প্রেরিত 21
21
যিরুশালেংদুঃঃ লাঃখ্রাং
1ঙারো ঈফিষ ক্যংসা গংখ্যুকরোগা লাঃফু ক্রুছুরো সাংফমা তাকরো চঃচঅ কো রিই তংদুঃ লাঃগেলিরি। মুলাং রাকমা ঙারো রোদঃ রিই তংমা রক্কেলিরি। য়াংনক য়াংচাগা পাতারা ম্রুদুঃ লাঃগেলিরি। য়াংদেমা ঙারো ফৈনিকিয়াদুঃ লাঃফু সাংফ তাজাং রাঃগেলিরি। 2য়াংখা ঙারো থুউ সাংফমা তাকরো লাঃগেলিরি। 3নক্কা রিই তংগো ম্রাংরো, য়াং ম্রকফাক্কা হ্লি পেরো ঙারো সিরিয়া প্রিমা সোর ম্রুমা লাঃরো সাংফগা ছাংগেলিরি। য়াংদে ঙারোমা পাচা ওয়েছেংগো ক্যাফু চাঃগা হিকলিরি। 4য়াংদেমা তিবিরোগু রাঃআরারো ঙারো য়াংসুউরোনা আতু য়াংদে খঃনরাক নিংগেলিরি। য়াং তিবিরোচা সেংস্যাংস ওয়িঞেং আতুওয়ংগা নিংরো য়াংসুউ যিরুশালেংদুঃ মাঃলারাঅং আতংবেং থাঃগেলিরি। 5য়িগিলি নিংফুল্হক নিংরো ঙারো য়াংসুউরোগু ফ্রুকরো, ঙারো যিরুশালেংদুঃ লাঃগেলিরি। হিকচা আলুং তিবিরো, য়াংসুউরোমা মিঃয়ানা সাঃসিমিরোলি ঙারোনা আতু ম্রু প্রাংগা রকঅং লাঃগেলিরি। নক্কা ঙারো ম্র কাইংনাঃমা পছতুক তুকরো ছুউক তংগেলিরি। 6য়াংনক তয়ক্কা তয়ক সাওয়াফু ক্রুছুরো ঙারো সাংফমা তাক্কেরি অর য়াংসুউরো ঈংদুঃ প্রেং লাঃখাগেতি।
7সোরগা লাঃরো ঙারো তলিমায়িমা রক্কেলিরি। য়াংদেমা ক্যুংসা ঞিংরোনা ক্রুছুরো, য়াংসুউরোনা তারাক নিংগেলিরি। 8মুলাং রাকমা ঙারো লাঃরো কৈসরিয়ামা রক্কেলিরি অর য়াংদেমা আকং সাদাং হঃ প্রাসা ফিলিপ ঈংমা নিংগেলিরি। দিঃ লুকচা ফ্রত্তি, যিরুশালেং ক্যংমা থুউ খনয়ক কিসা লংসামা তয়ক হিকলিরি। 9য়াংসুউমা সিমি লিয়ক লাং মারাব্রি হিকলিরি। য়াংসুউরোচা লুঃউরোবামা রিসিঞ্যং থাওরা ফুরা ঈঃ তাঃরাগো হঃ প্রাগেতি।
10ঙারো য়াংদেমা লৈগারাক নিংব্রিনক, যিহূদীয়াগা আগাব নাঃমিনা তয়ক রিসি লেলিরি। 11য়াংসুউ ঙারোবামা লাঃরো পৌলমা খাবেংগু খ্যুয়ে য়ুল্লিরি অর য়াংচানা কুঃ আখ্রি অলাক্কু খ্যুয়েংরো প্রলিরি, “সেংস্যাংস ওয়িঞেংচা প্ররি, ‘যিরুশালেংমা যিহূদীরোচা দিঃ খাবেং ঈংস্যাংগু, দিঃ পুয়েং খ্যুয়েংফু অর যিহুদীমুহু লুঃউরোবামা এঃ পিফু।’”
12দিঃ চাঃগাগো ক্রারো য়াংদেমা লুঃউরো অর ঙারো পৌলগো কংগং চিইঞ্যংনা যিরুশালেংদুঃ মালাগিছুরো আতংবেং থাঃগেলিরি। 13য়াংখা পৌল প্রলিরি, “নাংরা ঙুরো ঙা চিঃমা যাফু দুঃখাওয়া পিগেতিলি? আস্যাং যীশু কিজু যিরুশালেংমা সাসাক অখ্যুয়েং ক্যাফু যালি, সিঃফু মিগিলি ঙা আঃমা খেংনৈরি।”
14য়াংসুউগো প্ররো মনৈরো ঙারো তিতি নিংগেলিরি নক্কা প্রগেলিরি, “আস্যাং চিইতগ্র ফ্রঈপেচি।”
