2 KHO:KHAM 4
4
Myaung Sho" Ra" Cug' Mo" Myhi" Re Elisha Bao" Thaug' Byid' Ru
1Lapa phung: mae bobo: ra" cug' mo" myhi" dayaug wa Elisha jhao" ye: mung: Asang we"- nga" yham sang pho" shid va". Nao ba: ru we' dakhyo: yao: wa Mao"So re gyaug phug' ra" yaug ngad: ra". Ana" yao" jhin sang byu dayaug wa nga" yham sang pho" nho: jhin qhid' mae" nga" yauggai zo: shid' yaug re jeim khyo" jhui" yu: pye' nae" joe" li" ava"- ga: ta" ra".
2Elisha wa- ni" qhid' mae" ngo pe" kad' byid: nae" i? Nao yham mae pe" qo" i? Ngo re ta" kyo: la,- ga: myid' ra". Yao: wa zhanlun xau yae angai dayae: mae" je yang: gatau pe" re: maqo"- ga: ta" ra".
3Elisha wa ni" yham kyo: cao: jhao" ye: mung: nao qo" boe" qhi" yae akeim jham ye ngho: wa,- 4Ai: thao re nao we' ni" yauggai zo: tao wa yham khug khyo vao lo" mung: kham: pyid' pye' yang: yae: jham mae xau vhe' ke' ge,- byang" we' ayae mae to: wa,- ga: ta" ra".
5Aimung: myiqe: myhi" wa yao" yauggai zo: tao we' daga" yham khug khyo vao lo" mung: kham: pyid' pye' yang: zhanlun xau yae: angai re yu: yu mung: yao" yauggai zo: tao yu byid' ra" yae: jham mae xau vhe' ke' ra". 6Yao: maho' yae: alhab' re bin: ke' gelao" yao: wa yae gatau jo, shi" i? ga: myid' ra". Yao" yauggai zo: dayaug wa ai: lam wa lo" thao" ngad va"- ga: tau" ra". Ailao" zhanlun xau yug: ru thang: lo" byaug: ra". 7Yao: wa lapa Elisha jhao" dam: ye" ra". Ai: lapa pho" wa yao: re- zhanlun xau jham re aung: mung: ni" jhin alhab' re xe' pye' wa,- nao we' ni" yauggai zo: tao: qhid' mae" kao so' khau nae" ngaui laug sho' dang: li" nae"- ga: ta" ra".
Elisha We' Shunem Mae" Jo,nho" Qo" Ra" Myiqe: Myhi"
8Daba na mae Elisha wa Shunem khyo ye" ra". Aimae jo,nho" qo" ra" myiqe: dayaug na: ra". Yao: wa Elisha re zo damyo: khai zho" ra". Ai: ba na mae" Shunem khyo yao: ye: khao: ngo" Elisha wa ai: myiqe: myhi" yham mae zo zo" ra". 9Yao: wa yao" yham sang pho" re- ce: khyo khyao za: lhaung" li" ra" byu ceyaug wa gyang" lho" ra" byu dayaug ngad: rure ngo ba:- 10Khaung dao mae qe, ngai daqe, kad' mung: yab jaung:- saboe"- tao" khau"- myikaug' jham nyhang" byid: lang: yao: ngonhaung" jhao" lae" li" khao: ngo" aimae yao: qo" thang: na nae" ngad: ra"- ga: ta" ra".
11Daba na mae Elisha wa Shunem khyo tug' lo mung: myaung: lo" ngho" na nae" yao" qe, khyo do, lo" ra". 12Yao: wa yao" daui daui yaug Gehazi re ai: myiqe: re yekhai nhao: ke' ra". Yao: joe" lo lao"- 13Elisha wa Gehazi re- yao: nga" shid' yaug qo ca" ru qhid' mae" yao" yang bao" thaug' byid' ru alhab' qhid' mae" ngo wa yao" qhid' mae" pe" qo" kad' byid nae" rure yao: re myid: wa,- yao: ngore kho:kham pho" jhao"- mangad: lao"- gye zug: pho" jhao" ngore dao: yejhau byid: nhao nug: laug -ga: ta" ra". Yao: wa ngore cemae ngoyao" byu qe: phaung mae na: jo, qo: ra" ga: tau" ra".
14Elisha wa Gehazi re aire- ngo wa yao" qhid' mae" pe" qo" kad' byid: nae" i? ga: myid' ra". Yao: wa gai va"- yao wa yauggai zo: maqo" ngad: ra".
