YOBA 10
10
1Ngo wa na: ngau" va".
Nga" alokho: yang: nyhung: ra" thoe re tae" gyo: byid: la,-
2Mao"So we"- ngore dao: daphyid' la,-
ngore ta" kyo: la,- ngore qobo zhaug' ru pe" si: ngad: ra" i?
3Nao aiqhi" mamyan: makhyad' yhin" ru wa jo: ra" i?
Nao yao: phan" phaug' to" rure nghang: gai: i?
Aimung: nhag' khyag' myid mabo: ra" mau" re qinug sam: su qu" qi: ru gai: i?
4Boe" lo: ra" gu: re ngonhaung" myao: ruru: nao myao: i?
5Ni" apyad wa- ngonhaung" nho: apyad qhi" lang" ra" i?
6Aire pe"mung:- nao wa nga" qobo jham re cao" qu" yang:
ngo shad' ra" qobo ja: khao: ngo" re cao" qho: qin" ra" i?
7Ngo qobo maqo" ru we' ngore
khag' yang re: ni" lo, mae" maqo" khyad' yu: rure nao ba: ra".
8Ni" lo, yang ngore kad' mung: akhyao kad' to" ra".
Ai: lo; yang yao: ngore phyo' qheim" pye' ra".
9Nao wa ngore zhogam: yang kad' to" rure myid: beim: wa,-
Nao wa ngore phalhug khyo dam: tug' khyoe' mhan" pye' nae" i?
10Nao wa ngore myhung: ke' nae" qhid' mae" nga" pho" re qam: byid' ra".
Nao wa ngore nga" myhi" nho: aung khug mae qi" li" nhao: ra".
11Nao wa nga" shoqug: jham we' qug: khyao jham re akhyao kad' to" ra".
Aimung: shoqug: jham re shomhaung" shogyi: jham we' shoqid: yang thab' to" ra".
12Nao wa ngore kao so' we' gang" tang: ra" jhid: de; myid ke' byid' ra".
Aimung:- ni" gun caung: ruyang ngore daui: na: jo, nhao: ra".
13Ngadqere:- ai: ayo, alhab' gu: mae
nao wa ngore dae te' nae" qhid' mae" sae za: khug' yaung: to" rure ngo ba va".
14Nao wa- ngore qobo khonhae" kad' nae" laug- ga: lhaug' qu" lai: lo: va".
Airumung: nao ngore qobo maqo" khyad' byid: ngad: ra".
15Ngo qobo shad' lao" jao" ngo wa nao we' gyo: mae qug: va".
Ngadqere: ngo jo: ru kad' re ra" au: re ngo mang gai pe" maqo" yu:
Ngo wa myid myo: mung: qho' phau: va".
16Ngo qe aung doe; ru aqo" yu: ngad: re
nao wa ngore khangkhyi we' dakhyo: kung" pye' ra".
Nao wa ngore dae qo" te' sho' mug' pho: lo, mau" jham rere: kad' ra".
17Nao wa ngore ngag: thaug' nae" sagse: daja: ja: khonhae" re: aqo" ci: ra".
Nao: yang ngore nhag' yo" ra" ni" nhag' yo: wa je: axo: li" ra".
Nao wa khe' zin" ru asag' daja: ja: re khonhae" re: myid: kyae: na: ra".
18Mao"So we"- nao ngore pe"mung: khau: li" nhao: i?
Ngo re khag' yang mathe' myao: shire ngo shid: byaug ang va" ru ngad: ra".
19Yao: myhi" aung mae" lab khug khyo khyao za: lo" nae" ein: ru wa-
manhae" na: re gai ra".
20Nga" apyad wa alaug thao" lo" va" mangad: i?
Ngo yao: re za: nha: to: la, ngo phao: thug' lo" ra" ayo, re ngaui bau: taung" kham zo: nhao la,-
21Ngo wa mamyao" re lo" byaug mung: khonhae" re: madam: tug' lo lo nae".
Cad no, mung: mug: dab: ra" mug: khyo lo" naeva".
22Bo" bao yao: re: cad' no, boe" ra" jo, qo- mug: cad' mang:- aqab qab: ra" mang:-
nhag' cad' nayaug mang: khyo lo" naeva".
Currently Selected:
YOBA 10: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