15য়াংনক ঙারো ওয়েংছেংগু য়াংরো যিরুশালেংদুঃ লাঃগেলিরি। 16কৈসরিয়াগা লৈগায়ক তিবি ঙারোনা আতু লাঃগেলিরি অর ম্নাসোন নাঃমিনা সাঈপ্রাস রিই তংমা য়াংসুউ ঈংদুঃ য়ুউ লাঃলিইরি। দিঃ লুঃউ ঈংমা ঙারো নিংফু চাঃগা হিকলিরি। দিঃ লুঃউচা তিবিরোমা পাথামা তিবি হিকলিরি।
যিরুশালেংমা
17যিরুশালেংমা রকপ্রিনক ক্যুংসা ঞিংরোচা প্যগেরো ঙারোগু লাকখেংগেলিরি। 18মুলাং রাকমা পৌলচা ঙারোনা যাকোবগো ক্রিফু লাঃগেলিরি। 19পৌল য়াংসুউরোগু ক্রুছুলিরি অর য়াংসুউ তাঃরা হঃরো থাওরা ফুরাচা যা পুয়েং যিহূদীমুহু লুঃউরোমা অলুক লুকলিইরি, য়াংচারোগু তুখু তুখু প্রপ্রালিরি।
20দিঃ চাঃগাগো ক্রারো, থুউ গংখ্যুকরোচা থাওরা ফুরাগো খিম্যুয়েংগেলিরি অর পৌলগো প্রগেলিরি, “ঞিং, নাংগা ম্রাংরি, মন্হক থং থং যিহূদী যীশু আঃপমা ক্যুংগেতিলি অর য়াংসুউরো আলুংসুউ মোশি থুংজৈংগো সুংফু কিজু কংগং তান্হা ফ্রত্তি। 21য়াংসুউরো সাদাং রাঃগেচাগা, যিহূদী মুহু আতুওয়ংমা, যা যিহূদীরো নিংগেতি, য়াংসুউরোগু নাং মোশি থুংজৈংগো মুসুংগিছুরো সুয়েংসাং পিনিংরি। প্রফুছুগি, নাং য়াংসুউরোমা সাঃসিমিরোগু লিইফ্যা ফ্রেচিঃরি অর যিহূদীরোমা আগু সুংগেচা আক্যাংগো মুসুংজি। আগু ঙারো যা প্যাংফুলি। 22য়াংসুউরো ক্রারো হিফুচাগা, নাং লাঃব্যা। 23আগু ঙারো যা প্ররিলি, নাং য়াংচাগো লুঃউ। ঙারো আতুওয়ংমা য়জৈংজে লিঃয়ক হিরি, যাসুরো তুখু সচ্চা কুঃগেরি। 24য়াং লুঃউরোগু নাং নাক নক্কা য়ুউ লাঃলি। অর য়াংসুউরোনা আতু নাংলি সেংস্যাংস ফ্রঈপেচি। অর য়াংসুউরো ছেংবাং রুঈফু কিজু তেংগা পিলৈ। য়াংখা আলুংসুউ সিইফুচাগা, নাং আক্রংলিলাগো য়াংসুউরো যা সাদাং রাঃগেলি, য়াং সাদাংচা আম্হা অর নাং থুংজৈংগো সুংরি। 25য়জংছুগি যা যিহূদীমুহু লুঃউরো ক্যুংগেরি ঙারো য়াংসুউবাদুঃ ঙারো যা ম্হেকেরিলি, য়াং আক্রংলিলাগো য়ুউরো চাঃআ রুঈ পুলিরিচাগা, লাক থুউক পুংমা তাংচা আঃচাআগো মাঃচাগেকি, রুঈ মসক্কেকি, লৈখ্র ফ্যরো সেতচা সুদুওয়া হাংসাগো মাঃচাগি অর কামিসুগো মুসুংগেকি।”
26য়াংখা পৌলচা থুউ লুঃউরোগু য়ুউ লাঃরো, য়াংসুউরোনা আতু কুঃগোলি সেংস্যাংস প্যাংলিরি। মুলাং রাকমা য়াংসুউ ওয়িপাসানা ক্যংদুঃ লাঃল্লিরি অর য়াংসুউরোমা সেংস্যাংস প্যাংচা যাখা তুংফুলি অর আলুংসুউ কিজু যাখা সুদুঃওয়া ল্হুফুলি, য়াংচারোগু আঃসিঈ পিইলিরি।
পৌল আখ্যুয়েং ক্যালিরি
27সেংস্যাংস প্যাংফু য়াং খঃনরাক তুংফু আখিং লাঃরি নক তুদিয়া কাবাগ্রিমা লৈগায়ক যিহূদীরোচা পৌলগো ওয়িপাসানা ক্যংমা ম্রাংগেলিরি। য়াংসুউরো য়াংদেমা হিচা লুঃউরোগু চুউ থুউলিরি অর পৌলগো তিঃগেলিরি। 