প্রেরিত 22
22
1“ঞিংরোনা ফাখাংরো, ঙা আগু ঙা চাঃগাগো প্রফু, নাথংগে।”
2লুঃউরোচা য়াংসুউগো ঈব্রিয় আঃমু প্রচাগো ক্রারো, তিদিংচুছুয়ি ফ্রক্কেলিরি।
য়াংখা পৌল প্রলিরি, 3“ঙা তয়ক যিহূদী। কিলিকিয়া তার্ষ ম্রুমা ঙা ম্যুংরি। য়িগিলি ঙা দিঃ ম্রুমা আগ্রি ফ্রঈরি। গমলিয়ে আখ্রি আরাংমা থৈরো, ঙা ঙারো আচৈংরোমা থুংজৈংগো সিসিম্যুঈ প্যাংরো সুয়েংসাং য়ুলিরি। থাওরা ফুরাগো গানি কুবাংরো যা পুয়েং চিদানা প্রাগেতিলি, ঙা কুঃদৈং য়াং পুয়েং চিদানা স্যাং হিকলিরি।” 4যীশুগো যাসুরো রুসিগেতি, য়াংসুউরোগু ঙা আঞ্যচি প্যাংরো লৈগায়ক্কু সেঃ বৈলিরি অর য়ক্ক্যানা মিঃমারোগু তিঃরো থংমা থিলিরি। 5দিঃ চাঃগাচা আম্হেং, য়াংচা কিজু সাকসি হিরি, মহা ফুংগ্রিনা মহা আতৈংবাংগ্রিমা আলুংসুুউ। প্রফুছুগি, ঙা য়াংসুউরোগা দামেস্ক ম্রুগা কেইং গংখ্যুকরোগু পিফু কিজু চাঃআ য়ুলিরি অর থুউজৈংজে লুঃউরোগু খ্যুয়েংরো যিরুশালেংমা য়ুউরো ডেং পিইফু কিজু য়াংদুঃ লাঃলিইরি। 6“য়াংখা ম্যুয়েংদি আখিং ফ্রঈব্যা। ঙা দামেস্কবামা রকব্রিনক ব্রুংখনৈং প্যাংরো থাওরা ফুরাফুংগা লিফাকলাকচি তুখু আড়ং ক্যালিরি। 7ঙা কেইংফামা লি লাঃখারি অর ক্রালিরি যাসুমিসি ঙা প্রলিরি, ‘শৌল, শৌল, নাং যাফু, ঙাগো আঞ্যচি প্যাংরিলি?’” 8ঙা মিংলিরি, ‘আস্যাং, কুঃবাং যাসুলি?’
য়াংসুউ প্রলিরি, ‘ঙা নাসরতগা যীশু, যাসুগো নাং আঞ্যচি প্যাংরিলি।’ 9যাসুরো ঙা নকলৈ হিকলিরি, য়াংসুউরো থুউ আড়ংগো ম্রাংগেলিরি, ছুগি যাসু ঙানা চাঃগা প্রলিরিলি য়াংসুউ চাঃগাগো য়াংসুউরো নাঃমিলিগেলি। 10য়াংখা ঙা প্রলিরি, ‘আস্যাং, ঙা যা প্যাংফুলি?’
আস্যাং প্রলিরি, ‘থাঃ, দামেস্কদুঃ লাঃলি। নাং কিজু যা ম্হেরো হিকলিরি, য়াংচা য়াংদেমারা নাংকু প্রফুব্যা।’ 11ঙা নকলৈকসুরো ঙা আলাক্কু কৈরো ঙাগো দামেস্ক ম্রুদুঃ য়ুউ লাখাগেতি। আক্রংগা থুউ আড়ংমা ঙামা ম্যাকচি কেইং লাখারি। 12“নক্কা অননিয় নাঃমিনা লুঃউ তয়ক ঙাদুঃ লাঃলিইরি। য়াংসুউ মোশি থুংজৈংগো রুসিইতারানা রুসিইরি। অর য়াংদেমা হিচা যিহূদীরো য়াংসুউগো কংগং ম্যাকন্হা পিগেতি। 13য়াংসুউ ঙাবামা লাঃরো রেঃরো প্রলিরি, ‘ঞিং শৌল, নাকমা ক্রিফু আঃচা প্রেং লাঃলে।’” অর খ্যাং খ্যাং ঙা য়াংসুউগো ম্রাংলিরি। 14“য়াংখা অননিয়চা প্রলিরি, ‘ঙারো আচৈঙমা থাওরা ফুরা নাংকু রুয়িকক য়ুব্যা, যাস্যালিছুগি নাং য়াংসুউ চিঃছেংদাগো সিঃঅং, অর য়াং তাঃরাজ লুঃউগো প্রফুছুগি যীশু খ্রীট্গো ম্রাংঅং অর য়াংসুউ চাঃগাগো ক্রাঅং। 15নাং য়াংসুউমা সাকসি ফ্রমি, অর যা ম্রাংলিরি, ক্রালিরি আলুংচা লুঃউরোবামা প্রঃমি। 16নাং আগু যাফু আক্রা প্যাংরিলি? থাঃরো রিঃখ্যুও মাঙ্গালাগো লাকখেং অর আপ্রইকা ক্যুওয়েম্রকফু কিজু যীশুগো খঃরো নাকমা হিকচা আলুং আপ্রইকু ছিঃবলৈ।’”
