প্রেরিত 25
25
ওখ্যুকসু আগ্রিই হ্রিইগা পৌলগো তাঃরা চৈখ্রাং
1য়াং প্রিনিদুঃ লাঃরো সুংরাক নক ফিষ্ট কৈসরিয়াগা যিরুশালেংদুঃ লাঃলিইরি। 2য়াংখা ফুংগ্রি আগ্রিরোনা যিহূদী গংখ্যুকরো য়াংসুউবামা লাঃরো পৌলগো ছেংগ্যাংফাক লুকরো নালিং প্রুক্কেলিরি। 3য়াংসুউরো ফিষ্টগো কংগং আহ্লাপা ম্হেরো আতংবেং থাঃগেলিচাগা, কুঃবাং ঙারো ম্যাকন্হাগো ক্রিরো পৌলগো যিরুশালেংদুঃ খঃফু রুওয়েলৈ। য়াং আক্রংচা ফ্রঈতি, য়াংসুউরোচা লেংমা খুঃ নিংরো পৌলগো সেঃফু চাঃগা আথু ঙাং প্যাংগেলিরি। 4য়াংখা ফিষ্ট প্রলিরি, “পৌলগো কৈসরিয়ামা লংরো হিরি অর ঙা কুঃদৈং আয়াং য়াংদুঃ লাঃফু। 5নাংরো আতুওয়ংগা লৈগায়ক ক্ষেমতা হিকরি লুঃউ ঙানা আতু লাঃ অর য়াং লুঃউরা তুখুমাসা আপ্রই হিরিছুগি, য়াংচাগো প্রা পিগে।”
6ফিষ্ট য়াংদেমা কুঃরাক ছিঃরাক নিংরো কৈসরিয়াদুঃ প্রেং লাঃখারি। নক্কা মুলাং রাকমা য়াংসুউ তাঃরা ছুয়িনুয়িফু থৈংরো, পৌলগো য়াংসুউ হ্রিইদুঃ য়ুউ লাঃফু কিজু অানা পিইলিরি। 7যা যিহূদীরো যিরুশালেংগা লাঃগেতি, পৌল য়াংদুঃ লাঃব্রিনক য়াংসুউরো পৌল লিফাক লাকচি রেঃক্কেরো, য়াংসুউগো ছেংগ্যাংফাক লুঃউরো প্রফুমারা রাঃঅং আপ্রই পিগেলিরি, য়িগিলি য়াংচারো তুখুগোলি হ্রিই তাং মাপ্রানৈলি।
8য়াংখা পৌল কুঃ ব্রাক্কা দিঃ চাঃগাগো প্রলিরি, “ঙা যিহূদীরোমা থুংজৈং অর ওয়িপাসানা ক্যং অর প্রফুছুগি সিঃথি রোমগো য়ুউরো তুখুউলি ছেংগ্যাংফাক মুলুকলি।”
9ফিষ্টচা যিহূদীরোগু চিঃ অপ্য পিফু কিজু পৌলগো প্রলিরি, “দিঃ আপ্রইরো আফ্রি তাঃরাচা ঙা যিরুশালেংমা লাঃরো তাঃরা চঃনৈঅং, য়াংচা কিজু নাং য়াংদুঃ লাঃফু নৈংফুলঃ?”
10য়াংখা পৌল প্রলিরি, “ঙা আগু রোমীয় তাঃরা আচুওয়িমা রেঃরো হিরি অর রোমীয় আচুরাবামা ঙাক তাঃরা ফ্রঈরাফু তেংরি। কুবাংগা আহ্লাপা সিঃরি, ঙা যিহূদীরো আঃপমা তুখুউলি মকং মুলুঃউল্লি। 11হিবেচি, ঙারা সিফুঞ্যং তুখুমাসা আপ্রই লুকরো হিগিরাছুগি, ঙা সিইফু কিজু লাক খেংনৈরি। য়জংছুগি দিঃ যিহুদীরো ঙাগো ছেংগ্যাংফাক লুকরো যা আপ্রই তাংগেতিলি, য়াংচা আম্হেং মুহুরাছুগি য়াংসুউরোবামা ঙাগো রুওয়েফু তয়কমালি তাওয়েং মিহি। ঙা সিঃথিবামা তাঃরা তাংবারি।”
12ফিষ্ট য়াংসুউমা আতৈংবাংসিরোনা আতৈংবাং প্যাংরো প্রলিরি, “নাং যাখা সিঃথিবামা তাঃরা তাংরি, য়াংখা সিঃথিদুঃ লাঃফুব্যা।”
ফিষ্টনা আগ্রীপ্প মাং
13য়াং লৈগারাক নক যিহুদীরোমা মাং আগ্রিপ্পনা য়াংসুউ মিঃয়া বর্ণীকি ফিষ্টগো ক্রুছুফু কিজু কৈসরিয়াদুঃ লাঃগেতি। 14য়াংসুউরো য়াংদেমা লৈগারাক নিংগেরি আক্রংনা ফিষ্টচা পৌল আক্রংলিলাগো য়ুউরো মাংগো প্রলিরি। য়াংসুউ প্রলিরি, “ফিলিস্ক লুঃউ তয়ক্কু দিঃমা থং খ্যারো বৈখারি। 15ঙা যাখা যিরুশালেংদুঃ লাঃখারি, য়াংখা ফুংগ্রি আগ্রিনা যিহূদী গংখ্যুক ওয়াগ্রিরো দিঃ লুঃউগো ছেংগ্যাংফাক লুকিরো নালিং প্রুক্কেরি অর অপ্রস্যাং খ্যারো দিঃ লুঃউগো ডেং পিরাফু প্রগেলিরি।”
