2 KHO:KHAM 3
3
Israel Byu Qe We' Moba Byu Qe: Agyo: Mae" Gye Khe' Poe
1Yuda kho:kham Yehoshaphad eib: ru daxe: she' zin ein: zin mae Ahab nho: yauggai zo: Yoram wa Israel kho:kham boe" lo: ra". Yao: wa Samari mae daxe: shid' zin eib: na: ra". 2Yao: wa Mao"So re qobo shad' lhoe" ra". Ngadqere: yao: wa yao: pho" we' yao: myhi" Yezebe qhi" maxo ngad: ra". Yao: wa Bala re caung:pa" nae" yao: pho" yang kad' to" ra" khyao dau alho jham re lao" phan" khyang: pye' ra". 3Ngadqere: yao" qhid' mae kho:kham kad' ra" Nebad nho: yauggai zo: kho:kham Yeroboam we' dakhyo: Israel byu qere qobo shad' lhoe" nhao mung: mathang: pye' ngad: ra".
4Moba kho:kham Mesha wa yao khau yaug ngad: ra". Amung: Israel kho:kham re khang: khyo" zin khao: ngo" yao nau" 100,000 dau:- yao 100,000 dau: mae" yao mug' jham re byid' ra". 5Ngadqere: Israel kho:kham Ahab shid lao"- Mesha wa Israel byu qere tau: lhan" ra". 6Ajao" kho:kham Yoram wa Samari mae" to" mung: yao" gyetab alhab' re zhang" yu: ra". 7Yao: wa Yuda kho:kham Yehoshaphad re Moba kho:kham wa ngore gye kad' tau: lhan" ra" yao: re gyekhe' rumae nao bo nae" i? ga: lagyo: ke' yang: dao: pyang: ke' ra".
Yehoshaphad wa ngo bobo nae"- ngo wa nao jaung: ra" khyo" ngad: nga" byu qe we' nga" myao: jham re: nao jaung: ra" khyo" ngad:- 8Khoshad' khyo" gye zin: nae" i? ga: tau" ra". Yoram wa Edom din" pyad yo khyo" lai: phyid' lo" ra" khyo qhang gau: khyo" ye: nae" ngad:- ga: tau" ra".
9Amung: kho:kham Yoram we' Yuda we' Edom kho:kham bam to" lo" ako"- nhad' ba su" ye: thao yao: bam qid gan: byaug mung: byu qe: qhid' mae" re: qo vin: ra" gug'nyhug' jham: qhid' mae" re: pe" mashaug' loko" ngad: ra". 10Kho:kham Yoram wa- aga" Asang wa ngonhaung" sam yaug re Moba kho:kham lo, mae ke' byid: vanhaung- ga: ta" ra".
11Kho:kham Yehoshaphad wa Asang re yao: khyo" yang dao: qo" myid: nae" lapa dayaug re: mana i? ga: myid' ra". Kho:kham Yoram nho: gyetab mae" gyezug: dayaug wa- Shaphad nho: yauggai zo: Elisha cemae na: ra" yao: wa Elia nho: bao" thaug' yaug ngad: ra"- ga: tau" ako".
12Yehoshaphad wa- yao: wa dangman" ra" lapa ngad: ra"- ga: ta" ra". Aimung: kho:kham sam yaug wa Elisha jhao" ye" ako".
13Elisha wa Israel kho:kham re- ngo wa nao re pe"mung: bao" nae" i? Ni" pho" we' ni" myhi" shid' tao dao: lhaung" myid: ko" ra" ai: lapa qejhao" dao: ye myid: wa,- ga: ta" ra". Yoram wa- mangad: ngonhaung" kho:kham sam yaug re Moba kho:kham lo, khyo ke' byid: yaug wa Asang ngad: ra" ga: phaug' ta" ra".
14Elisha wa- ngo wa ni" ba nam Yuda kho:kham Yehoshaphad re maphug' myao: yang: ngad: re ngo caung da" byid: yang daui na: ra" Asang: mang re lao: yang: nao we' pe" majho" sin: nae" ein: ngo jham tang: zai ngad:- 15Ana" ngore tang: be; yaug khai byid: la,- ga: ta" ra".
