प्रेरीत 28
28
माल्टा टापुला
1एःन्डुले सेन्दी चाङ्बुइ सुःरला ओःङ्मीःजीक ओः टापुइ मीःन माल्टा दुबा लाःकेन ताम ङीःइ छोर्सी। 2ओःलाइ मीःक्या माःङ्बुरा डीक्पु दु। ओः तेःकासुना नाम क्याःप्ती ख्यारी काःल्क्योक सोङ्गारा खुङक्याइ मेः फुतेर्सी, ओःले ङीःक्या थाम्जेरला तोःङ्ज्याङ पेःसी। 3पावलगीइ फाङ्बाकाःङ सीङ रुःप जोदी ख्योङ्सी ओःले मेःला लुसी। मेःइ टोःम्बोइ पेःगासुना प्रुःल चीग थेङ्दी ओःङ्सी, ओःले खुङगीइ लाःक्पाला ठील टीःल्दी मुतेर्सी। 4ओःलाइ मीःक्याइ खुङगीइ लाःक्पाला प्रुःल ठील्क्योक थोङ्दी चीगकीइ राःङ्सा ङीमु एःन्डुबा ताम लाःकाला स्युःसी, “दीखो मीः पक्काङ मीःक्सेररा ओःङ्कोः। दीखो चाङ्बुलाःम्ले नी सेन्दी ओःङ्सी इःनाङ ठीम पेःगेन ल्हामुइ दीखोला सेन्जे मेतेर्केन एः।” 5इःनाङ पावलगीइ राःङगीइ लाःक्पा योङ्दी प्रुःलला मेःला लुतेर्सी, ओःले खुङला चीङ माःकाल। 6खुङक्याइ पावलगीइ लाःक्पा इःक्पु चीगला टाःङेन एः ओःले सीगेन एः लाःती तादी तेःसी। इःनाङ माःङ्बुरा बेर तीङ्लाङ खुङला चीङ माःकालमीःजीक खुङक्याला सेमला राःङ्सारा ठीवा चेसी ओःले एःन्डु लाःसी, “दीखो नी ल्हा का दुबा।”
7ओः ठाउँलाःम्ले ओः टापुइ छेस्यो पब्लीयसकीइ सीःङ थामालारा एःके। खुङगीइ ङीःक्याला राःङगीइ खीमला खेर्ती तोःङ्ज्याङ पेःसी ओःले ङीःमा सुमथुप ङीःक्या खुङगीइ खीमला डोम्बो चादी तेःसी। 8पब्लीयसकीइ आबाला छावा रा आउँगीइ नाःजाइ नेःपा काःल्दी एःके। ओः सोङ्गारा, पावल पब्लीयसकीइ आबाइ कोठाला काःल्सी ओःले प्रार्थना पेःदी राःङगीइ लाःक्पा नेःपाखाला ज्यामीःजीक खुङ टाःसी। 9एःन्डुबा काःल्मीःजीक ओः टापुला एःक्योक थाम्जेर नेःपाक्या पावल साःला ओःङ्सी ओःले खुङक्या थाम्जेर टाःसी। 10खुङक्याइ ङीःक्याला माःङ्बुरा केगाक्या तेर्सी, ओःले ङीःक्या जहाजला जागेन तीःजीला खुङक्याइ ङीःक्याला लाःमला कोःकेन क्युःक्या जहाजला लुतेर्सी।
माल्टालाःम्ले रोम
