প্রেরিত 15
15
যিরুশালেংমা আতেংবাং
1যিহুদীয়া প্রিনিগা লুঃউ লৈগায়ক সিরিয়া প্রি আন্তিয়খিয়াদুঃ লাঃগেলিরি অর ক্যুংসা ঞিংরোগু দিঃচা প্ররো সুওয়েংসাং পিগেলিরিচাগা, “মোশি থুংজৈং আলৈঃ নাংরোগু স্যুও ফিয়া আরিইগো মাঃফ্রে ছুগি, নাংরো তাখ্যাকলি, আপ্রইকা খুওয়ং মাঃরানৈমুঃ।” 2য়জংছুগি পৌলনা বার্ণবানা থুউ লুঃউরোনা কংগং চাঃগা আঙ্রাং ফ্রক্কেলিরি। নক্কা ম্হেকেরিচাগা, পৌলনা বার্ণবা আন্তিয়খিয়া লৈগায়ক ক্যুংসারোগু য়ুউরো যিরুশালেংদুঃ লাঃফু। অর তেমেংদরোনা ক্যংমা গংখ্যুকরোনা আতু দিঃ আক্রংলিলাগু য়ুউরো আছুয়ি আঞি প্যাংফু। 3আন্তিয়খিয়া ক্যং লুঃউরোচা য়াংসুউরো লাঃফুচাগো য়াং পিগেলিরি। ফৈনিকিয়ানা শমরিয়া প্রিনি আতুওয়ংগা লাঃখা পৌলনা বার্ণবা লুঃউরোগু প্রলিরি, যিহূদী মুহু লুঃউরো যা পুয়েং থাওরা ফুরাগু রুসিগেরিলি। দিঃ সাদাংগো ক্রারো ক্যুংসা ঞিংরো কংগং প্যগেলিরি। 4যাখা পৌলনা বার্ণবা যিরুশালেংদুঃ লাঃগেলিরি, য়াংখা ক্যং লুঃউরো, গংখ্যুকরোনা তেমেংদরো চিঃপ্যরো য়াংসুউরোগু লাঃক খেংগেলিরি। য়াংসুউরো আতুওয়ংগা নিংরো থাওরা ফুরা ঈঃ যা লুকলিইরি, য়াংচা আলুংচাগু য়াংসুউরো আলুংসুউগু প্রঃ প্রাগেলিরি।
5ফরীশী আফুয়িমা লৈগায়ক লুঃউ ক্যুংগেলিরি। য়াং ক্যুংসারোচা থাঃরো প্রগেলিরি, “যিহুদী মুহুক লুঃউরো স্যুও ফিয়া আরিইগো ফ্রেফু সাংরি অর য়াংসুউরো মোশির থুংজৈংগু সুংঞ্যং য়জংকিজু য়াংসুউরোগু আঃনা পিফু সাংরি।”
6য়াংখা তেমেংদরোনা গংখ্যুক ক্যংসারো দিঃ আক্রলিলাগো য়ুউরো চেংজাফু কিজু আঃরা তেরেমা চুক্কেলিরি। 7আম্যা আতৈংবাং প্যাংব্রিরি নক পিতর থাঃরো য়াংসুউরোগু প্রলিরি, “ঞিং অকুরো, কুবাংরো সিরিচাগা, আম্যা রাক হ্রিইগা কুবাংরো আতুওয়ংগা থাওরা ফুরা ঙাগো রুঈকক য়ুলিরি, আক্রংগা যিহূদী মুহু লুঃউরো ঙা খুনাংগা আকং সাদাংগো ক্রারো ক্যুংগেঞ্যং। 8থাওরা ফুরাচা হিচা আলুং লুঃউ চিইদানাগু সিরি। য়াংসুউ যা পুয়েং ঙারোগু সেংস্যাংস ওয়িঞেং ল্হুউলিরিলি, যিহূদী মুহু লুঃউরোগুলি য়াং পুয়েং সেংস্যাংস ওয়িঞেং ল্হুরো সাকসি পিইলিরিচাগা, য়াংসুউরোলি আপ্রইকা ক্যুয়েম্রকব্যা। 