Yao" yham sang pho" wa mao: zo: ngad: ra"- ga: tau" ra".
15Elisha wa yao: re cekhyo khai: lo ri:- ga: amyin" byid' ra". Ai: myiqe: wa joe" vao lo mung: kham: zang mae ye; jo; ra". 16Ailao"- Elisha wa yao: re- sao nhag' ce yo, mae ni" lo, mae yauggai zo: vo; ci:na: li" nae"- ga: ta" ra". Yao: wa o"- nhag' bo we"- jeju khyo" ngore damhug' la,- nao wa Mao"So: byu dayaug ngad: ra"- ga: ta" ra".
17Ngadqere: Elisha ta" to" ru we' dakhyo: thao: zin ai: ayo, ko mae yao: wa yauggai zo: dayaug khau: ra".
18Ai: thao mataung" myao" re- gaug yad yo, daba: ne, kao mae yauggai nau" wa gaug yad mo, we' daga" yo mae na: ra" yao: pho" jhao" yeqhug' nae" ye" lo" ra". 19Yao: wa nyag din taung" yao: pho" re- nga" au: no: ra"- nga" au: no: ra" ga: gyi: ngug: ra".
Yao: pho" wa daui daui yaug re ai: yauggai nau" re yao: myhi" jhao" vo; lo" wa,- ga: ta" ra".
20Daui daui yaug wa yauggai nau" re yao: myhi" jhao" vo; lo" ra". Yao: myhi" wa yao: re ba khaung tau sho' yao" tao: kheim" mae vo; ci: ra". Ai: au: re shid: lo" byaug: ra". 21Yao: wa yauggai nau" re Elisha nho: qe, khyo vo; do, lo" mung: yab jaung: dao mae lo" lhang" to: yang: to: co' mung: kham: lhang: pyid' ra". 22Ai: thao yao: wa yao" yham sang pho" re khai: yu mung: yao: re daui daui okaung dayaug cekhyo lo ze we' nhao: ke' byid: la,- ngo lapa Elisha jhao" ye: ca" ra". Gai: boe" qhi" phyad yang: dam: tug' lo nae"- ga: ta" ra".
23Yao" yham sang pho" wa- nao pe"mung: ana" ba ye: ca" i? Dugno: Ba re: mangad:-lho" xin: poe re: mangad: ga: myid' ra".
Yao: wa- pe" maca" ga: tau" ra". 24Ai: thao yao: wa loze dao do; zaung mung: daui daui yaug re loze re qo" qao: ra" qhi" qao sho' kad' wa, ngo mata" ta" wa dayam" nhao- ga: amyin" byid' ra". 25Aimung: yao: to" lo" mung: Elisha na: ra" Khame bam khyo ye" lo" ra".
Elisha wa yao: li" na: rure va: mae" the' myao mung: yao" daui daui yaug Gehazi re- qu" wa,- Shunem myiqe: myhi" li" na: ra". 26Yham sang pho" we' yao" yauggai zo:- khoru: ngad: ko" rure phyad yequ" wa,- ga: ta" ra".
Yao: wa Gehazi re alhab' gai: ga: lham tau" ra". 27Ngadqere: yao: Elisha jhao" joe" vao li" lao"- yao" qhid' kheim: mae goe; gyo" mung: Elisha khyid mae zaui" ra" Gehazi wa yao: re deim" geim: pye' nae" seim" ra". Ngadqere: Elisha wa na: jo, vashao:- yao: nhag' lam gyai ngai: na: rure nao mamyao i? Asang wa ngore pe" daja: re: mata" to: ngad: ra"- ga: ta" ra".
28Myiqe: myhi" wa yao: re- nhag' bo we"- ngo nao re yauggai zo: mho' qu" i? Nga" myid: lao" khyo jham re makad' nae" ngo nao re mata" i? ga: ta" ra".
29Elisha wa Gehazi jhao" lhang mung:-phyad kad' wa,- nga" zaung: bao" re yu: ci mung: ye" lo" wa,- nao jho" qhug' ra" yaug we' au" nae" dathang nao re dayaug yaug au" ngad: re dao: phyid byid: nae" ayo, dayu- yham khyo din: za: ye: mung: nga" zaung: bao" re yauggai nau" dao mae yezaui" ci wa,- ga: ta" ra".