11दावा सुम तीङ्ला, ङीःक्या अलेक्जेड्रीयालाःम्ले जहाजला जासी। दी जहाज सेर्काला ओः टापुला एःके। जहाजकीइ तोःङ्गीइ बोला जाउँले ल्हाइ छेन्दा खोप्तीक्योक एःके। 12ङीःक्या सुराकुसाइ लाःकेन क्याःसाला लेप्सी ओःले ओःला ङीःमा सुम तेःसी। 13ङीःक्या ओःलाःम्ले काःल्सी ओःले रेगीयन क्याःसाला लेप्सी। ङार्तो च्योःङ्रा ल्होलाःम्ले ल्हाबा क्याःप्काला स्युःसी, ओःले नाङ च्योःङ्रा ङीःक्या पटीओलीला लेप्सी। 14ओःला ङीःक्याइ प्रभु येशुखाला सेमल्हुक लुगेन आतानोःक्याला फ्रेसी, ओःले खुङक्याइ ङीःक्याला ङीःमा तीःनथुप खुङक्या ङीमु तेःचेला वासी पेःसी। ङीःक्या खुङक्या ङीमु ङीःमा तीःनथुप तेःमीःजीक ङीःक्या रोम क्याःसाला ओःङ्सी। 15ङीःक्या रोमला ओःङ्क्योक प्रभुला सेमल्हुक लुगेन ओःलाइ आतानोःक्याइ छोर्सी ओःले खुङक्या ङीःक्याला फ्रेचेला अप्पीयसकीइ छोङ्साथुप ओःले पाटी-सुम लाःकेन ठाउँथुपला ओःङ्सी। पावलगीइ खुङक्याला थोङ्मीःजीक खुङगीइ कोन्ज्योला थुजीछे तेर्सी ओःले हौसला ज्योर्सी।
पावल रोम क्याःसाला
16ङीःक्या रोमला ओःङ्मीःजीक पावलला मेःन्दा चीग थेइ सुरक्षाला राःङगीइ कोठा लेःङ्दी तेःचे तेर्सी।
17ङीःमा सुम तीङ्ला पावलगीइ यहुदीक्याइ तोःङ्क्याःप्केन मीःक्याला केक्याःप्सी। खुङक्या जोम्मीःजीक पावलगीइ लाःसी, “आतानोःक्या, ङाःइ उःइ क्युःपा ओःले उःइ फाफामुमीःजीक ङीःन्दी ओःङ्क्योक रीमठीमगीइ वीरोधला चीङ मेःबेनाङ, यहुदी आतानोःक्याइ ङाःला यरुशलेमला जुम्सी ओःले रोमीक्याइ जीम्माला तेर्सी। 18रोमीक्याइ ङाःला छानबीन पेःमीःजीक खुङक्याइ ङाःला पोःर्तेर्चे सेम पेःसी चीलेलाःना खुङक्याइ ङाःला मृत्युदण्ड तेर्कोःन्दी चीङ माःताःक्पा माःफ्रे। 19ङाः ङीमु ङाःइ राःङगीइ क्युःपाइ मीःक्याइ वीरुद्धला माःताक्पा च्याःङेन चीङ ताम म्याःनाङ, यहुदीक्याइ वीरोध पेःमीःजीक ङाःइ कैसर साःला अपील पेःराकोःन काःल्सी। 20ओः सोङ्गारा, ङाःइ ख्या ङीमु फ्रेती ताम लाःचेला ख्याक्याला केक्याःप्क्योक इःङे। चीलेलाःना इस्राएलगीइ मीःक्याइ रेःवा पेःक्योक थार्च्युगेन्दी मीः ओःङ्सीःङ्दी एः लाःती ङाःइ सेमल्हुक लुक्योक सोङ्गारा ङाःला एःन्डुले च्याल्दाइ ताःम्क्योक इःङे।”
21खुङक्याइ पावलला लाःसी, “ङीःइ नी ख्याइ बारेला यहुदीयालाःम्ले चीङ इःगी ज्योर्ती म्याः ओःले सुङ आतानोःक्या ओःलाःम्ले ओःङ्दी ख्याइ बारेला चीङ माःइबा ताममाङ लाःतीङ म्याः। 22इःनाङ ख्याइ ठीवा साल्क्योक तामक्या ङीःला कोःजे सेम थेती एः चीलेलाःना ख्याइ छोबाइ वीरोधला काःनाथेते ताम लाःक्योकदी ङीःइ छोर्ती एः।”