9য়াংসুউ ঙারোনা য়াংসুউরো কিজু আখ্রা ছুরো তুখুউলি মাঃথালি, আক্রংগা য়াংসুউরো ক্যুংরিলো, য়াংসুউ য়াংসুউরো চিঃঞ্যংগোলি ছিঃ বৈলিরি। 10য়জংছুগি ঙারো অাচৈংরো মুহুক্কি ঙারো যা ওয়েংগো মরুওকনৈ, য়াংচাগো যিহূদী মুহু লুঃউরোগু রুওকচিলো, যাফু কুবাংরো থাওরা ফুরাগো চেংফু ক্রিগেতিলি? 11ঙারো ক্যুংরিচাগা, আস্যাং যীশু সাঃনালো যিহুদী মুহু লুঃউ ক্যুংসারো, যা পুয়েং আপ্রইকা ক্যুয়েম্রক রাঃগেলি, য়াং পুয়েং ঙারোলি ক্যুয়েম্রক রাঃগেরি।”
12য়াংখা আতৈংবাংমা হিচা আলুং লুঃউঃ তিতিক প্যক্কেরি অর পৌলনা বার্ণবা আতুওয়ংগা নিংরো থাওরা ফুরাচা যিহূদী মুহু লুঃউরো আতুওয়ংমা যা এংঅফুয়ি অলুক লুকরিলি, য়াংচা য়াংসুউরো খুনাংগা নাথংগেলিরি। 13য়াংসুউরো চাঃগা প্রব্রি নক যাকোব প্রলিরি, “ঞিং আকুরো, নাথংগে। 14থাওরা ফুরা ঈঃ কুঃ লুঃউ প্যাংফু কিজু যিহূদী মুহু লুঃউরো আতুওয়ংগা লৈগায়ক লুঃউগো রুঈকক য়ুউরো প্রালিরিচাগা, যিহূদী মুহু লুঃউরো কিজুলি য়াংসুউমা চেংজাখ্রাং হিরি। দিঃ চাঃগাচা শিমোন পিতর ঙারোগু প্রলিরি।” 15দিঃ চাঃগানা রিসি চাঃগারোনা তুঃরি, আক্রংগা কেইংমা রুঈরো হিরি:
16‘য়াং নক ঙা লাঃরো দায়ূদ প্যাকচা ঈংগো প্রেংরো ঙা লুকফু। যাচা প্যাক লাঃখারি, য়াংচাগো ঙ্হাং থুকফু অর প্রেংরো আকং প্যাংফু। 17যাফুলি ছুগি আখ্রা লুঃউরো প্রফুছুগি যা হিকচা যিহূদী মুহু লুঃউরোগু ঙাচা ছুরো খঃলিইরি, য়াংসুউরো ঙাাগো হ্রানৈরি।’ আস্যাং, যাসু দিঃ অলুক লুকতি, য়াংসুউ দিঃ চাঃগাগো প্রলিরি। 18আয়াংকাবাং দিঃচা য়াংসুউ চিম্মা হিকলিরি।ূ
19যাকেবা অরলি প্রলিরি, “য়াংচা কিজু ঙা চিম্মাগা, যিহুদী মুহুক লুঃউরো থাওরা ফুরা ঈঃ সাঃসানাগু রুসিইরি কিজু, য়াংসুউরোগু দুঃখাওয়া পিফু মাতৈং। 20ঙারো তুখু অলুক লুকনৈরি, ঙারো য়াংসুউরোগু দিঃ চাঃগা রুয়িনৈরি, য়াংসুউরো হিচা আলুং আঃরুথুউক পুংনা হিচা আলুং জগ্র খেকচাগা আওয়ি নিংগে অর লৈংখ্র ফ্যরো সেঃচা সুদুওয়া হাংসানা সুয়িগো মাঃচাগি। 21দিঃ আনারোগু য়াংসুউরোগু পিফু সাংরি। আক্রংগা মোশি যা প্রলিরিলি, য়াংচা হিচা আলুং ম্রুমা আয়াংখাকাবাং হঃ প্রালিইরি অর য়াংসুউ যা রুয়িরো লাঃখারি, য়াংচারোগু সাদাংদৈং সাদাংদৈং রিঃফুং জাংরোমা ফেএ প্রাগেতি।”
