প্রেরিত 17
17
পৌলনা সীলচা থিষলনীকী ম্রুমা
1পৌলনা সীলচা আমফিপলিনা আপল্লোনিয়া ম্রু আতুওয়ংগা নিংরো থিষলনীকী ম্রুদুঃ লাঃগেলিরি। য়াংদে যিহুদীরোমা রিই ফুংজাং তিঈং হিকলিরি। 2পৌলচা য়াংসুউ অাক্যাং আলৈ য়াং রিই ফুংজাংদুঃ লাঃলিইরি অর নক্কা ছাংরো ছাংরো সুংখক সাদাং রাকমা লুঃউরোনা আতু সেংস্যাংস কেইংগা চাঃগাগো আছুয়িঞি প্যাংগেলিরি। 3য়াংসুউ লুঃউরোগু আঃসি পিরো আতাং প্রালিচাগা, মশীহচা দুঃখাওয়া হ্রালিরি অর আঃসিঈগা হ্রাংরো থাঃফু অলু হিকলিরি। য়াংসুউ প্রলিরি, “যা যীশু চাঃগাগো ঙা কুঃবাংরোবামা হঃ প্রারি, য়াং যীশুচা ফ্রত্তি মশীহ।” 4দিঃ চাঃগাগো ক্রারো লৈগায়ক যিহূদীরো ক্যুংরো পৌলনা সীলমা লাঃরো পংগেরি। অর থাওরা ফুরাগো রুসিসা আম্যা লুঃউ গ্রীকনা আম্যা ম্যাকন্হা হিসা মিঃমারোলি, য়াংসুউরোনা পংগেলিরি।
5য়জংছুগি যিহুদীরোচা ম্যাকচি মুংরো জিইগা লৈগায়ক আপ্যাক লুঃউ হ্রা য়ুউ লাঃরো য়াংদেমা চুকলিরি অর ম্রুমা ক্যক্যরোছা প্যাংগেলিরি। য়াংনক পৌলনা সীলগো হ্রারো প্রাংদুঃ লুঃউদুঃ থুকখাফু কিজু য়াংসুউরো যাসোন ঈং আঃপমা ছাংরো চুক্কেলিরি, 6ছুগি য়াংদেমা য়াংসুউরো পৌলরোগু মাঃরাগেলি। য়াংখা য়াংসুউরো যাসোননা লৈগায়ক ক্যুংসা ঞিংরোগু ঙাং য়ুউ লাঃরো ম্রু ওকখ্যুকসারোদুঃ য়ুউ লাঃরো অঃরো প্রগেলিরি, “যাসুরো কাবা লুংগো কৈংরো ল্হুক্কেলিরি, য়াংসুউরো আগু দিঃমা রকরো হিরি। 7অর যাসোন কুঃ ঈংমা য়াংসুউরোগু নিংফু পিইলিরি। য়াংসুউরো আলুংসুউ সিঃথি কৈসর আঃনাগো মছংব্রি প্রগেলিরি, য়াংসুউগো আপি অরলি তয়ক যীশু নাঃমিনা মাং হিরি।”
8দিঃ চাঃগা প্ররো থুউ যিহূদীরোচা ওকখ্যুকসুরোনা লুঃউরোগো চিই্কু থুদুরোং দুঃরোং প্যাংগেলিরি। 9য়িগিলি যাসোননা অর আখ্রা লুঃউরোচা ক্যুয়েফু কিজু তেংগা পিগেলিখা, থুঃউসুরো য়াংসুউরোগু রুওয়েলৈক্কেতি।
বিরয়া ম্রুমা
10ঞিঃ নাকরি নক ক্যুংসা ঞিংরোচা পৌলনা সীলগো বিরয়াদুঃ রুওয়েলৈক্কেতি। য়াংদেমা রকরো য়াংসুউরো যিহূদী রিঃফুং জাংদুঃ লাঃগেলিরি। 11থিষলনীকীমা যিহূদীরো থাকপাং বিরয়া ম্রুমা যিহূদীরো চিইচা কংগং আল্হাপা হিকলিরি। য়াংসুউরো কংগং চিঃক ঞোয়েংগা থাওরা ফুরা ঈঃ তাঃরাগো নাথংরো, লাক খেংগেরি। পৌল যা প্ররিলি, য়াংচা ম্হেংরি লঃ, ক্রিফু কিজু য়াংসুউরো নিংদৈং কেইংমা হ্রা ক্রিগেলিরি। 12আম্যা যিহূদী যীশু আঃপমা ক্যুংগেলিরি; দিঃচাগো আপি ম্যাকন্হা হিচা গ্রীক মিঃমারোনা য়ক্ক্যারোলি ক্যুংগেলিরি।