23ओः तीङ्ला खुङक्याइ पावलगीइ ताम कोःजेला ङीःमा चीग ज्यासी। ओःले ओः ङीःमाला माःङ्बुरा यहुदीक्या जोम्दी पावल तेःकेन ठाउँला ओःङ्सी। पावलगीइ खुङक्याला ङामुमीःजीक कुःङ्मुथुप कोन्ज्योइ क्याःल्खापकीइ बारेला लोप्सी। खुङगीइ मोशाइ तेर्क्योक ठीमक्याइ तामक्या ओःले कोन्ज्योइ लेःङ्गो तेर्केनक्याइ प्रुःक्योक पेज्याक्याइ तामक्या लेःङ्दी येशुइ बारेला सेच्युगेन कोसीस पेःसी। 24मेःन्दा काःजेइदी खुङगीइ तामला सेमल्हुक लुसी, इःनाङ राःङ्साक्याइदी सेमल्हुक मालु। 25ओः सोङ्गारा, खुङक्या नाःङ्लारा खुङक्याइ ताम माःडीक। ओःले पावलगीइ खुङक्या डोजेतोःङ्ला एःन्डु लाःसी, “चाङ्मा लाइ कोन्ज्योइ लेःङ्गो तेर्केन यशैयालाःम्ले ख्याक्याइ फाफामुक्याला लाःक्योक ताम तेःन्दामरा डीक्पु एःके! चीलेलाःना खुङगीइ एःन्डुले लाःती एःके,
26‘दी मीःक्या साःला सुङ ओःले लोःप,
ख्याक्याइ कोःजे नी कोःउए, इःनाङ मेसेए,
ख्याक्याइ तजे नी तउए, इःनाङ मेःथोङ्ए।
27चीलेलाःना दीखो मीःक्याइ सेम ताःम्बु एः,
दीखुङक्याइ नाम्ज्यो थुक्पु काःल्दी एः
ओःले दीखुङक्याइ राःङगीइ मी चुम्दी एः!
मीःङे लाःना नी दीखुङक्याइ मीइ थोङ्जेके,
खुङक्याइ नाम्ज्योइ कोःजेके,
ओःले खुङक्याइ सेमगीइ सेजेके,
ओःले खुङक्याइ राःङगीइ सेम ङाःछ्योले लोजेके,
ओःले ङाः खुङक्याला टाःच्युजेके।’#यशैया ६:९-१०”
28ओःले पावलगीइ ताम सीःङ्च्युदेरा लाःसी, “ताः ख्योक्याइ दी ताम सेदो, कोन्ज्योइ थार्च्युगेन याःबु लेःङ्गो खुङगीइ राःङ्सा क्युःपाक्या साःला ताङ्दी एः ओःले खुङक्याइ याःबुले कोःगेन एः।” 29[पावलगीइ दी ताम लाःसीःङ्मीःजीक खुङक्या चीगकीइ राःङ्सा ङीमु वादवीवाद पेःदेरा काःल्सी।]#२८:२९ काःजे ग्रीक तामगीइ तोःङ्गीइ छ्येइ पेज्याक्याला दीखो पद २९ म्याः।
30लोः ङीथुप पावल ओः ठाउँला राःङगीइरा भाडाला लेङ्क्योक कोठाला तेःसी। ओःले खुङला फ्रेकाला ओःङेन थाम्जेर मीःक्याला खुङगीइ ओःला तोःङ्ज्याङ पेःउके। 31खुङगीइ जीबारा माःबेबा कोन्ज्योइ क्याःल्खापकीइ बारेला प्रचार पेःउके ओःले प्रभु येशु ख्रीष्टकीइ बारेला लोप्कुके। ओःले एःन्डुबा पेःजेलाःम्ले खुङला सुइयाङ मेकाके।
Currently Selected:
प्रेरीत 28: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
