প্রেরিত 18
18
করিন্হ ম্রুমা
1য়াং নক পৌলচা এথেন্স ম্রুগো বৈরো করিন্হ ম্রুদুঃ লাঃলিইরি। 2য়াংদেমা আকিলা নাঃমিনা যিহূদী তয়কনা আতুয়ি রাঃলিইরি। পন্ত প্রিনিমা আকিলাচা ম্যুঈলিরি। সিঃথি ক্লৌদিয়চা হিচা আলুং যিহূদীরোগু রোমগা থুওয়ক লাঃগেলি ছুরো আঃনা পিইলিরি। য়াংচা কিজু লৈগারাক হ্রিইগা আকিলাচা য়াংসুউ মাঃয়াআ প্রিষ্কিল্লাগো য়ুউরো ঈটালিগা করিন্হেদুঃ লাঃগেলিরি। পৌলচা য়াংসুউরোদুঃ লাঃলিইরি। 3য়াংসুউঞ্যং কুঃলি তাম্বু লুকসা ছুরো য়াংসুউনা পংরো অলুক লুকলিইরি। 4তাসাদাং মক্যুয়েং পৌলচা রিঃফুং জাংমা লাঃরো যীশু আক্রংলিলাগো আছুয়িঞি প্যাংরি অর গ্রীকনা যিহুদীরোগু যীশুগো রুসিজিফু ক্রেংলিরি।
5সীলনা তীমথিয়চা ম্যাসিডোনিয়াগা লাঃরি নক পৌলচা সাসাক থাওরা ফুরা ঈঃ তাঃরাগো হঃ প্রারো আখিং বৈলিরি। য়াংসুউচা যিহুদীরোবামা সাকসি পিইলিরিচাগা, যীশুচা মশীহ। 6য়জংছুগি যিহুদীরোচা যাখা পৌলগো ছেংগ্যাংফাক লুঃউরো চাঃগা প্ররো আঞ্যচি প্যাংগেতি য়াংখা পৌলচা য়াংসুউরোগু ছেংগ্যাংফাক লুঃউরো কুঃ আওয়েচাকু খাঃরো বৈরো প্রলিরি, “কুবাংরো কুঃ আচৈংগো তাওয়েং হিচা,কুবাংরো আগং আথাকমা হিবেচি। দিঃ আক্রংলিলাগো য়ুুরো ঙামা তুখুউলি আপ্রই মিহি। আগুকাবাং ঙা যিহুদী মুহু লুঃউরোদুঃ লাঃফুব্যা।” 7য়াং নক পৌলচা রিঃফুং জাংগো বৈরো তিতিয় যুষ্ট নাঃমিনা লুঃউ তয়ক ঈংদুঃ লাঃলিইরি। দিঃ লুঃউ ঈংচা রিঃফুং জাং ঈংনেংমা হিকলিরি অর য়াংসুউচা যিহুদী মুহু ফ্ররোলি, থাওরা ফুরাগো বাওয়ানা রুত্তি। 8রিঃফুং জাংমা ওকখ্যুকসু ক্রীষ্পনা য়াংসুউ ঈংমা হিচা আলুংসুউ আস্যাং আঃপমা ক্যুংগেলিরি। দিঃচাগো আপি করিন্হীয়রোমা আম্যা লুঃউ পৌল চাঃগাগো ক্রারো ক্যুংগেলিরি অর রিঃখ্যুও মাঙ্গালা য়ুগেলিরি।
9তারাক ঞিঈ আস্যাংচা তুখু ঈঙমাক প্রারো পৌলগো দিঃ চাঃগাগো প্রলিরি, “মক্রক্কি, তাঃরা হঃরো নিঃ, তিঃতি মিনিংগি; 10আক্রংগা ঙা নাংনা আতু হিরি। নাংকু খুঃও সেঃরো তয়ল্লি, মকং মুলুক নৈংমুক, আক্রংগা দিঃ ম্রুমা ঙামা লুঃউ আম্যা হিরি।” 11য়জংছুগি পৌলচা য়াং ম্রুমা নিংরো তন্হ পেলুং থাওরা ফুরা ঈঃ তাঃরাগো সুওয়েংসাং পিইলিরি।
12গাল্লিয়ো যাখা আখায়া প্রিনিমা ওকখ্যুকসু হিকলিরি, য়াংখা যিহূদীরো আলুংসুউ পংরো পৌলগো তিঃরো তাঃরাচৈ হিংদুঃ য়ুউ লাঃগেলিরি। 13য়াংসুউরো প্রগেলিরি, “দিঃ লুঃউচা লুঃউরোগু প্রজারাঞ্যং থাওরা ফুরা ঈঃ বাওয়ানা প্যাংফুকিজু প্ররি, যা ঙারো থুংজৈংমা ছেংগ্যাংফাক।”
14পৌল চাঃগা প্রফু আখিংমা গাল্লিয়ো যিহুদীরোগু প্রলিরি, “যিহুদীরো, দিঃচা কংগং মকং মুহুক্কি আপ্রই অলুক ছুগি, নাংরো চাঃগা নাথংফু কিজু ঙা ম্হেফুচা। 15ছুগি দিঃচা তুখু প্রজারা আখ্রাংগু য়ুউরো, তয়ক নাঃমিগো য়ুউরো অর নাংরোমা থুংজৈংগু য়ুউরো চাঃগা, য়জংছুগি নাংরোরা দিঃচাগো ওয়ে ওয়াসানা খ্যাগে। ঙা য়াং আক্রংরোগু য়ুউরো তাঃরা মচৈ।” 16দিঃ চাঃগা প্ররো য়াংসুউ তাঃরা চৈরাগা, য়াংসুউরোগু থুওয়ক লাঃলিছুরো আঃনা পিইলিরি। 17য়াংখা থুউ যিহুদীরোচা আঃলুঃউংসো পংরো রিঃফুংজাংমা ওকখ্যুকসু সোস্হিনীগো তিঃরো তাঃরা চৈচা হ্রিইগা আবুঃ আঃসে প্যাংগেলিরি, য়জংছুগি গাল্লিয়োচা প্রেংরোলি মিক্রিলি।