যিহূদী মুহু লুঃউঃউউরোবাদুঃঃ চাঃআ পুখ্রাং
22য়াংখা তেমেংদরো, ক্যংমা গংখ্যুকরো অর ক্যংমা হিচা আলুং লুঃউচা ম্হেকেরিচাগা, য়াংসুউরো কুঃরো আতুওয়ংগা লৈগায়ক লুঃউগো রুঈককরো পৌলনা বার্ণবানা আতু আন্তিয়খিয়াদুঃ রুওয়েলৈতি। য়াংসুউরো যিহূদানা সীলগো রুইকক য়ুগেলিরি। দিঃ যিহূদাগো বরশাব্বালি খঃরি। ক্যুংসা লুঃউরোমা দিঃ নৈয়কচা হিকলিরি গংখ্যুক। 23য়াংসুউরোনা দিঃ চাঃগো পিঃ রুওয়েলিরি,
আন্তিয়খিয়া, সিরিয়ানা কিলিকিয়া যিহূদী লুঃউ মুহু ক্যুংসা ঞিংরোবাদুঃ, ঙারো তেমেংদরোনা ক্যংমা গংখ্যুকরো প্রফুছুগি কুবাংরো ঞিংরোদুঃ দিঃ চাঃআগো রুঈচা। কুবাংরো কিজু মাঙ্গালা বাআ।
24“ঙারো ক্রাগেলিচাগা, ঙারো আতুওয়ংগা লৈগায়ক লাঃরো আম্যা চাঃগা প্ররো, কুবাংরো চিই্কু থুউদুঃ লঃ দুঃ লঃ প্যাংরো দুঃখাওয়া পিইলিরি, ছুগি ঙারোগা য়াংসুউরোগু য়াং পুয়েং অলুক লুকফু মাপ্রলি। 25য়াংচা কিজু ঙারো আলুংসুউ তিজিতৈং প্যাংরো লৈগায়ক্কু রুঈকক য়ুগেলিরি, য়াংসুউরোচা ঙারোমা কংগং সাংগেচা মিছুয়ি বার্ণবানা পৌলনা আতু কুবাংরোবাদুঃ য়াংসুউরোগু রুওয়েলৈতি। 26বার্ণবানা পৌলচা আস্যাং যীশু কিজু সিঃলেংমা রকখিয়িব্যা। 27ঙারো যিহূদানা সীলগোলি রুওয়েলৈতি, যা ফুলি ছুগি, ঙারো যা রুয়িলিরি, য়াংচাগো য়াংসুউরো কুঃবাংরোবামা খুনাংনালি প্রনৈঅং। 28সেংস্যাংস ওয়িঞেংনা ঙারো দিঃচা কংমি তুওয়ক্কেলিচাগা, দিঃ অলুহিক আক্রংরো মুহুকপ্রি অর তুখুমাসা কিজু কুবাংরো আঃপমা মিফিরাঅং। 29য়াং অলুহিক আক্রংরোচা ফ্রতি, কুবাংরো লাকথুক পুংমা পুজচা আঃচাগো মাঃচাআ গেকি, সুয়িঈ মসক্কেকি, লৈখ্র ফ্যরো সেঃচা সুদুঃওয়া হাংসাগো মাঃচাগেকি অর তাখ্যাকলি আপ্রইঈ মাঃমাআ গেকি। দিঃ অলুকরোগা কাকরো নিংগি কুবাংরোমা আকং ফ্রমি। ছুংরিব্যা।”
