रोमी 1
1
1दी इःगी ङाः पावलगीइ प्रुःदेरा एः। ङाः येशु ख्रीष्टकीइ लाबु इःङे। कोन्ज्योइरा ङाःला प्रेरीत ओःङ्जेला केक्याःप्सी ओःले खुङगीइ याःबु लेःङ्गो लाःचेला दाम्सी। 2ओःखोरा याःबु लेःङ्गोइ बारेला कोन्ज्योइ माःङ्बुरा लोः तोःङ्ला राःङगीइ लेःङ्गो तेर्केनलाःम्ले चाङ्मा छ्येइ पेज्याला ताःम्ज्या पेःदी एःके।
3ओःखो याःबु लेःङ्गोदी कोन्ज्योइ पुः येशु ख्रीष्टकीइ बारेला इःङे। ओःले खुङ मीःइ मीःजी लेःङ्दी क्याःल्बु दाऊदकीइ रीःबालाःम्ले केसी। 4उःइ प्रभु येशु ख्रीष्टदी कोन्ज्योइ ल्हे एःक्योक पुः इःङे लाःकेन ताम चाङ्मा लाइ खुङला सीक्योकलाःम्ले सोम्बो लोदी तेङ्तेर्ती एः। 5खुङगीइरा ङीःला नीङ च्योःदी प्रेरीत जोसी। थाम्जेर राःङ्सा क्युःपाइ मीःक्याइ सेमल्हुक लुदी ओःले खुङगीइ लाःक्योक ताम ङीःन्दी खुङला सेःसा पेःज्युक लाःती दी याःबु लेःङ्गो लाःकेन लेःगा तेर्सी। 6ख्याक्यालाङ ओः राःङ्सा क्युःपाइ मीःक्या ङीमुरा येशु ख्रीष्टकीइ मीःक्या ओःङ्जेला केक्याःप्ती एः।
7कोन्ज्योइ च्याःम्बु पेःक्योक ओःले खुङगीइ मीःक्या ओःङ्जेला केक्याःप्क्योक ख्याक्या रोमला एःक्योक थाम्जेरला ङाः दी इःगी प्रुःदेरा एः। उःइ आबा कोन्ज्यो ओःले प्रभु येशु ख्रीष्टकीइ ख्याक्या थाम्जेरला अनुग्रह ओःले खाम्साङ्बु तेर्च्युक।
पावल रोम क्याःसाला डोजे सेम पेःक्योक
8थाम्जेर भन्दा तोःङ्ला ङाः ख्याक्या थाम्जेरकीइ लागी येशु ख्रीष्टलाःम्ले उःइ कोन्ज्योला थुजीछे फुल्गे, चीलेलाःना जाम्बुलीङगीइ थाम्जेरछ्योइ मीःक्याइ ख्याक्याइ ख्रीष्टला लुक्योक सेमल्हुककीइ बारेला कोःसीःङ्दी एः। 9ङाः कोन्ज्योइ पुःइ बारेला याःबु लेःङ्गो लाःतेरा कोन्ज्योला ङाःइ लालाःम्ले मेःबा पेःउए। ओःले ङाःइ प्रार्थनाला ख्याक्याला तेन्दुरा टेःम्बा साल्तेःती एः लाःकेन ताम कोन्ज्योरा सेदी एः। 10कोन्ज्योला सेम एः लाःना तीङ्स्योला एःनाङ ङाः ख्याक्या साःला ओःङ्जे खुज्युक लाःती ङाः कोन्ज्यो ङीमु प्रार्थना पेःदेरा एः। 11चीलेलाःना ख्याक्याइ सेमल्हुक राःम्बु जोजेला मीःलीइ मोलाम तेर्का लाःती ङाः ख्याक्या ङीमु फ्रेचेला माःङ्बुरा सेम एः। 12एःन्डुले ङाःइ सेमल्हुककीइ ख्याक्याला ओःले ख्याक्याइ सेमल्हुककीइ ङाःला सेमस्युक तेर्चे खुज्युक लाःकेन ङाःइ सेम इःङे।