13য়াখা থিষলনীকী যিহূদীরো ক্রাগেলিরি, পৌলচা বিরয়ামা থাওরা ফুরা ঈঃ তাঃরাগো হঃ প্রারি, য়াংখা য়াংসুউরো য়াংদুঃলি লাঃগেরো য়াংমা লুঃউরোগু চুওঃ থুউরো ক্যক্যরোছা প্যাংগেলিরি। 14য়াংখা খ্যাং খ্যাং ক্যুংসা ঞিংরোচা পৌলগো ম্র নাঃদুঃঃ রুওয়েলৈলিরি, য়জংছুগি সীলনা তীমথিয়চা বিরয়ামা হিলৈতি। 15যা লুঃউরো পৌলগো য়ুউ লাঃগেতিলি, য়াংসুউরো পৌলগো এথেন্স ম্রুদুঃ য়ুউ লাঃগেলিরি। য়াংনক থুউ লুঃউরোচা, সীলনা তীমথিয়রো কিজু দিঃ আঃনা য়ুউরো বিরয়াদুঃ প্রেং লাঃখাগেতি। আঃনাচা হিকলিরি, সীলনা তীমথিয়চা মনৈতয়ং আয়াং নৈরিলি, পৌলনা লাঃরো পংফু কিজু।
এথেন্স ম্রুমা
16পৌলচা এথেন্স ম্রুমা সীলনা তীমথিয়রো কিজু চংরো হিকলিরি আখিংমা, য়াং ম্রুচা লাকথুউক পুং প্রিরো হিচাগো ম্রাংলিরি। য়জং ছুগি য়াংসুউ চিইচা কংগং ওয়েংনিহারি। 17পৌলচা রিঃফুং জাংমা যিহূদীরোনা থাওরা ফুরাগো রুসিসা গ্রীকরোনা আছুয়িঞি প্যাংলিরি। দিঃচাগো আপি য়াংসুউচা জিঈ লাঃসা লুঃউরোনালি রাকমা রাকমা ছুয়িনিলিরি। 18য়াংখা ঈপীকুরীয়না স্তোয়িকীয় আফুয়িমা কেইং ছারা লৈগায়ক পৌলনা চাঃগা আঙ্রুংজা ফ্রক্কেলিরি। য়াংদেমা লৈগায়ক প্রগেলিরি, “দিঃ চাঃগা ম্যাসুচা, যা প্রফু ক্রিরিলি?” অর আখ্রা লুঃউরোচা প্রগেলিরি, “ঙারো থাংচাগা দিঃ লুঃউ নেংঞেংখ্রা নেঃসা নেঃসিমি তাঃরারোগু হঃ প্রারি।” য়াংসুউরো দিঃ চাঃগা প্রগেরি, আক্রংগা পৌলচা যীশু আক্রলিলাগো অর আসিইগা হ্রাং থাঃচা আক্রংলিলাগো য়ুউরো হঃ প্রালিইরি। 19য়াংখা থুউ কেইংছারারোচা পৌলগো আরেয়পাগ আতেংবাং হ্রিইগা য়ুউ লাঃখাগেতি। য়াংদেমা য়াংসুউরো পৌলগো মিংগেলিরি, “কুঃবাং যা আসঃঅ সুয়েংসাং পিচা য়াংচা যালি, ঙারো সিইনৈফুলঃ? 20আক্রংগা কুঃবাং প্রফুচাঅং লৈংখুয়েং চাঃগা প্রলিরি, য়াংচা ঙারো মাক্রাফু তুঈরি। য়জং কিজু দিঃ চাঃগা আদিপিচা যালি, ঙারো ক্রাখ্যাংরি।” 21য়াংসুউরো দিঃ চাঃগা প্রগেলিরি, আক্রংগা এথেন্সমা হিচা আলুং লুঃউনা য়াং ম্রুমা যাসু নেংঙেংখ্রা লুঃউরো নিংগেতি, য়াংসুউরোরা আঃসঅ আঃসঅ আক্রংলিলা চাঃগাগো প্ররো অর নাথংরো আখিং বৈক্কেতি।
22য়াংখা পৌলচা আরেয়পাগ আতেংবাংমা থাঃ রেঃরো প্রলিরি, “এথেন্স ম্রুমা লুঃউরো, নাথংগে। ঙা ম্রাংরিচাগা, কুবাংরো ফুরা তাঃরাগো কংগং সিঃগেতি, 23আক্রংগা ঙা লিঃ ক্রিরিখা কুবাংরোমা বাওয়ানা রুতচা ওয়েংরোগু যাখা ক্রিলিরি, য়াংখা প্রফুচা তুখু নেঃমা পুং ম্রাংলিরি, যাসু আঃথাক্কা রুঈরো হিরি, ‘মিসিরি নেঃ আতুওয়ক।’ কুবাংরো মিসিব্রি যাসুগো য়ুউরো বাওয়ানা থৈংগেতিলি, য়াংসুউ আক্রংলিলাগো য়ুউরো ঙা কুঃবাংরোবামা হঃ প্রালিইরি।