30পৌল, বার্ণবানা থুউ লুঃউরোগু রুওয়েব্রি নক য়াংসুউরো আন্তিয়খিয়াদুঃ লাঃগেলিরি। 31লুঃউরো য়াং চাঃআগো ফেক্কেলিরি অর য়াংদেমা যা আফ্য চাঃগা রুঈরো হিকলিরি, য়াংচা কিজু য়াংসুউরো কংগং ওয়েংসাগেলিরি। 32যিহূদানা সীল য়াংসুউরো কুঃদৈংলি রিসি হিকলিরি; য়াংচা কিজু য়াংসুউরো আম্যা চাঃগা প্ররো ঞিংরোগু চিঃ আঃ তুঃতাংলিরি অর য়াংসুউরো অক্যুংগো তুঃতাংরো য়াংসুউরোগু কেগেং প্যাংলিরি। 33-34আন্তিয়খিয়ামা য়াংসুউরো লৈগারাক নিংগেলিরি। যিরুশালেংমা যাসুরো যিহূদানা সীলগো আন্তিয়খিয়াদুঃ রুওয়েলৈতি, আন্তিয়খিয়ামা ঞিংরোচা য়াংসুউরোগু ক্রুছুরো যিহূদানা সীলগো অর প্রেংরো য়াংসুউরোবাদুঃঃ রুওয়েলৈলিরি, 35য়জংছুগি পৌলনা বার্ণবাচা আন্তিয়খিয়ামা নিংগেলিরি। য়াংদেমা য়াংসুউরো অরলি আম্যা লুঃউরোনা আস্যাং তাঃরাগো সুওয়েংসাং পিগেলিরি অর হঃরো প্রাগেলিরি।
পৌলনা বার্নবা আতুওয়কচা মুতুঈগে
36লৈগারাক ফ্ররো পৌলচা বার্ণবাগো প্রলিরি, “যা আঃরারোমা ঙারো আস্যাং তাঃরাগো হঃ প্রাগেলিরি, লাঃ, আগু য়াং আঃরারোমা লাঃরো ক্যুংসা ঞিংরোনা আতুয়ি খেংগেমি অর য়াংসুউরো যা পুয়েং নিংগেতি য়াংচাগো ক্রিগেমি।” 37য়াংখা বার্ণবা যোকনগো আতু য়ুউ লাঃফু ক্রিলিরি। দিঃ যোহনগো মার্কলি খঃরি। 38য়জংছুগি পৌলচা য়াংসুউগো আতু য়ুউ লাঃচাগো চিঃঈ মাসায়ালি, আক্রংগা মার্ক য়াংসুউরোগু পামফুলিয়ামা বৈরো লাঃখারি অর য়াংসুউরোনা আতু অর অলুক মুলুকলিইব্যা। 39য়াংখা পৌলনা বার্ণবা আতুওয়কচা মুতুরো ফ্রক্কেলিচাগা, য়াংসুউরো তয়ক্কা তয়ক কুয়ি লাঃখাগেতি। বার্ণবাচা মার্ককু য়ুউরো সাংফমা তাকরো সাঈপ্রাস তংম্রুদুঃ লাঃলিইরি, অর পৌলচা সীলগো রুঈকক য়ুলিরি। 40য়াংখা আন্তিয়খিয়ামা ঞিংরোচা পৌলনা সীলগো আস্যাং আঃলাকমা থিঃব্রিনক, য়াংসুউরো লাঃগেলিরি। 41পৌলচা সিরিয়ানা কিলিকিয়া আতুওয়ংগা নিংরো হিকচা আলুং ক্যংসা লুঃউরো আক্যুংগো তুতাংরো অরলি য়াংসুউরোগু কেগেং প্যাংরো তুতাংলিরি।
Currently Selected:
প্রেরিত 15: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