13आतानोःक्या ओःले आजीनोःमोक्या, ङाः ख्याक्या साःला माःङ्बुरा खेप ओःङेन सेम पेःदी एःके लाःकेन ताम ख्याक्याइ छोर्च्युक, इःनाङ ची ची लेःगाइ पेःगासुना ङाः ओःङ्जे ज्योर्ती म्याः। ङाःइ राःङ्सा ठाउँक्यालाङ राःङ्सा क्युःपाइ मीःक्याला ख्रीष्टला ख्योङ्क्योक च्योःङ्रारा ख्याक्याइ ठाउँलाङ मीःक्याला ख्रीष्टला ख्योङ्जे खुगा लाःकेन ङाःइ सेम इःङे। 14चीलेलाःना ग्रीक मीःक्या एःनाङ एःच्युक, ओःले रीःइ मीःक्या एःनाङ एःच्युक, नावा साल्बु एःनाङ एःच्युक, ओःले आक्याक्पा एःनाङ एःच्युक, ङाःइ थाम्जेर राःङ्सा क्युःपाइ मीःक्याला याःबु लेःङ्गो लाःराकोःउए। 15ओः सोङ्गारा, ख्याक्या रोम क्याःसाला तेःकेनक्यालाङ याःबु लेःङ्गो लाःचेला ङाःला माःङ्बुरा सेम एः।
याःबु लेःङ्गोइ ल्हे
16चीलेलाःना याःबु लेःङ्गो लाःचेला ङाः ङोःछा मेःबे। चीलेलाःना सेमल्हुक लुगेन थाम्जेर मीःक्याइ तेःन्दाला दी याःबु लेःङ्गोला कोन्ज्योइ थार्च्युगेन ल्हे एः। दी लेःङ्गो थाम्जेरले तोःङ्ला कोःजे ज्योर्केन्दी ङीः यहुदीक्या एःके, ओःले ताःसे ख्याक्या राःङ्सा क्युःपाइ मीःक्याइयाङ कोःजे ज्योर्ती एः। 17चीलेलाःना कोन्ज्योइ उःक्याला खुङगीइ तोःङ्ला काःन्डुले ताःक्पा जोउबा लाःकेन ताम याःबु लेःङ्गोइ तेङ्तेर्कुए। ओःले खुङगीइ तोःङ्ला ताःक्पा ओःङेन ताम सेमल्हुक लुदी चीग्रा ओःङ्गुए। छ्येइ पेज्याला एःन्डुले प्रुःदी एः, “ताःक्पा मीःक्या खुङक्याइ सेमल्हुकलाःम्लेरा सेन्ङेन एः।”#हबकुक २:४
माःरीक्पा पेःगेन मीःक्याखाला कोन्ज्योइ सीःताङ
18कोन्ज्योइ नाःम्खालीङलाःम्ले राःङगीइ सीःताङ मीःक्याइ पेःक्योक तीःक्पाक्या ओःले माःरीक्पा लेःगाक्याइ वीरुद्धला लेप्क्योक थोङ्दी एः। खुङक्याइ पेःक्योक माःरीक्पा लेःगाक्याइ पेःगासुना, राःङ्सा मीःक्याइ कोन्ज्योइ बारेला तेःन्दाम ताम सेजे ज्योर्ती म्याः। 19कोन्ज्योइ बारेला सेकोःन तामक्या खुङक्याइ साङ्बुले सेदी एः, चीलेलाःना खुङ राःङगीइरा खुङक्याला ओः तामक्या साङ्बुले तेङ्तेर्ती एः। 20जाम्बुलीङ जोगासुना मीःजीकरा खुङगीइ जोक्योक स्याःक्यालाःम्ले मीःक्याइ कोन्ज्योला ङोःसेजे खुउए। कोन्ज्योइ ल्हे ओःले खुङ काःन्डुबा एः लाःकेन मेःथोङेन तामक्या खुङक्याइ याःबुले सेजे खुउए। ओः सोङ्गारा, खुङक्याइ कोन्ज्योला ङोःमेसेए लाःती बहाना पेःजे मीःखुगेन एः। 21चीलेलाःना खुङक्याइ कोन्ज्योला ङोःसेदीङ कोन्ज्योला पेःकोन सेःसा माःबे, ओःले थुजीछेङ माःफुल। बरु खुङक्याइ राःङगीइ ठीवाक्या लेःगारा म्याःक्योक काःल्सी ओःले खुङक्याइ आक्याक्पा सेमक्या ताःरुङ नाक्जुक काःङ्सी। 22खुङक्याइ राःङगीइ राःङला नावा साल्बु लाःती लाःनाङ इःनाङ खुङक्या आक्याक्पा काःल्दी एः। 23खुङक्याइ तेन्दुरा सोम्बो एःकेन कोन्ज्योला छ्याक छाल्जेइ पोःर्ती सीदी डोगेन मीःक्या, च्याःज्युङ्माक्या, पशुक्या, ओःले साला टोःपा टीःती डोगेन उइ क्युःपाक्याइ कुक्या जोदी ओःक्याला छ्याक छाल्सी।