24“থাওরা ফুরা, যাসু দিঃ কাবানা, য়াংদে যা হিরি, হিচা আলুংচা তিজলিরি, য়াংসুউচা নেঃফুংনা কাবামা আস্যাং। য়াংসুউচা আঃলাকনা লুকচা তুখুবাং ক্যংমা মিনি। 25য়াংসুউমা তুখুক মিহিক লুঃউ মিহিক, য়জংকিজু লুঃউরো আঃলাক্কা পুজ লাক খেংফুলি অলুক মিহি আক্রংগা য়াংসুউরা হিচা আলুং লুঃউগো বাওয়া, আসাক অর আখ্রা আলুংচা ল্হুরি। 26য়াংসুউ তয়ক লুঃউগা হিচা আলুং জেঃ মুয়োগু তিজলিরি, যা আস্যালিছুগি য়াংসুউরো কাবামা নিনৈঅং। য়াংসুউরো যাখা যামা নিংফুলি য়াংচালি, ম্হে পিইলিরি। 27থাওরা ফুরাচতা দিঃ অলুক লুকলিইরি আক্রংগা লুঃউরোচা তুওয়ারো তুওয়ারো, য়াংসুউগো রাঃরো লাঃফু কিজু হ্রাগেঞ্যং। প্রফুছুগি য়াংসুউ ঙারোগা আওয়ি মিনি, 28আক্রংগা য়াংসুউ গুংধ আঃনা ঙারো হ্রাং নিংরি, লাঃরি সুওয়ারি অর হ্রাংরোলি নিংরি। কুবাংরোমা লৈগায়ক কাপ্যা রুঈসালি প্রলিরি, ‘ঙারোলি য়াংসুউ সাঃ।’
29“য়জংছুগি ঙারো থাওরা ফুরা সাঃরাছুগি, য়াংখা থাওরা ফুরাগো লুঃউ আলাকনা চিঃঞুয়েং পিরো লুঃউচ্চা রুঈ, মুয়িং মুহুকি ক্যকনা থুউচ্চা পুং ছুরো ঙারো ম্হেফু মাসাং। 30আয়াংখা লুঃউরো মিসি কিজু থাওরা ফুরাচা ম্রাংগিলি, মাম্রাংলিব্যা। ছুগি আগু য়াংসুউচা হিচা আলুক আঃরামা হিচা লুঃউরোগু আপ্রইকা চিই্কু প্রেংজিফু কিজু আঃনা পিইলিরি। 31আক্রংগা য়াংসুউ প্রফুচাঅং রাক তারাক্কু ম্হেলিরি, য়াং রাকমা য়াংসুউ আঃরা পিচা লুঃউরোনা য়াংসুউ পব্রং প্যাংরো লুঃউরোগু তাঃরা চফু। য়াংসুউ দিঃ যীশুগো আসিইগা হ্রাং প্যাংরো হিচা আলুং লুঃউরোবামা আম্রাং প্রালিইরি।”
32আঃসিরো প্রেংরো হ্রাং থাঃচা চাঃগাগো ক্রারো লুঃউরো আতুওয়ংমা লৈগায়কচা খুনাং খ্যয়েং ফ্রক্কেরি, য়িগিলি অর আখ্রা লুঃউরো প্রগেলিরি, “দিঃ আক্রংলিলাগো য়ুউরো ঙারো কুবাংগা নক্কা নাথংফু।” 33য়াংখা পৌলচা য়াং আতৈংবাংগা থুওয়ক লাঃলিইরি। 34লৈগায়ক লুঃউ পৌলনা পংগেরি অর ক্যুংগেরি। য়াং ক্যুংসুরোমা দিয়নুষিয় নাঃমিনা তয়ক আরেয়পাগ আতৈংবাংমা তয়ক আতৈংবাং লুঃউ, দামারিস নাঃমিনা তয়ক মিঃমা অর য়াংসুউরোনা অরলি লৈগায়ক হিকলিরি।
Currently Selected:
প্রেরিত 17: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
