প্রেরিত 27
27
পৌল রোমদুঃঃ রুওয়েখ্রাং
1সাংফমা ঙারোগু ঈটালিয়দুঃঃ য়ুউ লাঃফু ম্হেপ্রি নক পৌলনা অরলি তয়ক থংসিগো, যুলিয় নাঃমিনা চৈবুস্যি তয়ক্কু আলাকমা এঃলিইরি। যুলিয় হিকলিরি সিথি কুঃ সুুরুয়িমা চৈবুস্যি তয়ক। 2ঙারো আদ্রামুত্তীয় সাংফছুয়িকা, সাংফমা তাকরো লাঃখাগেতি। তুদিয়া কাবাগ্রিদুঃ লাঃফু কিজু সাংফরো ম্হেরো হিকলিরি। ম্যাসিডোনিয়া প্রিনিমা থিষলকিনি ম্রুগা আরিষ্টার্খচা ঙারোনা আতু হিকলিরি।
3ঙারো সাংফচা মুলাংখা সিদোনমা তেংলিরি। যুলিয়চা পৌলনা কংগং আহ্লা ক্যাংওয়ে প্যাংলিরি অর য়াংসুউ মিছুয়িরোগু খুওয়ং পিইলিরিচাগা, য়াংসুউ মিছুয়িরো য়াংসুউগো লুকচা ওয়েংছেং পিনৈংরি। 4নক্কা য়াংগা প্রেংরো ঙারো সাংফ রুওয়েকেরি। লিঃচা ঙারো আপ্রইেংগা হিরি আক্রংনা, সাঈপ্রাস রিই তং যা ব্রাক্কা লিঃ মিহিকলিরি, য়াং ব্রাক্কা নিংরো ঙারো লাঃগেলিরি।নক্কা য়াংগা প্রেংরো ঙারো সাংফ রুওয়েকেরি। 5নক্কা ঙারো কিলিকিয়ানা পামফুলিয়া হ্রিঃগা যা ম্র হিকলিরি, য়াং ম্র কুউরো লুঃউকিয়া প্রিনিমা মুরা ম্রুমা রক্কেলিরি। 6চৈবুস্যিচা য়াংদেমা আলেকজান্দিয়াদুঃ লাঃফু সাংফ তাজাং রালিরি। য়াং সাংফচা ঈটালি প্রিদুঃ লাঃরিলো, য়াংসুউ ঙারোগো য়ুউরো য়াং সাংফমা তাকলিরি। 7ঙারো সাংফচা লৈগারাক ফ্রঈব্যা কংগং এঃসে এঃসে লাঃরি কংগং সিঃখেংরো ক্লীদোন ম্রুবাদুঃ রক্কেলিরি, য়জংছুগি লিঃচা অর ঙারোগু লাঃফু মিপিলিব্যা। য়াংখা ঙারো ক্রীট রিই তং যা ব্রাক্কা লিঃ মিহিলি, য়াং ব্রাক্কা নিংরো সলমোনী বাগা লাঃগেলিরি। 8ম্রনাগা ঙারো দুঃখাওয়া প্যাংলো লাঃগেলিইরি অর আহ্লা আঃরা পোতাশ্রয় খঃরো আঃরা তুখুমা রক্কেলিরি। য়াংনেং বামা হিকলিরি লাসেয়া ম্রু।
9য়জং প্যাংরো লৈগারাক লাঃলিইরি। য়াংখা তেথেঃচা নিংখিং তুংরো, ছং ক্যাহ্লারিব্যা। ছুগি সাংফমা তাকরো লাঃফু, য়াংখা তুখু ফিঈ ফ্রফু লেংমা সিকলিইরি। য়াংচাকিজু পৌল সাংফমা লুঃউরোগু সিঃদি পিইফু কিজু প্রলিরি, 10“ক্রিগে, ঙা ম্রাংরিচাগা, ঙারো দিঃ লাঃরি লেংমা কংগং প্যাক্কেফুদিঃ। য়াং প্যাককিংচা ঙারোমা সাসাক সাংফনা ওয়েংছেং প্যাকফু মুহু, ঙারো আসাকলি প্যাক লাঃফু।”
11ছুগি চৈবুস্যিচা পৌল চাঃগাগো নামথংব্রি সাংফমা আগ্রিনা সাংফ ঙাংসা চাঃগাগো কৈলিরি। 12সাংফছুয়ি আঃরাচা আখেং রাকমা নিংফুঞ্যং আঃরা মুহু কিজু, আম্যাজ লুঃউরো ম্হেকেরিচাগা, য়াংচাগা লাঃরো নৈংরিছুগি ফৈনিমা আখেং রাক্কু তুংজিফু। ফৈনিক হিকলিরি, ক্রিট রিঃতং সাংফছুয়ি আঃরা। য়াং আঃরাচা আনকফাকনা ম্রকফাক অর তংফাকনা আনকফাক ব্রাকচা ল্হঃরো হিকলিরি।
