প্রেরিত 16
16
পৌল অর সীলনা আতু তীমথিয়
1নক্কা পৌলচা দর্বীনা লুস্ত্রা ম্রুদুঃ লাঃখারি। য়াংদেমা তীমথিয় নাঃমিনা তয়ক তিবি নিংলিরি। য়াংসুউ আঃমিঈচা হিকলিরি খ্রিরিয়েং আঃপমা ক্যুংসা তয়ক যিহূদী মিঃমা, য়িগিলি য়াংসুউ ফাখাং জে ম্যুঃচা হিকলিরি গ্রীক। 2লুস্ত্রানা ঈকনিয় ম্রুমা ক্যুংসা ঞিংরো তীমথীয়গো কংগং ম্যাকন্হা পিগেতি। 3পৌলচা থিমথীয়গো য়ুউরো লাঃফু ক্রিলিরি, আক্রংনা য়াংসুউরো স্যুও ফিয়া আরিইগো ফ্রেলিরি। আক্রংগা য়াং আঃরামা যা যিহূদীরো নিংগেতি, য়াংসুউরো সিকচাগা তীমথিয় ফাখাংচা তয়ক গ্রীক হিকলিরি। 4নক্কা য়াংসুউরো য়াং ম্রু আতুওয়ংগা নিংরো লাঃগেলিরি অর যিরুশালেংমা তেমেংদরোনা ক্যংমা গংখ্যুকরো লৈংখুক থুংজৈং লুকরো য়াংচাগো লুঃউরোগু আসিক পিরো, সুংফু কিজু প্রগেলিরি। 5দিঃ পুয়েং প্যাংরো ক্যংমা লুঃউরোচা খ্রীট বাসাগো ক্যুংরো আম্রিজি ফ্র তাক্কেলিরি অর য়াংসুউরো লুঃউচা রাকমা রাকমা প্রি লাঃখাগেতি।
ম্যাসিডোনিয়া প্রিনিমা পৌল
6সেংস্যাংস ওয়িঞেংচা পৌলনা য়াংসুউ মিছুয়িগো তুদিয়া কাবামা তাঃরা হঃফু মিপিলি। য়াংখা য়াংসুউরো ফরুগিয়ানা গালাতিয়া প্রিনি হিচা আলুং আঃরাদুঃ লাঃগেলিরি। 7নক্কা য়াংসুউরো মুশিয়া নেংঙেংখ্রাবামা লাঃরো বিথুঃউনিয়া প্রিনিদুঃ লাঃফু ক্রেংগেলিরি। য়জংছুগি যীশু ওয়িঞেংচা য়াংসুউরোগু লাঃফু মিপিলি। 8য়াংচা কিজু য়াংসুউরো মুশিয়া আতুওয়ংগা নিংরো ত্রোয়া ম্রুদুঃঃ লাঃগেলিরি। 9ঞিঈ স্যুয়েংখংমা পৌলচা ঈংমাক তুখু ম্রাংলিরি, ম্যাসিডোনিয়া প্রিনিমা লুঃউ তয়ক রেঃরো আতংবেং প্যাংরিচাগা, “ম্যাসিডোনিয়ামা লাঃরো ঙারোগু কিয়িছিবা।”
10পৌল দিঃ ঈংমাক মাকরি নক ঙারো ম্যাসিডোনিয়াদুঃ লাঃফু কিজু খ্যাং খ্যাং য়াংগেলিরি, আক্রংগা ঙারো সিকগেলিরি ম্যাসিডোনিয়ামা লুঃউরোবামা খ্রীট আক্রলিলাগো য়ুউরো আকং সাদাং হঃফু কিজুরা থাওরা ফুরা ঙারোগু খঃলিইরি।
লুঃউদিয়া ক্যুংসা ফ্ররি
11নক্কা ঙারো ত্রোয়াগো বৈরো সাংফমা তাকরো চঃচঅ সামথ্রাকী তং ম্রুদুঃ লাঃগেলিরি অর মুলাংখা নিয়াপলি ম্রুদুঃ লাঃগেলিরি। 12য়াংচাগা ঙারো ফিলিপী ম্রুদুঃ লাঃখাগেতি। দিঃ ফিলিপীঈচা ম্যাসিডোনিয়া য়াং অাঃরামা আগ্রি ম্রু। য়াংদেমা লুঃউরোচা মাং রোম্মা লাকথাক লুঃউ হিকলিরি। ঙারো লৈগারাক য়াংদেমা হিলিগেতি।
