YOBA 11
11
Zopha
1-2Ce: lajheim: mabo: rure khag' maphaug' tau: genae" i?
Ai qhi" jhau: ruyang byu dayaug re qo" dangman" nhao: ra" i?
3Yoba we"- nao re ngonhaung" maqo" phaug' tau: ein: myid: i?
Ni" jung" dao: jham: yang ngonhaung" re majhau lo: qo" tae" jo, nhao nae" i?
4Nao ta" ru dang: ga: nao phug: ra".
Nao wa Mao"So: myo,khung: mae dangman" ga: nao phug: ta" ra".
5Mao"So: yang nao re phaug' tau: byid' qa: we"- ein: ngo lhaung" myid:-
6Yao: wa nao re- pha,jhi" myo: sho' va: jo, rure ta" kyo" li" nae".
Xao su byu: qhid' mae" saung" no; ra" khyo jham jo; ra".
Mao"So wa nao re- nao leim zo: nae" man: qi" ra" tho' yeim" yang: qobo dae byid' na: ra".
7Mao"So nho: qi" qhang: ru we'
kheim: so' atu" aka" we' kyo: re nao qo" qho: myao byid: nae" i?
8Mug:gaung wa Mao"So: qhid' mae" thao" ga" ru majo, ngad: ra".
Ngadqere: aiwa nao matho' myhi: ra" mae jo; ra".
Mao"So wa movo: mug: re ba: ra".
Ngadqere: nao wa aire maba ngad: ra".
9Mao"So nho: qi" qhang: ra" khyo wa myidgaung tho' je: lu: ra".
Pang:lai:: tho' re: je: lae: ra".
10Mao"So: yang nao re taung" yu mung: tarha" yung" gau" to" re
yao: re tam" pye' nae" khag' na: i?
11Mao"So wa byu khoyaug aphug' made; rure ba: ra".
Yao: wa yao: bam: makhyang" ra" lo,mau" alhab' re myao: ra".
12Loze lae" jham asham" khyo" khau: li" lao" she,-
nhag' magyang: mo, pha,jhi" bo: qhid' li" genae".
13Yoba we"- ni" nhag' lam: re jo jo kad' to: wa,-
Mao"So jhao" myhi: joe" ye: wa,-
14Ni" yham mae" makhyang: mashab: ru we' shad' rure yu: pye' wa,-
15Ai: thao mug: myid re thaug' qhao" yang: kao so' dam: daui wa,- nhag' lam: tang mung: vae" ra" myid bo wa,-
16Ailao" ni" qug: khai: jham alhab' wa yug: lai: lo" mung: mamyid: beim: lo" ra" qid joe" ru we' dakhyo:
ni" xam: myid mae sham: baui" lo" byaug nae".
17Ni" apyad wa- na" gaung ba tho' je yang: bao: li" nae".
Aimung: kao so' gyaung: khyo: nho: cad' no; thao" ra" yo, khyin: wa ne,seim mug: bo" zo" we' dakhyo: bao: li" nae".
18Nao wa- gug:gam: ru we' myid: lao" ru byang" sho' daui: na: li" nae".
Mao"So wa nao re gye vha byid: mung: dugno: qo" yu nhao nae".
19Nao wa ni" gyevo jham re magyaug ca" nae".
Byu myo: sho' mo, wa nao mae" bao" thaug' ru li" mho' li" genae".
20Ngadqere: makhyang: mashab: nhag' lam: kaui mo, wa nhag' lam: thao" ru we'
qu" qin" mung: phao: loe, nae" khyo maqhug' myao genae".
Yao: bam: myid: lao" jo, qo ein nae" ru wa shid: ru joe" li" nae" ru za: ngad: ra".
Currently Selected:
YOBA 11: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
