रोमी इःगीइ ङोःसी
इःगीइ ङोःसी
दी इःगी पावलगीइ रोमला एःक्योक कोःम्साइ मीःक्याला प्रुःदी एःके। ओः तीःजीला कोःम्साला खुङक्या ङीमु फ्रेती खुङक्या ङीमु चीङ ङीःमाथुप लेःगा पेःमीःजीक खुङक्यालाःम्ले चीङ डेबाक्या लेःङ्दी स्पेनछ्योले डोजे सेम पेःदी एःके। दी इःगी प्रभुला सेमल्हुक लुगेन मीःक्याइ लुक्योक सेमल्हुककीइ बारेला ओःले खुङक्याइ मीःजीला ङीःमारी टाःङ्मा कोःकेन तामक्याइ बारेला लाःचेला खुङगीइ प्रुःदी एःके। दी इःगीला पावलगीइ लोप्केन तामगीइ छ्योम्बो लेःन ज्योर्कुए।
पावलगीइ रोमगीइ कोःम्साइ मीःक्याला टासीदेले लाःतेरा खुङगीइ खुङक्याइ लागी तेन्दुरा प्रार्थना पेःउए लाःकेन ताम लाःकुए। ओः तीङ्ला खुङगीइ दी इःगीइ छ्योम्बो तामगीइ बारेला लाःकाला स्युःउए– “कोन्ज्योइ उःक्याला खुङगीइ तोःङ्ला काःन्डुले ताःक्पा जोउबा लाःकेन ताम याःबु लेःङ्गोइ तेङ्तेर्कुए। ओःले खुङगीइ तोःङ्ला ताःक्पा ओःङेन ताम सेमल्हुक लुदी चीग्रा ओःङ्गुए” (१:१७)।
ओः तीङ्ला पावलगीइ दीखोइ बारेला एःन्डुले लाःकुए– यहुदी एःनाङ ओःले राःङ्सा क्युःपाइ मीःक्या एःनाङ थाम्जेर मीःक्या कोन्ज्योइ तोःङ्ला ताःक्पा ओःङ्कोःउए चीलेलाःना लाःयोइ आङ्ज्या वाःला थाम्जेर मीःक्या ओःन्डुबा ओःन्डुबारा एः। ओःले राःङ कोन्ज्योइ तोःङ्ला ताःक्पा ओःङ्जेला येशु ख्रीष्टला सेमल्हुक लुकोःउए। ओः तीङ्ला कोन्ज्यो ङीमु एःक्योक सेम्बा सम्बन्धलाःम्ले ओःङेन येशु ख्रीष्टला एःक्योक सेम्बा मीःजीइ बारेला लाःती एः। सेमल्हुक लुगेनक्याइ कोन्ज्यो ङीमु शान्ती ज्योर्कुए ओःले खुङक्याला कोन्ज्योइ लाइ लाःयो रा सीबुइ आङ्ज्यालाःम्ले खाफ्याच्युउए। अध्याय ङा मीःजीक अध्याय केःथुप सेमल्हुक लुगेनक्याइ मीःजीला कोन्ज्योइ छ्येइ ठीम ओःले खुङगीइ लाइ ल्हेइ लेःगा ची इःम्बा, ओः तामक्याइ बारेला टेः पेःदी एः। ओः तीङ्ला कोन्ज्योइ मीःइ क्युःपाइ लागी जोक्योक तेःदाम नाःङ्ला यहुदीक्या ओःले राःङ्सा क्युःपाइ मीःक्या काःन्डुले ओःङ्जे खुउए लाःकेन दी तामगीइ लेःन तेर्चे छोल्दी एः। पावलगीइ ओःखोइ लेःन एःन्डु लाःती लाःकुए– यहुदीक्याइ येशुला चीले स्वीकार माःबे, ओःखोइदीङ कारण एः। ओःखोदी थाम्जेर मीः क्युःपाला येशु ख्रीष्टलाःम्ले कोन्ज्योइ नीङ च्योःज्युक लाःती पेःक्योक तेःदामगीइ बो चीग इःङे। ओःले यहुदीक्याइ येशुला तेन्दुरा स्वीकार माःबेबारा मेःतेकेन एः लाःती पावलगीइ सेमल्हुक लुउए। तीङ्ला पावलगीइ प्रभुला सेमल्हुक लुगेन मीःक्याइ सेन्कोःन मीःजी लाःक्योकदी राःङ्सा मीःक्या ङीमु काःन्डुले च्याःम्बु पेःदी तेःको लाःती प्रुःउए। खुङगीइ एःन्डुबा तामक्याइ बारेला प्रुःउए– कोन्ज्योला मेःबा पेःजे, प्रभुला सेमल्हुक लुगेन मीःक्याइ देशकीइ लागी ओःले चीगकीइ राःङ्साइ लागी पेःकोःन लेःगा, ओःले नावाइ बारेला टीःउए। खुङगीइ राःङगीइ लेःङ्गोक्या ओःले कोन्ज्योला याःरला क्यागेन तामक्या प्रुःदी खुङगीइ इःगी सीःङ्गुए।
थीमी सुची
ङोःसी ओःले छ्योम्बो ताम १:१-१७
मीःक्या थार्चे कोःउए १:१८–३:२०
थार्चेइ लागी कोन्ज्योइ तेःदाम ३:२१–४:२५
ख्रीष्टला सेम्बा मीःली ५:१–८:३९
कोन्ज्योइ तेःदाम नाःङ्ला यहुदीक्या ९:१–११:३६
ख्रीष्टला सेमल्हुक लुगेन मीःक्याइ डोलुङ तेःलुङ १२:१–१५:१३
सीःङ्क्योक ओःले राःङगीइ टासीदेले १५:१४–१६:२७
Currently Selected:
रोमी इःगीइ ङोःसी: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.