ESAIA 64
64
1Nao wa pe" mung: yang: mug:gaung re lao" cad' mung: magyo" li" i? Bam jham wa nao re myao mung: gyaug: nin" na genaeva". 2Yao: bam wa myi: laung dao mae zhau: na: ra" qid we' dakhyo: ko, ko, nin" na genae va". Ni" gyevo qere ni" qam: so' li" qhu" byid: wa,- ni" qhid' kheim: mae byumyu" qe re ko, ko, nin" nhao wa,. 3Nao wa ngonhaung" mamyid: to" ra" ja: jham: yang li" kyaug' tin" ra" ayo, jo; lo: ra". Bam jham wa nao re myao mung: gyaug: nin" ako". 4Yao: re lam khug: ra" mo, qhid' mae" airu" ra" mau" jham re kad' yaug nao we' dau: ra" Mao"So re khag' re: mamyao: qu"- magyo" qu" ngad: ako". 5Nao wa jo: ra" mau" kad' ru mae ngaui bau" ru qo" yu ko" ra" mo,- yao: bam nao: yang khoru: kao so' daui nhao nug: rure myid: beim: mo, re lham: pang" yu: ra". Nao wa ngonhaung" re nhag' yo" lo: ra". Ngadqere: ngonhaung" wa xo' yang: qobo kad' lo: ra". Nao gyai nhag' yo: ngadqere: ganhae" gaco' mae" ngonhaung" wa xo' yang: shad' ru kad' lo: bam va". 6Ngonhaung" alhab' wa qobo jab qe boe" lai: lo va". Ngonhaung" nho: gai: thao" ra" lo, mau" jham wa bin sho' maca' majhad' ngad: ra". Ngonhaung" nho: qobo mathao mae la: yang hug' tao" lo" qhug' ra" kyaug' jhoe' lo" ra" avho' jham we' ngonhaung" dau va". 7Akyu" mho' yang: nao jhao" khag' re: matug' lo- bao" thaug' ru qhid' mae" nao jhao" khag' maye: ngad: ako". Ngonhaung" nho: qobo mathao mae naoyao" gaung re vho' jo, mung: ngonhaung" re shapye' to" ava".
8Ngadqere: Asang we"- nao wa ngonhaung" nho: pho" ngad: ra". Ngonhaung" wa zhogam myid we' dau mung: nao wa ug' kad' yaug we' dau: ra". Nao ngonhaung" re phan" to: va". 9Airumung: ngonhaung" re nhag' dataung" yo: la,- ngonhaung" qobo jham re apyad ato mae dazaui" ci byid: la,- ngonhaung" wa ni" byumyu" qe ngad:- ngonhaung" re nhag' khyag' byid: la,. 10Ni" nho: gyang" lho" ra" vogaung: jham wa din"pyad' yo we' dau mung: Yerusalem wa cae: jhug tag byo; jo; ra". 11Ngonhaung" nho: phug' pho" qeyang nao re caung:khin" byid' ra" ngonhaung" nho: gyang" lho" mung: yaung" ra" jo, qo Caung:pa" Yham wa myi" yang ngha" pye' ru qhug' ava". Ngonhaung" jhid'de; ra" jo, qo jham alhab' wa byo; qeim: jo; ava". 12Asang we"- ceru re nao pe" makad' lo: na nae" i? Nao pe" makad' lo: ngonhaung" qo" zang: qhao" ra" azhao" tho' je yang: ngonhaung" re dayin dayo: qug: khai: kham zo: nhao nae" i?
Currently Selected:
ESAIA 64: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009