ESAIA 66
66
Byumyu" Mung"dan: Jham Re Asang Dao: Kho' Ru
1 Asang wa- mug:gaung wa nga" zaung tao"- myid gaung wa nga" khyid kai: tao" ngad: ra". Aire pe" ja" yham nao ngo re qo" kad' byid: nae" i? Ngo na nae" pe" ru" ra" jo, qo i? 2Mug: khaung geim" re ngoyao: phan" to" ru ngad:- ngo wa nhag' lam: nyham: khyo" mo, we' myid tha" mo,- ngo re gyaug phug' mo,- ngo re mho dao: gyo: mo, re ngo o ngaui: ra".
3Byu qe wa yao: bam o ngaui: ra" khyo" kad' ako". Yao: bam wa ngaui" xeim: khyo" nung: jaung lo: re se' re- xao su byu re ngaui" xeim: khyo" ngaui" byid: qere:- yao: bam: yao nau" re ngaui" xeim: khyo" ngaui" byid: qere:- lakha" nho: lang zang: re lao" khyug' qere:- yao: bam gaug zo ngaui" xeim: vo, sa: ngaui" byid: qere:- yao: bam: sheim nae pyo: ja: phad' ngaui" qere:- so alho re akyu" mho' qere: alhab' wa yao: bam: qhid' mae" dakhyo: za: ngad: ra". Yao: bam maca' majhad' lo,mau" khyo" caung:pa" ru mae pyo: khyo qho: ako". 4Airumung: ngo wa yao: bam: dao mae yao: bam gyaug: ra" ja: qug: khai: kyi" khyag' rure boe" nhao nae". Pe"mung:ga"re ngo khai: au: khag' matau: byid:- ngo dao: jhau: au: khag' matae" gyo: byid: geyang: ngad: ra". Yao: bam wa ngo re mho dao: magyo: byid: nae" we' makhyang" ru kad' nae" khyin: yu: ako"- ga: ta" ra". 5Yao: re gyaug phug' ru we' mho dao: gyo: byid: ko" ra" mo, naonhaung" we"- Asang ta" rure tae" gyo: ge,- naonhaung" ngo re jhaug' zaug geyang: naonhaung" byu damyo" wa naonhaung" re nghang: mung: naonhaung" we' pe" majho" sin" ra" khyo" kad' li" genae". Yao: bam naonhaung" re jung" mung:- naonhaung" ngaui bau" rure ngonhaung" the' myao sho' Asang wa yao" qi" qhang: rure qhu" byid: mung: naonhaung" re khyad' yu vashao:- ga: ta" ako". Ngadqere: yao: bam yao: nga: yeim li" genae". 6Tae" gyo: ge,- vogaung: mae" thoe qi: Caung:pa" Yham mae" thoe wa yao" gyevo qere Asang: yang qobo dae byid' na: ra" thoe ngad: ra" wo"-
7Nga" gyang" lho" vogaung: wa khonhae" re: zo: makhau: qu" ra" myiqe: dayaug nyag din taung" zo: khau: li" ru we' dau: ra". 8Airu" rure khag' khonhae" myao: qu"- gyo" qu" vako" i? Byu damyu" wa daba na mae za: khau: li" i? Byumyu" makhau: li" shire Ziun wa dayin dayo: qug: khai: ru myao" sho' makham zo: ca" nae". 9Nga" byu qere zo: khau nae" azhao" we' yao: bam re makhau: li" nhao sho' ra" azhao" khyo joe" sho' ngo boe" nhao: li" nae" ein: dajho ge,- ga: Asang ta" to" ra".
10Ce: vogaung: re jhid'de; mo, naonhaung" we"-
Yerusalem we' daga" ngaui bau: ge,- yao" qhid' mae" bau: ge,-
yao" qhid' mae" kaug' ngug: na mo, naonhaung" we"- ana" yao: we' daga" ngaui bau: ge,.
11Zoshao wa yao: myhi" qao gao mae bau" ru we' dakhyo:
naonhaung" wa yao" jo,nho" mae ngaui bau" li" nae".
