প্রেরিত 23
23
1পৌলচা চঃচ মহা অাতৈংবাংগ্রি লুঃউরোগো ক্রিরো প্রলিরি, “ঙামা ঞিংরো, ঙা গিনি তৈংঅং সেংস্যাংস চিইঞ্যংনা থাওরা ফুরাগো ঙা রুসিইতারা থাঃলেতি।” 2দিঃ চাঃগা ক্রারো মহা ফুংগ্রি অননিয়চা পৌলবামা যাসুরো রেঃরো হিকলিরি, য়াংসুউরোগা পৌল পাঃমা সেফু কিজু আনা পিইলিরি। 3য়াংখা পৌল অননিয়গো প্রলিরি, “ক্রং সুঃদ, থাওরা ফুরা কুবাংগো সেঃমি। থুংজৈং অল ঙাগো তাঃরা চৈঃফু কিজু কুঃবাং য়াংদেমা থৈংরি। য়িগিলি ঙাগো সেঃফু আনা পিরো, কুবাংচা কুঃদৈং থুংজৈংগো মাঃথালি।”
4যাসুরো পৌলবামা রেঃ হিকলিরি, য়াংসুউরো পৌলগো প্রগেলিরি, “নাং থাওরা ফুরামা মহা ফুংগ্রিগো ম্যাকন্হা মাঃথা!”
5য়াংখা পৌল প্রলিরি, “ঞিংরো, ঙাগা মিসিলি, য়াংসুউ মহা ফুংগ্রি। ঙা সিঃলিগি, দিঃ চাঃগাগো মপ্রলিমুঃ। আক্রংগা সেংস্যাংস কেইং চাউমা রুয়িরো হিরি, ‘নাং জে ম্যুমা গংখ্যুকরোগু ম্যাকন্হা মাফ্যাক্কি।’”
6য়াং মহা আতৈংবাংগ্রিমা সদ্দূকি তাসাঙ হিকলিরি, অর ফরিশি তাসাঙ হিকলিরি। দিঃচাগো সিঃরো পৌলচা য়াং আতৈংবাংগ্রিমা অঃরো প্রলিরি, “ঙামা ঞিংরো, ঙা তয়ক ফরিশীমা ফরিশী সাঃ। ঙা তাঃরা ফ্রত্তি আক্রংগা ঙা ক্যুংরিচাগা, আঃসিরো প্রেংরো আহ্রাং ফ্ররো থাঃফু।” 7য়াংসুউ দিঃ চাঃগামা ফরিশীরোনা সদ্দূকীরো আতুওয়ংমা চাঃগা অঙ্রুংজা ফ্রক্কেলিরি। য়জংছুগি য়াং আতৈংবাংমা লুঃউচা নৈফু কুয়ি লাঃখারি। 8আক্রংগা সদ্দূকীরো প্রগেলিরি, “আঃসিরো অর প্রেংরো আহ্রাং ফ্রঈরো মাঃথাব্যা।” দিঃচাগো আপি য়াংসুউরো অরলি প্রগেলিরি, থাওরা ফুরা তেমেংদলি মিহি, ওয়িঞেংলি মিহি; ফরিশিরোচা দিঃচাগো ক্যুংগেতি।
9য়াংখা কংগং ক্যক্যরুচ্ছা ফ্রক্কেলিরি। অর ফরিশি আফুয়িমা লৈগায়ক কেইং ছারা থাঃরো কংগং চাঃগা ফীঃরো আঙ্রাংজা প্যাংগেলিরি। য়াংসুউরো প্রগেলিরি, “ঙারো দিঃ লুঃউমা তুখুউলি আপ্রই মাম্রাং। প্রফুছুগি তয়ক ওয়িঞেং মুহুক্কি থাওরা ফুরা ঈঃ তেমেংদ য়াংসুউনা চাঃগা প্ররি।”
