প্রেরিত 19
19
পৌলচা ঈফিষ ম্রুমা
1-2আপল্লোচা যাখা করিন্হেমা হিকলিরি, য়াং আখিংমা পৌলচা তুদিয়া কাবাগ্রিগা নিংরো ঈফিষদুঃ লাঃল্লিরি। য়াংদেমা লৈগায়ক তিবিরোগু আতুয়ি রাঃরো য়াংসুউরোগু মিংলিরি, “কুবাংরো যাখা আস্যাং যীশু আঃপমা ক্যুংগেলিরি, য়াংখা কুবাংরো সেংস্যাংস ওয়েঞেংগো রাঃগে লঃ?”
য়াংসুউরো য়াংসুউগো প্রগেলিরি, “সেংস্যাংস ওয়িঞেং হিচাগো ঙারোগা মাক্রাসি।”
3য়াংখা পৌল প্রলিরি, “য়জংছুগি কুবাংরো যা রিই খ্যুও মাঙ্গালা রাঃগেলিরিলি?”
য়াংসুউরো প্রগেলিরি, “যোহন রিঃখ্যুও মাঙ্গালা।”
4পৌল প্রলিরি, “আপ্রইকা চিই্কু প্রেংরো যা রিঃখ্যুও মাঙ্গালা, য়াংচা ফ্রুত্তি যোহনমা রিঃখ্যুও মাঙ্গালা। যোহন লুঃউরোগু প্রলিরি, য়াংসুউ নক যাসু লাঃরিলি য়াংসুউ আঃপমা প্রফুছুগি যীশু আঃপমা ক্যুংগেরাফু।”
5দিঃ চাঃগাগো ক্রারো থুউ তিবিরোচা আস্যাং যীশু নাঃমিনা রিঃখ্যুও মাঙ্গালা য়ুগেলিরি। 6য়াংখা পৌলচা য়াংসুউরো আঃপমা আঃলাক তাংলিরি নক,য়াংসুউরো আঃপমা সেংস্যাংস ওয়িঞেং লাঃল্লিরি, অর য়াংসুউরো আখ্রা আখ্রা অঃমুত প্রগেলিরি অর রিসিঞ্যং থাওরা ফুরা ঈঃ তাঃরাগো হঃ প্রাগেলিরি। 7য়াং তিবিরো আনৈং আম্যা আয়ক তিছিনৈয়ক হিকলিরি।
8য়াং নক পৌলচা রিঃফুং জাংদুঃ লাঃল্লিরি অর সুংলা তৈংঅং কংগং চিঃআঃনা চাঃগা প্রলিরি। থাওরা ফুরা ঈঃ নেংঙেংদ আক্রংলিলাগো য়ুউরো কংগং আম্রি হিজ আঙ্রাং চাঃগানা লুঃউরোগু অক্যুং পিফু কিজু ক্রেংলিরি। 9ছুগি য়াংসুউরো লৈগায়কমা চিইচা কংগং কেইং লাঃখারি আক্রংনা য়াংসুউরো ক্যুংফু মিক্রিগেলি। অর লুঃউরো হ্রিইথাকমা যীশু আক্রংলিলাগো য়ুউরো আঙ্রুংজা প্যাংগেলিরি। য়াংখা পৌলচা য়াংসুউরোগু বৈরো লাঃল্লিরি। পৌলচা তিবিরোগু য়ুউরো তুরান্না নাঃমিনা তয়ক কেইং ছারা সুয়েংসাং পিচা ঈংদুঃ তারাক মক্যুং লাঃরো আম্রি হিজ আঙ্রাং চাঃগানা আছুয়িঞি প্যাংলিরি। 10নৈনঅ তয়ং জং লাঃল্লিরিব্যা। য়িখা যা যিহূদীরোনা গ্রীকরো তুদীয়া কাবা প্রিনিমা নিংগেতি, য়াংসুউরো আলুংসুউ আস্যাং তাঃরাগো ক্রাগেলিরি।
11থাওরা ফুরাচা পৌলগা নিংরো কংগং এংঅফুয়ি এংঅফুয়ি অলুক লুকলিইরি। 12য়াংসুউ সুংচা গাংসানা কাইংথামা আওয়েগু সানাসিরোদুঃ য়ুউ লাঃগি য়াংসুউরো আঃনি মকংচা কেইংমালিরি অর মকং নেঃরোচা থুওয়ক ব্রিগেতি।
13লৈগায়ক যিহূদীরোচা মকং নেঃ কৈসারোগু আকং প্যাংরো পেক্কেতি। য়াংসুউচা আস্যাং যীশু নাঃমিগো সুংরো, মকং নেঃ কৈরো হিকসারোগু আকং প্যাংফু ক্রেংগেলিরি। য়াংসুউরো প্রগেলিরি, “পৌল যাসু আক্রংলিলাগো য়ুউরো তাঃরা হঃরিলি, ঙা য়াংসুউ নাঃমিনা আঃনা পিরি, থুওয়অক লাঃলি।”