24ओः सोङ्गारा, कोन्ज्योइ खुङक्याला खुङक्याइ राःङगीइ सेम पेःक्योक च्योःङ्रारा माचाङ्क्योक लेःगाक्या पेःदी तेःचेला पोःर्तेर्सी, ओःले खुङक्याइ चीगकीइ राःङ्सा ङीमु जुबुला ङोःछाबु लेःगाक्या पेःसी। 25खुङक्याइ कोन्ज्योइ बारेइ तेःन्दाम तामला सेमल्हुक लुजे पोःर्ती तेःन्दाम म्याःक्योक तामक्याला सेमल्हुक लुगाला स्युःसी। खुङक्याइ थाम्जेर स्याःक्या जोगेन्दी ओःले तेन्दुरा सेःसा ज्योर्कोःन कोन्ज्योला छ्याक छाल्जे पोःर्ती खुङगीइ जोक्योक स्याःक्याला छ्याक छाल्सी ओःले मेःबा पेःसी। आमेन।
26ओः सोङ्गारा, कोन्ज्योइ खुङक्याला खुङक्याइ राःङगीइ सेम पेःक्योक च्योःङ्रारा माचाङ्क्योक लेःगाक्या पेःदी तेःचेला पोःर्तेर्सी। खुङक्याइ पेःन्पीःजाक्या राःङगीइ ख्योबो ङीमु ङ्याःल्जे पोःर्ती पेःन्पीःजा पेःन्पीःजाइ कील्ला क्युक टोःजे च्योःङ्रा लेःगाक्या पेःसी। 27ओःले ओःन्डुरा पेःदी खुङक्याइ ख्योबोक्याङ राःङगीइ छ्युङ्मा ङीमु ङ्याःल्जे पोःर्ती राःङ्सा ख्य्वा पीःजाक्याछ्योले सेम छीदी चीगकीइ राःङ्सा ङीमु क्युक टोःजे च्योःङ्रा लेःगाक्या पेःगाला स्युःसी। एःन्डुले खुङक्याइ राःङगीइ जुबुइ पेःक्योक लेःगा अनुसारकीइ दण्ड ज्योर्सी।
28एःन्डुले खुङक्याइ कोन्ज्योला सेःसा पेःजे माःङीःन्क्योक सोङ्गारा कोन्ज्योइ खुङक्याला पेःजे मेःयोङेन माःइबा लेःगाक्यारा पेःज्युक लाःती खुङक्याइ माःरीक्पा ठीवाक्यालारा पोःर्तेर्सी। 29ओः सोङ्गारा, खुङक्याइ थाम्जेर खालेइ माःइबा तामक्या चीग्रा ठीवा साल्गुए ओःले माःताक्पा तामक्याइ काःङ्दी एः। खुङक्याइ मीफामु पेःउए, राःङ्साला क्युक्ट्वा पेःउए, राःङ्साला मीसेर पेःउए, मीः सेकुए, ठुक्पा स्योर्कुए, स्योप क्युःर्कुए, राःङ्साइ सेम सुःक्याःप्च्युउए, राःङ्साइ ताम तुप्कुए, 30राःङ्साइ बारेला माःइबा ताम लाःतेरा डोउए, कोन्ज्योला क्युक्ट्वा पेःउए, सुलाङ सेःसा मेःबेए, खोक्नाक पेःगेन्दी, टोप्साक तेङेन्दी, माःरीक्पा तामक्या पेःगेन माःङ्बुरा लाःमक्या तेङ्गुए, आबा आमाइ लाःक्योक तामक्या चीङ मीःङीनए, 31आक्याक्पा च्योःङ्रा ओःङ्गुए, ताःम्ज्या पेःक्योक तामक्या मेःबेए, राःङ्साला च्याःम्बु मेःबेए ओःले राःङ्साला नीङ मेःच्योःए। 32एःन्डुबा लेःगा पेःगेन मीःक्या सीजेला डीक्पु ओःङ्गोए लाःती कोन्ज्योइ छ्येइ ठीम खुङक्याइ सेक्योक एःनाङ खुङक्याइ एःन्डुबा लेःगा पेःजे चीग्रा मीःङे, बरु एःन्डुबा लेःगा पेःजेला राःङ्सा मीःक्याला सेमस्युक तेर्कुए।
Currently Selected:
रोमी 1: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
