প্রেরিত 26
26
1য়াংখা আগ্রিপ্প পৌলগো প্রলিরি, “নাং ব্রাক্কা চাঃগা প্রফুকিজু, নাংকু খুওয়ং পিরি।”
য়াংখা পৌল আলাক ম্রাংরো কুঃ ব্রাক্কা দিঃ চাঃগা প্রলিরি, 2“আস্যাং মাং আগ্রিপ্প, যিহূদীরো ঙাগো যাচারোগু য়ুউরো আপ্রই খ্যাগেতিলি, য়াংচাগো ছেংগ্যাংফাক লুকরো কুঃবাং হ্রিঃগা, গানি ঙা ঙাক ব্রাক্কা চাঃগা প্রফু আঃলি রাঃরো, কুঃগোকুঃ কংগং কেইংস্যাং ম্হেতি। 3প্রফুলঃঞ্যংছুগি যাখা যিহুদীরো আগু থুংজৈংনা চাঃগা ঙ্রাংগেচা আক্রংলিলাগো কুঃবাং আহ্লাপা সিবারি। য়াংচাকিজু সিখেংরো ঙা চাঃগাগো নাথংফু কিজু কুবাংগো চিঃঞ্যংগা আতংবেং থাঃবারি।”
4“আঞিখাকাবাং প্রফুছুগি ঙাক আঞিগাচালো ঙাক প্রিমা অর নক্কা যিরুশালেং লুঃউরোবামা যা পুয়েং ঙা নিংলিরিলি, যিহূদী আলুংসুউ সিকরি। 5আয়াংকাবাং য়াংসুউরো ঙাগো সিরি অর চিঃতমা তুওয়ক্কি দিঃ সাকসি পিনৈংরি, ঙারো ভাষামা ফরিশি নাঃমিনা যাসুরো আরাংকাবাং হিকলিরি, ঙা য়াং ফরিশিঞ্যং নিংচালিরি। 6থাওরা ফুরা ঙুক আচৈরোবামা যা গিধি খেংলিরি, য়াংচাগো ম্হেরিলো আগু ঙাগো তাঃরা চৈক্কেতি। 7ঙুরোমা আচৈ তিছি নৈছাক লুঃউরোচা রাকনিং চিইঞ্যংনা থাওরা ফুরাগো রুসিইতারা থাঃরো, য়াং গিধি প্রিজুচাগো ম্রাংরাফু ম্হেতি। আস্যাং মাংগ্রি, ম্হেতি কিজু যিহূদীরো ঙাগো আপ্রই খ্যাগেতি। 8থাওরা ফুরাচা আঃসিরোগু আহ্রাং প্যাংরি দিঃ চাঃগারোগু মক্যুংসাং ছুরো কুবাংরো যাফু মক্যুংগেলি?”