14য়াংসুউরা আতুওয়ংমা স্কিবা নাঃমিনা তয়ক যিহূদী, আগ্রি ফুংগ্রিমা খনৈয়ক সাঃরোচা দিঃ পুয়েং প্যাংগেতি। 15তাখা য়াংসুউরো য়াং পুয়েং প্যাংগেতিখা, মকং নেঃচা প্রলিরি, “ঙা যীশুগোলি সিরি, পৌলগোলি সিরি, ছুগি নাংরো যাসুলি?” 16যা লুঃউগো মকং নেঃ কৈলিরিলি, য়াংখা থুউ খনৈয়ক আথাকমা খুং তাকলিরি অর য়াংসুউরো আলুংসুউগু কংগং আনৈংজা প্যাংগেলিরি, য়াংসুউরো আনাগ্রি রাঃরো, আওয়েচা মচৈব্রি ঈংদুঃ ব্রি লাঃখাগেতি।
17দিঃ সাদংচা যাখা ঈফিষমা নিংগেসা যিহূদীনা গ্রীকরো ক্রাগেলিরি, য়াংখা য়াংসুউরো আলুংসুউ ক্রক্কেলিরি অর আস্যাং যীশু নাঃমিনা খিমুয়েংগেলিরি। 18যাসুরো আস্যাং যীশু আঃপমা ক্যুংগেলি, য়জৈংজে লৈগায়ক লুঃউ য়াংখা লাঃরো আব্রিচি প্যাংরো য়াংসুউরো মকং অলুক লুকচাগো লাকখেংগেলিরি। 19যাসুরো ম্যাকচি প্যাক প্রাগেতি, য়াংসুউরো আতুওয়ংমা আম্যা লুঃউ য়াংসুউরোমা চাউরোগু তেরেতৈংমা খ্যারো আলুংসুউ হ্রিথাকমা মিং তবলৈকেতি। য়াং চাউরো আফু খেক্কি, আফু ফ্রত্তিচা ফ্রত্তি সাব্রা থং ঙাছি। 20আস্যাং তাঃরাচা দিঃ পুয়েং প্রি লাঃখারি অর য়াংসুউ গুংদচা লুঃউরোবামা অরলি আম্যা অলুক লুকলিইরি।
21দিঃ প্রাসানারো ফ্রব্রিনক পৌলচা ম্হেলিরি, কুঃচা ম্যাসিডোনিয়ানা আখায়াগা নিংরো যিরুশালেংদুঃ লাঃফু। পৌলচা প্রলিরি, “যিরুশালেং লাঃব্রিনক ঙা, রোম ম্রুদুঃলি লাঃরাফু।” 22নক্কা য়াংসুউ তীমথিয়না ঈরাস্ত দিঃ নৈয়ক অলুক কুউসাগো ম্যাসিডোনিয়াদুঃ রুওয়েলৈতি। অর য়াংসুউ অরলি লৈগারাক তুদীয়া কাবাগ্রি প্রিনিমা নিংলিরি।
ঈফিষমা ক্যক্যরুচ্ছা ফ্রইখ্রাং
23য়াং আখিংমা যীশু আক্রংলিলাগো য়ুউরো কংগং ক্যক্যরুচ্ছা ফ্রল্লিরি। 24দিমিত্রিয় নাঃমিনা রুঈছৈংস্যাং তয়কচা নেঃমা আরতেমিস ক্যংঞ্যং আস্যি আস্যি মুয়ি ক্যং লুকলিইরি। য়জংছুগি লুকসারোচা কংগং আম্রে ফ্রক্কেতি। 25দিমিত্রিয়চা য়াং স্যুয়ি খুওয়েসারোনা আখ্রা জেঃ জেঃ লুকসারোগু তেরেমা খঃরো প্রলিরি, “ঞিংরো, নাংরোগা সিরি, দিঃ কুংনা ঙারো কংগং আম্রে ফ্রক্কেতি। 26য়িগি নাংরো ম্রাংগেতি ক্রাগেতিচাগা, পৌল নাঃমিনা থুউ লুঃউচা, ঙারো দিঃ ঈফিসমা অর প্রফুছুগি হিকচা আলুং তুদিয়া কাবাগ্রি প্রিনিমা আম্যা লুঃউরোগু অক্যুং পিরো, আম্হা লেংদুঃ য়ুউ লাঃখারি। য়াংসুউ প্ররিচাগা, অালাকনা লুকচা নেঃ-নেঃমারো তুখুউলি মুহুক। 27দিঃ চাঃগামা সাসাক ঙারো কুং অংম্রাংচা প্যাক লাঃফু মুহুক, মহা নেঃমা আরতেমিস ক্যংলি আলিং ফ্র লাঃফু। অর তুদিয়া কাবাগ্রি প্রিনিমা হিচা আলুংসুউ, প্রফুছুগি, কাবামা হিচা আলুংসুউ, যা নেঃকু রুসিগেতিলি, য়াংসুউরো কুঃদৈংলি আগ্রিকি মিহিম্হুপ্যা।”