Tang: be; nghaui" yaug yao" be, tang: re be; na: au: Asang: qam: so' wa Elisha dao mae joe" li" ra". 16Amung: yao: wa- Asang ceru: ta" ra"- ce: qid kin" jo; ra" qid zo: gyaung: mae qid khyo: jham cao" dau: ge,. 17Naonhaung" wa mug: qu: ru we' la re mamyao gesho' ngadqere: ce: qid zo: gyaung: wa qid byang" jo; li" nae". Naonhaung"- naonhaung" gug'nyhug' naonhaung" nho: qo vin gug'nyhug' jham magan: mago" qhug' shaug' li" genae"- ga: ra". 18Elisha wa xo' mung: Asang: qhid' mae" ce wa gyai laui: ra" mau" ngad: ra". Yao: wa naonhaung" re Moba byu re aung doe; rure re: byid' li" nae". 19Naonhaung" wa yao: bam nho: yaung" shab: ra" gyetab vogaung: jham alhab' re aung: pye' li" genae". Naonhaung" wa yao: bam: shi: gae jham re thau: khyang: pye' mung: yao: bam: qid thug' jham re tam" pye' yang: yao: bam: myid xau gai: ra" yo jham alhab' re laug baui jham: yang bam" pye' li" genae"- ga: ta" ra".
20Thao: ba ne, kao- ne, seim ngaui" xeim: ngaui" byid' ra" ayo, mae qid wa Edom shad' khyomae" yug: lo mung: myid gaung re yug: nghoe' pye' ra".
21Moba byu qe wa ai: kho:kham sam yaug yao: bam re gye li" zin: nae" joe" vako" ra" khyo re the' gyo: gelao"- apyad qi" thao" rumae" ngai: thao" ra" yauggai qemae" shae lhae qo" ci mo, alhab' re khai: zhang" yu mung: mug: kyo: mae na: jo; ako". 22Thao: ba ne, kao yao: bam to" li" ko" re- ba wa qid dao mae zho: jo, mung: sa: ru" ru ngad: jo; ra". 23Yao: bam wa sa: wo"- ga: ta" ako". Ai kho:kham sam yaug wa yao: cao: jho" zin: gemung: jho" se' pye' ru ngad nae"-yao: bam: jamu jham khyo ye: mung: lanyab yeyu gelang:- ga: ta" ako".
24Ngadqere: yao: bam jamu khyo joe" ye: gelao"- Israel byu qe wa yao: bam re lham: khe' zin: mung: lham: khe' tug' ke' ako". Israel byu qe wa cao" khe' mung: Moba byu qere se' pye' ako". 25Amung: yao: bam: vogaung: jham re phyo' qheim" pye' ako". Yao: bam ai: myid xau gai: ra" yothaung: pa: khyo" lai: lo" ko" au: Israel byu yaug khao: ngo" wa ai: yothaung: jham alhab' mae laug baui byang" li" sho' pye' zaui: ako". Yao: bam wa qid thug' jham rere: jhid' pye' mung: shigae jham re thau: khyang: pye' ako". Lo" thao" mae vomo" Kira Heresa za: adang: lo" ra". Laug lhaui: lhaui: mo, wa aire vang" to: mung: khe' zin" ako".
26Moba kho:kham wa gye poe seim" va" rure beim: lao"- yao: wa shae ci sulhe: nhad' yo yaug re yao: we' daga" jhui" yu mung: gyevo qe: phaung gaung: khyo" Suri kho:kham jhao" phao: loe; nae" seim" ra" ngadqere: yao: seim" pye' ra". 27Amung: yao: wa yao" khu mae kho:kham xo' kad' nae" yaug yao" zoqhid' yauggai zo: re Moba re ngaui" byid' ra" xeim: khyo" vang dao mae ngaui" byid' ra". Israel byu qe wa gyaug: din: pye' ako". Aimung: yao: bam ai: vogaung: mae" zad' phao mung: yao: bam yao" mung" khyo tug' lo" ako".
Currently Selected:
2 KHO:KHAM 3: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