13সাদাং রাকনি ঙারো, ম্রু লেংখাওয়া প্রাংগা খ্যংনাদুঃ লাঃগেলিরি; চিঃকমা তুওয়ক্কেলিরি, য়াংদেমা যিহূদীরো ছুউক তংফু কিজু আঃরা হিরি। য়াংদেমা যা মিঃমারো তেরেমা চুক্কেলিরি, ঙারো য়াংসুউরোবামা থৈংরো চাঃগা প্রগেলিরি। 14যাসুরো নাথংগেলিরি, য়াংসুউরো আতুওয়ংমা থুয়াতীয়া ম্রুমা লুঃউদিয়া নাঃমিনা তয়ক মিঃমা হিকলিরি। য়াংসুউ খ্রেরেং রং আওয়ে কুং প্রুত্তি। যিহূদী মুহুকিলি য়াংসুউ থাওরা ফুরা ঈঃ বাওয়ানা রুত্তি। আস্যাং লুদিয়া চিই্কু প্রফু মাঃরা রাঃঅং প্যাংবলৈচাগা, য়াংসুউ পৌল চাঃগাগো ক্রারো ক্যুংঅং। 15য়জংছুগি য়াংসুউনা য়াংসুউ ঈংসারো আলুংসুউ রিঃখ্যু মাঙ্গালা য়ুগেলিরি। য়াং নক য়াংসুউ ঙারোগু দিঃ চাঃগা প্ররো আগেংদুঃক খঃলিইরি, “কুবাংরোরা ঙাগো আঃচ থাওরা ফুরাগো রুসিসা তুওয়ক্কি, ঙারো ঈংমা লাঃরো নিংগে।” দিঃ চাঃগা প্ররো য়াংসুউ ঙারোগু লুঃউ ওয়েনা খঃরো য়াংসুউ ঈংদুঃ য়ুউ লাঃখারি।
পৌলনা সীলচা থংমা
16তারাক যাখা ঙারো থুউ ছুউক তংচা আঃরাদুঃ লাঃগেলিখা, য়াংখা তয়ক ক্যুংমানা ঙারো আতুয়ি রাঃগেরি। য়াংসুউগো মকং নেঃ কৈংরো হিকলিরি আক্রংনা, য়াংসুউচা হ্রিইদুঃ চাঃগাগো প্রনৈংরি। য়জংছুগি য়াংসুউ ঈংস্যাংরোমা আম্রে ফ্রত্তি। 17য়াং মিঃমাচা পৌলনা ঙারো নক্কা লাঃরো লাঃরো অঃরো প্রলিরি, “দিঃ লুঃউরোচা আস্যাং আগ্রি থাওরা ফুরামা ক্যুয়েং। যা পুয়েং প্যাংরো আপ্রইকা রুওয়েম্রকতি, য়াংচাগো য়াংসুউরো কুবাংরোগু প্রঃ প্রাগেতি।”
18য়াংসুউ আম্যা রাক রকঅং দিঃ পুয়েং প্যাংলিরি। আছুংমা পৌলচা কংগং মুছু মাঃছা ফ্ররিব্যা, য়াংসুউ নকতু প্রেংরো, য়াং মকং নেঃকু প্রলিরি, “যীশু খ্রীট্ নাঃমিনা ঙা নাংকু আঃনা পিরি, দিঃ মিঃমাগা থুওয়করো লাঃ।” অর খ্যাং খ্যাং য়াং ওয়িঞেংচা থুওয়ক লাঃখারি।
19ম্রেচা প্যাক লাঃখারিগো ম্রাংরো, মিঃমা ঈংস্যাংরো পৌলনা সীলগো তিঃরো ম্রু চকমা গংখ্যুকরোদুঃ ঙাংরো য়ুউ লাঃখাগেতি। 20য়াং নক য়াংসুউরো ওকখ্যুকসুরোদুঃ য়ুউ লাঃরো প্রগেলিরি, “দিঃ লুঃউরো ঙারো ম্রুমা ক্যঃক্য রুছাঃ প্যাংগেতি। দিঃ লুঃউরো যিহুদী। 21দিঃ লুঃউরো প্রলৈংঞ্যং ছুগি যা আক্যাং আক্রংলিলাগো সুওয়েংসাং পিগেতিলি, য়াংচা রোমীয় ফ্ররো ঙারো লাক খেংফু মুহুক্কি সুংফু ছুগি থুংজৈং ছেংগ্যাংফাক ক্যারি।”
22অর লুঃউরোলি পৌলনা সীলগো ছেংগ্যাংফাক লুকরো থুউসুরোনা পংগেরি। য়াংখা ওকখ্যুকসুরো আঃনা পিইলিরিচাগা, য়াংসুউরো আওয়েচাগো ছুকরো দুঃকনা সেঃফু। 23কংগং আম্যা দুঃকনা সেঃরো, য়াংসুউরোগু থংমা থাঃলৈতি। অর কংগং সিঃদি খ্যারো চংফু কিজু থং চংসাগো আনা পিইলিরি। 24থং চংসাচা য়াং আঃনাগো রাঃরো পৌলনা সীলগো ঈং আঃথিদুঃ য়ুউ লাঃখারি অর খঃলংসিনা য়াংসুউরো আখ্রিগো ক্যুং থাঃলিরি।
