প্রেরিত 24
24
পৌলগো তাঃরা চঃখ্রাং
1ঙা রাক নক মহা ফুংগ্রি অননিয়চা লৈগায়ক যিহূদী গংখ্যুক ওয়াগ্রিনা তর্তুল্ল নাঃমিনা তাঃরামা ব্রাক ঙাংরো প্রসা তয়ক্কু য়ুউরো কৈসরিয়াদুঃ লাঃগেলিরি অর পৌলগু ছেংগ্যাংফাক লুঃউরো ওকখ্যুকসু আগ্রিমা তাঃরা তাংগেলিরি। 2-3পৌলগো খঃ য়ুউব্রিনক তর্তুল্লচা পৌলমা আপ্রইকু তাং প্রারো প্রলিরি, “অ আস্যাং ফীলিস্ক, কুঃবাং লাকতুওয়ংমা ঙারো আয়াংকাবাং কংগং আখেংসানা নিংলাঃগেতি। কুঃবাং কুবাংমা পঞ্ঞানা, দিঃ জে ম্যুগো কংগং আখেংসা লুঃউবরৈব্যা। য়াংচা কিজু ঙারো খ্যাংখাফ্র, খ্যাংরামামুছু, কুবাংগো ঙারো চিঃঞ্যংনা কিজু তাংগেতি। 4ছুগি কুঃবাং আখিংচা অর মাপ্যাক রাঃঅং, য়াংচা কিজু ঙা আতংবেং থাঃচাগা, কুঃবাং রুয়িমেরু ঙারো চাঃগাগো নাথংবা। ঙারো আতু প্যাংরো আলুং চাঃগাগো প্রঃ প্রাফু।”
5“ঙারো ম্রাংলিরি, দিঃ লুঃউচা তয়ক আপ্যাক, খ্যাংখামুছু য়াংসুউ ক্যক্যরুচ্ছা প্যাংরি। কাবামা হিচা যিহূদীরোগু ক্যক্যরুচ্ছা প্যাংবলৈতি। য়াংসুউচা নাসরতীয় নাঃমিনা তুখু ছেংগ্যাংফাক ভাষা আফুয়িমা গংখ্যুক। 6-7ওয়িপাসানা ক্যংগুলি মেসেং স্যাংস প্যাংফু ক্রেংরি কিজু, ঙারো য়াংসুউগো তিঃগেলিরি। 8ঙারো য়াংসুউগো যা আপ্রই তাংগেতিলি, কুঃবাং কুঃদৈং য়াংসুউগো মিংলো ক্রিগি লুকচাগো সিরামি।”
9দিঃ চাঃগা আলুংচা ম্হেংরিছুরো, অর যিহুদীরোলি লাক খেংগেরি।
10য়াংখা ওকখ্যুক আগ্রিচা, পৌলগো প্রঃ ছুরিখা, পৌলচা প্রলিরি, “ঙা সিরি, কুঃবাং লৈগনঅ ফ্রঈব্যা দিঃ যিহূদী জে ম্যুরোগু তাঃরা চৈ লাঃরি; য়াংচা কিজু ঙা কংগং প্যরো, ঙা কুঃ ব্রাক্কা চাঃগা প্রঃমি। 11গিনি তিছি নৈরাক আম্যা মফ্রঈসি, ঙা ওয়িপাসানা প্যাংফু কিজু যিরুশালেংদুঃ লাঃলিচা। কুঃবাং চঃরো ক্রিগি, সিনৈমি। 12ঙাগো যাসুরো আপ্রই তাংগেতি, য়াংসুউরো ঙাগো ওয়িপাসানা ক্যংমা তয়কনালি চাঃগা আঙ্রাংজা ফ্রঈরো মাম্রাংগেলি অর প্রফুছুগি রিঃফুং জাংমা মুহুকি ম্রুমা দিঃ তেরেমা লুঃউরোগু চাঃগা আথু ঙাং প্যাংরো মাম্রাংগেলি। 13ঙাগো ছেগ্যাংফাক লুঃউরো, য়াংসুউরো আগু যা আপ্রই তাংগেতিলি, য়াংচাগো কুবাংবামা য়াংসুউরো ম্যাকন্হা ব্রাং মাপ্রানৈমু।” 14খ্যাংচামুছু হিবেচি, দিঃ চাঃগাচা ঙা কুবাংবামা লাক খেংচাগা, যীশু খ্রীট্ লেং, যাসুগো য়াংসুউরো ভাষা ছেংগ্যাংফাক লেং প্রগেতি, ঙা য়াং লেংমারা ঙামা আচৈংরো থাওরা ফুরাগো ওয়িপাসানা প্যাংরি। মোশি থুংজৈংনা যামুছু তুউরি, য়াংচাগো অর রিসিইরো রুয়িচাগো ঙা ক্যুংরি। 15য়াংসুউরো যা পুয়েং ম্হেতিলি, ঙালি য়াং পুয়েং থাওরা ফুরা আঃপমা ম্হেচাগা, আকংনা মকং আলুংসুউগু প্রেংরো আহ্রাং প্যাংফু। 16য়জংকিজু ঙা থাওরা ফুরানা লুঃউরোবামা খ্যাংখামুছু ঙা চিইঞুয়েংগো সেসেং থাঃফু ক্রেংরি।