16“ঙা য়াংসুউরোগু প্রলিরি, ‘খ্যাংসুগোমুছু ছেংগ্যাংফাক লুকরো তুখু নালিং প্রুক্কি, যাসুরো নালিং প্রুরি, য়াংসুউরো হ্রিইগা কুঃগো আপ্রইস্যাং মুহুছুরো অালিঃ মাঃরানৈথাওরা ফুরা, য়াংসুউগো ডেং পিফুচা রোমীয়রোমা আগু হিচা থুংজৈংমা হিমি।’
17“য়াং যিহীদীরো ঙানা আতু লাঃব্রিনক ঙা আক্রাব্রি, মুলাং রাকমা তাঃরা প্যাংফু থৈংলিরি অর য়াং লুঃউগো য়ুউ লাঃফু আনা পিইলিরি। 18যা লুকরো য়াংসুউগো আপ্রই তাংগেতি, য়াংসুউরো যাখা চাঃগা প্রফু রেঃরি, য়াংখা ঙা যা পুয়েং তুওয়কলিরি, য়াং পুয়েং তুখুউলি নালিং য়াংসুউরো মাপ্যাংগেলি, 19প্রফুছুগি য়াংসুউরো ভাষাঞ্যং অর যীশু খঃরো তয়ক আঃসি আক্রংলিলাগো য়ুউরো আপ্রই তাংগেলিরি। পৌল খঃরো য়াং লুঃউচা লাক খেংসা ফ্রত্তি, য়াং যীশু হ্রাংরো হিরি। 20দিঃচারোগু যা পুয়েং সাদাং য়ুউফুলি, য়াংচাগো তুওয়ক মারাব্রি ঙা মিংলিরি, দিঃ আলুং আপ্রইকু তাঃরা চনৈঅং, য়াংচা কিজু য়াং লুঃউচা যিরুশালেংদুঃ লাঃফু লাক খেংরি লঃ। 21য়জংছুগি য়াংসুউ যাখা সিঃথি তাঃরা ফ্রিফুচাগো চংফু কিজু ঙাবামা তাঃরা তাংরি, য়াংখা সিঃথিদুঃ মুওয়েথাওরা ফুরা য়াংসুউগো চংরো থাঃ ছুরো ঙা আনা পিইলিরি।” 22য়াংখা আগ্রিপ্পা ফিষ্টগো প্রলিরি, “ঙা কুঃদৈং দিঃ লুঃউ চাঃগাগো নাথং খ্যাংরি।”
ফিষ্ট প্রলিরি, “নাকফ্রেং নাথংরামি।”
আগ্রিপ্পে হ্রিইগা পৌল
23মুলাং রাকমা আগ্রিপ্প মাংনা বর্ণীকি চৈবু আগ্রি অর ম্রুমা আগ্রি আগ্রি লুঃউরোগু য়ুউরো, কংগং আপ্যনা তাঃরা চৈচা ঈংদুঃ ওয়ংগেলিরি। ফিষ্ট আনা পিরো পৌলগো য়াংদুঃ য়ুউ লাঃলিইরি। 24য়াংখা ফিষ্ট প্রলিরি, “মাং আগ্রিপ্প অর দিঃমা যাসুরো অরক হিরি, কুবাংরো দিঃ লুঃউগো ম্রাংগেতি। হিচা আলুং যিহূদীরো যিরুশালেংনা কৈসরিয়ারো ঙাবামা তাঃরা তাংগেরি অর অঃরো প্রগেতিচাগা, দিঃ লুঃউচা অর হ্রাং নিংফু মাতেংব্যা। 25ছুগি ঙা ম্রাংলিরিচাগ, সেঃবলৈফু ডেং পিফুঞ্যং, দিঃ লুঃউচা তুখুউলি আপ্রই মুলুকলিই। য়জংছুগি য়াংসুউ যাখা কুঃদৈং সিঃতিবামা তাঃরা তাংরি য়াংখা ঙা য়াংসুউগো সিঃথিদুঃ রুওয়েফু কিজু ম্হেলিরি, 26য়জংছুগি মহা সিঃথিদুঃ রুঈফুঞ্যং আম্হেং তুখুউলি মাঃরালি। য়াংচা কিজু ঙা কুবাংরো আলুং হ্রিইথাকমা, প্রফুঞ্যংছুগি মাং আগ্রিপ্প কুঃবাং হ্রিইগা য়াংসুউগো য়ুখারি, কুঃবাং মিংরোমিগিলি তুখুমাসা রুঈনৈঅং; 27ঙা তুওয়কচাগা, আখ্যুয়েং ক্যাসা তয়ক্কু, তেরেতু রুওয়েফু হ্রিইগা, য়াংসুউ আপ্রইকুলি আসিক পিইরাফু তেংরি।”
Currently Selected:
প্রেরিত 25: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
