ESAIA 65
65
Tau: Lhan" Rure Mao"So: Yang Qobo Dae Byid' Ra" Khyo
1 Asang wa nga" byu qe: akyu" mho' dao: re tau: byid: nae" ngo jin" jin" ngad:- ngadqere: yao: bam akyu" mamho' ngad: ako". Yao: bam ngo re qho myao genae" ngo jin" jin" ngad:- ngadqere: yao: bam qho: nae" seim" lhao" re: maseim" ngad: ako". Ngo cemae na: naonhaung" re bao" byid: nae" ein: ngo dao: phyid byid: nae" qhid' mae" jin" jin" ngad sho' ngadqere: byumyu" wa ngo re akyu" mamho' ngad: ako". 2Shad' ra" mau" re nao: gyi: zag kad' mung: yao: bam qad: ra" khyo ye" lo" ko" ra" nga" byumyu" re ngo wa khonhae" re: pang" yu nae" jin" jin" ngad: lo: ra". 3Yao: bam maba: qho' lo: ngo re nhag' yo: nhao: na: ako". Yao: bam wa gyang" lho" khyae mae tarha" taung bug so ngaui" xeim: re ngaui" byid: mung: taung bug phan jham: dao mae sheim nae pyo: ja: phad' ngaui" byid' ako". 4Shid: ra" mo; subyo jham re dao: myid: ye myid: nae". Yao: bam myi" re laug aug' we' lab jham khyo ye" ako". Yao: bam wa vo, sho: zo: mung: tarha" taung bug so re ngaui" byid' ra" shokyug' qang: re shaug' ako". 5Ai: thao yao: bam wa gaje qere ngonhaung" jhao" date' li" ge,- ngonhaung" wa gyai gyang" lho" yang: naonhaung" magai: tin:- ga: ta" ako". Ngo wa airu" ra" byu qeru: maqo" zang" jo,- yao: bam re gye kad' ra" nga" nhag' jam: yo" ruwa khonhae" re: mashid: ra" myi: we' dakhyo: ngad: ra".
6Yao: bam: qobo dae re ngo myid: phyid' to: gau ngad va". Yao: bam re dao: phyid' ru re tung" to: va". Yao: bam kad' lo: rure ngo maqu" lhaui" pye' nae". Yao: bam: qobo jham we' yao: bam: phug' pho" qenho: qobo jham qhid' mae" ngo yao: bam re aphug' byid: nae". 7Yao: bam wa bug gaung mae" tarha" taung bug so phan jham mae sheim nae pyo: ja: phad' ngaui" byid: mung: ngo re- makhyang" ra" dao: jhau: ako". Airumung: lai: lo: ra" ayo, mae yao: bam: lo,mau" jham qhid' mae" man: qi" ru we' dakhyo: yao: bam re ngo qobo dae byid: nae"- ga: ta" ra".
8 Asang wa sabyi shi: agai re khag' re: mazai" phyo' pye'- ai: atha" aijham: yang yao: bam sabyi qang: kad' ako". Nga" byu qe alhab' rere: ngo maphyo' qheim" pye' nae". Ngo re caung da" byid' ra" mo, re ngo khyad' yu nae". 9Yuda amyu" kaung mae bobo: ra" Israel qere ngo shaman" byid: nae". Yao: bam wa nga" nho: bam jham re sang: li" genae". Ngo re caung da" byid' ra" ngo khyin: yu: to" ra" byu qe wa aimae qo" na: li" genae". 10Yao: bam ngo re caung:pa" byid' li" genae". Amung: yao: bam: yao jham we' nung: jham re ba vao shad' mae" Sharon din" we' ba thug' shad' qug: khai: lao: khaung: mae jo; ra" mhin: gyo, jao: khyo jhui" ye" lo" li" genae".
