্লু, য়াংসুউরো ঙারোগু মিং ফঃরো আলুংসুউগু খঃলিইরি। 3পৌলচা থাং আসুয়ি তুবুং চুকরো, মিংমা থিঃফু আখিংখা, কংগং আছুয়িংস্যাং ম্রিং তগং য়াং মিং আহ্লংনা, থুউ থাং আপুংগা তুওয়করো পৌল আলাকমা কঃলিরি। 4ম্রিংচা পৌল আলাকমা তাঃরো হিচাগো ম্রাংরো, য়াং রিই তংমা লুঃউরোচা প্রগেলিরি, “দিঃ লুঃউচা আম্হেং লুঃউসেঃসা। আক্রংগা ম্র মুদৈং অলাক্কা রুওয়েকিলি, সামাথি নেঃ আলাক্কা মরুওয়েলি।”
5য়জংছুগি পৌল যাখা য়াংসুউ আলাক্কু খাঃরো ম্রিংগো মিংমা থিলিরি, য়াংখা পৌলমা তুখুউলি মফ্রলি। 6লুঃউরো তুওয়ক্কেলিচা ফ্রঈতি, য়াংসুউ কেইংথাচা রংরো তাকফু অর ব্রুং খুনৈং প্যাংরো সিঃ লাঃফু। ছুগি তছং ফ্ররোলি, য়াংসুউমা তুখু মফ্রলিচাগো ম্রাংরো, লুঃউরোচা চাঃগা হ্লিরো প্রগেলিরি, “দিঃ লুঃউচা নেঃ।”
7য়াং আঃরাবা নেংমা পুব্লিয় নাঃমিনা য়াং রিই তংমা আগ্রিই লুঃউমা আঃরা মাজন হিকলিরি। পুব্লিয়চা য়াংসুউ ঈংদুঃ ঙারোগু খঃলিইরি অর সুংরাক রকঅং ঙারোগু কংগং আহ্লাপা লুককেলেইরি। 8য়াং আখিংমা পুব্লিয় ফাখাংচা প্যারিনা খ্রংছু রঃগা কেএ হিকলিরি। পৌল আথিদুঃ লাঃরো ছুউক তংলিরি অর য়াংসুউ কাইংথামা আলাক তাংরো কেইংমাজিলিরি। 9দিঃ প্রাসানা ফ্রপ্রিনক য়াং রিই তংমা হিচা আলুং সানাসিরোচা কেইংমাগেলিরি। 10য়াংসুউরো জে জে প্যাংরো ঙারোগু ম্যাকন্হা পিইলিরি অর নক্কা সাংফ রুওয়েফু হ্রিইগা ঙুরোমা লুকফু ওয়েছেংরোগু সাংফমা পিগেলিরি।
পৌল রোম্মা রকখ্রাং
11য়াংদে সুংলা নিংব্রিনক ঙারো সাংফ তাজাংমা তাকরো লাঃগেলিরি। সাংফচা য়াং রিই তংমা আখেং আখিংগো ক্যলিরি। য়াংচা হিকলিরি আলেকজান্দ্রিয় ম্রুমা সাংফ অর য়াংসুউ আগংমা মুঃরুওয়া নেঃ পুং থুউ হিকলিরি। 12ঙারো সুরাকুষমা সাংফ ক্যুয়েংরো য়াংদেমা সুংরাক হিকগেলিইরি। 13য়াংচাগা লাঃরো ঙারোচা রিগিয়মা রক্কেলিরি। মুলাং রাকমা তংফাক লিঃ থাঃলিরি অর নক্কা রাকমা ঙারো পুতিয়লিমা রক্কেলিরি। 14য়াংদেমা ঙারো লৈগায়ক খ্রীটগো ক্যুংসা ঞিংরোনা তুঈগেলিরি। য়াংসুউরোনা তাখালি ল্হক নিংফু কিজু, ঙারোগু য়াংসুউরো আতংবেং থাঃগেলিরি। দিঃ পুয়েং প্যাংরো ঙারো রোম্মা রক্কে হ্লারি। 15য়াংদেমা খ্রিটগো ক্যুংসারো ঙারো লাঃফু সাদাংগো ক্রাগেলিরি। লেংমা ঙারোগু ক্রছুফু কিজু, য়াংসুউরোমা লৈগায়ক আপ্পিয়েহাট, তয়ক তিরি তিন সরাঈ ওয়া তৈঅং লাঃগেলিরি। দিঃ লুঃউরোগু ম্রাংরো পৌল থাওরা ফুরাগো কিজু তাংলিরি। অর য়াংসুউ কুঃদৈং চিঃআঃ তুতাংলিরি। 16ঙারো রোম্মা রকপ্রি নক পৌল আখ্রা ঈংমা নিংফু খুওঅং রাঃলিরি। য়াংচা কিজু সুরুয়িরোচা য়াংসুউগো চংগেতি।
রোম্মা তারা হঃখ্রাং
