YOBA 9
9
Yoba
1-2Ngad va"- ai: gu: alhab' re qhid' phyao: ngo gyo" qu" va".
Ngadqere:- byu dayaug wa Mao"So we' mung bo: re khoru: qo" gai: aung nae" i?
3Yao: we' khag' qo" jho" ngag nae" i?
Yao: wa- khag' yang maqo" phyid: ra"
dao: myid: dataung re qo" myid' ra".
4Mao"So wa pha,jhi" gyai bo mung: kheim: so' gyai qi" ra". Yao: re ngag: thaug' yang: khag' maqo" to" ye, ngad: ra".
5Yao: wa mata" peim" to: lo: bam jham re qhui" pye' ra".
Aimung: nhag' yo" ruyang aijham re phyo' qheim" pye' ra".
6Mao"So wa myid lab: lab: nhao: mung: myidgaung re lhaui" nhan" ke' ra".
Yao: wa myidgaung re thaug' to" ra" zang baung: jham re lao" lhaui" ke' ra".
7Yao: wa ba re mathug' sho' qo" tam" to" ra".
Myi" rere: kyi mabao sho' qo" kad' ra".
8Mao"So wa- mug: khaung re phyid: lhu: ke' ra" au: khag' mabao" ngad: ako".
Pang:lai:: maojaung" nho: dao gaung: mae zab nhae" rure re: khag' mabao"-
9Mao"So wa mug: kin mae kyi jham re lhao" to" ra".
Kyilo; lakhyan"- Bo" myhung- Cad' myhung we' mug: thao shad' mae" kyi jham re lhao" to" ra".
10Yao: kad' ra" mau" qi: jham re ngonhaung" matho' ba: gyo:-
Aimung: yao" mug' pho: mau" wa thao" gan: lo" ga" ru majo,-
11Mao"So su" lai: lo" ngadqere: yao: re ngo mathe' myao-
12Yao: o: rure yao: yu: pye' ra". Aimung: yao: re khag' yang maqo" tam"-
yao: re khag' yang re:- nao pe"mung: airu: kad' na: i? ga: mavae" myid: ngad: ra".
13Mao"So nho: nhag' yo: wa gang" tang: jo; ra".
Yao: wa yao: re ngag: thaug' nae" qhid' mae" panglai: maojaung: Rahab re bao" thaug' byid' ra" yao" gyevo qere khyoe' kad' pye' ra".
14Aimung: Mao"So re phaug' tau: nae" dao: kheim: jham re ngo khoru: ba: qo" qho nae" i?
15Ngo wa qobo maqo" ngad sho' ngadqere:-
nga" nho: tarha" agyi Mao"So mae" nhag' khyag' yu nae" rure za: aqo" mho' lo"-
16Airu: ngad sho' qere:- yao" yang ngore dao: qe to" jhau nhao: re-
yao: ngore tae" gyo: byid' li" nae" ein: maba: tho' myid: lam-
17Yao: wa- pe" si: mabo: rumae ngore be; khyad' mung:
thaung" cad' pye' nae" qhid' mae" la qam" re nhao: ke' byid' ra".
18Yao: wa ngore so' tha" she nae" akhang" mabyid: ngad: ra".
Yao: wa nga" apyad re kho" ru byang" sho' ke' to: byid' ava".
19Ngo wa qam: jam: ci: re gai nae" laug? Mao"So re qam: jam" yang jhan: nae" laug?
Ngo wa yao: re tarha" yung" gau: nae" laug? yao: re khag' yang qo" lo" nhao nae" i?
20Ngo wa- qobo maqo" mung: ngo wa jhaug' zaug: yaug ngad:- ngadqere: nga" dao: jham wa qobo qo" nhohab mung: ra".
Aimung:- ngo jhau: ru ja: khao: ngo" wa ngore qobo zhaug' ra".
21-22Ngo wa qobo maqo" yaug ngad:- ngadqere: ngo pe" shui manho lo: ngo wa na: nghang: va".
Pe" akhyag yaug mangad: lo:-
qobo qo" qo" maqo"qo" Mao"So wa ngonhaung" re phyo' qheim" pye' li"nae".
23Qobo maqo" su dayaug nyag din taung" shid: lo" re Mao"So qi: ra".
24Mao"So wa makhyang: mashab nhag' lam: kaui mo, re mug:myid byid' pye' ra".
Yao: wa tarha" agyi alhab' re myo,jid nhao: ra".
Aimung: aire Mao"So makad' re khag' yang kad' ra" i?
25Nga" ba na jham wa phyad za: tao" lai: lo" ako" aigu: mae" daba re: magai ngad: ra".
26Nga" apyad wa- phyad: thao" ra" qid lha we' dakhyo: lai: lo" ra".
Aiwa thao lho re khe' dao" gyo" lo: ra" zeim baung: we' dakhyo: mye; ra".
27-28Ngo wa qinug sam: su kad' mung: nga" dae khai" nho: rure to" myhid' pye' nae" qam: ke' mung:-
nga" dayin dayo: kham zo" ru alhab' wa ngore lodam: tug' kyaug' na: ngad: re wa-
Mao"So: yang ngore- qobo qo" ga: qobo zhaug' to" rure ngo ba: ra".
29Ngo re qobo qo" ga: qobo zhaug' ruyang ngo pe"mung: sang: kho: nae" i?
30Nga" qobo jham re- pe" ja" sa:pya" yang re: maqo" cid' san: pye' ngad: ra".
31Mao"So wa- ngore maca' majhad' tham: khug khyo shapye' khyo" pye' ra".
Aimung:- nga" nho: mai bau: jham lhao" re: ngore ca' pye' ako".
32Mao"So qe xao su byu angad: re yao: re ngo qo" phaug' tau: nae".
Nga" shid' zo" nho: myan" myo" rure dao: qo" phyid' byid: nae" qhid' mae" tarha" yung" khyo qo" gai: ye: naeva" ru-
33Ngadqere:- nga" shid' zo" agyo: mae vao: jhau byid: nae" byu khag' mana ngad: ra".
Mao"So we' nga" shid' zo" gyo: mae dao: kho' phyid' byid: nae" khag' mana-
34Mao"So we"- ngore qobo dae byid' ru to" pye' la, se,-
ni" kyaug' tin" rure va: khyo yu: lo" wa,.
35Ngo wa magyaug-
ngo wa ngoyao" nhag' lam: re ba mung: ngo dao: jhau naeva".
Currently Selected:
YOBA 9: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