9“ঙা কুঃদৈং ক্যুংরি, নাসরত যীশুগো ছেংগ্যাংফাক লুঃউরো যা প্যাংসাংলি, য়াংচা ঙা প্যাংলিরি, 10অর য়াংচাগো ম্হেরো ঙা যিরুশালেংমা লুকলিইরি। ফুংগ্রি আগ্রিগা ক্ষেমতা রাঃরো ঙা খ্রিট আঃপমা ক্যুংসা লুঃউরো লৈগায়ক্কু থংমা থিঃলিরি অর য়াংসুউরোগু সেঃবৈফুখা য়াংসুউরোগু ছেংগ্যাংফাক লুঃউরো ব্রাক ঙাংলিরি। 11য়াংসুউরোগু ডেং পিফু কিজু খ্যাংখামুছু রিঃফুং তাজাংগা তাজাং লাঃলিইরি অর যীশুগো য়ুউরো ছেংগ্যাংফাক চাঃগা প্রফু কিজু য়াংসুউরো আঃপমা ঞ্যচিঃ প্যাংলিরি। য়াংসুউরো আঃপমা ঙা কংগং মেং ফ্রলিরি, য়াংসুউরো আঃপমা ঞ্যচিঃ প্যাংফু কিজু ঙা নেংঙেংখ্রা ম্রুদুঃঃ তয়ং লাঃলিইরি।”
12“দিঃ পুয়েং তখক আগ্রি ফুংগ্রিরোগা ক্ষেমতানা আনা য়ুউরো ঙা দামেস্ক ম্রুদুঃ লাঃলিইরি। 13আস্যাং মাং, য়াংখা ম্যুয়েংদিতেং ফ্রঈব্যা। লেংমা নিংগা লালাং তুখু আড়ং থাওরা ফুরাফুংগা ঙানা ঙামা মিছুয়িরো লিফাক লাকচি আড়ং তকলিরি। 14ঙারো আলুংসুউ কেইংফামা লিঃখাগেতি অর ঙা ক্রালিরি ঈব্রীয় আঃমুনা যাসুমিসি ঙাগো প্ররি, ‘শৌল,শৌল, যাফু নাং ঙাগো ঞ্যচিঃ প্যাংরিলি? চুউ হিরি দুঃকমা ক্যকরো নাং কুঃগো কুঃ মাফ্যাকলঃ?’
15“য়াংখা ঙা প্রলিরি, ‘আস্যাং, কুঃবাং যাসুলি?’
16“অাস্যাং প্রলিরি, ‘ঙা যীশু, যাসুউ আঃপমা নাং ঞ্যংচি প্যাংরি। আগু থাআ, নাং আখ্রিমা আঃপ্রুকলো থাআ। প্রুজুকসানা সাকসি প্যাংফুকিজু নাংক্কু ঙা আম্রাং পিলিচা। নাং যা পুয়েং ঙাগো ম্রাংরিলি, অর ঙা নাক্কু যা প্রাফুলি, য়াংচারোগু নাং লুঃউরোবামা প্রলি। 17-18নাং জে ম্যুগা অর যিহূদীমুহু লুঃউরো আলাক্কা ঙা নাংক্কু কিয়িছিফু। য়াংসুউরো ম্যাকচিগো লাংজিফু কিজু অর মুম্যুংগা আড়ংদুঃ য়ুফুনা মেংনে আলাক্কা থাওরা ফুরাবাদুঃ প্রেং য়ুউ লাঃফু কিজু ঙা নাংকু য়াংসুউরোবাদুঃ রুওয়েতি। যাস্যালিছুগি ঙা আঃপমা আক্যুং থাঃরো, য়াংসুউরো আপ্রইকা ক্যুয়েঅং অর থাওরা ফুরা ঈঃ আতুওয়ক যাসুরোগু আখ্রা থাঃলিরি, য়াংসুউরোবামা আঃরা রাঃঅং।’