17সুংরাক নক পৌল য়াংদেমা যিহূদী গংখ্যুকরোগু খঃরো তেরেমা চুক্কেলিরি। য়াংসুউরো চুক্কেব্রি নক পৌল য়াংসুউরোগু প্রলিরি, “ঙা ঞিংরো, প্রফুছুগি ঙা ঙারোমা আচৈংগো ছেংগ্যাংফাক মুলুকলি অর প্রফুছুগি অগু সুংগেচা আক্যাংগুলি ছেংগ্যাংফাক মুলুকলি। য়িগিলি ঙাগো যিরুশালেংমা তিঃগেরি অর রোমীয়রো আলাকমা এঃলিরি। 18রোমীয়রো ঙারো মিংরো রুওয়েফু ক্রিলিরি, আক্রংগা ঙাগো সেঃফুঞ্যং ঙা আপ্রই মুলুকলি। 19য়জংছুগি যিহুদীরোচা মাসায়াখা ঙাচা মুরুওয়ে সাব্রি সিথিবামা তাঃরা তাংলিরি। প্রফুছুগি ঙা ঙাক কুঃদৈং লুঃউরোবামা তুখুউলি আপ্রই খ্যাফু মাঃলা। 20য়াংচা কিজু ঙা কুবাংরোনা আতুয়ি খেংরো চাঃগা প্রফু ক্রিলিরি। ঈস্রায়েল জে ম্যুঈমা যাচাগো ম্হেরো হিরি, য়াং আম্হে কিজু ঙাগো দিঃ সেং ক্যক্রুনা ক্যুয়েংরি।”
21য়াংখা যিহুদী গংখ্যুকরোগু প্রগেরি, “কুঃবাং আক্রংলিলাগো য়ুউরো ঙারো তুখুউলি চাঃআ মাঃরাগেলি। যা ঞিংরো য়াং আচাগা লাঃগেতি, য়াংসুউরো তয়কলি কুঃবাং আক্রংলিলাগো য়ুউরো মপ্রগেলি অর তুখুউলি মকং চাঃগা মপ্রগেলি। 22য়িগিলি ঙারো কুঃবাং যা তুওয়কতিলি য়াংচাগো নাথং খ্যাংরি। আক্রংগা ঙারো সিরি, হিচা আলুং আঃরামা লুঃউরো য়াং আফুয়িকু য়ুউরো ছেংগ্যাংফাক চাঃগা প্ররি।”
23পৌলনা আতুয়ি খেংফু কিজু য়াংসুউরো তারাক রাক ম্হেকেলিরি। পৌল যামা নিংরিলি, য়াংদুঃ য়াংসুউরো আপি অরলি আম্যা লুঃউ লাঃগেলিরি। য়াংখা পৌল ঞিগাকাবাং মম্যুয়েং তৈংঅং থাওরা ফুরা ঈঃ নেংঙেংদগো য়ুউরো য়াংসুউরোগু ঈসি পিইলিরি অর নালিফু পিইলিরি। মোশির থুংজৈনা রিসিইরো কেইং চাউগা যীশু আক্রংলিলাগো প্রারো য়াংসুউগো য়ুউরো ক্যুংজিফু কিজু ক্রেংলিরি। 24য়াংসুউ যা প্রলিরি, য়াংচা লৈগায়ক ক্যুংগেলিরি, অর লৈগায়ক মক্যুংগেলি। 25পৌল চাঃগা আতৈং য়াংসুউরোমা ক্যুংফু মক্যুংফু ফ্ররো য়াংসুউরো য়াংচাগা লাঃগেলিরি। য়াংসুউরো লাঃফু হ্রিইগা পৌল প্রলিরি, “সেংস্যাংস ওয়িঞেংচা রিসি যিশাঈয়গা নিংরো কুবাংরো আচৈংবামা যা আম্হেং চাঃগা প্রলিরিচাগা, 26দিঃ লুঃউরোবামা লাঃরো প্রঃ, ‘নাংরো নাথংমি, য়িগিলি তুখুউলি নামিলি মুহুক। ম্রাংমি য়িগিলি তাখ্যাকপাং মিসিমুঃ। 27য়াং লুঃউরোমা চিইদানাচা কংগং কেগেং অর নাঃ পাংপাহাব্যা। অর য়াংসুউরো য়াংসুউরোমা ম্যাকচিইুলি আকেইং প্যাংরো থাঃগেতি, যাফুলিছুগি ম্যাকচিইনা মাম্রাংরাঅং, নাঃনা মাক্রারাঅং অর চিঃঞ্যংনা নাঃমিলিরাঅং। অর আকং ফ্রঈফু কিজু ঙাবাদুঃ প্রেং মাঃলারাঅং।’
28-29“য়াংচা কিজু কুবাংরো সিরো থাঃগে, থাওরা ফুরা যা পুয়েং লুঃউঃউউরোগু আপ্রইকা রুওয়েম্রকতি য়াং চাঃগা যিহুদীমুহু বারোমা লাঃরো প্রগেমি অর য়াংসুউরোরা য়াং চাঃগাগো নাথাংমি।”
30নৈনঅ তৈংঅং পৌল য়াংসুউ ঙারো নিংচা ঈংমা হিকলিরি অর যাসুরো য়াংসুউনা আতুয়ি খেংফু লাঃরি, য়াংসুউরো আলুংসুউগো পৌল লাক খেংলিরি। 31য়াংসুউ চিঃআ তুতাংরো তেরেমালি মতপ্রি থাওরা ফুরা ঈঃ আক্রংলিলাগো য়ুউরো তাঃরা হঃলিরি অর আস্যাং যীশু খ্রীট আক্রংলিলাগো য়ুউরো সুয়েং সাং পিইলিরি।
Currently Selected:
প্রেরিত 28: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