17“লৈগনঅ ক্রারো ঙা যিরুশালেংদুঃ লাঃলিইরি, আক্রংগা ঙা ঙাক জেম্যু ছাংরিসা লুঃউরোগু তেকে তেংগা পয়সা পিনৈঅং অর সুদুঃওয়া ল্হুনৈঅং। 18কুঃগো সেংস্যাংস প্যাংব্রি নক, যাখা ঙা য়াং অলু লুকতিলি, খ্যাং খ্যাং য়াংসুউরো ঙাগো ওয়িপাসানা ক্যংমা ম্রাংগেলিরি। ঙাবামা লুঃউরোলি মুচুক্কেলি অর ঙাগো য়ুউরোলি ক্যক্যরুচ্ছা মফ্রলি। 19য়জংছুগি য়াংদেমা তুদিয়া কাবাগ্রিগা লৈগায়ক যিহূদীরোলি হিকলিরি। কুবাংবাদুঃ য়াং যিহূদীরোরা লাঃফু সাংলিরি। অর ঙাগো তুখুমাসা আপ্রই তাংফু হিগি, য়াংসুউরোরা আপ্রই তাংরাফু সাংরি। 20প্রলনৈঅংছুগি দিঃমা যাসুরো অরক হিরি য়াংসুউরো প্রগে, ঙা যাখা আতৈংবাংগ্রি রেঃলিরি, য়াংখা য়াংসুউরো ঙামা যা আপ্রই রাঃগেলিরিলি। 21য়াংসুউরো সাসাক তুখু ঙাগো আপ্রই তাংনৈরিচাগা, ঙা য়াংসুউরো হ্রিঃগা রেঃরো চাঃগা আগ্রিনা প্রলিরি, ‘আঃসিরো প্রেং হ্রাং থাঃফু আক্রংলিলাগো য়ুউরো গানি কুবাংরো হ্রিথাকমা ঙাগো তাঃরা চৈতি।’”
22যীশু লেং আক্রংলিলাগো য়ুউরো ফিলিস্ক কংগং আহ্লা সিঃলিরি। য়াংসুউ তাঃরা চৈচাগো তেং থাঃরো প্রলিরি, “চৈবু আগ্রি লুসিয় লাঃব্রিমারা ঙা নাংরো তাঃরাগো ছুংফু।” 23য়াংসুউ পৌলগো চং থাঃফু কিজু চৈবুস্যিগো আঃনা পিইলিরি। য়িগিলি য়াংসুউগো তাঃনা তিনি রুওয়ে থাঃফু প্রলিরি। য়াংসুউ খুওয়ং পিইলিরিচাগা, পৌল মিছুয়িরো লাঃরো অলুঃউতিহি পৌলগো লুক্কিকরা প্যাংনৈঅং।
24লৈগারাক নক ফিলিস্ক য়াংসুউ যিহূদী মিঃয়া দ্রুষিল্লাগো আতু য়ুউরো লাঃলিইরি। য়াংসুউ পৌলগো খঃ য়ুউরো, য়াংসুউবামা খ্রিট যীশু আঃপমা আক্যুং চাঃগাগো নাথংলিরি। 25পৌল যাখা আকং চিঃনা নিংফু, কুঃদৈং চিই্কু সেএ থাঃফু অর হ্রিইদুঃ ফ্রফু আক্রংলিলাগো য়ুউরো প্রলিরি, য়াংখা ফিলিস্ক ক্রকরো প্রলিরি, “নাং আগু লাঃলি, আখিং কাঃলা ক্রিরো ঙা নাক্কু খঃফু রুওয়েলৈমি।” 26য়াংসুউ তুওয়কলিরি, পৌল য়াংসুউগো ঘুষ পিফু। য়াংচা কিজু প্রেং প্রেং পৌলগো খঃরো, য়াংসুউ পৌল চাঃগা প্রলিরি।
27নৈঃনঅ লাঃব্রিনক ফিলিস্ক আঃরামা পর্কীয় ফিস্ক থৈংলিরি। ফিলিস্ক যিহূদীরোগু চিঃ ফ্যফু কিজু পৌলগো থংমা খ্যা বৈখারি।
Currently Selected:
প্রেরিত 24: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