19“আস্যাং মাং আগ্রিপ্প, য়াংচা কিজু থাওরা ফুরা ফুংগা, থুউ প্রাচা আতুওয়ংগা নিংরো, ঙা যা প্রলিরিলি, য়াং চাঃগাগো ঙা মিপিলি। 20যাসুরো দামেস্ক ম্রুমা হিরি পাথামা য়াংসুউরোবামা, য়াংনক যাসুরো যিরুশালেংমা অর হিচা আলুং যিহুদিয়া প্রিনিমা হিরি য়াংসুউরোবামা অর ঙা যিহুদীমুহু বারোমালি তাঃরা হঃ প্রালিরিচাগা, আপ্রইকা চিঃ প্রেংরো থাওরা ফুরাদুঃ প্রেংফু সাংরি। অর প্রফুজারা অলুককো লুকফু সাংরি যাচাগো ম্রাংরো সিফুচাগা, য়াংসুউরো চিঃ প্রেংগেব্যা। 21য়াংচা কিজু যিহূদীরো ঙাগো ওয়িপাসানা ক্যংমা সেঃ বৈফু ক্রেংলিরি। 22ছুগি গিনিতৈঅং থাওরা ফুরাচা ঙাগো কিয়িছি লাঃরি অর য়াংচাকিজু ঙা দিঃমা রেঃরো আঞি আফুওয়া লুঃউরো হ্রিইথাকমা সাকসিই পিইরি। রিসিরোনা মোশি যা প্রাসানা চাঃগাগো প্রঃ বৈখারি, য়াংচাগো আপি ঙা তুখুউলি মঃপ্র। 23য়াং চাঃগাচা ফ্রঈতি, মশীহগো দুঃখাওয়া খেংরাফু অর যিহূদী মুহু লুঃউরোবামা থাওরা ফুরা নেংঙেংদ আক্রংলিলাগো য়ুউরো তাঃরা হঃরাফু।”
24যাখা পৌল দিঃ পুয়েং কুঃগো য়ুউরো চাঃগা প্রলিরি, য়াংখা ফিষ্ট য়াংসুউগো চাঃগাগো ফ্রেরো অঃরো প্রলিরি, “পৌল, নাং রুঃ লাঃখাব্যা। নাং চাআগ্রি তেঃপ অর য়াং চাআচা নাংক্কু আরুঃ প্যাংবলৈতি।”
25য়াংখা পৌল প্রলিরি, “আস্যাং ফিষ্ট, ঙা অরু মুহু। ঙা যা প্ররিলি য়াংচা আম্হেং অর চাঃগা রাংরি। 26মাংগা দিঃ আক্রংলিলাগো সিরি অর ঙা য়াংসুউনা অব্রিচি আলুং চাঃগাগো প্রনৈরি। অর ঙা দিঃ চাঃগাগো আম্হেং সিচাগা, দিঃচারো তুখুউলি য়াংসুউ ম্রাংরো হিকলিরি, আক্রংগা দিঃ প্রাসানারোচা খুঃরো মফ্রলি। 27মাং আগ্রিপ্প, কুঃবাং রিসিইরো চাঃগাগো ক্যুরিলঃ? ঙা সিরি কুঃবাং ক্যুংরি।”
28য়াংখা আগ্রিপ্প পৌলগো প্রলিরি, “নাং কংগং আখিং আনৈমা, ঙাগো খিরিয়েং প্যাংফু ক্রেংরিয়াং?”
29পৌল প্রলিরি, “আখিং আনৈ হিলি, আম্যা হিলি। ঙা থাওরা ফুরাবামা দিঃ ছুউক তংরি, কুঃবাং সাসাক মুহু, গানি যাসুরো ঙা চাঃগাগো নাথংগেতি, য়াংসুউরো আলুংসুউ দিঃ খ্যুয়েংচা সেংক্য ক্রু আপি ঙাঞ্যং ফ্রঈপেচি।”
30য়াংখা মাং থাঃলিরি অর থাঃরি খ্যাং খ্যাং আগ্রি ওকখ্যুকসু ফিষ্ট অর বর্ণীকিনা অর য়াংদে যাসুউরো থৈং হিকলিরি য়াংসুউরো আলুকরো থাঃরো রেঃক্কেলিরি। 31য়াংনক য়াংসুউরো য়াংগাচা লাঃখারো, য়াংসুউরো তয়ক্কু তয়ক প্রগেলিরি, “দিঃ লুঃউচা তুখুউলি আপ্রই মুলুকলি, যা আপ্রই কিজু য়াংসুউগো সেঃ বৈফু মুহুক্কি থংমা খ্যালৈঅং।”
32আগ্রিপ্প ফিষ্টগো প্রলিরি, “দিঃ লুঃউচা সিঃথিমা তাঃরা মাতাংলিছুগি, য়াংসুউগো রুওয়েনৈলিফু।”
Currently Selected:
প্রেরিত 26: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