10য়াং চাঃগা আঙ্রাংজাচা কংগং তাঃ রুয়েং লাঃখারিব্যা, য়াংখা চৈবুচা ক্রক লাঃখারি, আক্রংগা য়াংসুউরো পৌলগো তুওয়াবলৈফুলঃ। চৈবুচা সুরুয়িরোগু আনা পিইলিরিচাগা, য়াংসুউরো লাঃরো লুঃউরো আলাক্কা পৌলগো য়ুউরো সুরুয়ি নিংচা ঈংদুঃ য়ুউ লাঃলি।
11নক্কা রাক ঞিঃমা আস্যাং পৌলবামা রেঃরো প্রলিরি, “কাইংথামা রিঃগো থাঃআ, যা পুয়েং যিরুশালেংমা নাং ঙাঃ আক্রলিলাগো য়ুউরো সাকসি পিরিলি, য়াং পুয়েং রোমমালি নাক্কু সাকসি পিরাফু।”
পৌলগো সেঃবৈফু চাঃগা আথু আঙাং ফ্রঈচা
12নক মুলাং রাকমা যিহূদীরোচা তুখু চাঃগা আথু আঙাং প্যাংগেলিরি অর পৌলগো মেঃসেনৈ থাওরা ফুরা য়াংসুউরো তুখুউলি মাঃচাব্যাছুরো কিং কৈংগেলিরি। 13আয়ক লিছিথাক আম্যা লুঃউ দিঃ চাঃগাগো আথু আঙাং প্যাংগেলিরি। 14য়াংসুউরো আগ্রি ফুংগ্রিরোনা যিহূদী ওয়াগ্রি গংখ্যুকরোদুঃ লাঃরো প্রগেলিরি, “পৌলগো মেঃসে থাওরা ফুরা ঙারো তুখুউলি মাঃচাব্যাছুরো কিং কৈংগেরি। 15আগু কুবাংরো অর আতৈংবাংগ্রিমা লুঃউরো দিঃ আক্রংগো য়ুউরো অর আহ্লাপা প্যাংরো চৈঃচারো ক্রিফু আলিং প্ররো, পৌলগো কুবাংরো হ্রিইদুঃ য়ুউখাফু কিজু চৈবুদুঃ সাদাং রুওয়েলৈ। য়াংসুউ দিঃমা রকফু হ্রিইগা, ঙারো য়াংসুউগো সেঃবলৈফু কিজু ঙারো য়াংরো নিংফু।”
16য়জংছুগি পৌল ঞিংমা সাঃচা দিঃ আথু আঙাং চাঃগাগো ক্রারো, সুরুয়ি নিংচা ঈংদুঃ লাঃলিইরি অর পৌলগো সাদাং পিইলিরি। 17য়াংখা পৌর তয়ক চৈবুস্যিগো খঃরো প্রলিরি, “দিঃ আপ্যুস্যিগো চৈবুদুঃ য়ুউ লাঃলি। য়াংসুউবামা দিঃ লুঃউচা তুখু চাঃগা প্রফু হিকরি।”
18য়াংখা থুউ চৈবুস্যিচা য়াং আপ্যুস্যিগু য়ুউরো চৈবুবাদুঃ য়ুউ লাঃরো প্রলিরি, “আখ্যুয়েং ক্যাসা পৌল ঙাগো খঃরো দিঃ আপ্যুস্যিগো কুবাংবাদুঃ য়ুউ লাঃফু প্রলিরি, আক্রংগা কুবাংবামা দিঃ লুঃউচা তুখু প্রফু হিকরিছুরি।”
19য়াংখা চৈবু আগ্রিচা য়াং আপ্যুস্যিগো আলাক্কু কৈংরো তেরেতু য়ুউ লাঃরো প্রলিরি, “নাং ঙাগো যা প্রখ্যাংলি?”