12 Asang wa nao re jo,nho" na: dai: ru myao" dang: jo, sho' byid: nae". Byumyu" qe: nho: jo,nho" wa khonhae" re: mayug: kin" lo" byaug: ra" qid gyaung: we' dakhyo: nao jhao" yug: vao nhao nae". Nao wa yao: myhi" yang yao" lo, mae vo; ci mung: jhid'de; myid we' keim" yang: nug' jhaug' byid' ra" zoshao we' dau: li" nae". 13Yao: myhi" wa yao: zo: re nhag' tang" byid' ru we' dakhyo:- ngo wa nao re Yerusalem mae nhag' tang" byid: nae". 14Ceru: boe" rure nao myao lao"- nao ngaui bau" li" nae". Ai wa nao re qam: bo nhao mung: qao" zin" nhao nae". Ailao" Asang ngo wa ngo re mho dao: gyo: byid: mo, re bao" thaug' byid: yaug ngad mung: nga" gyevo qere gye kad' mung: nga" nhag' yo" rure qhu" byid: yaug ngad: rure naonhaung" ba: li" genae"- ga: ta" ra".
15 Asang wa myi: we' daga" joe" li" li" nae". Yao" yang nhag' yo" ra" mo, re qobo dae byid: nae" qhid' mae" yao: wa la qam" nho: daung mae zaung: jui" li" nae". 16Yao" yang qobo qo" qho: myao: ra" myid gaung: byu qe alhab' re myi: we' shae pyang" yang yao: qobo dae byid' li" nae". Myo: sho' mo, wa se' pye' qhug' li" genae".
17 Asang wa- yao: yao" gaung re tarha" taung bug so re caung:pa" nae" qhid' mae" kyang" san: pye' mo,- gyang" lho" khyae khyo jin: ye" lo" ru mae boye: mo,- vo, sho:- qug sho: we' maca' majhad' boe" ra" gatau zo:ve zo: mo, qhid' mae" thao" lo" nae" ayo, jhao" ava". 18Ngo wa yao: bam myid: qu" ra" khyo jham we' lo, mau" jham re ba byid' ra". Byumyu" alhab' re zhang" yu nae" qhid' mae" ngo joe" li" na:- yao: bam zang" li" gelao"- nga" qam so' pe" qo" kad' rure ba: li" genae". Amung: yao: bam re qobo dae byid: yaug wa ngo ngad: rure ba: li" genae". 19Ngadqere: ngo wa damyo" re wa tang" to: mung: nga" lahau: re magyo" qu"- nga" qi" qhang: ru we' qam so' re mamyao: qu" ko" ra"- Spain- Libya- Ludia we' yao" nho: lo, dau: ra" lo, la: bag mo,- Tuba we' Greeg jham ngad: ra" mung"dan: we' byumyu" qe khyo yao: bam re nhao: ke' nae". Ce: byumyu" phaung gaung: mae yao: bam wa nga" qi" qhang: ra" khyo re ta" hau" li" genae". 20Yao: bam wa naonhaung" nho: mao: nhaung: qere nga" qhid' mae" jhaung qhu" khyo" byumyu" qe mae" jhui" tug' lo: li" genae". Yao: bam re myao: jham- loze jham- gola:u jham myao: lhin" jham we' qo tho lhin" jham: dao mae caung:pa" thung" khyo" san sin" ra" ke' ja: zai jham mae Israel byu qe Caung:pa" Yham khyo gaug zo ngaui" xeim: jham re tho: li" ko" ru we' dakhyo: za: Yerusalem mae" nga" gyang" lho" bug gaung khyo yao: bam jhin" lo: li" genae". 21Ngo wa yao: bam mae" damyo" re khinjaung qe we' Levi byu qe kad' nhao nae".
22Myid gaung sag' we' mug:gaung sag' wa nga" qam: so' khyo" yang jo; jo; li" genae". Ai we' dakhyo: ni" myid:zo: qe we' ni" mang wa jo; jo; li" nae". 23Lho" xin: poe ba khao:ngo" we' Dugno: Ba khao:ngo" byumyu" ja: khao:ngo" nho: mung" byu qe wa ce: Yerusalem mae ngo re li" caung:pa" li" genae". 24Yao: bam to" lo" ko" au:- ngo re gye kad' tau: lhan: mo; nho: mao gaung jham re yao: bam myao: li" genae". Yao: bam re zo" ra" bathaung wa khonhae" re: mashid- yao: bam re nga" ra" myi: wa khonhae" re: mashid ngad: ra". Aibam: nho: myao jao: wa xao su byu alhab' qhid' mae" maca' majhad' ngad: li" nae"- ga: Asang ta" ra"- ga: ta" ra".
Currently Selected:
ESAIA 66: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009