17“নক্কা ঙা যিরুশালেংদুঃ প্রেং লাঃরো, তারাক ওয়িপাসানা ক্যংমা ছুঃউক তংলিরি, য়াংখা ঙা ওয়িমঃ পাচাঞ্যং ফ্রলিরি। 18য়াং পুয়েং হিরিখা ঙা ম্রাংলিরি আস্যাং ঙানা চাঃগা প্ররি। য়াংসুউ ঙাগো প্রলিরি, ‘আয়াং প্যাং, আগু যিরুশালেংগা লাঃলি। আক্রংগা ঙা আক্রলিলাগো য়ুউরো নাং সাকসিগো লুঃউরো লাক মাখেং মুহুক।’” 19“ঙা প্রলিরি, ‘আস্যাং, দিঃ লুঃউরো সিকরি, যাসুরো কুবাংগো ক্যুংগেতি, য়াংসুউরোগু বুকসেঃরো ঙা থংমা থিঃফু কিজু ঙা তুখু রিঃফুং জাংগা অর তুখু রিঃফুং জাং লাঃলিইরি। 20যাখা কুঃবাং সাকসি স্তিফানগো সেঃ বৈলিরি, য়াংখা ঙা য়াংমা রেঃরো আঃ পিইলিরি অর যাসুরো য়াংসুউগো সেঃকেতি, য়াংসুউরো আওয়েচাগো চং নিংলিরি।’” 21“য়াংখা আস্যাং প্রলিরি, ‘নাং লাঃলি, ঙা নাংকু আওয়ি যিহূদীমুহুরোদুঃঃ রুওয়েফু।’”
22লুঃউরোচা আগুতয়ং পৌল চাঃগাগো নাথংগেতিসি, য়জংছুগি যাখা য়াংসুউ যিহূদীমুহু লুঃউরো চাঃগারোগু প্রলিরি, য়াংখা লুঃউরো আনা অঃরো প্রগেলিরি, “দিঃ লুঃউগো কাবাগা ফ্যকবলৈ, য়াংসুউগো আহ্রাং থাঃফু মাতেংব্যা।” 23লুঃউরো যাখা অঃগেতিলি অর আওয়েচাগো আখাদুঃঃ রুওঅংরো অমু তথংনা প্যাংগেলিরি, 24য়াংখা চৈবু আগ্রিচা পৌলগো সুরুয়িরো নিংচা ঈংদুঃঃ য়ুউ লাঃফু আঃনা পিইলিরি। লুঃউরো যাফু পৌলগো ছেগ্যাংফাক লুঃউরো দিঃ পুয়েং অগেতিলি, য়াংচাগো সিফু কিজু চৈবুচা ক্রুদুঃকনা সেরো মিংফু কিজু আঃনা পিইলিরি। 25যাখা পৌলগো ক্রুদুঃকনা সেফু কিজু খ্যুয়েংলিরি, য়াংখা যা চৈবুস্যিচা রে হিকলিরি পৌল য়াংসুউগো প্রলিরি, “যাসুগো আপ্রইসিছুরো আগুতয়ং মেম্হেসি, য়জং তয়ক রোমীয়গো ক্রুদুঃকনা সেফুচা, কুবাংরোমা থুঃউংজৈং অল ক্যালঃ?”
26দিঃ চাঃগাগো ক্রারো য়াং চৈবুস্যিচা চৈবু আগ্রিদুঃ সাদাং পোরো প্রলিরি, “কুঃবাং যা লুকখেংলি? দিঃ লুঃউচাগা রোমীয়।”
27য়াংখা চৈবু আগ্রিচা পৌলদুঃ লাঃরো মিংলিরি, “ঙাগো প্রলা ক্রিমি, নাং রোমীয় লঃ?”
পৌল প্রলিরি, “অঈ।”
28চৈবু আগ্রিচা প্রলিরি, “কংগং আম্যা তেংগা পয়সা কুংরো ঙা রোমীয় ফ্রঈফু তাওয়েংগো ঙা ওয়িলিরি।”
পৌল প্রলিরি, “ঙাগা রোমীয় ফ্ররো ম্যুঈচা।”
29দিঃ চাঃগা ক্রারো, য়াংসুউগো যাসুরো চাঃগা মিংখেংগেলিরি, খ্যাং খ্যাং য়াংসুউরো লাঃখাগেতিব্যা। যাখা চৈবুচা সিলিরি, য়াংসুউ তয়ক রোমীয়গো খ্যুয়েংলিরি, য়াংখা য়াংসুউ ক্রকলিরি।
মহা আতৈংবাংগ্রিই হ্রিইগা পৌল
30যিহূদীরো যাফু পৌলগো আপ্রই তাংগেতিলি, য়াংচা আম্হেংগো সিফু কিজু মুলাং রাকমা চৈবু আগ্রিচা পৌলমা খ্যুয়েংরো হিচাগো ফ্রিঃপিইলিরি অর মহাআতৈংবাংগ্রি লুঃউরোনা তিলিংদৈংমা আচু ক্যাফুকিজু আনা পিইলিরি। য়াংনক য়াংসুউ পৌলগো য়ুউ লাঃরো য়াংসুউরো হ্রিইগা রেঃচিলিরি।
Currently Selected:
প্রেরিত 22: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