20য়াং আপ্যুস্যিচা প্রলিরি, “যিহূদীরো ম্হেকেচাগা, পৌল আক্রলিলাগো অরলি আহ্লাপা প্যাংরো সাদাং য়ুফু লিংরো, য়াংসুউগো নাকফ্রেং আতৈংবাংগ্রি হ্রিদুঃ য়ুউ লাঃফু কিজু কুবাংগো আতংবেং থাঃফু। 21কুঃবাং য়াংসুউরো চাঃগাগো লাক মেখেংগি, আক্রংগা আয়ক লিছিঃ থাকপাং আম্যা লুঃউ খুঃরো পৌল কিজু চং হিফু। পৌলগো মেঃসে থাওরা ফুরা, য়াং লুঃউরোচা তুখুউলি মাঃচা ছুরো কিং কৈংগেরি। য়াংসুউরো আগু য়াংরো চং হিরি, কুবাংগা চাঃগা রাঃফুচাগো ম্হেরো।”
22চৈবু আগ্রিচা য়াং আপ্যুস্যিগো রুওয়েফু হ্রিইগা, দিঃ আনা পিইলিরি, “দিঃ চাঃগাচা নাং ঙাগো প্ররিলু, তয়ক্কুলি মঃপ্রগি।”
পৌলগো কৈসরিয়াদুঃ রুওয়েলৈতি
23নক্কা চৈবু আগ্রিচা, য়াংসুউমা নৈয়ক চৈবুস্যিগো খঃরো প্রলিরি, “আয়ক নৈরা জং সুরুয়ি, আয়ক খঃনৈছি ম্রাং সুরুয়ি অর আয়ক নৈরা হ্লি সুরুয়িরোগু গানি ঞিঃ কুঃখ্যাক আখিংমা কৈসরিয়াদুঃ লাঃফু কিজু য়াংলু থাঃ। 24অর পৌল কিজুলি ম্রাং য়াংলু থাঃ, য়াংসুউচা ফিঈ মাক্যাব্রি ওকখ্যুকসো আগ্রি ফীলিক্সবাদুঃ য়ুউ লাঃনৈঅং।”
25চৈবু আগ্রিচা দিঃ চাঃআ রুয়িলিরি:
26“ঙা ক্লোদিয় লুঃউসিয়, ওকখ্যুক আগ্রি ফিলিস্কবাদুঃ দিঃ চাঃআ রুয়িরি, ঙা ক্রোছুগো লাক খেংবা।
27“যিহূদী লুঃউরো দিঃ লুঃউগো তিঃরো, সেঃ বলৈকেতিব্যা, য়জংছুগি ঙা ঙামা সুরুয়িরোগু য়ুউরো, য়াংসুউগো থকমারো য়ুউ লাঃলিইরি। আক্রংগা ঙা সিলিরি য়াংসুউ তয়ক রোমীয়। 28নক্কা ঙা সিফু ক্রিলিরিচাগা, যাফু লুঃউরো য়াংসুউগো আপ্রই খ্যাগেতিলি। য়াংচা কিজু ঙা য়াংসুউগো আতৈংবাংগ্রি হ্রিইদুঃ য়ুউ লাঃখারি। 29ঙা সিলিরিচাগা, য়াংসুউরোমা বাসা থুংজৈং আক্রংলিলাগো য়ুউরো, য়াংসুউরো য়াংসুউগো আপ্রই খ্যাগেতি। ছুগি সেঃফুঞ্যং অর থংমা থিঃফুঞ্যং আপ্রইকা দিঃ লুঃউমা মিহিক। 30যাখা ঙা সিলিরি, লুঃউরোচা দিঃ লুঃউগো ছেংগ্যাংফাক লুক্কেতি, খ্যাং খ্যাং ঙা দিঃ লুঃউগো কুবাংদুঃ রুওয়েলৈতি। যাসুরো য়াংসুউগো আপ্রই খ্যাগেতি, য়াংসুউরো কুঃদৈং য়াং লুঃউ আপ্রইকু কুবাংগো প্রনৈঅং।”
31য়াংখা সুরুয়িরোচা চৈবু আগ্রি আনাতৈং পৌলগো ঞিস্যুয়েখংমা য়াংসুউরোনা আতু য়ুউরো আন্তিপাত্রি ম্রু রকঅং য়ুউ লাঃখাগেতি। 32মুলাং রাকমা য়াংসুউরো ম্রাংমা সুরুয়িরোনা আতু পৌলগো রুওয়েরো, য়াংসুউরো ঈংদুঃ প্রেং লাঃখাগেতি। 33ম্রাংমা সুরুয়িরোচা কৈসরিয়ামা রকরো চাঃআনা পৌলগো ওকখ্যুকসু আগ্রি আলাকমা পিগেলিরি। 34ওকখ্যুক আগ্রিচা চাঃআগো ফেঃরো পৌল যা আঃরাগালি মিংলিরি। পৌলচা কিলিকিয়া প্রিনিগা লুঃউ য়াংচাগো সিরো, য়াংসুউ প্রলিরি, 35“নাংকু যাসুরো আপ্রই খ্যারি, য়াংসুউরো দিঃমা রকপ্রিমা ঙা নাং চাঃগাগো নাথংফু।” নক্কা য়াংসুউ হেরোদ মাং ঈং থংমা পৌলগো চংথাফু কিজু প্রলিরি।
Currently Selected:
প্রেরিত 23: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