আপল্লো চাঃগা
18লৈগারাক করিন্হেমা নিংব্রিনক পৌলচা ক্যুংসা ঞিংরোগা লাঃলিইরি অর আকিলানা পিষ্কিলানা আতু রিই লেংগা সিরিয়া প্রিদুঃ লাঃগেলিরি। পৌলচা তুখু গিধি প্যাংলিরি কিজু লাঃফু হ্রিঃগা কিংক্রিয়া সাংফ ছুয়িমা ছেংবাংগো রুয়িতলিরি। 19ঈপিষ ম্রুমা রকরো য়াংসুউ প্রিষ্কিল্লানা আকিলাগো ফ্রুতলিরি। নক্কা য়াংসুউ কুঃ রিঃফুংজাংমা লাঃরো যিহুদীরোনা আতু যীশু আক্রংলিলাগো য়ুউরো আছুয়িঞি প্যাংগেলিরি। 20যিহূদীরো য়াংসুউগো লৈগারাক য়াংসুউরোনা আতু নিংফু প্রলিরি, য়িগিলি য়াংসুউচা লাক মাখেংলি। 21ছুগি য়াংসুউ য়াংচাগা লাঃফু আখিংখা য়াংসুউ প্রলিরি, “থাওরা ফুরা রুওয়েতিছুগি, ঙা প্রেংরো লাঃফু।” য়াং নক য়াংসুউ ঈফিষ ম্রুগা সাংফমা তাকরো লাঃলিইরি।
22য়াংসুউ কৈসরিয়া ম্রুমা রকরো, সাংফগা সাকরো যিরুশালেংদুঃ লাঃল্লিরি। য়াংদেমা ক্যং লুঃউরোগু ক্রোছুব্রিরি নক য়াংসুউ আন্তিয়খিয়াদুঃ লাঃল্লিরি। 23আন্তিয়খিয়ামা লৈগারাক নিংব্রি নক, য়াংসুউ য়াংচাগা লাঃল্লিরি। অর গালাতিয়ানা ফরুগিয়া প্রিনিমা তারাগা তারা লাঃরো ক্যুংসা তিবিরোগু চিঃআঃগো তুতাংরো য়াংসুউরোগু তুতাংলিরি।
24য়াং আক্রামা আপল্লো নাঃমিনা যিহূদী তয়ক ঈফিষদুঃ লাঃল্লিরি। আলেকজান্দ্রিয় ম্রুমা য়াংসুউ ঈং হিকলিরি। য়াংসুউ তয়ক কংগং তাঃরা হঃনৈসা হিকলিরি অর সেংস্যাংস কেইং চাউকুলি আহ্লা নালিরি। 25আস্যাং আক্রংলিলাগো য়াংসুউ সুয়েংসাং রাঃল্লিরি। য়াংসুউচা কংগং চিঃনা চাঃগা প্রলিরি অর যীশু আক্রলিলাগো য়ুউরো আম্হেংগো সুয়েংসাং পিইলিরি। ছুগি য়াংসুউচা যোহন রিঃখ্যুুও মাঙ্গালাগো আপি অর রিঃখ্যুও মাঙ্গালাগো মিসি। 26য়াংসুউচা কংগং চিঃ আঃনা রিঃফুংজাংমা চাঃগা প্রফু চাঃল্লিরি। য়াংখা প্রিষ্কিল্লানা আকিলা চাঃগাগো ক্রারো, য়াংসুউচা য়াংসুউরোগু কুঃ আগেংদুঃক খঃলিইরি অর থাওরা ফুরা ঈঃ সাসানা আক্রংলিলাগো অরলি আহ্লাপা প্যাংরো প্রঃ প্রালিইরি।
27নক্কা আপল্লো যাখা আখায়াতদুঃ লাঃফু ক্রিলিরি, য়াংখা ঈফিষমা ক্যুংসা ঞিংরোচা য়াংসুউগো চিঃআঃগো তুতাংলিগেতি। আখায়ামা তিবিরোচা, আপল্লোগু লাকখেংঞ্যং য়জংকিজু ঈফিষীয় ঞিংরোচা আখায়াদুঃ চাঃআ রুয়িগেলিরি। থাওরা ফুরা ঈঃ গুংদনা আখায়ামা যাসুরো ক্যুংগেলিরি, আপল্লোচা য়াংদেমা রকরো, য়াংসুউরোগু কংগং আকুঃ পিইলিরি। 28যীশুচা মশীহরো, য়াংসুউচা সেংস্যাংস কেইং চাউ আতুওয়ংগা নিংরো তাং প্রালিইরি অর আলুংসুউ হ্রিইথাকমা কংগং পুয়েংঞা হিঃ চাঃগানা আঙ্রুংজা প্যাংরো যিহুদীরোগু স্যুংজিলৈতি।
Currently Selected:
প্রেরিত 18: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