লিঃগ্রি মুঃগ্রি
13নক্কা যাখা এঃসে এঃসে তংফাক লিঃ থালিরিখা, য়াংখা য়াংসুউরো তুওয়ক্কেলিচাগা, য়াংসুউরো যা লুকরিলি য়াংচা রাঃরি। 14য়জংছুগি তাঃনা নিংব্রিনক য়াং রিঃতংগা উরাকুলো নাঃমিনা কংগং ক্রকফুয়ি মুদৈং থালিরি. অর সাংফচা য়াং মুদৈংমা ক্যালিরি। 15ঙারো লিঃ আঃনা অর হ্রিদুঃঃ মাঃলানৈহ্লিব্যা। য়াংচাকিজু হ্রিদুঃ মাঃলাব্রি, সাংফগো লিঃমা রুওয়েলৈতিব্যা। 16নক্কা কৌদা নাঃমিনা তুখু আস্যি রিঃতং, যা ব্রাক্কা লিঃ মিহিলি, ঙারো য়াংচাগা নিংরো লাঃগেলিরি অর সাংফমা যা লং হিকলিরি, য়াং লংরোগু কংগং দুঃখাওয়ানা প্যাকফুচাগা কিঃছিগেরি। 17লুঃউরোচা লংরোগু সাংফদুঃ ঙাং তাংগেরি য়াংনক ক্রুনা সাংফমা ঈংখং লেংখাওয়াগো খ্যুয়েংগেলিরি আক্রংগা প্যয়েংরুওয়ারোচা আখ্রা মফ্ররাঅং। 18মুদৈং লিঃমা ঙারো সাংফচা কংগং লুকলিইরি, মুলাংখা সাংফমা লুঃউরোচা সাংফগা ওয়েংগো রিঃমা বলৈকেতি। 19সুংরাকখা য়াংসুউরো কুঃ আলাকনা সাংফমগো ছাংচারোগুলি বলৈকেতি। 20লৈগারাক ফৈঅং কংখাংমা ক্রিনা নিংগুলি মাম্রাংরালি অর কংগং মুদৈং মুুবুয়ি থাঃনিংলিরি। আছুংমা ঙারো আসাক ম্রেমিছুরো মাথাংগেলিব্যা।
21লৈগারাক ফৈব্যা লুঃউরো তুখুউলি মাঃচাগেসি কিজু পৌল য়াংসুউরো হ্রিথাকমা রেঃরো প্রলিরি, “ক্রি, ঙা চাঃগাগো নাথংরো, ক্রীপ রিঃতংগা সাংফগো রুওয়েফু মাসাংলি। নাথংলিগি দিঃ ফিঃনা প্যাককিংগা কুবাংরো রুওয়েক্কেলিফু। 22ছুগি আগু ঙা নাংরোগু আতংবেং থাঃচাগা, কুবাংরো চিই্কু লেল্হেং থাঃগে, আক্রংগা কুবাংরো তয়কলি মিসিমু, দিঃ সাংফরা সাসাক প্যাক লাঃফু। 23ঙা যাসুউ লুঃউলি অর ঙা যাসুউগো রুসিইরিলি য়াং থাওরা ফোরা তেমেংদ তয়ক ঞ্যাগা ঞি ঙা নেংমা রেঃরো প্রলিইরি, 24‘পৌল, মক্রক্কি। নাক্কু সিথি কৈসর হ্রিইগা রেঃরাফু। দিঃ সাংফমা যাসুউরো নাংনা লাঃগেতি, য়াংসুউরো আলুংসুউ আসাক্কু থাওরা ফোরা নাংক্কু ল্হুরি।’ 25য়াংচা কিজু কুবাংরো চিই্কু লেল্হেং থাঃগে। থাওরা ফুরা ঈঃ আঃপমা ঙামা আক্যুং হিকরি, য়াংসুউ ঙাগো যা প্ররিলি, য়াংচারা ফ্রঈফু। 26ছুগি ঙারো যা রিই তংমা লাঃরো ক্যাফুলি।”
সাংফ নঃখ্রাং
27ঙারো আদ্রিয়া ম্রমা দিঃ পুয়েং লাঃ নিংগেতি। মুদৈং থাঃরো তিছি লিরাক ঞি সুওয়েংখংমা সাংফ ল্যগেসারো তুওয়ক্কেরিচাগা, য়াংসুউরো কাইংনাঃমা রক্কেব্যা। 28য়াংসুউরো ক্রাংরো ক্রিগেলিরিখা, য়াংদে রিঃচা লাকতং স্যুঈচি আনাক হিরি। অর তছং নক য়াংসুউরো ক্রাং ক্রিগেরিখা, য়াংখা রিঃচা লাকতং ক্রকছি হিরি। 