11Ngadqere: nga" nho: gyang" lho" bug gaung Ziun rere: pe" shui manho: ra" mo, ngo re shapye' pye' mung: zhau: vha:gai nhao: ru we' au: pa lo, kyo' boe" nhao: ra" Gad we' naonhaung" wa- ai Meni so re caung:pa" mo, naonhaung" we' madau genae". 12Airu wa mai: shid mung nae" ra" naonhaung" au: pa ngad: li" nae". Pe"mung:ga"re ngo naonhaung" re khai: au: re naonhaung" matau:- ngo dao: jhau: au: re naonhaung" matae" gyo: yang: ngad: ako". Naonhaung" wa- ngo re mho dao: magyo: nae" we' makhyang" ru kad' nae" qhid' mae" khyin: yu: ako". 13Ngo re caung:pa" mung: mho dao: gyo" ra" mo, wa magan: mago" qo" zo: qo" shaug' li" genae". Ngadqere: naonhaung" wa vae: moe; qid shab' qhug' li" genae". Yao: bam wa ngaui pyo" li" genae"- ngadqere: naonhaung" wa nga: yeim genae". 14Yao: bam ngaui bau: yang: nghaui"caung: li" genae". Ngadqere: naonhaung" wa nhag' lam: baug: go, yang: gyi: ngug: li" genae". 15Nga" nho: khyin: yu: to" ra" byumyu" wa naonhaung" mang re nhang: kheim: khyo" ci: li" genae". Asang kho:kham ngo wa nao re se' pye' nae". Ngadqere: ngo re mho dao: gyo" ra" mo, re wa mang sag' byid: nae". 16Shaman" jeju mho' ra" mung"dan: mae" byu dayaug yaug wa jhaug' zaug: ra" Mao"So: yang shaman" byid: nae" rure re: mho' li" genae". Jham tang" ra" yaug khag' ngadqere: jhaug' zaug: ra" Mao"So: mang re lao: yang: jham tang" li" nae". Lai: lo" ra" ayo, mae" qug: khai: wa baui" byaug mung: to" myhid' pye' li" nae"- ga: ta" ra".
Phan" To" Ra" Khyo Asag'
17 Asang wa- ngo wa myid kin asag' we' mug: kin asag' re phan" to: yaug ngad:. Na: lai: lo: ra" ayo, mae" boe" ra" khyo jham alhab' wa bin sho' to" myhid' pye' qhug' nae". 18Ngo phan" to" rumae ngaui bau: ngaui lho" mung ge,- ngo phan" to" ra" Yerusalem wa ngaui bau" ru byang" jo; li" nae". Amung: yao" vobyu qe wa ngaui pyo" li" genae". 19Yerusalem we' yao" vobyu qe: mathao mae ngoyao: re: ngaui bau" ru byang" jo; li" nae". Aimae ngug byid gyo" ru majo, nae". Bao" thaug' mho' ru majo, nae". 20Zonau" qe mashid lo: genae". Byu alhab' mo, kao byang" sho' qo" na: li" genae". Dayo zin ngad mo, re wa apyad ngai shi" ga: jho: li" genae". Ai: apyad majoe" shire shid: ru wa ngoyang yao: bam re qobo dae byid' ra" ve, so: ngad: li" nae". 21-22Byu qe wa yham jham kad' mung: aimae na: li" genae". Aijham mae gatau khag' mana genae". Yao: bam wa sabyi khyae jham re qho: mung: sabyi qang: shaug' pyo" na: li" genae". Aire su gaje qe qo" shaug' genae" mangad:- sag' gae we' dakhyo: nga" byu qe wa kao qhang sho' qo" na: li" genae". Yao: bam zaui" ra" mau" aphug' re yao: bam byang" sho' qo" kham zo" li" genae". 23Yao: bam zaui" ra" mau" wa aung myaug: li" nae". Yao: bam: zoshao qe wa qug: khai: kyi" khyag' ru mathaung" qhug' genae". Ngo wa yao: bam we' yao: bam: myid:zo: qere joe" lo nae" ayo, mae shaman" byid: nae". 24Yao: bam akyu" mabin: mho' shire lhao" yao: bam: akyu" mho' dao: re ngo tau: byid: nae". 25Zag ne jham we' yao nau" qe daga" zo" li" genae". Nung: jham we' dakhyo: khang khyi jham wa khovho zo" li" genae". Lhao maui jham re gyaug maca" lo nae"- aijham: zo:ve wa phalhug ngad nae". Nga" nho: gyang" lho" ra" bug gaung Ziun mae gyaug ci" dae te' ru makhyang" ru pe" majo, lo nae"- ga: ta" ra".
Currently Selected:
ESAIA 65: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009