YOBA 8
8
Bildad
1-2Nao wa ni" dao: je dao: myid bin: jhau va" i?
3Mao"So wa tarha" dangman" rure khonhae" re: manai: sham" nag: pye'-
yao: wa jo: rure kad' nae" khonhae" re: malhoe' pye' ngad: ra".
4Ni" zo: qe wa Mao"So re qobo shad' ge-ang va".
Aimung: yao: wa yao: bam kham zo: nae" man: qi" ra" khyo" yao: bam re qobo dae byid' ava".
5Ngadqere:- ana" lhang: lo mung: qam: bo: thao" ra" Mao"So re goe; mho' wa,-
6Nao qe ainho" dangman" mung: san sin" yaug ngad: re wa-
Mao"So li" mung: nao re bao" yu nae" ngad: ra".
Aimung: ni" aphug' jhaung qhu" khyo" ni" yham byu qere dam: tau: to' byid' li" nae".
7Ailao" Mao"So nao re byid: nae" ru we' tai" re-
nao seim" pye' va" jo,nho" alhab' wa pe" lhao" magai: tai" nae".
8Ganhae" gaco' mae" pha,jhi" re dazab kho lhau" qho: qu" shi: wa,.
Ngonhaung" nho: phug' pho" qe- mho" zhao: yu: ra" dangman" rure myid: ca: qu" wa,.
9Ngonhaung" nho: apyad kao so' wa lang" ra" ngonhaung" wa pe" yao: maba-
Ngonhaung" wa mug:myid dao mae bao qab jham we' dakhyo: na: lai: lo" ako".
10Ngadqere:- ganhae" gaco' mae" pha,jhi" bo mo; yang nao re mho" shid' vageshao:
yao: bam ta" ang: rure tae" gyo: wa,.
11Qid phaung: jham wa- qid majo; rumae maqo" yaug- aijham re tham: nheim" taung gaung mae khonhae" re: maqhug' myao.
12Qid kin" byaug lao"-
thau: ci magai shimae" aijham shi" sao qhid' jhoe' mai: lo" ako".
13Mao"So re maba mo, wa ai: akyu" mabo: ra" qid phaung: jham we' dau: ako".
Mao"So re to" myhid' pye' gelao" yao: bam: myid: lao" khyo ci: phyaug' pye' ako".
14Yao: bam wa-
phyogao: yham khyang re myid: lam: na: ako".
15Yao: bam qe phyogao: yham re ngha: na: re aiwa yao: bam re qo" zaui" ci nae" i?
Yao: bam qe khyang dakhe' re zhab' ci: re ai wa yao: bam qhid' mae" gang: nae" i?
16Makhyang: mashab mo, wa ba zho mae myo, gae yaug: thug' li" ru we' dakhyo: yaug: thug' li" ako".
Dakhyae: geim" mae byo: lo" ra" myo, gae we' dakhyo: yaug: li" ako".
17Aijham: nho: agyi: jham wa laug zang jham re thab' pye' ako".
Aimung: laug zang khao: ngo" mae tang za: kyin" zhaug' ci: ako".
18Ngadqere:- yao: bam re lao" phan" pye' lao"
yao: bam ai: jo, qo mae yaug: lai: lo: rure khag' re: maba genae".
19Ngad va"- makhyang: mashab mo, qo" yu: ra" ngaui bau: khyo wa aigu: za: ngad: ra".
Gaje byu qe li" mung: yao: bam: jo, qo re yu: pye' byid' ako".
20Ngadqere:- jhaug' zaug mo, re khonhae" re: Mao"So mashapye' nae".
Makhyang: mashab mo, rere: khonhae" re: bao" thaug' byid' li" nae" mangad:-
21Yao: wa nao re dam: qi nhao mung: ngaui bau: taung" dam: hug' nhao: nae".
22Ngadqere:- yao: wa nao re nghang: mo, re nga: yeim nhao: li" nae".
Aimung: makhyang: mashab mo, yham jham wa baui" byaug: li" nae".
Currently Selected:
YOBA 8: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