28দিঃ চাঃগাগো ক্রারো থুউ লুঃউরোচা মেংগ্রি তাক্কেলিরি অর অঃরো প্রগেলিরি, “ঈফিসিয়রোমা আরতেমিস নেঃমাচা আগ্রিকি।” 29অর ক্রিলৈতঃ ম্রুচা ক্যক্যরুচ্ছা ফ্রঈলাখাব্যা। গাঈয়না আরিষ্টার্খ নাঃমিনা নৈয়ক ম্যাসিডোনিয়াগা যাসুরো য়াংখা পৌলনা আতু লাঃগেতি, য়াংখা থুউ লুঃউরোচা য়াংসুউরোগু তিঃগেলিরি। অর আলুংসুউ আতৈংবাং প্যাংচা আঃরাদুঃ লাঃখাগেতি। 30পৌলচা লুঃউ মাছেংরাঃদুঃ লাঃফু ক্রিলিরি, ছুগি তিবিরোচা মরুওয়েকেলি। 31য়াং প্রিনিমা লৈগায়ক মাংমা য়ুংসিচা পৌলমা মিছুয়ি হিকলিরি। য়াংসুউরোলি পৌলগো সাদাং রুওয়েরো কংগং আঃকুরো আতংবেং থাগেলিচাগা, য়াংসুউচা ফিঃ লাঃচাগো ম্রাংরো, থুউ আতৈংবাং প্যাংচা আঃরাদুঃ মাঃলাগি।
32দিঃ আক্রামা আতৈংবাংচা কংগং ক্যক্যরুচ্ছা ফ্র নিরি। লৈগায়কচা তুখু চাঃগা প্ররো অগেলিইরি, অর আখ্রা লৈগায়কচা আখ্রা চাঃগা প্ররো অঃগেলিইরি। হিকচা লুঃউ আম্যা মিসিচাগা, য়াংসুউরো যাফু দিঃ আতৈংবাংদুঃ লাঃগেতিলি। 33যিহূদীরোচা আলেকসান্দরগো হ্রিইদুঃ তুঃ প্রিব্রিনক, লৈগায়ক লুঃউচা প্রঃ পিইলিরি, য়াংসুউ যা প্ররাফুলি। য়াংখা আলেকসান্দরচা লুঃউরো হ্রিথাকমা কুঃ ব্রাক চাঃগা প্রফুকিজু আঃলাক প্রারো অালুংসুউগু তিতি নিংজিলিরি। 34ছুগি লুঃউরো যাখা আলেকসান্দরচা যিহূদীগো সিকগেলিরি, য়াংখা য়াংসুউরো তখক দৈংমা নৈগংদাল্হক অঃরো প্রগেলিরি, “ঈফিষিয়রোমা নেঃমা আরতেমিসচা আগ্রিকি।”
35আছুংমা য়াং ম্রুমা প্রফুচাঞ্যং আচুরা য়ুংসি তয়ক লুঃউরোগু তিতি নিংজিলু প্রলিরি, “ঈফিষিয় লুঃউরো, দিঃ চাঃগাগো লুঃউরো সিকরি, আগ্রিকি আরতেমিস নেঃএমা ক্যংনা অর গংখাংগা ক্যাচা য়াংসুউ পুংগো রোসিরো থাঃচা ফ্রত্তি ঈফিষ ম্রু। 36দিঃ আম্হেংগো যাখা ঙারো অঃলাক মাখেং মাপ্যাংনৈলি, য়াংখা আহ্নেংঞ্যং লুঃউরো তিতি নিচা কংরি। 37প্রফুছুগি দিঃ লুঃউরোচা ঙারো ক্যংগালি তুখুউলি মুখুলি অর ঙারো নেঃমাগোলি আরি আসুয়েং মুপ্রুলি, য়িগিলি নাংরো দিঃ লুঃউরোগু দুঃঃ য়ুউ লাগেতি। 38ছুগি দিমিত্রিয়না য়াংসুউমা মিছুয়ি রুয়ি খুওয়েসারো, খ্যাংসুউগোমুছু ছেংগ্যাকফাক লুঃউরো চাঃগা প্রফুছুগি, তাঃরা চৈঃ খেংচা ল্হঃরো হিরি অর ওকখ্যুকসুরোলি য়াংমা হিরি। য়াংসুউরো য়াংমা তাঃরা তাংনৈরি। 39ছুগি নাংরো অর আম্যা প্রখ্যাংগি, য়জংছুগি নিংদৈং আতৈংবাংমারা ওয়ে ওয়াসানা খ্যারাফু। 40গিনি প্রাসানামা দিঃ অবু আসেঃ অর ফ্যাক্কেরি কিজু ঙারো আথাকমা আপ্রই ক্যামিলু ক্রকব্যা। য়জংরা ফ্রত্তিছুগি, ঙারো দিঃ ক্যক্যরুচ্ছা ফ্রচা তুখুউলি আক্রং মাপ্রানৈমু, আক্রংগা দিঃ ক্যক্যরুচ্ছা ফ্রচা তুখুউলি আক্রং মিহি।” 41দিঃ চাঃগা প্ররো য়াংসুউ আতৈংবাংগো তুংজিলৈতি।
Currently Selected:
প্রেরিত 19: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