28নক্কা য়াংসুউরো অঃরো প্রগেলিরি, “ঈস্রায়েলিয়েরো, লাঃগে। হিচা আলুং লুঃউরোবাামা ঙারো জে ম্যুগো অর ঙারোমা থুংজৈংগু অর ওয়িপাসানা ক্যংগো য়ুউরো যাসু ছেংগ্যাংফাক লুকরো সুয়েংসাং পিরিলি, দিঃচা য়াং লুঃউদি। দিঃচাগো আপি দিঃ লুঃউচা ওয়িপাসানা ক্যংমা গ্রীকরোগু য়ুউ লাঃরো সেংস্যাংস আঃরাগো ফ্যাকবলৈতি।” 29য়াংসুউরো দিঃচাগা প্রগেলিরি, আক্রংগা য়াংসুউরো হ্রিইগা ঈফিসীয়গা ত্রপিমগো পৌলনা আতু ম্রুমা ম্রাংগেলিরি। য়াংচা কিজু য়াংসুউরো তুওয়ক্কেলিরি, পৌল ত্রফিমগোলি ওয়িপাসানা ক্যংদুঃ য়ুউ লাঃল্লিরি।
30য়াংখা ম্রুলুং ক্যক্যরুচ্ছা ফ্রক্কেলিরি। লুঃউরোচা তিলিংদৈংমা লাঃরো পৌলগো ওয়িপাসানা ক্যংগা ঙাং থুঃউক্কেলিরি অর খ্যাং খ্যাং ওয়িপাসানা ক্যং লেংখাওয়াচা পুয়িলাখারি। 31লুঃউরোচা পৌলগো সেঃবৈফু ক্রেংগেলিরি, য়াং আখিংমা রোমীয় সুরুয়িমা আগ্রি চৈবুদুঃ সাদাং হ্লাহারিচাগা, যিরুশালেং ম্রুমা ক্যক্যরুচ্ছা ফৈব্যা। 32য়াং চৈবুচা খ্যাং খ্যাং লৈগায়ক সুুরুয়ি তারামা আগ্রিনা সুরুয়িরোগু য়ুউরো, ব্রি লাঃরো থুউ ক্যক্যরুচ্ছাদুঃ লাঃগেলিরি। লুঃউরোচা চৈবুনা সুরুয়িরোগু ম্রাংরো পৌল বুক্কেচা তেংগেলিরি।
33য়াংখা চৈবুচা পৌলগো লাঃরো খ্যয়েংলিরি অর সেংক্য ক্রু নৈক্রুনা য়াংসুউরো খ্যয়েংফু আনা পিইলিরি। য়াংনক চৈবুচা মিংলিরি, “দিঃ লুঃউচা যাসুলি? দিঃ লুঃউ যা লুকরিলি?” 34য়াংখা লুঃউরো আতুওয়ংগা লৈগায়ক অঃরো তেজে চাঃগা প্রগেলিরি, অর লৈগায়ক আখ্রা তেজে প্রগেলিরি। য়জংছুগি চৈবুচা ক্যক্যরুচ্ছা ফ্রচ্চা আম্হেং আক্রংলিলাগো নামিলিব্রি, পৌলগো সুরুয়ি নিংরা ঈংদুঃ য়ুউ লাঃফু আনা পিইলিরি। 35পৌলচা কঃথ রকঅং রকপ্রিনক, লুঃউরোবাগা রুওয়েফু কিজু, সুরুয়িরোচা য়াংসুউগো রুওক য়ুউ লাখারারি। 36লুঃউরো য়াংসুউ নক্কা নক্কা অরো প্রগেলিরি, “য়াংসুউগো সেঃবলৈ।”
লুঃউরোবামা পৌল প্রখ্রাং
37সুরুয়িরো পৌলগো য়ুউরো সুরুয়িরো নিংচা ঈংদুঃ ওয়ংফু আখিংমা, পৌল আগ্রি চৈবুগো প্রলিরি, “কুবাংগো তুখুমাসা প্রনৈফুলঃ?”
চৈবু আগ্রিচা প্রলিরি, “নাং গ্রীক আমুঙ তেতিনা! 38মিসর ম্রিমা যা লুঃউচা লৈগারাক হ্রিইগা কেইংছেংরো লিথং লুঃউগো সেঃরো কেইংছেংরোগু সিঃলিপ্রাংদুঃ য়ুউ লাখারি, নাং য়িগি য়াং লুঃউ মুহুক লঃ?”
39য়াংখা পৌল আপ্রইি পিইলিরি, “ঙা তয়ক যিহূদী, কিলিকিয়া প্রিনিমা তার্ষ ম্রুগা লুঃউ। ঙা থুউ ম্রু ঈঃ ম্রু লুঃউ মুহু। রুসিই থারো প্ররি, ঙাগো লুঃউরোবামা চাঃগা প্রফু পি।”
40চৈবু আগ্রিগা খুওঅং রাঃরো পৌলচা কঃথ আথাকমা রেঃলিরি অর আলাক ম্রাংরো লুঃউরোগু তিতি নিংফু কিজু লাকঞ্যং প্রালিইরি। লুঃউরো তিতি নিংব্রিনক, পৌলচা ঈব্রিয় আঃমুনা য়াংসুউরোগু প্রলিরি,
Currently Selected:
প্রেরিত 21: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