30Myiqe: myhi" wa Elisha re- ngo nao mae" mathug' lo" nae" ein:- ra" khyo re ngo jhaug' zaug: ra" daui: na: ra" Asang re we' nao re mang lao: yang: ngo jham tang" ra"- ga: ta" ra". Amung: yao: shid' yaug daga" za: dam: tug' lo: ako". 31Gehazi wa qhid' au: khyo ye" na mung: Elisha nho: zaung: bao" re zoshao: dao mae yezaui" ci ngadqere: pe" thoe re:- kao so' bo: ra" ave, pe" re: maboe" ngad: ra". Aimung: yao: wa Elisha jhao" tug' lo mung: yauggai nau" maso" li" ngad: ra"- ga: ta" ra".
32Elisha joe" lo lao"- yao: wa qe, khug khyo yao: za: vao ye" lo" re yauggai nau" wa yab jaung: dao mae shid: lang" jo; rure yemyao: ra". 33Yao: wa kham: pyid' pye' mung: Asang re akyu" mho' ra". 34Ai: thao yao: wa yauggai nau" dao mae gam" gyo" mung:- yao" nhad'- myo,jid' lo, re yauggai nau" nho: nhad'- myo, jid' lo, dao mae to" ra". Yao: ai: yauggai nau" dao mae goe; jo; au: yauggai nau" nho: gaung wa lam: li" ra". 35Elisha to" li" mung: qe, mae su" lhau: ra". Ai: thao dam: lo" mung: yauggai nau" dao mae dam: lo" gam" nghoe' ke' ra". Yauggai nau" wa nhad' lhang hag co" co" mung: yao" myo, re phung" ke' ra". 36Elisha wa Gehazi re khai: yu mung: yauggai nau" yao: myhi" re lo" khai: yu nae" yao: re ta" ke' ra". Yao: joe" vao li" lao"- Elisha wa yao: re ni" yauggai zo: cemae ngad: ra"- ga: lham: ta" ra". 37Yao: wa Elisha nho: khyid mae yao" myo,khung: myid gaung mae tin: sho' goe; gyo" ra". Ai: thao yao: wa yao" yauggai zo: re jhui" yu yang: thug' lo" ra".
Mug' Pho: Ve, Lho Gatau Shid' Ja:
38Dalhang mae- mung"dan: geim" mae jao: sho' bao" khug' khug' au: Elisha wa Gilga khyo tug' lo: ra". Yao: wa lapa daphung: re mho" shid' na: au: yao: wa yao" daui daui yaug re myikhyeim" dao mae ug' qi: dakhye' lhung" to: mung: ai: bam: qhid' mae" xeim: qang: kyug' byid: nae" ta" ra". 39Yao: bam mae" dayaug wa pa: din" khyo ao: pho' qho ye" lo" ra". Yao: wa naui lae" re yemyao mung: qo" vo; ra" nho" am shi: jham re phyo' vo; lo: mung: po: po: yad: yang: zoxeim: ug' mae ke' ra". Yao: wa ai pe" ngad: rure maba ngad: ra". 40Ai: xeim: kyug' qang: re ai: byu qe zo: nae" khau: byid' ra". Yao: bam zo" ke' we' yao: bam wa Elisha re- ce wa daug ngad: ra" magai: zo: ga: ta" ako". 41Elisha wa zo:ve dajhid' re mho' mung:- ug' khug khyo pye' zaui: ke' ra". Amung: yao: bam re xeim: qang: dam: khau: byid: ge,- ga: ta" ra". Ai: thao re wa pe" maca" lo:ngad: ra".
42Gatau dalhang mae byu dayaug wa Baal Shalisha mae" ai: zin mae" bale gaug sag' yang kad' ra" mug shid' xe khai" we'- gaug sag' dajhid' Elisha re vin: li" byid' ra". Elisha wa yao" daui daui yaug re aire lapa phung: mae" mo, re zho: nae"- ga: ta" ra". 43Ngadqere: yao: wa byu dayo yaug: qhid' mae" ceru laug nae" ein: nao jho: i? ga: tau" ra". Elisha wa airu yao: bam re byid: zho: wa,- pe"mung:ga"re yao: bam zo: mung: daqhae: lao" re dang shinae"- ga: Asang ta" ra" ga: phaug' tau" ra". 44Aimung: daui daui yaug wa yao: bam re zo:ve jaung byid: mung: Asang ta" ru we' dakhyo:- yao: bam alhab' mo, zo: mung: daqhae: dang: ashi".
Currently Selected:
2 KHO:KHAM 4: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