25য়াংখা ঞিঈ সুওয়েখং রুয়িব্যা। পৌলনা সীলচা ছুওক তংগেলিরি অর থাওরা ফুরাগো য়ুউরো ঈঃ ছুলিগেতি। আখ্রা সুংসিরোচা নাথংগেলিরি। 26য়াং আখিংমা ব্রুং খুনৈং প্যাংরো কংগং আগ্রিকি মায়াং লুঃউল্লিরি অর য়াংচা কিজু থংমা ওক তৈংরোকুঞ্যং লুকলিইরি। য়াংখা খ্যাং খ্যাং হিচা আলুং লেংখাওয়ানা সুংসিরো সেংক্য ক্রোচা ক্যুয়ে লাঃখারি। 27থংগো চংসাচা নুঃ লাঃলিইরি অর থংমা লেংখাওয়ারোচা ল্হঃরো ম্রাংরো, দাস্যি থুউরো কুঃদৈং সিঃফু প্যাংলিরি। য়াংসুউ তুওয়কলিরি, হিচা আলুং থংসিরো ব্রিখাব্যা। 28য়াংখা পৌলচা অঃরো প্রলিরি, “তেং, কুঃদৈং মকং মাপ্যাংগি; ঙারো আঃলুঃউংসো দিঃমা হিরিসি।”
29য়াংখা থুউ থং চংসাচা তয়ক্কু ছিংমিং য়ুখি ছুরো, কুঃচা আঃথিদুঃ লাঃখারি অর তুংরো তুংরো পৌলনা সীল খ্রারাংমা ওয়েলিরি। 30য়াং নক পৌলনা সীলগো প্রাংগা য়ুউ লাঃরো মিংলিরি, “প্রঃ, আপ্রইকা রুওয়েম্রকফু কিজু ঙা যা প্যাংরাফুলি?”
31য়াংসুউরো প্রগেলিইরি, “কুবাংনা কুবাংমা ঈংসারো আস্যাং যীশু আঃপমা অক্যুং থাগেকি, য়ল্হকব্রিমারা আপ্রইকা রুওয়েম্রকমি।” 32পৌলনা সীলচা য়াংখা থংমা চংসানা য়াংসুউ ঈংসারো আলুংসুউবামা আস্যাং তাঃরাগো হঃ প্রাগেলিরি। 33থং চংসাচা য়াং ঞিমা পৌলনা সীলগো য়ুউ লাঃরো, য়াংসুউরোমা প্রেচা আঃরারোগু ছিঈ বৈলিরি। অর য়াংসুউনা য়াংসুউ ঈংসারো হিচা আলুংসুউ খ্যাং খ্যাং রিই খ্যুও মাঙ্গালা য়ুগেলিরি। 34য়াং নক য়াংসুউ পৌলনা সীলগো কুঃ ঈংদুঃ য়ুউ লাঃরো চাঃফু পিইলিরি। থাওরা ফুরাগো আঃপমা ক্যুংগেরো, য়াংসুউ ঈংসারো আলুংসো কংগং প্যগেলিরি।
35মুলাং চঃজগা ওকখ্যুকসু য়াংসুউরোমা য়ুংসিরোগু প্ররো রুওয়েলিরি, “থুউ লুঃউরোগু রুওয়েলৈ।” 36য়াংখা থং চংসাচা পৌলগো প্রলিরি, “কুবাংনা সীলগো রুওয়েফু কিজু ওক্যখ্যুকসু প্রঃ রুওয়েলৈতি। কুবাংরো আগু থুওয়ক লাঃলে অর চিঃ আখেংসানা লাঃগেলি।”
37য়াংখা পৌল থুউ য়ুংসিরোগু প্রলিরি, “ঙারো রোমীয়, ঙারোগু আকং মকং মচৈব্রি, লুঃউরো হ্রিইথাকমা দুঃকনা সেঃরো থংমা থিঃলিরি। আগু ওকখ্যুকসুরো ঙারোগু আথিঃমা আথিঃ রুওয়েফু ক্রিরিয়াং? য়াংচা মাফ্রনৈ, য়াংসুউরো কুঃদৈং লাঃরো ঙারোগু প্রাংদুঃ য়ুউ লাঃ।”
38য়াং য়ুংসিরোচা য়াংখা দিঃ চাঃগাগো ওকখ্যুকসুগো প্রগেলিরি। ওকখ্যুকসুরো যাখা ক্রাগেলিরি পৌলনা সীলচা রোমীয়, য়াংখা য়াংসুউরো ক্রক্কেলিরি। 39য়াংসুউরো পৌলনা সীলবামা লাঃরো খুঅং তংগেলিরি অর য়াংসুউরোগু থং প্রাংদুঃ য়ুউ লাঃরো, ম্রুগা থুওয়ক লাঃলিগে ছুরো আতংবেং থাঃগেলিরি। 40পৌলনা সীলচা থং প্রাংগা লাঃরো লুঃউদিয়া ঈংদুঃ লাঃখাগেতি। য়াংদেমা ক্যুংসা ঞিংরোনা য়াংসুউরো আতুয়ি রাগেলিরি। ঞিংরোগু চিইআঃ তুতাংপিব্রিরি নক য়াংসুউরো য়াংচাগা লাঃখাগেতি।
Currently Selected:
প্রেরিত 16: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