29ক্যকমা বুওয়েমি ক্রকরো য়াংসুউরো সাংফ নক্কা ব্রাক্কা লিঃখু সাংফ ঙ্রিং খ্যাগেলিরি অর মুলাংফু কিজু ছুউক তংগেলিরি। 30নক্কা সাংফমা ল্যগেসারো, ব্রি লাঃফুব্যা ক্রেংগেরো সাংফমা হ্রিঃগা ব্রাক্কা সাংফ ঙ্রিং খ্যাফুঞ্যং প্যাংরো সাংফমা হিচা লংগো ম্রমা খ্যালৈগেতি। 31য়াংখা পৌল চৈবুস্যিনা সুরুয়িরোগু প্রলিরি, “দিঃ ল্যসারো সাংফমা মিহিগি, কুবাংরো আসাক মুওয়েমু।” 32য়াংখা সুরুয়িরোচা লং ক্রুগো ফ্রে বলৈক্কেতি আক্রংগা লংচা ম্রমা ক্যা লাঃঞ্যং।
33মুলাংফু হ্রিঃগা পৌল আলুংসুউগো তুখুমাসা চাঃগেছুরো আতংবেং থাঃরো প্রলিরি, “গানি তিছি লিরাক ফ্রঈব্যা, যা ফ্রঈফু মফ্র তুওয়ক্কেরো কুবাংরো তুখু চাঃফু মফ্রকে। 34আগু ঙা কুবাংরোগু তুখুমাসা চাঃফু কিজু আতংবেং থাঃরি। হ্রাংরো নিংফু কিজুগা কুবাংরো তুখুমাসা চাঃআ সাংরি। কুবাংরো ম্রাংগেমি, কুবাংরোমা ছেংবাং বাং তাবাং মাপ্যাকমু।”
35দিঃ চাঃগা প্ররো পৌল ভংমুগো য়ুউরো আলুংসুউ হ্রিইথাকমা থাওরা ফুরাবামা ছুউক তংলিরি অর ফিরো চাঃফু পিইলিরি। 36য়াংখা য়াংসুউরো আলুংসুউ চিইআঃ রাঃরো চাঃগেলিরি। 37ঙারো সাংফমা আয়ক ন্হরা খনছি খ্রকয়ক হিকলিরি। 38আলুংসুউ ওয়েং তিব্রি চাঃব্রি নক সাংফগো পঃবঃ প্যাংফু কিজু সাংফমা হিকচা আলুং গংগো ম্রমা বলৈকেতি।
39মুলাংখা য়াংসুউরো আঃরাগো মিসিগেলি, য়জংছুগি প্রফুঞ্যং তুখু ম্রস্যি ম্রাংগেলিরি, যামা কেইংনারোচা সিঃলি ব্রাং হিকলিরি। য়াংখা য়াংসুউরো ম্হেকেলিরি, ফ্রনৈংরিছুগি সাংফগো য়াং কাইংনাঃমা তাংফু। 40য়াংচা কিজু য়াংসুউরো সাংফমা সাংফ ঙ্রিংগো ক্রু ফ্রেরো ম্রমা খ্যালৈকেতি অর সাংফ আওয়ে খ্যয়েংচা ক্রুগো ফ্রি বলৈকেতি। য়াং নক য়াংসুউরো লিঃ লাঃরাদুঃ, য়াংসুউরো সাংফমা আওয়েকু তাংলৈকেতি অর হ্রিদুঃঃ কাইংনাঃমা লাঃরো সং কঃলিরি। 41হ্রিইগা ব্রাকচা আয়াং সং কঃরিলো, সাংফচা মাঃলালিব্যা অর রিই লৈং সেঃরো নক্কা ব্রাকচা থুংবৈং লাংবৈং ফ্ররো প্যাক লাঃখারি।
42য়াংখা সুরুয়িরোচা খ্যুয়েংরো হিচারোগু সেঃ বৈফু ক্রেংগেলিরি, যাস্যালিছুগি য়াংসুউরো তয়কলি রিঃগুক খেঃরো মিব্রিরাঅং। 43য়জংছুগি চৈবুস্যিচা পৌলগো মাঃফু ক্রিলিরিলো, সুরুয়িরোগো কুঃ চিঃতগ্র মলুকচিলি। য়াংসুউ আনা পিইলিরি, যাসুরো রিঃগুক তেঃতি য়াংসুউরো পাথামা সাংফগা ছাংরো কাইংনাঃমা লাঃরো তাক্কে, 44অর আখ্রা লুঃউরোচা সাংফমা পুয়েংরুয়ারোনা অর জে জে আপুয়েংরোগু কৈরো য়াংদুঃ লাঃগে। দিঃ পুয়েং প্যাংরো আলুংসুউ তুজুং তুখু মফ্রপ্রি কাইংনাঃমা তাক্কেলিরি।
Currently Selected:
প্রেরিত 27: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
